Sunday School: Doktrina sa Ebanghelyo
Leksyon 39: ‘Alang sa Paghingpit sa mga Santos’

Leksyon 39

“Alang sa Paghingpit sa mga Santos”

Mga Taga-Efeso

Katuyoan

Aron pagtabang sa mga sakop sa klase nga makasabut nga ang paagi sa “paghingpit … sa mga santos” (Mga Taga-Efeso 4:12) nagkinahanglan nga kita mopalambo sa atong hugot nga pagtuo diha ni Kristo, mosunod sa mga panudlo sa mga apostoles ug mga propeta, ug manalipod sa atong mga kaugalingon gikan sa pagkadautan sa kalibutan.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mga Taga-Efeso 1:9–10. Si Pablo mitudlo nga ang katuyoan sa dispensasyon sa kahingpitan sa panahon mao ang “paghiusa sa tanan nga mga butang diha ni Kristo.”

    2. Mga Taga-Efeso 2:12–22; 4:1–16. Si Pablo mitudlo nga si Jesukristo mao ang atong bato nga tukuranan. Siya mitudlo nga ang Ginoo mihatag kanato sa mga apostoles ug mga propeta aron pagtabang kanato nga mahimong hingpit ug moabot ngadto sa “pagkahiusa sa hugot nga pagtuo.”

    3. Mga Taga-Efeso 5:22–29; 6:1–4. Si Pablo mitudlo sa panginahanglan alang sa panaghiusa tali sa bana ug asawa ug tali sa mga ginikanan ug mga anak.

    4. Mga Taga-Efeso 4:21–32; 6:10–18. Si Pablo mitudlo nga kita kinahanglan “mosul-ob sa bag-ong pagkatawo” ug “mosul-ob sa tibuok hinagiban sa Dios” aron sa pagpanalipod kanato gikan sa pagkadautan sa kalibutan.

  2. Dugang nga basahonon: Juan 17:11; Mosiah 18:21–22; Doktrina ug mga Pakigsaad 27:15–18; 38:25–27; Ang Giya ngadto sa mga Kasulatan, “Kapaigoan,” 126.

  3. Kon ikaw mogamit sa pang-atensyon nga kalihokan, pagdala diha sa klase og hilo (mga 1 ngadto sa 3 ka pye ang gitas-on) ug pisi nga susama ang gitas-on.

  4. Sugyot alang sa pagtudlo: Ang pagmarka sa kasulatan makatabang sa mga magtutudlo ug mga sakop sa klase sa pag-ila sa mahinungdanon nga mga pulong, mga ideya, mga tawo, ug mga panghitabo. Ikaw makaawhag sa mga sakop sa klase sa pagmarka sa ilang mga kasulatan pinaagi sa pagtudlo sa mahinungdanon nga mga baruganan, paghatag og mga ikatandi nga pakisayran, o pagsulti unsa ang imong gisulat diha sa margin sa imong kasulatan.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita sa mga sakop sa klase ang hilo ug pisi (tan-awa sa seksyon sa “Pagpangandam”).

Pang-atensyon nga Kalihokan

  • Unsa ang anaa sa hilo ug sa pisi nga komon sa duha? ( Ang duha gibuhat sa lanot o sa lubid nga materyal.) Sa unsa nga paagi nga sila magkalahi? (Ang hilo usa lang ka lanot, samtang ang pisi gibuhat sa daghan nga mga lanot nga gilubid.) Hain niini nga mga butang ang mas lig-on?

Ipasabut nga, sama sa usa ka hilo, kita huyang kon kita magdepende lang sa atong mga kaugalingon. Hinoon, sama sa pisi, kita mahimong mas lig-on kon kita makighiusa sa uban diha sa hugot nga pagtuo ug pagkamatarung. Sa iyang sulat ngadto sa Mga Taga-Efeso, si Pablo mihatag og gibug-aton sa kamahinungdanon sa “paghingpit … sa mga santos” ug pagkab-ot sa “paghiusa diha sa hugot nga pagtuo” (Mga Taga-Efeso 4:12–13). Kini nga leksyon maghisgut sa unsa nga paagi nga isip mga pamilya ug isip Simbahan kita makapaduol ngadto sa pagkahingpit ug paghiusa pinaagi sa pagsalig sa Manluluwas, pagsunod sa mga apostoles ug mga propeta, pagpalambo sa lig-on nga mga pamilya, ug pagsul-ob sa tibuok hinagiban sa Dios.

Paghisgut ug Paggamit sa Kasulatan

Sa mainampoong paagi pagpili og mga tudling ug mga pangutana sa kasulatan nga mas makatubag sa mga panginahanglan sa mga sakop sa klase. Awhaga ang mga sakop sa klase sa pagpaambit sa mga kasinatian nga may kalabutan ngadto sa mga baruganan sa kasulatan.

1. Ang dispensasyon sa kahingpitan sa mga panahon

Basaha ug hisguti ang Mga Taga-Efeso 1:9–10.

  • Diha sa unang kapitulo sa Mga Taga-Efeso, si Pablo naghisgut kabahin sa “dispensasyon sa kahingpitan sa panahon” (Mga Taga-Efeso 1:10). Unsa man ang dispensasyon sa ebanghelyo? (Usa ka tagal sa panahon diin ang Ginoo adunay dili mokubos usa ka sulugoon dinhi sa yuta kinsa naghupot sa mga yawe sa priesthood ug nga gitugutan sa pagpangalagad sa ebanghelyo. Tan-awa sa Ang Giya ngadto sa mga Kasulatan, “Kapaigoan”, 126.

  • Unsa man ang dispensasyon sa kahingpitan sa panahon? (Ang dispensasyon nga nagsugod sa pagpahiuli sa ebanghelyo ug sa kapunongan sa Simbahan pinaagi ni Joseph Smith.) Ngano nga ang atong dispensasyon gitawag nga kahingpitan sa panahon?

    Si Presidente Gordon B. Hinckley mitudlo: “Ikaw ug ako nakasinati sa talagsaon ug maanindot nga mga panalangin sa dispensasyon sa kahingpitan sa panahon. Karon nga panahon ug higayon gipahiuli dinhi sa yuta ang tanan nga mga baruganan, mga gahum, mga panalangin, ug mga yawe sa tanan nga nag-una nga mga dispensasyon” (sa Conference Report, Abr. 1992, 98; o Ensign, Mayo 1992, 70).

  • Unsa ang gisulti ni Pablo nga buhaton sa atong Langitnong Amahan niini nga dispensasyon? (Tan-awa sa Mga Taga-Efeso 1:9–10.) Unsa sa inyong hunahuna ang gipasabut sa “maghiusa sa tanan nga butang diha ni Kristo”? Unsa ang uban nga butang nga gihiusa sa atong panahon karon? (Ang mga tubag mahimong maglakip sa mga kasulatan, mga miyembro sa Simbahan, mga talaan sa mga patay, ug mga pamilya nga gibugkos diha sa templo.) Sa unsa nga paagi kita makatabang niini nga proseso sa paghiusa?

2. Si Jesukristo ingon nga atong bato nga tukuranan

Basaha ug hisguti ang pinili nga mga bersikulo gikan sa Mga Taga-Efeso 2:12–22 ug 4:1–16.

  • Itandi ang Mga Taga-Efeso 2:12 ug 2:19. Giunsa paghulagway ni Pablo ang mga kausaban nga nahitabo niadtong kinsa midawat ug misunod sa Manluluwas? Sa unsa nga paagi nga kamo nakakita niining sama nga mga kasulatan diha sa inyong kaugalingon o sa uban? Sa unsa nga paagi nga ang inyong pagpakig-uban sa uban nga mga miyembro sa Simbahan ingon nga “katagi-lungsod” diha sa ebanghelyo nakapanalangin sa inyong kinabuhi?

  • Unsa ang gipasabut ni Pablo sa pagtulun-an nga si Jesukristo mao ang “punoan nga bato nga tukuranan” sa Simbahan? (Mga Taga-Efeso 2:20). (Kon kinahanglanon, ipasabut nga ang bato nga tukuranan mao ang sukaranan nga bato nga gibutang diha sa suok diin ang duha ka mga bongbong mag-abot. Ang bato nga sukaranan mahinungdanon alang sa kalig-on sa paghiusa sa usa ka estruktura.) Sa unsa nga paagi nga si Jesukristo nahimong bato nga tukuranan sa inyong hugot nga pagtuo?

  • Unsa ang gitudlo ni Pablo diha sa Mga Taga-Efeso 2:20 ug 4:11–14 mahitungod sa kamahinungdanon sa mga apostoles ug mga propeta? Ngano nga ang buhi nga mga apostoles ug mga propeta mahinungdanon diha sa tinuod nga Simbahan? Unsa ang uban nga mga pagtulun-an gikan sa mga apostoles ug mga propeta sa ulahing mga adlaw nga nakatabang kanato sa pagtubo ngadto sa kahingpitan ug paghiusa? (Ikaw mahimo nga molista sa mga tubag sa mga sakop sa klase diha sa pisara.)

    Si Presidente Boyd K. Packer mitudlo: “Nga ang pagpangalagad sa mga propeta ug mga apostoles magdala kanila sa bisan kanus-a ug kanunay ngadto sa panimalay ug sa pamilya.… Ang pinakaimportante nga katuyoan sa tanan natong gitudlo mao ang paghiusa sa mga ginikanan ug mga anak diha sa hugot nga pagtuo diha ni Ginoong Jesukristo, nga sila malipayon sa panimalay, mabugkos diha sa mahangturong kaminyoon, madugtong ngadto sa ilang kagikan, ug makasiguro sa kahimayaan diha sa atubangan sa atong Langitnong Amahan” (sa Conference Report, Abr. 1995, 8; o Ensign, Mayo 1995, 8).

  • Unsa ang gipasabut ni Pablo pinaagi sa pagtudlo nga adunay “usa ka Ginoo, usa ka hugot nga pagtuo, usa ka bunyag”? (Mga Taga-Efeso 4:5). Ngano nga mahinungdanon nga kita mahiusa sa atong pagsabut ug pagtudlo sa sukaranan nga mga doktrina sa Simbahan?

3. Ang paghiusa tali sa bana ug asawa ug tali sa mga ginikanan ug mga anak

Basaha ug tukia ang Mga Taga-Efeso 5:22–29; 6:1–4.

  • Unsa nga mga pagkomparar ang gigamit ni Pablo sa dihang siya mihulagway sa relasyon tali sa bana ug asawa? (Tan-awa sa Mga Taga-Efeso 5:22–29.) Unsa ang makat-unan sa mga bana ug mga asawa gikan niini nga pagkomparar aron pagtabang kanila sa pagpalambo og mas dakong gugma ug paghiusa diha sa ilang kaminyoon? (Hisguti ang piho nga mga paagi sa pagpakita ni Jesus sa iyang gugma alang sa Simbahan ug sa unsa nga paagi nga magamit matag adlaw diha sa kaminyoon. Mahimo nimong ilista ang mga tubag sa mga sakop sa klase diha sa pisara.)

    Si Presidente Spencer W. Kimball mitudlo: “Inyo bang mabasahan diha sa tanang balaan nga mga kasulatan diin si Ginoong Jesukristo mipakyas sa iyang simbahan?… Siya ba matinud-anon? Siya ba matinuoron? Aduna bay maayo ug nahiangay nga wala niya ihatag? Unya kana mao ang atong gipangayo—unsa ang iyang gipangayo gikan sa usa ka bana….

    “… Kamo ba makahunahuna kon giunsa niya paghigugma ang Simbahan? Ang matag gininhawa mahinungdanon ngadto kaniya. Ang matag pagtubo, ang matag tawo, bililhon alang kaniya. Siya mihatag ngadto niadtong mga katawhan sa iyang tanan nga kusog, sa iyang tanan nga gahum, sa iyang tanan nga kaikag. Siya mihatag sa iyang kinabuhi––unsa pa ang labaw nga ikahatag sa usa?” (Men of Example [pakigpulong nga gihatag ngadto sa mga magtutudlo sa relihiyon, 12 sa Sept. 1975], 4–5).

  • Unsa ang tambag ni Pablo ngadto sa mga anak diha sa Mga Taga-Efeso 6:1–3? Ngano nga kini nga tambag mahinungdanon karon? Sa unsa nga paagi nga kamo napanalanginan tungod sa pagtahud sa inyong mga ginikanan?

  • Unsa ang gipasabut ni Pablo sa dihang siya mitambag sa mga ginikanan sa pagmatutu sa anak pinaagi “sa pagbansay ug pagpahimatngon gikan sa Ginoo”? (Mga Taga-Efeso 6:4). Sa unsa nga paagi nga ang mga ginikanan makabansay sa ilang mga anak sa espirituhanon nga paagi? Sa unsa nga paagi nga ang mga ginikanan makasunod sa ehemplo sa Ginoo kon magpahimatngon sa mga anak?

  • Sa unsa nga paagi nga ang tambag ni Pablo ngadto sa mga ginikanan ug mga anak makatabang sa pagpalig-on sa relasyon sa pamilya ug makapatunhay sa panaghiusa diha sa panimalay? Unsa nga tambag ang gihatag kanato sa mga apostoles ug mga propeta sa ulahing mga adlaw mahitungod sa mga pamilya? Dapita ang mga sakop sa klase sa paghisgut sa bag-ohay nga tambag nga gihatag sa kinatibuk-ang komperensya, diha sa uban nga mga miting o mga fireside, ug diha sa mga artikulo sa magasin sa Simbahan.

    Diha sa “Ang Banay: Usa ka Pamahayag ngadto sa Kalibutan,” ang Unang Kapangulohan ug ang Korum sa Napulog duha ka mga Apostoles mitudlo nga ang “kalipay diha sa kinabuhi sa panimalay labing mapaabut nga mahimong makab-ot kon kini gitukod ug gipalungtad diha sa baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat, ug makaayo sa lawas nga kalihokan sa paglingaw-lingaw” (Ensign, Nob. 1995, 102).

4. Pagsul-ob sa “bag-ong pagkatawo” ug “sa tibuok hinagiban sa Dios”

Basaha ug hisguti ang Mga Taga-Efeso 4:21–32 ug Mga Taga-Efeso 6:10–18.

  • Unsa ang gipasabut ni Pablo sa dihang siya miawhag sa mga taga-Efeso sa “pagsul-ob sa bag-ong pagkatawo”? (Mga Taga-Efeso 4:24). Unsa ang uban nga mga kinaiya sa mga katawhan kinsa nahimong “bag-o” pinaagi sa Pag-ula ni Jesukristo? (Tan-awa sa Mga Taga-Efeso 4:21–32.)

  • Samtang nag-awhag sa mga Santos sa pagsul-ob sa hinagiban sa Dios, si Pablo mipasidaan kanila batok sa daghan nga mga matang sa dautan nga mga impluwensya (Mga Taga-Efeso 6:10–12). Unsa ang ubang dautan nga mga impluwensya niini nga kinabuhi?

  • Unsa ang nagkalainlain nga mga piraso sa unsay gitawag ni Pablo nga hinagiban sa Dios? Unsa ang girepresentaran sa matag piraso? (Tan-awa sa Mga Taga-Efeso 6:13–18; D&P 27:15–18. Ikaw mahimo nga molista sa mga tubag diha sa pisara ubos sa mga ulohan Hinagiban ug Gipaila.) Sa unsa nga paagi nga ang matag piraso sa hinagiban sa Dios makapanalipod kanato batok sa impluwensya ni Satanas? Unsa ang atong mabuhat aron pagsul-ob niini nga hinagiban matag adlaw?

Panapos

Ipamatuod nga ang Ginoo mitukod sa iyang Simbahan, nga adunay mga apostoles ug mga propeta, aron pagtabang kanato nga mahimong sama kaniya ug makabalik sa pagpuyo uban kaniya. Awhaga ang mga sakop sa klase sa pagpaninguha nga maghiusa alang sa “panghingpit sa mga Santos” pinaagi sa pagsunod sa mga pagtulun-an diha sa Mga Taga-Efeso.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Ikaw mahimong mogamit sa usa o pipila niini nga mga ideya isip kabahin sa leksyon.

1. “Isul-ob ang tibuok hinagiban sa Dios” (Mga Taga-Efeso 11)

Ipasundayag ang “The Whole Armor of God,” trese ka minutos nga bahin gikan sa New Testament Video Presentations (53914). Unya ipangutana ang mosunod:

  • Unsa nga mga kakuyaw ang giatubang sa mga sundalo diha sa video? Unsa nga mga kakuyaw ang giatubang sa mga batan-on? Sa unsa nga paagi nga ang sakop sa matag pundok napanalanginan tungod sa pagsul-ob sa ilang hinagiban?

2. Pag-ampo alang sa mga lider sa Simbahan

  • Basaha ang Mga Taga-Efeso 6:18–20. Ngano sa inyong hunahuna nga si Pablo mihangyo sa mga taga-Efeso sa pag-ampo alang kaniya? Kanus-a nga kita naligon pinaagi sa mga pag-ampo sa uban? Ngano nga mahinungdanon nga kita mag-ampo alang sa matag usa ug alang sa mga lider sa Simbahan?

3. “Pinaagi sa grasya kamo nangaluwas pinaagi sa hugot nga pagtuo” (Mga Taga-Efeso 2:8)

  • Unsa ang gitudlo ni Pablo diha sa Mga Taga-Efeso 2:8–9 mahitungod kon sa unsa nga paagi nga ang usa ka tawo makadawat sa kaluwasan? Nganong imposible man alang kanato ang pagluwas sa atong mga kaugalingon pinaagi lamang sa atong mga buhat? (Tan-awa sa Mga Taga-Roma 3:23; Mosiah 3:17; Alma 22:14. Ikaw mahimo nga motudlo nga si Pablo kanunay nga mipahinumdom sa mga Santos nga mga Judeo nga ang mga buhat sa balaod ni Moises dili makapaluwas kanila. Alang sa dugang mga makuti nga panaghisgutan sa grasya ug mga buhat, tan-awa sa leksyon 36.)