Lesona 11
“Ona Fetalai Atu Lea O Ia Ia Te i Latou, I Mea e Tele I Faataoto”
-
O le a le uiga o le faataoto i le lulu saito? (Tagai Mataio 13:3–8, 18–23.) Aisea e te manatu ai o le faataoto o lo o faatatau tele i le eleele ae le o le lulu saito ma le saito?
-
O le a le valaaulia na tuuina mai e Iesu ina ua uma ona ia tuuina mai le faataoto i le lulu saito? (Tagai Mataio 13:9.) E te manatu o le a le uiga o le upu faalogo i lenei valaaulia? O le a le uiga o le vaai ae latou te le iloa po o le faalogo ae latou te le lagona? (Tagai Mataio 13:13–15.)
-
Na aoao mai e le Perofeta o Iosefa Samita o le faataoto i le sinapi ma le mea faafefete, o lo o faatatau lea i le Ekalesia a Iesu Keriso o le Au Paia o Aso e Gata Ai (Teachings of the Prophet Joseph Smith, sel. Joseph Fielding Smith [1976], 98–100). E faapefea ona e vaaia le faatupulaia o le galuega a le Atua e pei ona faamatalaina mai nei faataoto?
Fautuaga mo Talanoaga i Aiga
Aumai ni fasipepa laiti se 14. I luga o fasipepa taitasi ia tusia ai faaupuga nei, e faatatau i le faataoto i le saito ma le titania: (1) o le lulu saito, (2) o le Alii ma ana Aposetolo, (3) o le fatu lelei, (4) o tagata amiotonu o le Ekalesia, (5) o le eleele, (6) o le lalolagi, (7) o le titania, (8) o e amioleaga, (9) o fili, (10) o le tiapolo, (11) o le seleselega, (12) o le iuga o le lalolagi, (13) o le tagata selesele, ma le (14) o agelu. Ina ia talanoaina le faataoto i le saito ma le titania, ia faafefiloi fasi pepa. Tuu atu i tagata o le aiga latou te faavasegaina tagata, mea o lo o taua, ma galuega o lo o i le faataoto ma o latou uiga. Atonu e te manao e faitau le Mataio 13:24–30, 36–43 ma le Mataupu Faavae ma Feagaiga 86:1–7 a o e taitaiina lenei talanoaga.