“Panunod sa Gingharian nga Giandam alang Kaninyo”

Katuyoan

Aron pagtabang sa mga sakop sa klase nga maandam ang ilang mga kaugalingon alang sa Ikaduhang Pag-anhi pinaagi sa pagpuyo sa matarung nga paagi, pagpalambo sa ilang mga talento, ug pag-alagad sa uban.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Mateo 25:1–13. Pinaagi sa sambingay sa napulo ka mga birhen, si Jesus nagtudlo nga kita kinahanglan mag-andam alang sa iyang Ikaduhang Pag-anhi.
2. Mateo 25:14–30. Pinaagi sa sambingay sa mga talento, si Jesus nagtudlo nga kita kinahanglan mopalambo sa mga gasa nga atong nadawat gikan sa Dios.
3. Mateo 25:31–46. Pinaagi sa sambingay sa mga karnero ug mga kanding, si Jesus nagtudlo nga kinahanglan nga kita andam sa pag-alagad sa usag usa.
Kon ikaw mogamit sa pang-atensyon nga kalihokan, pagdala og usa ka gamay nga garapon, usa ka sudlanan nga may lana o kinoloran nga tubig, ug, kon anaa, ang hulagway sa Ang Ikaduhang Pag-anhi (62562 853; Pakete sa mga Hulagway sa Ebanghelyo 238).
Pag-andam og usa ka papel ug usa ka bolpen o lapis alang sa matag sakop sa klase.
Sugyot alang sa pagtudlo: Matag karon ug unya, gamit sa mga pamahayag sa mga propeta sa ulahing mga adlaw, nga makit-an niini nga manwal ug sa mga magasin sa Simbahan, aron sa pagtabang sa pagdumala ug pagpatin-aw sa mga hilisgutan sa klase ug aron pagpasabut og maayo nga ang Ginoo magpadayon sa pagpadayag sa iyang kabubut-on karon. Gamita kining mga kinutlo aron pag-abag, dili pag-ilis, sa pagbasa sa kasulatan ug panaghisgutan sa klase.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang gamay nga garapon, usa ka sudlanan nga may lana o kinoloran nga tubig, ug ang hulagway sa Ikaduhang Pag-anhi.

Ipasabut nga kini nga leksyon nagpukos sa tulo ka mga sambingay nga gitudlo sa Manluluwas agi og tubag sa mga pangutana sa iyang mga Apostoles mahitungod sa iyang Ikaduhang Pag-anhi. Sultihi ang mga sakop sa klase nga kamo mogamit sa garapon ug sa lana o sa kinoloran nga tubig aron pagpasabut sa atong pagpangandam alang sa Ikaduhang Pag-anhi.

Paghisgut ug Paggamit sa Kasulatan

Samtang ikaw nagtudlo sa mosunod nga mga tudling sa kasulatan, hisguti kon sa unsa nga paagi nga kini magamit sa inadlaw-adlaw nga kinabuhi. Awhaga ang mga sakop sa klase sa pagpaambit og mga kasinatian nga may kalabutan sa mga baruganan sa kasulatan.

1. Si Jesus mitudlo sa sambingay sa napulo ka mga birhen.

Basaha ug tukia ang Mateo 25:1–13. Ipasabut nga ang sambingay sa napulo ka mga birhen gipasikad sa pamatasan sa kasal sa mga Judeo. Sa panahon ni Jesus, ang pamanhonon ug ang iyang mga higala mokuha sa pangasaw-onon gikan sa iyang panimalay ngadto sa panimalay sa pamanhonon. Diha sa dalan, ang mga higala sa pangasaw-onon naghulat aron moapil kanila. Sa ilang pag-abut sa panimalay sa pamanhonon, silang tanan mosulod alang sa kasal. Kini nga mga kasal sa kasagaran pagahimoon sa gabii, busa kadtong naghulat sa pangasaw-onon ug pamanhonon magdala og gagmay nga mga lampara nga gibutangan og lana.

Sa sambingay sa napulo ka mga birhen, kinsa ang gipasabut sa pamanhonon? (Ang Manluluwas.) Kinsa ang gipasabut sa mga birhen? (Mga sakop sa Simbahan.) Unsa ang gipasabut sa kasal? (Ang Ikaduhang Pag-anhi sa Manluluwas.) Unsa ang gipasabut sa lana sa mga lampara. (Pagpangandam alang sa Ikaduhang Pag-anhi.)
Unsa ang gibuhat sa lima ka mga birhen nga binuang? (Tan-awa sa Mateo 25:3.) Unsa ang mga sangputanan sa ilang kakulang sa pagpangandam? (Tan-awa sa Mateo 25:8–12.) Sa unsa nga paagi kita usahay makahimo og sama nga sayop ingon sa buangbuang nga mga birhen?
Unsa ang gibuhat sa lima ka mga birhen nga maalamon? (Mateo 25:4.) Unsa ang mga sangputanan sa ilang pagpangandam? (Tan-awa sa Mateo 25:10.) Unsa ang atong makat-unan gikan sa mga gibuhat sa lima ka maalamon nga mga birhen? (Tan-awa sa D&P 45:56–57. Kita kinahanglan nga mag-andam sa atong mga kaugalingon alang sa Ikaduhang Pag-anhi ni Jesukristo.)
Ibutang sa hunahuna nga ang lana diha sa sambingay nagpasabut sa pagpangandam alang sa Ikaduhang Pag-anhi, unsa ang ubang mga paagi nga kita makadugang sa “lana” sa atong “mga lampara”? (Ang mga tubag mahimong maglakip sa piho nga mga elemento sa matarung nga pagpuyo, sama sa pagbansay sa hugot nga pagtuo, pagdawat sa mga ordinansa, paghupot sa mga pakigsaad, o paghatag og pag-alagad.)

Kon ikaw naggamit sa garapon ug sa lana o sa kinoloran nga tubig (tan-awa sa pang-atensyon nga kalihokan), ipasabut nga ang garapon nagpasabut sa mga lampara diha sa sambingay. Pagbutang og usa ka tolo sa lana o tubig diha sa garapon matag higayon nga ang sakop sa klase magsugyot kon unsa ang atong buhaton aron sa pag-andam. Ikaw mahimo nga mopaambit sa mosunod nga mga pagpasabut gikan ni Presidente Spencer W. Kimball:

“Diha sa sambingay, ang lana mahimong mapalit diha sa merkado. Sa atong mga kinabuhi ang lana sa pagpangandam matigum sa kada tolo sa matarung nga pagpuyo. Ang pagtambong sa mga miting sa sakrament modugang og lana diha sa atong mga lampara, kada tolo sulod sa mga katuigan. Ang pagpuasa, pag-ampo sa pamilya, home teaching, pagpugong sa mga kagana sa lawas, pagsangyaw sa ebanghelyo, pagtuon sa mga kasulatan … matag buhat sa mapadayonon nga kakugi ug pagkamasulundon maoy usa ka tolo nga idugang ngadto sa atong pundo. Mga buhat sa kalooy, pagbayad sa mga halad ug mga ikapulo, limpyo nga mga hunahuna ug mga lihok, kaminyoon diha sa pakigsaad alang sa kahangturan––kini, usab, mahinungdanon kaayo nga makadugang sa lana diin kita sa tungang gabii makadugang sa atong nahutdan sa lana nga mga lampara” (Faith Precedes the Miracle [1972], 256).

Hangyoa ang mga sakop sa klase sa paghunahuna sa hilom sa mosunod nga mga pangutana:

Unsa ang inyong gibuhat niining miagi nga semana aron pagdugang og lana sa inyong lampara? Unsa ang uban nga mga butang nga inyong buhaton niining nagsingabut nga mga semana aron pagdugang og lana sa inyong lamapara?

2. Si Jesus mitudlo sa sambingay sa mga talento.

Basaha ug tukia ang Mateo 25:14–30. Ipasabut nga diha sa panahon sa Bag-ong Tugon, ang talento usa ka kantidad sa salapi.

Sa sambingay sa mga talento, kinsa ang gipasabut sa tawo nga milakaw sa layo nga nasud? (Ang Ginoo.) Kinsa ang gipasabut sa mga ulipon? (Matag usa kanato.) Unsa ang gipasabut sa mga talento? (Mga gasa gikan sa Dios.)
Unsa ang gibuhat sa mga ulipon nga gihatagan og lima ka mga talento ug duha ka mga talento? (Tan- awa sa Mateo 25:16–17.) Unsa nga ganti ang nadawat nilang duha? (Tan-awa sa Mateo 25:21, 23.) Unsa ang gitudlo niini nga sambingay mahitungod sa walay katapusan nga ganti nga ipanalangin sa atong Langitnong Amahan kanato? (Ang mga tubag mahimong maglakip nga ang mga tawo kinsa adunay pipila lamang ka mga gasa gikan sa Dios makadawat sa tanang panalangin kon sila mogamit sa ilang mga gasa sa hingpit.)

Si Elder James E. Faust miingon niadtong ingon og adunay nadawat nga mas gamay nga mga talento: “Kon ang ilang mga talento gigamit aron pagtukod sa gingharian sa Dios ug pag-alagad sa uban, sila sa hingpit makadawat sa mga saad sa Manluluwas. Ang dako nga saad sa Manluluwas mao nga ‘sila makadawat [sa ilang] ganti, gani ang kalinaw dinhi sa kalibutan ug kinabuhing dayon sa kalibutan nga umaabut’ (D&P 59:23)” (sa Conference Report, Abr. 1994; o Ensign, Mayo 1994, 6).
Unsa ang gibuhat sa ulipon nga gihatagan og usa ka talento sa iyang salapi? (Tan-awa sa Mateo 25:24–25.) Unsa ang gisulti sa agalon ngadto kaniya? (Tan-awa sa Mateo 25:26–30.) Ngano nga kita usahay mapakyas sa pagpalambo sa mga talento ug mga gasa nga gihatag sa Dios kanato? Unsaon man nato pagbuntog sa mga babag sa pagpalambo niini nga mga gasa?
Si Marvin J. Ashton nagtudlo nga “kini atong katungod ug responsibilidad ang pagdawat sa atong mga gasa ug ang pagpaambit niini” (sa Conference Report, Okt. 1987; o Ensign, Nob. 1987, 20). Unsaon nato pag-ila ug pagdawat sa mga talento o mga gasa nga gisalig sa Ginoo ngari kanato? Sa inyong hunahuna ngano nga mahinungdanon man ang pagpaambit sa atong mga talento o mga gasa? Unsa nga mga panalangin ang miabut sa inyong kinabuhi tungod kay kamo mipalambo ug mipaambit sa inyong mga talento o mga gasa? Sa unsa nga paagi nga kamo napanalanginan tungod kay ang uban mipaambit sa ilang mga talento o mga gasa?
Ang matag tawo gihatagan og labing ubos usa ka gasa gikan sa Dios (D&P 46:11–12), apan ang ubang mga gasa mas sayon ra ilhon kay sa uban. Unsa ang pipila ka mga gasa nga malagmit malisud ilhon apan magamit aron pagalagad sa uban ug paghimaya sa Dios?

Si Elder Marvin J. Ashton miingon:

“Tuguti ako nga mosulti sa pipila ka mga gasa nga dili pirmeng makita o dili kaayo mabantayan apan mahinungdanon kaayo. Lakip niini tingali mao ang inyong mga gasa … mga gasa nga dili kaayo makita apan bisan pa niana mga tinuod ug bililhon.

“Atong balikan paghinumdom ang uban niining dili kaayo makita nga mga gasa: ang gasa sa pagpangayo; ang gasa sa pagpaminaw; ang gasa sa pagkadungog ug paggamit sa gamay ug ligdong nga tingog; ang gasa nga makahimo sa pagbakho; ang gasa sa paglikay sa mga pakiglalis; ang gasa sa pagkamauyonon; ang gasa sa pagsalikway sa walay hinungdan nga pagsublisubli; ang gasa sa pagpangita nianang matarung; ang gasa sa dili paghukom sa uban; ang gasa sa pagpangayo sa Dios alang sa paggiya; ang gasa sa pagkatinun- an; ang gasa sa pag-atiman sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og gamhanan nga pagpamatuod; ang gasa sa pagdawat sa Espiritu Santo” (sa Conference Report, Okt. 1987, 23; o Ensign, Nob. 1987, 20).

Hatagi ang kada sakop sa klase og bolpen o lapis ug piraso nga papel. Hangyoa sila sa pagsulat sa usa o duha sa ilang mga talento o mga gasa uban sa dili moubos sa usa ka piho nga butang nga ilang buhaton sa sunod nga pipila ka mga semana sa paggamit niini sa pag-alagad sa uban.

Kon ikaw naggamit sa garapon ug sa lana o kinoloran nga mga tubig, pagdugang og pipila ka mga tolo diha sa garapon. Ipasabut nga samtang kita nagpalambo sa mga talento ug mga gasa nga gihatag sa Dios kanato, kita nagdugang og lana sa atong mga lampara.

3. Si Jesus mitudlo sa sambingay sa mga karnero ug mga kanding.

Basaha ug tukia ang Mateo 25:31–46.

Si Jesus mitudlo nga sa iyang Ikaduhang Pag-anhi siya molain kanato ingon nga ang magbalantay sa mga karnero molain sa mga karnero gikan sa mga kanding (Mateo 25:31–32). Diha sa sambingay sa mga karnero ug sa mga kanding, kinsa ang gipasabut sa mga karnero? (Tan-awa sa Mateo 25:33–34.) Kinsa ang gipasabut sa mga kanding? (Tan-awa sa Mateo 25:33; 41).
Unsa ang gitudlo niini nga mga sambingay nga angay natong buhaton aron pag-andam alang sa Ikaduhang Pag-anhi ug sa adlaw sa paghukom? (Tan-awa sa Mateo 25:35–46.)

Si Elder Marion D. Hanks miingon:

“Si Jesus mitudlo sa iyang mga sumusunod sa sambingay sa mga karnero ug sa mga kanding, nga nagpasabut sa paghukom nga moabut, diin siya tin-aw nga miila kinsa kadtong makapanunod sa ‘kinabuhing dayon’ ug kadtong kinsa ‘mamahawa ngadto sa silot nga dayon’ (Mateo 25:46). Ang timailhan sa kalainan mao nga kadtong makapanunod sa gingharian uban kaniya nakapalambo sa iyang kinaiya sa pagtabang, nakasinati sa hingpit nga kalipay sa paghatag ug ang katagbawan sa pag-alagad. Siya mitubag sa mga panginahanglan sa gigutom, giuhaw, walay pinuy-anan, sa walay saput, sa masakiton, ug kadtong nabilanggo….

“Wala tingali mas tin-aw pa kay sa kataas sa bili nga gibutang sa Manluluwas diha sa dili hinakog nga pag-alagad sa uban ingon nga kinahanglan kaayo nga elemento sa Kristohanon nga kinaiya ug sa kaluwasan. Ang pagtabang, paghatag, ug pagsakripisyo mao, o kinahanglan gayud, nga sama gyud ka natural sa pagtubo ug pagginhawa” (sa Conference Report, Abr. 1992, 10; o Ensign, Mayo 1992, 9).

Kon ikaw naggamit sa garapon ug sa lana o kinoloran nga tubig, pagdugang og pipila ka mga tolo ngadto sa garapon. Ipasabut nga samtang kita mag-alagad sa uban, kita nagdugang og lana sa atong mga lampara. Kita usab mahimong motabang sa uban sa pagdugang og lana sa ilang kaugalingon nga mga lampara. Pakig-ambit og mga ehemplo sa pag-alagad nga imong namatikdan, ug pagdapit sa mga sakop sa klase sa pagpaambit og mga ehemplo nga ilang nakit-an.

Giunsa man nato sa pagpanalangin ang uban pinaagi sa atong pag-alagad? Sa unsa nga paagi nga ang pag-alagad sa uban nakapanalangin kaninyo? Unsa ang inyong gibati niadtong inyong gialagaran? Unsa ang inyong gibati niadtong kinsa mialagad kaninyo? Sa unsa nga paagi nga kita mahimong mas makamatngon sa panginahanglan sa uban? Sa unsa nga paagi nga kita mahimong mas makugihon sa pag-alagad sa uban?
Sa inyong hunahuna unsa man ang gipasabut sa Manluluwas sa dihang siya miingon, “Tungod kay gibuhat ninyo kini ngadto sa usa sa labing gagmay niining akong mga igsoon, gibuhat usab ninyo kini kanako”? (Mateo 25:40; tan-awa usab sa Mosiah 2:17).

Panapos

Ipamatuod nga kita kinahanglan nga mangandam alang sa Ikaduhang Pag-anhi ni Jesukristo. Kita kinahanglan nga mopalambo sa mga gasa sa Dios nga gihatag kanato ug mosunod sa ehemplo sa Manluluwas sa pagtagana sa atong mga kinabuhi diha sa pag-alagad sa uban. Ipasabut og maayo nga kita makabuhat niining tanan nga mga butang, dili magsapayan sa atong mga kahimtang.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. “A Poor Wayfaring Man of Grief”

Uban sa mga sakop sa klase, kantaha o basaha ang mga pulong sa himno nga “A Poor Wayfaring Man of Grief” (Hymn, no. 29). Dayon basaha ang Mateo 25:40. Dapita ang mga sakop sa klase sa pagpaambit sa ilang mga pagbati kabahin sa mensahe sa himno ug sa tudling sa kasulatan.

2. Pagpasalida sa video

Ikaw mahimong mogamit sa ikalima nga bahin sa “New Testament Customs,” usa ka pinili gikan sa New Testament Video Presentations (53914), aron pagpasabut sa naandan nga mga kombira sa kaminyoon diha sa mga panahon na Bag-ong Tugon.