“Putli nga Relihiyon”

Katuyoan

Aron pagtabang sa mga sakop sa klase nga makasabut sa mga kinaiya nga kinahanglan atong ipalambo aron hingpit natong masunod ang atong relihiyon.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Santiago 1:1–4; 5:10–11. Si Santiago mitudlo nga kita kinahanglan molahutay sa mga kasakit nga mapailubon.
2. Santiago 1:5–7; 4:8. Si Santiago mitudlo nga kita kinahanglan mag-ampo sa Dios diha sa hugot nga pagtuo.
3. Santiago 1:19–20, 26; 3:2–18. Si Santiago mitudlo nga kita kinahanglan mopugong sa atong mga dila ug nga “dili dali masuko.”
4. Santiago 1:22–25, 27; 2:14–26; 4:17. Si Santiago mitudlo nga kita kinahanglan “motuman sa pulong,” magpakita sa atong hugot nga pagtuo pinaagi sa atong mga buhat.
Dugang nga basahonon: Ang Giya ngadto sa mga Kasulatan, “Ang Epistola ni Santiago,” 232.
Sugyot alang sa pagtudlo: “Itudlo ang katinuod sa personal nga pakigsulti gikan ug ngadto sa Dios. Tabangi ang matag usa nga makasabut unsaon sa pag-ampo nga takus ug unsaon sa pagdawat ug pag-ila sa mga tubag gikan sa Dios”.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa klase.

Isulat ang Putli nga relihiyon diha sa pisara, ug ipangutana ang mosunod:

Pang-atensyon nga Kalihokan

Unsa ang gipasabut sa pulong putli? (Mga butang mahimong maglakip sa tinuod, bug-os, ug hingpit.) Unsa ang gipasabut sa relihiyon? (Ang mga tubag mahimong maglakip sa pag-alagad ug pagsimba sa Dios, usa ka paagi sa pagtuo ug mga buhat; ug usa ka pasalig o paghalad sa usa ka piho nga dalan sa kinabuhi.)
Unsaon ninyo paghatag og kahulugan sa putli nga relihiyon?

Hangyoa ang usa ka sakop sa klase sa pagbasa sa Santiago 1:27. Ipasabut nga kini nga leksyon maghisgut kon sa unsang paagi kita makagamit sa mga pagtulun- an ni Santiago aron pagtabang kanato sa pagpuyo sa usa ka “putli nga relihiyon” ug mahimong “dili mahugaw sa atubangan sa Dios.”

Paghisgut ug Paggamit sa Kasulatan

Samtang ikaw naghisgut sa mga pagtulun-an ni Santiago, ilista kini diha sa pisara ubos sa ulohan nga Putli nga relihiyon. Hisguti kon sa unsa nga paagi nga ang matag ideya nga gitudlo ni Santiago makatabang kanato sa pagpuyo sa usa ka putli nga relihiyon.

Ipasabut nga ang tigsulat sa basahon ni Santiago sa kinatibuk-an gituohan nga mao ang igsoon ni Jesukristo. Human mabanhaw si Jesus, si Santiago mialagad ingon nga usa ka Apostol ug siya usa ka mahinungdanon nga lider sa unang Simbahan (Mga Buhat 12:17; 15:13–20).

1. Kita kinahanglan nga molahutay sa mga kasakit sa mapailubong paagi.

Basaha ug hisguti ang Santiago 1:1–4; 5:10–11.

Unsa ang gitudlo ni Santiago mahitungod sa pag-atubang sa mga pagsulay sa atong hugot nga pagtuo? (Tan-awa sa Hubad ni Joseph Smith sa Santiago 1:2–3 diin nagpakita nga ang hugpong sa mga pulong nga nagkalain-lain nga mga pagtintal giusab ngadto sa daghang mga kasakit.) Sa unsa nga paagi nga ang mga pagsulay makatabang kanato sa pagpalambo sa atong pagpailub. Sa unsa nga paagi nga kita mapanalanginan kon kita molahutay sa mga kasakit nga mapailubon? (Tan-awa sa Santiago 1:4; Mga Taga-Roma 5:3–5; Alma 36:3.)

Si Elder Orson F. Whitney misulat: “Walay sakit nga atong giantus, walay pagsulay nga atong nasinati nga nausik. Kini nakatabang sa atong edukasyon, ngadto sa kalamboan sa ingon nga mga kinaiya sama sa pailub, hugot nga pagtuo, kalig-on, ug pagkamapainubsanon. Ang tanan nga atong giantus ug tanan nga atong gilahutay, ilabi na kon kita milahutay niini nga mapailubon, mag-ugmad sa atong mga kinaiya, magputli sa atong mga kasingkasing, magpalig- on sa atong mga kalag, ug maghimo kanato nga mas malumo ug mang-giloloy-on, mas angayan nga pagatawgon nga mga anak sa Dios” (kinutlo sa Spencer W. Kimball, Faith Precedes the Miracle [1972], 98).
Kinsa ang gisulti ni Santiago nga maayong panig-ingnan sa pailub diha sa kasakit? (Tan-awa sa Santiago 5:10–11.) Sa unsa nga paagi nga kamo nakakita sa mga propeta sa ulahing mga adlaw nga mipakita niini nga pailub? Sa unsa nga paagi nga ang ilang mga ehemplo nakatabang kaninyo?

2. Kita kinahanglang mag-ampo sa Dios pinaagi sa hugot nga pagtuo.

Basaha ug hisguti ang Santiago 1:5–7 ug 4:8.

Unsa ang tambag nga gihatag ni Santiago ngadto niadtong “kulang sa kaalam”? (Tan-awa sa Santiago 1:5–6.) Unsa ang buhaton sa Langitnong Amahan kon kita mangayo uban sa hugot nga pagtuo? Unsa nga mga kasinatian ang inyong nasinati sa pagdawat og mga tubag sa pag-ampo?
Sa unsa nga paagi nga si Joseph Smith naimpluwensya sa tambag diha sa Santiago 1:5? (Tan-awa sa Joseph Smith––Kasaysayan 1:11–13.) Unsa ang atong makat-unan sa iyang kasinatian? Sa unsa nga paagi nga ang hukom ni Joseph Smith sa pagsunod sa tambag sa Santiago 1:5 nakaapekto kanato? (Tan-awa sa Joseph Smith––Kasaysayan 1:14–20.)

Si Presidente Spencer W. Kimball miingon: “Tungod kay ang katorse anyos nga batan-ong lalaki miadto sa kakahoyan aron sa pag-ampo, human makabasa sa mga kasulatan … tungod kay siya misunod sa pagpadayag nga iyang nadawat gikan sa kahitas-an, ania Ang Simbahan ni Jesukristo sa mga Santos sa Ulahing mga Adlaw. Ania kanato ang tanan nga mga panalangin nga makahimo kanato nga labing malipayon nga katawhan sa tibuok kalibutan, tungod kay ang katorse anyos nga batan-ong lalaki miadto sa kakahoyan aron sa pag-ampo” (sa Conference Report, Area Conference sa Melbourne Australia 1976, 23).

Kon ikaw nagtudlo sa mga batan-on, ipamatuod nga ang pagpangayo sa Dios pinaagi sa hugot nga pagtuo ug pagdawat sa kaalam wala mag-agad sa edad o uban nga mga kahimtang. Si Joseph Smith nag-edad og katorse sa dihang iyang gisulayan ang mga pulong ni Santiago ug siya nakadawat sa Unang Panan-awon. Siya nag-edad og disesyete sa dihang si anghel Moroni mibisita kaniya ug mipadayag diin gitago ang bulawan nga mga palid.
Giunsa ni Santiago paghulagway niadtong kinsa nag-ampo nga walay hugot nga pagtuo? (Tan-awa sa Santiago 1:6–7.) Unsa ang atong buhaton aron paglig- on sa atong hugot nga pagtuo?
Si Santiago mitudlo, “Dumuol kamo sa Dios, ug siya moduol kaninyo” (Santiago 4:8). Sa unsa nga paagi nga ang tinuod nga pag-ampo makapaduol kanato ngadto sa Dios?

3. Kita kinahanglang mopugong sa atong mga dila ug “dili dali masuko.”

Hisguti ang Santiago 1:19–20, 26; 3:2–18. Dapita ang mga sakop sa klase sa pagbasa og kusog sa pinili nga mga bersikulo.

Si Santiago mitudlo nga kita kinahanglang “magmaabtik sa pagpamati, magmahinay sa pagsulti” (Santiago 1:19). Unsa nga mga kasinatian diha sa inyong kinabuhi ang nakapamatuod sa kaalam niini nga tambag? Sa unsa nga paagi nga kita mahimo nga mas maayo nga tigpaminaw ug manggihunahunaon nga mga tigsulti?
Si Santiago mitudlo usab nga “dili dali masuko” (Santiago 1:19). Unsa ang uban nga mga sangputanan diha sa pagsulti o paglihok nga may kasuko? Unsa nga mga kasinatian diha sa inyong kinabuhi ang nakapamatuod sa kaalam sa tambag si Santiago? Sa unsa nga paagi nga kita makabuntog o maka-kontrol sa mga pagbati sa kasuko?
Si Santiago mitudlo nga kita kinahanglang mopugong sa atong mga dila (Santiago 1:26). Unsa ang katuyoan sa pugong sa kabayo? (Aron paggiya ug pagkontrol sa kabayo.) Sa unsa nga paagi nga kita makagamit sa tambag ni Santiago sa “pagpugong” sa atong mga dila? (Tan-awa sa Santiago 4:11. Ang mga tubag mahimong maglakip sa paglikay sa paglibak, mga bakak, pag-awayaway, pagpanumpa, ug masuk-anon nga mga pulong. Hinoon, kita kinahanglang mogamit sa atong mga dila sa pagsulti sa mabination nga mga pulong, sa pagsulti sa kamatuoran, sa pag-ampo, ug sa pagpasiugda og kalinaw.)
Basaha ang Santiago 3:3–5. Unsa ang gitandi ni Santiago sa niini nga mga bersikulo? (Ang pagtaud sa bokado sa kabayo ug sa timon sa usa ka sakayan. Ikaw mahimo nga mopasabut nga ang bokado usa ka bahin nga puthaw sa pugong nga gisulod sa baba sa kabayo.) Unsa ang atong makat-unan gikan niini nga mga pagtandi? Sa unsa nga paagi nga ang pagkat-on sa pagpugong sa atong mga pulong makatabang kanato sa pagpugong sa ubang mga bahin sa atong kinabuhi?
Basaha ang Santiago 3:9–13. Unsa ang gitudlo ni Santiago niini nga mga bersikulo mahitungod sa pagpugong sa atong sinultihan? (Hisguti ang mga paggamit niini nga tambag uban sa mga sakop sa klase. Sama pananglit, kon adunay mga sakop sa klase nga mga priests, ikaw mahimong maghisgot sa kamahinungdanon sa pagmatngon nga ang ilang mga sinultihan limpyo sulod sa semana aron sila takus nga mopanalangin sa sakramento sa Domingo. Usa ka sama nga paggamit mahimo nga buhaton alang niadtong nagtudlo sa ebanghelyo.)
Sa unsa nga paagi nga ang pagpugong sa atong mga dila makatabang sa pagpasiugda og kalinaw? (Tan-awa sa Santiago 3:16–18.) Ngano nga ang pagpugong sa atong mga dila mahinungdanon nga bahin sa putli nga relihiyon?

4. Kita kinahanglang “motuman sa pulong,” magpakita sa atong hugot nga pagtuo pinaagi sa atong mga buhat.

Basaha ug hisguti ang pinili nga mga bersikulo gikan sa Santiago 1:22–25, 27; 2:14–26; 4:17.

Unsa ang gipasabut sa “tigpaminaw lamang” sa pulong sa (Santiago 1:22). Sa unsa nga paagi nga ang “tigpaminaw lamang” naglingla sa ilang mga kaugalingon? (Tan-awa sa Santiago 1:22–25; 4:17.) Unsa ang mga panalangin sa “pagtuman sa pulong”?
Unsa ang gitudlo ni Santiago mahitungod sa relasyon tali sa hugot nga pagtuo ug sa mga buhat? (Tan-awa sa Santiago 2:14–26.) Ngano nga ang hugot nga pagtuo patay kon kini walay binuhatan? Sa unsa nga paagi nga ang maayong mga binuhatan maglig-on sa atong hugot nga pagtuo diha ni Jesukristo?
Unsa ang gipasabut pag-ayo ni Santiago nga kita kinahanglan mopuyo sa putli nga relihiyon? (Tan-awa sa Santiago 1:27 o pahinumdumi ang mga sakop sa klase sa pang-atensyon nga kalihokan.) Ngano sa inyong hunahuna nga ang pagduaw ug pagtabang sa mga tawo nga nanginahanglan kabahin sa putli nga relihiyon?
Unsa ang atong mabuhat sa pagpabilin “nga walay lama gikan sa kalibutan”? (Santiago 1:27 tan-awa sa D&P 59:9). Sa unsa nga paagi nga ang pagtambong sa simbahan ug pag-ambit sa sakramento matag semana makatabang kanato sa pagpabilin nga walay lama gikan sa kalibutan?

Panapos

Ipamatuod ang kamatuoran sa mga pagtulun-an ni Santiago. Hatagi og gibugaton nga kita makapuyo sa atong relihiyon nga labawng putli pinaagi sa pagkamapailubon diha sa kasakit, pag-ampo sa Dios pinaagi sa hugot nga pag-tuo, pagpahanas sa atong mga kaugalingon, ug paghimog maayong mga binuhatan.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimong mogamit sa usa o pipila niini nga mga ideya isip kabahin sa leksyon.

1. Pagpasundayag sa sakop sa klase

Sa semana sa dili pa ang leksyon itudlo, paghangyo og lima ka mga sakop sa klase nga matag usa magtuon sa nagkalainlain nga kapitulo sa Santiago. Sa pagsugod sa klase (human dayon sa pang-atensyon nga kalihokan, kon ikaw migamit niini), ipaambit niini nga mga sakop ang ilang mga pagsabut sa mga kapitulo nga ilang natun-an.

2. Pagpasalida sa video

Basaha ang Santiago 1:27 ug unya ipasundayag ang “The Body Is a Temple,” unom ka minuto nga bahin sa video gikan sa New Testament Video Presentations (53914). Hisguti kon unsa ang gitudlo niini nga pasundayag sa video mahitungod sa paghimo sa atong mga kaugalingon nga mga walay lama gikan sa kalibutan.

3. Dugang nga paghisgut-hisgot mahitungod sa basahon ni Santiago

Diha sa Hubad ni Joseph Smith sa Santiago 1:12, ang pulong paglahutay giusab ngadto sa pagsalikway. Unsa ang kalainan tali sa paglahutay sa mga pagtintal ug pagsalikway sa mga pagtintal? Unsa ang mga saad niadtong mosalikway sa pagtintal? (Tan-awa sa Santiago 1:12; 4:7.)
Unsa ang gitudlo ni Santiago mahitungod sa paghukom sa uban? (Tan-awa sa Santiago 2:1–9.) Ngano nga ang uban nga mga tawo mohukom sa uban pinaagi sa ilang kalibutanon nga mga kabtangan o materyal nga mga katigayunan? Sa unsa nga paagi nga kita makakat-on sa pagtan-aw sa mga kasingkasing sa mga tawo ug dili sa panagway, nga ingon sa gihimo sa Dios? (Tan-awa sa 1 Samuel 16:7; D&P 38:24–27.)
Unsa ang gitudlo ni Santiago mahitungod sa sangputanan sa kasina ug kahigal? (Tan-awa sa Santiago 3:16; 4:1–6.) Sa unsa nga paagi nga kita makabuntog sa pagbati sa kasina o kahigal? (Tan-awa sa Santiago 4:7–10.)
Unsa ang gitudlo ni Santiago mahitungod sa pagpangalagad ngadto sa masakiton? (Tan-awa sa Santiago 5:14–15.) Sa unsa nga paagi nga kamo napanalanginan o nakakita sa uban nga napanalanginan pinaagi sa makaayo nga gahum sa priesthood?
Si Santiago mipasabut pag-ayo sa kamahinungdanon sa pagtabang sa mga tawo kinsa “nahisalaag gikan sa kamatuoran” (Santiago 5:19–20). Sa unsa nga paagi nga kita makahimo niini?