Lesona 24
“O le Ola e Faavavau Foi Lenei”
-
O le a le misiona a le Agaga Paia? (Tagai Ioane 14:26; 15:26; 16:7–14.) E faapefea ona tatou iloa aafiaga a le Agaga Paia? (Tagai Kalatia 5:22–23; MFF 6:15, 23; 11:13.) E faapefea ona fesoasoani le mauaina o le meaalofa a le Agaga Paia ia te oe?
-
Na fetalai atu Iesu i ana Aposetolo, “E maua foi e outou le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33). E faapefea ona fesoasoani le malamalama e uiga i le manumalo o Iesu i le lalolagi ia i tatou, e faalototeteleina ai i tatou pe a tatou feagai ma puapuaga? Aisea e taua ai le loto tele?
-
I lana tatalo, sa faapea mai le Faaola, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai o Iesu Keriso lea” (Ioane 17:3). O le a le eseesega o le iloa o le Tama Faalelagi ma Iesu Keriso ma le malamalama e uiga ia te i laua? E faapefea ona tatou iloa i laua?
Fautuaga mo Talanoaga i Aiga
I se pusa, ia tuu i ai se fasipepa ua tusia ai upu nei Meaalofa a le Agaga Paia. I se pusa lona lua, tuu i ai se fasipepa ua tusia ai le Ola e Faavavau. Ia afifi pusa nei e pei o ni meaalofa. Faamatala atu o le Ioane 16–17, o lo o taua ai e Iesu meaalofa silisili e lua tatou te mauaina. Tuu atu i se tagata o le aiga e tatalaina le pusa muamua ma faitau mai le fasipepa o lo o i ai i totonu. Faitau le Ioane 16:13, ma faamatala atu i le fuaiupu lenei o le “Agaga o le upu moni” o lo o faatatau i le Agaga Paia. Tuu atu i se isi tagata o le aiga e tatalaina le pusa lona lua ma faitau mai le fasipepa o lo o i totonu. Faitau le Ioane 17:1–3. Tuuina atu lau faafetai mo le meaalofa a le Agaga Paia ma le avanoa e maua ai le ola e faavavau.