Mga Tabang alang sa Magtutudlo

Human magpakita ang nabanhaw nga Ginoo ngadto sa iyang mga Apostoles, siya mipakita pag-usab ngadto sa mga pundok nga didto sa may Dagat sa Galilea. Samtang siya didto uban kanila, siya nangutana kang Pedro og usa ka pangutana sa makatulo ka higayon: “Naghigugma ba ikaw kanako?” Sa matag higayon si Pedro mitubag, “Ikaw nahibalo nga ako naghigugma kanimo.” Diha sa gipanulti ni Pedro ang Dios mitubag: “Pakan-a ang akong mga karnero…. Pakan-a ang akong mga karnero…. Pakan-a ang akong mga karnero” (Juan 21:15–17).

Isip usa ka magtutudlo sa Doktrina sa Ebanghelyo, ikaw makapakita sa imong gugma alang sa Ginoo pinaagi sa pagpakaon sa iyang mga karnero, magsiguro nga ang matag sakop sa imong klase “nahinumduman ug napakaon pinaagi sa maayong mga pulong sa Dios” (Moroni 6:4). Usa ka mahinungdanong katuyoan sa pulong sa Dios mao ang pagtabang kanato nga “motuo nga si Jesus mao ang Kristo, ang Anak sa Dios; ug nga motuo nga [kita] mahimong makabaton og kinabuhi pinaagi sa iyang ngalan” (Juan 20:31). Gigiyahan pinaagi sa Espiritu, ikaw makatabang sa mga sakop sa klase nga mapalig-on ang ilang mga pagpamatuod sa Manluluwas, mapalig-on ang ilang hugot nga pagtuo diha kaniya, ug ang ilang pakigsaad nga magsunod sa iyang ebanghelyo. Makahimo ka usab sa pagtabang kanila nga makadawat og uban pang mga panalangin nga moabut gikan sa tinuoray nga pagtuon sa Bag-ong Tugon, sama sa gipahayag ni Presidente Thomas S. Monson:

“Ang tibuok mensahe sa Bag-ong Tugon magdala og usa ka espiritu nga makapamata sa tawhanong kalag. Ang mga anino sa kapakyasan mawala tungod sa mga sanag sa paglaum, ang mga kasakit modala og kalipay, ug ang pagbati nga daw kita walay hinungdan mawala uban sa piho nga kahibalo nga ang atong Langitnong Amahan nagpakabana sa matag usa kanato” (“The Spirit Giveth Life,” Ensign, Hunyo 1997, 2).

Pagtudlo pinaagi sa Espiritu

Kon mag-andam sa pagtudlo alang sa klase sa Doktrina sa Ebanghelyo, importante nga ikaw magtinguha sa pagdasig ug paggiya gikan sa Espiritu Santo. “Ang Espiritu ihatag diha kanimo pinaagi sa pag-ampo uban sa hugot nga pagtuo,” miingon ang Ginoo, “ug kon ikaw wala makadawat sa Espiritu ikaw dili motudlo” (D&P 42:14). Hinumdumi nga ang Espiritu Santo mao ang magtutudlo diha sa imong klase.

Mahimo nimong tinguhaon ang Espiritu pinaagi sa pag-ampo, pagpuasa, pagtuon sa mga kasulatan kada adlaw, ug pagsunod sa mga sugo. Samtang nag-andam alang sa klase, pag-ampo alang sa Espiritu aron sa pagtabang kanimo nga makasabut sa mga kasulatan ug sa mga panginahanglan sa mga sakop sa klase. Ang Espiritu makatabang usab kanimo sa pagplano sa makahuluganong mga paagi aron sa paghisgut sa mga kasulatan ug sa paggamit niini sa atong mga kinabuhi karon (tan-awa sa 1 Nephi 19:23). Uban sa paggiya sa Espiritu, ikaw mamahimong epektibo nga instrumento sa mga kamot sa Ginoo aron pagtudlo sa iyang pulong ngadto sa iyang mga anak.

Pipila ka mga sugyot kon unsaon sa pagdapit sa Espiritu diha sa imong klase gihatag sa ubos:

Pagdapit og mga sakop sa klase nga mohatag og mga pag-ampo sa dili pa magsugod ug sa pagkahuman sa leksyon. Sa panahon sa klase, pag-ampo sa imong kasingkasing alang sa Espiritu aron mogiya kanimo, sa pag-andam sa mga kasingkasing sa mga sakop sa klase, ug sa pagpamatuod ug pagdasig.
Gamita ang mga kasulatan (tan-awa sa “Pagpunting diha sa mga Kasulatan” diha sa ubos).
Hatag sa imong pagpamatuod kon ang Espiritu modasig kanimo, dili lamang diha sa katapusan sa leksyon. Pagpamatuod kabahin ni Jesukristo. Dapita kanunay ang mga sakop sa klase sa paghatag sa ilang mga pagpamatuod.
Gamita ang mga himno, mga awit sa Primary, ug uban pang sagradong mga musika aron pag-andam sa mga kasingkasing sa mga sakop sa klase nga mobati sa Espiritu.
Ipadayag ang imong gugma ngadto sa mga sakop sa klase, ngadto sa uban, ug ngadto sa Langitnong Amahan ug ni Jesukristo.
Pakigbahin og mga panghunahuna, mga pagbati, ug mga kasinatian nga may kalabutan sa leksyon. Dapita ang mga sakop sa klase sa pagbuhat sa ingon. Ang mga sakop sa klase mahimo usab nga makasulti kon giunsa nila paggamit ang mga baruganan nga gihisgutan sa miaging mga leksyon.

Pagpunting diha sa mga Kasulatan

Si Elder Boyd K. Packer nagtudlo, “Ang tinuod nga doktrina, kon masabtan, makapausab og mga batasan ug mga kinaiya” (sa Conference Report, Okt. 1986, 20; o Ensign, Nob. 1986, 17). Sa imong pagpangandam ug diha sa panahon sa klase, pukos ngadto sa makaluwas nga mga doktrina sa ebanghelyo ingon nga gitudlo diha sa mga kasulatan ug sa mga pagtulun-an sa mga propeta sa ulahing mga adlaw. Kini nagkinahanglan nga ikaw makugihon ug mainampoong magtuon sa mga kasulatan. Ang Ginoo nagsugo, “Ayaw pagtinguha sa pagpahayag sa akong pulong, apan unaha ang pagbaton sa akong pulong.” Samtang ikaw nakabaton sa iyang pulong pinaagi sa pagtuon sa kasulatan, ang Ginoo misaad, “unya ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahum sa Dios ngadto sa pagkabig sa mga tawo” (D&P 11:21).

Awhaga ang mga sakop sa klase sa pagdala sa ilang mga kasulatan diha sa klase matag semana. Basaha ang pinili nga mga tudling sa kasulatan nga magdungan samtang kamo naghisgut niini. Kon mahimo, gamita ang mga edisyon sa mga kasulatan sa mga Santos sa Ulahing mga Adlaw.

Matag sakop sa klase kinahanglan mahatagan og kopya sa Giya sa Pagtuon sa Sakop sa Klase sa Bag-ong Tugon (35682 853). Kining gamay nga basahon makatabang sa mga sakop sa klase sa pagpalambo sa ilang mga kahanas sa pagtuon ug moabli sa mga kasulatan alang sa mga tubag sa ilang mga pangutana. Kini motabang kanila sa pagsabut sa mga kasulatan, sa paggamit niini, sa pagandam sa paghisgut niini diha sa klase, ug sa paggamit niini diha sa mga panaghisgutan sa pamilya.

Ang Paggamit Niini nga Manwal

Kini nga manwal usa ka himan nga makatabang kanimo sa pagtudlo sa mga doktrina sa ebanghelyo gikan sa mga kasulatan. Kini gisulat alang sa mga klase sa Doktrina sa Ebanghelyo para sa mga batan-on ug mga hamtong ug pagagamiton matag upat ka tuig. Dugang nga mga pakisayran ug mga komentaryo dili na kinahanglan aron pagtudlo sa mga leksyon.

Ang mga leksyon niini nga manwal naglangkob og daghang mga kasayuran kay sa imo tingaling matudlo sa usa ka klasehan. Pagtinguha sa Espiritu sa Dios diha sa pagpili sa mga istorya sa kasulatan, mga pangutana, ug uban pang mga materyal sa leksyon nga mao gayuy makatubag sa mga panginahanglan sa mga sakop sa klase.

Matag leksyon naglakip sa mosunod nga mga seksyon:

Ulohan. Ang ulohan naglangkob sa duha ka mga elemento: usa ka mubong hugpong sa mga pulong nga magpasabut o kinutlo ug ang mga kasulatan nga kinahanglan nimong basahon sa dili pa mag-andam sa leksyon.
Katuyoan. Ang pamahayag sa katuyoan nagsugyot og usa ka nag-unang ideya nga imong mapokus sa imong pag-andam ug pagtudlo sa leksyon.
Pagpangandam. Kini nga seksyon nag-summarize sa mga istorya sa kasulatan nga gilatid diha sa leksyon ug naghatag og mga sugyot aron sa pagtabang kanimo nga motudlo sa mas epektibong paagi. Kini usab mahimong maglakip og dugang nga pagbasa ug uban pang mga sugyot alang sa pagpangandam, sama sa mga materyal nga gusto nimong dad-on sa klase.
Pang-atensyon nga kalihokan. Kini nga seksyon naglangkob og usa ka yano nga kalihokan, praktikal nga paghulagway sa leksyon, o pangutana nga makatabang sa mga sakop sa klase nga maandam aron makat-on, sa pagapil, ug mobati sa impluwensya sa Espiritu. Bisan kon kamo mogamit sa pang-atensyon nga kalihokan sa manwal o usa ka kalihokan nga imong hinimo, importante nga mopokus sa atensyon sa mga sakop sa klase atol sa pagsugod sa leksyon. Kini nga kalihokan kinahanglan nga mubo.
Paghisgut ug paggamit sa kasulatan. Kini mao ang labing mahinungdanon nga bahin sa leksyon. Mainampoong magtuon sa mga istorya sa kasulatan aron ikaw makatudlo ug makahisgut niini sa epektibong paagi. Gamita ang mga sugyot diha sa “Pag-awhag og Panaghisgutan sa Klase” ug “Paggamit sa Nagkalainlaing Paagi sa Pagtudlo sa mga Kasulatan” (mga pahina viii–ix) aron sa paglainlain sa paagi sa imong pagtudlo ug sa pagpabilin sa interes sa mga sakop sa klase.
Panapos. Kini nga seksyon makatabang kanimo sa pag-summarize sa leksyon ug pagdasig sa mga sakop sa klase nga magsunod sa mga baruganan nga inyong nahisgutan. Kini magpahinumdom usab kanimo sa paghatag sa imong pagpamatuod. Siguroha nga magbilin og igong panahon sa pagtapos sa matag leksyon.
Dugang nga mga ideya sa pagtudlo. Kini nga seksyon gihatag diha sa kadaghanan sa mga leksyon sa manwal. Kini mahimong maglakip og dugang nga mga kamatuoran gikan sa mga istorya sa kasulatan, uban pang mga paagi sa pagtudlo, mga kalihokan, o ubang mga sugyot nga magdugang sa gilatid sa leksyon. Mahimo nimong gamiton ang pipila niining mga ideya isip kabahin sa leksyon.

Ribyuha ang matag leksyon mga usa ka semana sa dili pa itudlo. Kon ikaw magtuon og sayo sa gihatag nga mga basahonon ug sa materyal sa leksyon, makadawat ka og mga hunahuna ug mga pagdasig sulod sa semana nga makatabang kanimo sa pagtudlo sa leksyon. Sa imong pagpamalandong sa leksyon nianang semanaha, pag-ampo alang sa Espiritu nga mogiya kanimo. Pagbaton og hugot nga pagtuo nga ang Ginoo manalangin kanimo.

Pag-awhag og Panaghisgutan sa Klase

Dili kinahanglan nga kanunay kang maghatag og mga lecture. Hinoon, tabangi ang mga sakop sa klase nga makahuluganong moapil diha sa paghisgut sa mga kasulatan. Ang pag-apil sa mga sakop sa klase makatabang kanila nga:

Makat-on pa og dugang kabahin sa mga kasulatan.
Makat-on unsaon paggamit sa mga baruganan sa ebanghelyo.
Mamahimong mas mapasaligon sa pagsunod sa ebanghelyo.
Makadapit sa Espiritu diha sa klase.
Makatudlo ug makalig-on sa usag usa (D&P 88:122) aron sila makapahimulos gikan sa mga gasa, kahibalo, kasinatian, ug mga pagpamatuod sa usag usa.

Ang mga panaghisgutan sa klase kinahanglang makatabang sa mga miyembro nga mapaduol ngadto ni Kristo ug magpuyo ingon nga iyang mga tinun-an. Ayaw hatagig gibug-aton ang mga panaghisgutan nga dili makahatag niini nga mga katuyoan.

Pagtinguha sa paggiya sa Espiritu samtang ikaw magtuon sa mga pangutana niini nga manwal ug mohukom hain ang imong ipangutana. Ang manwal naghatag og mga pakisayran sa kasulatan aron sa pagtabang kanimo ug sa mga sakop sa klase nga makakita og mga tubag sa kadaghanan niini nga mga pangutana. Ang mga tubag sa ubang mga pangutana magagikan na sa mga kasinatian sa mga sakop sa klase.

Mas importante ang pagtabang sa mga sakop sa klase nga makasabut ug makagamit sa mga kasulatan kay sa pagtudlo sa tanan nga mga materyal sa leksyon nga imong giandam. Kon ang mga sakop sa klase nakakat-on gikan sa maayong panaghisgutan, sa kasagaran mas makatabang ang pagpadayon niini kay sa pagtudlo sa tanang mga materyal sa leksyon.

Gamita ang mosunod nga mga sumbanan aron sa pag-awhag og panaghisgutan sa klase:

Pangutana og mga pangutana nga nagkinahanglan og mga paghunahuna ug panaghisgut kay sa mga pangutana nga matubag lang og “oo” o “dili.” Ang mga pangutana nga nagsugod og ngano, giunsa, kinsa, unsa, kanus-a, ug diin maoy kasagarang pinaka epektibo sa pag-awhag og panaghisgutan.
Awhaga ang mga sakop sa klase sa pagpaambit og mga kasinatian nga nagpakita kon sa unsa nga paagi nga magamit diha sa kinabuhi ang mga baruganan ug mga doktrina sa kasulatan. Awhaga usab sila sa pagpakigbahin sa ilang mga gibati kabahin sa unsay ilang nakat-unan gikan sa mga kasulatan. Hatag og nindot nga mga komentaryo kabahin sa ilang mga gipaambit.
Magmabination sa mga panginahanglan sa matag sakop sa klase. Bisan tuod nga ang tanang mga sakop sa klase kinahanglang awhagon sa pag-apil sa mga panaghisgutan sa klase, adunay uban nga magpanuko sa pag-apil. Mahimo nimo silang pakigsultihan nga kamo ra aron pagsuta kon unsa ang ilang bation kon sila pabasahon og kusog o paapilon diha sa klase. Pag-amping sa dili pagtawag sa mga sakop sa klase nga malagmit makapaulaw kanila.
Hatag og mga pakisayran sa kasulatan aron pagtabang sa mga sakop sa klase nga makakita og mga tubag sa ubang mga pangutana.
Awhaga ang mga sakop sa klase sa pagpamalandong sa mga pangutana diha sa Giya sa Pagtuon sa Sakop sa Klase sa Bag-ong Tugon samtang sila magtuon sa ilang mga basahonon matag semana. Sa imong pag-andam sa matag leksyon, hunahunaa kon unsaon paghisgut niini nga mga pangutana diha sa klase. Ang mga sakop sa klase mas makaapil sa mga panaghisgutan kon sila nakatuon sa ilang mga basahonon ug kon ikaw mangutana nga sila nakaandam sa mga tubag.

Paggamit sa Nagkalainlaing Paagi sa Pagtudlo sa mga Kasulatan

Gamita ang mosunod nga mga sugyot sa pagtudlo sa mga istorya sa kasulatan sa mas epektibong paagi ug sa mas daghan nga nagkalainlaing mga paagi:

Tabangi ang mga sakop sa klase nga makasabut unsa ang gitudlo sa mga kasulatan mahitungod ni Jesukristo. Hangyoa sila sa paghunahuna kon sa unsang paagi nga ang piho nga mga tudling sa kasulatan makapalambo sa ilang hugot nga pagtuo sa Manluluwas ug makatabang kanila nga mobati sa iyang gugma.
Hangyoa ang mga sakop sa klase sa paghunahuna ug sa pagpakigbahin og piho nga mga paagi nga magamit ang usa ka tudling sa kasulatan sa ilang mga kinabuhi. Ipa-personalize nila ang mga kasulatan pinaagi sa pagpuli sa ilang mga ngalan diha sa pinili nga mga tudling.
Agi og dugang sa pagtudlo sa doktrina, hatagi og gibug-aton ang mga istorya diha sa Bag-ong Tugon nga makapalambo sa hugot nga pagtuo, nga magsiguro nga ang mga sakop sa klase makasabut niini ug paghisgut og mga paagi sa paggamit niini.
Papangitaa ang mga sakop sa klase og mga pulong, mga hugpong sa mga pulong, o mga ideya nga gibalik-balik kanunay diha sa tudling sa kasulatan o diin adunay talagsaon nga kahulugan alang kanila.
Awhaga ang mga sakop sa klase sa paggamit sa appendix nga anaa sa Latterday Saint nga edisyon sa King James Version sa Biblia. Ang Topical Guide ug Bible Dictionary maoy mas makatabang sa personal nga pagtuon ug sa panaghisgutan sa klase.
Isulat diha sa pisara ang mga hugpong sa mga pulong, mahinungdanon nga mga pulong, o mga pangutana nga may kalabutan sa istorya sa kasulatan. Unya basaha o i-summarize ang istorya. Sa pagkadungog sa mga sakop sa klase sa mga hugpong sa mga pulong, mahinungdanon nga mga pulong, o mga tubag sa mga pangutana, hunong ug hisguti kini.
Sa tibuok Basahon ni Mormon, ang hugpong sa mga pulong nga “unya kita nakakita” maoy gigamit sa pagpaila sa usa ka summary sa mga baruganan nga gitudlo (tan-awa, sama pananglit, sa Helaman 3:28). Human mahisguti ang usa ka tudling sa kasulatan, hangyoa ang mga sakop sa klase sa pagpasabut sa baruganan diha sa tudling ginamit ang hugpong sa mga pulong nga “unya kita nakakita.”
Pangitaa ug hisguti ang mga simbolo nga gigamit diha sa Bag-ong Tugon. Sama pananglit, ang Pamanhunon ug ang pangasaw-onon nagrepresentar sa Manluluwas ug sa iyang mga katawhan.
Tan-awa kon sa unsa nga paagi nga ang mga katawhan o ang mga hitabo diha sa mga kasulatan mahimo nga managlahi sa usag usa.
Ipadrama sa mga sakop sa klase ang mga istorya diha sa kasulatan pinaagi sa pagbasa og kusog sa mga pulong sa nagkalainlain nga mga tawo diha sa istorya. Siguroha nga ang pagdrama mopakita og husto nga pagtahud sa mga kasulatan.
Bahina ang klase ngadto sa duha o daghan pa nga gagmayng mga grupo. Human maribyu ang usa ka istorya sa kasulatan, ipasulat sa matag grupo ang mga baruganan ug mga doktrina nga gitudlo sa istorya. Unya pahisguti sa tibuok klase kon sa unsa nga paagi nga kini nga mga panudlo magamit diha sa ilang mga kinabuhi.
Dapita ang mga sakop sa klase sa pagdala og lapis aron imarka sa mahinungdanon nga mga bersikulo samtang kamo naghisgut niini.

Pagtabang sa Bag-ong mga Miyembro

Isip usa ka magtutudlo sa Doktrina sa Ebanghelyo, ikaw adunay kahigayunan sa pagtudlo sa mga miyembro kinsa bag-o pa lang sa Simbahan. Ang imong pagtudlo makatabang sa bag-ong mga miyembro nga mamahimong lig-on diha sa hugot nga pagtuo.

Ang Unang Kapangulohan miingon: “Ang matag miyembro sa Simbahan nanginahanglan nga higugmaon ug amumahon, ilabi na sa mga unang bulan human sa bunyag. Kon ang bag-ong miyembro makadawat og tinuoray nga pagpakighigala, mga kahigayunan nga makaalagad, ug espirituhanon nga pag-amuma nga moabut gikan sa pagtuon sa pulong sa Dios, sila makasinati og malahutayon nga pagkakabig ug mahimong kauban uban sa mga santos, ug diha sa panimalay sa Dios (Mga Taga-Efeso 2:19)” (sulat sa Unang Kapangulohan, 15 sa Mayo 1997).

Pagtudlo sa Ebanghelyo ngadto sa mga Batan-on

Kon ikaw nagtudlo sa mga batan-on, hinumdumi nga sila kanunayng nanginahanglan og aktibo nga pagsalmot ug biswal nga mga pagtudlo sa mga doktrina nga gihisgutan. Ang imong paggamit sa mga video, mga hulagway, ug mga kalihokan nga gisugyot diha sa manwal makatabang sa mga batan-on nga magpabiling interesado sa mga leksyon. Alang sa ubang mga ideya nga makatabang sa imong pagtudlo sa ebanghelyo ngadto sa mga batan-on, tan-awa sa Teaching, No Greater Call (36123); sa Teaching Guidebook (34595); ug sa “Pagtudlo sa Ebanghelyo ug Pagpangulo,” seksyon 16 sa Tamdanan nga Basahon sa mga Panudlo sa Simbahan, Basahon 2: Mga Pangulo sa Pagkapari ug Kaabag [Auxiliary] (35903 853).