Sunday School: Doktrina sa Ebanghelyo
Leksyon 29: ‘Ang mga Tinun-an Nag-anam nag Kadaghan’

Leksyon 29

“Ang mga Tinun-an Nag-anam nag Kadaghan”

Mga Buhat 6–9

Katuyoan

Aron pagtabang sa mga sakop sa klase sa pag-ila nga ang buluhaton sa Simbahan gihimo pinaagi sa daghang mga tawo, ang tanan kanila naghatag sa ilang mga talento aron paglig-on sa Simbahan.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mga Buhat 6:1–7. Ang Napulog Duha ka mga Apostoles miordinar sa pito ka mga tawo aron pagdumala sa temporal nga buluhaton diha sa Simbahan.

    2. Mga Buhat 6:8–7:60. Si Esteban, usa sa pito, mipamatuod sa atubangan sa Sanhedrin. Ang iyang mga pulong nakapasuko sa mga katawhan kinsa naminaw, ug sila midala kaniya gawas sa dakbayan ug mibato kaniya hangtud nga namatay.

    3. Mga Buhat 8:4–40. Si Felipe, lain sa pito, misangyaw ug mihimo og mga milagro didto sa Samaria. Siya mitudlo ug mibunyag sa Etiopiahanon nga eunoco.

    4. Mga Buhat 8:1–3; 9:1–31. Si Saulo migukod sa Simbahan hangtud nga siya nakadawat sa panan-awon ni Jesukristo. Si Saulo nakabig ug gibunyagan ug misugod sa pagsangyaw sa ebanghelyo.

  2. Dugang nga basahonon: Mga Buhat 22:1–16; 26:1–5, 9–18.

  3. Sugyot alang sa pagtudlo: Hinumdumi nga ikaw nagtudlo sa klase sa mga indibidwal. Mahimong adunay dako nga kalainan ang ilang mga kasinatian sa kinabuhi, ang gidugayon sa pagkasakop diha sa Simbahan, ang pagsabut sa doktrina ug mga ordinansa sa ebanghelyo, mga talento ug mga kahanas, ug mga kahigayunan alang sa pagtuon. Paninguhaa ang pagsabut sa mga kalainan sa mga sakop sa klase ug tabangi ang matag sakop nga makasabut sa mga kamatuoran nga gitudlo. (Tan-awa sa Teaching, No Greater Call [36123], mga pahina 33–39.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pangutan-a ang mga sakop sa klase:

Pang-atensyon nga Kalihokan

  • Unsa nga bahin sa inyong lawas nga sa inyong pagtuo mao ang labing mahinungdanon? Ngano man?

Human nga ang daghang mga sakop sa klase nakatubag, ipangutana:

Pang-atensyon nga Kalihokan

  • Kinsa nga miyembro sa Simbahan nga sa inyong pagtuo mao ang labing mahinungdanon? Ngano man?

Tuguti pag-usab ang pipila ka mga sakop sa klase nga makatubag. Unya ipabasa sa usa ka sakop sa klase ang 1 Mga Taga-Corinto 12:14–21, ug ipabasa sa laing sakop sa klase ang 1 Mga Taga-Corinto 12:12–13. Ipasabut nga dinhi niini nga mga bersikulo si Apostol Pablo mitandi sa mga miyembro sa Simbahan ngadto sa mga bahin sa lawas. Sama nga ang tiil, ang kamot, ang dunggan, ug ang mata mga mahinungdanon diha sa ilang magkalahi nga mga kagamitan, mao usab ang tanan nga mga miyembro sa Simbahan mga mahinungdanon uban sa ilang nagkalainlain nga mga kahanas ug mga talento.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, hisguti kon sa unsang paagi kini magamit sa inadlaw-adlaw nga kinabuhi. Awhaga ang mga sakop sa klase sa pagpaambit sa mga kasinatian nga may kalabutan ngadto sa mga baruganan diha sa kasulatan.

1. Pito ka mga tawo ang giordinahan aron pagdumala sa temporal nga buluhaton diha sa Simbahan.

Basaha ug hisguti ang Mga Buhat 6:1–7. Ipasabut nga ubos sa pagdumala sa mga Apostoles ang Simbahan kusog nga mitubo, nagdugang sa mga nakabig sa daghang mga nasud. Kini mao ang hinungdan sa dakong kalipay, apan kini usab nagmugna og daghang mga hagit. Samtang nagtubo ang Simbahan, ang mga Apostoles nagkinahanglan sa ubang mga miyembro nga motabang sa pagdumala sa Simbahan ug pagtukod sa gingharian sa Dios.

  • Samtang ang Simbahan nagtubo, ang mga grupo sulod niini usahay dili magkauyon sa usag usa. Nganong ang uban nga mga Griyego nga mga sakop nagbagulbol man batok sa mga miyembro nga mga Hebreohanon? (Tan-awa sa Mga Buhat 6:1.) Sa unsa nga paagi nga kita ingon nga mga miyembro sa Simbahan makabuntog sa dili pagpanag-uyon ug mga panagbahin taliwala kanato, ma pinasikad man kini sa etniko, ekonomikanhon, kultura o uban pang mga kalainan? Ngano nga mahinungdanon nga kita mobuntog sa ingon nga panagbahin? (Tan-awa sa 2 Nephi 26:33; D&P 38:26–27.)

    Si Presidente Howard W. Hunter miingon: “Kini anaa diha sa pagsabut ug sa pagdawat [sa] malukpanon nga pagkaamahan sa Dios nga ang tanan nga tawhanong mga nilalang labing makapasalamat sa pagtagad sa Dios alang kanila ug sa ilang relasyon ngadto sa usag usa. Kini usa ka mensahe sa kinabuhi ug gugma nga moigo sa tumang kahingpit batok sa tanan nga makapugong nga mga tradisyon pinasikad sa kaliwat, sa pinulongan, sa ekonomikanhon o politikanhon nga kahimtang, sa nakab-ot nga edukasyon, o sa kultural nga kasinatian. Kay kitang tanan naggikan sa sama nga espirituhanong kaliwatan. Kita adunay balaan nga kagikanan; matag tawo usa ka espirituhanon nga anak sa Dios” (sa Conference Report, Okt. 1991, 22; o Ensign, Nob. 1991, 18).

  • Sa unsa nga paagi nga ang panaglahi sa mga miyembro makapalambo ug makapalig-on sa Simbahan? Sa unsa nga paagi nga kita magkalahi gikan sa usag usa ug sa gihapon magkahiusa?

  • Ang mga Apostoles mibati nga sila dili kinahanglang mogahin og panahon gikan sa pagtudlo sa ebanghelyo aron lang paghusay sa mga panagsumpaki ug pagtagad sa uban pang temporal nga atimanonon (Mga Buhat 6:2). Giunsa nila pagsulbad kini nga suliran? (Tan-awa sa Mga Buhat 6:3–6.) Ngano nga mahinungdanon man alang sa buluhaton sa Simbahan nga bahinon sa daghang mga tawo? Sa unsa nga paagi nga kamo napanalanginan pinaagi sa mga kahigayunan sa pag-alagad diha sa Simbahan?

  • Unsa nga mga kausaban sa organisasyon ang gidasig sa Ginoo ngadto sa mga lider sa Simbahan sa ulahing mga adlaw nga buhaton samtang ang Simbahan nagtubo? (Ang mga tubag mahimong maglakip sa pagdugang sa mga Korum diha sa Seventy o sa organisasyon diha sa Simbahan ngadto sa mga dapit nga gidumala ubos sa Area Presidency.) Sa unsa nga paagi nga kining mga kausaban nakatabang pagtagbaw sa mga panginahanglan sa mga miyembro sa Simbahan sa tibuok kalibutan?

2. Si Esteban mipamatuod sa atubangan sa Sanhedrin ug gibato hangtud namatay.

Hisguti ang Mga Buhat 6:8–7:60. Dapita ang mga sakop sa klase sa pagbasa og kusog sa pinili nga mga bersikulo.

  • Si Esteban, usa sa pito ka mga tawo nga gitawag aron pagtabang sa Napulog Duha ka mga Apostoles, gidakop ubos sa sayop nga pasangil sa pagpanamastamas sa ngalan sa Dios ug gidala sa atubangan sa Sanhedrin, ang konseho sa mga Judeo. (Mga Buhat 6:11–15; kon gikinahanglan, ipasabut nga ang pagpanamastamas mao ang pagkawalay pagtahud ngadto sa Dios o sa sagrado nga mga butang). Unsa ang gibuhat ni Esteban samtang siya miatubang sa Sanhedrin? (Tan-awa sa Mga Buhat 7:1–53. Siya mi-istorya sa kabahin sa kasaysayan sa mga Israelita.)

  • Sa inyong hunahuna ngano nga si Esteban mihatag man og gibug-aton sa mahinungdanon nga mga butang nga nahimo sa Ginoo diha sa kasaysayan sa Israel? Sa unsang paagi nga kita makasiguro nga kita dili makalimot sa mga gihimo sa Ginoo diha sa atong mga kinabuhi? Sa unsa nga paagi nga ang paghinumdom sa miagi nga mga panalangin gikan sa Ginoo makatabang kanato nga magpabilin nga matinud-anon karon?

  • Sa inyong hunahuna ngano nga si Esteban mipasabut man pag-ayo sa kanunay nga pagkamalimtanon ug pagka dili masulundon sa Israel ngadto sa Dios? Unsa nga mga pagtandi ang gihimo ni Esteban tali sa iyang tigpaminaw ug sa pagkadili masulundon sa unang mga Israelita? (Tan-awa sa Mga Buhat 7:51–53.) Unsa ang reaksyon sa mga tawo niini nga pagtandi? (Tan-awa sa Mga Buhat 7:54.)

  • Unsa nga panan-awon ang nadawat ni Esteban pagkahuman niya pagsulti? (Tan-awa sa Mga Buhat 7:55–56.) Unsa ang gibuhat sa mga tawo sa dihang siya misulti kanila sa iyang panan-awon? (Tan-awa sa Mga Buhat 7:57–58.) Unsa ang gipadayag sa katapusang pulong ni Esteban mahitungod sa iyang pagkatinunan? (Tan-awa sa Mga Buhat 7:59–60.)

3. Si Felipe misangyaw ug mihimo og mga milagro didto sa Samaria.

Basaha ug hisguti ang pinili nga mga bersikulo gikan sa Mga Buhat 8:4–40.

  • Si Felipe, lain sa pito ka mga tawo nga gipili aron pagtabang sa mga Apostoles, misangyaw ug mihimo og mga milagro didto sa Samaria. Unsay gibuhat sa mga katawhan sa Samaria kalabut sa mensahe ni Felipe? (Tan-awa sa Mga Buhat 8:6–8, 12.) Sa unsang paagi nga ang mga tawo nakadawat man sa gasa sa Espiritu Santo? (Tan-awa sa Mga Buhat 8:14–17.)

  • Usa sa Samarianhon nga mga nakabig mao ang usa ka tigsalamangka nga ginganlan og Simon. Kinsa may gipasidunggan ni Simon tungod sa iyang nahimo pinaagi sa salamangka? (Tan-awa Mga Buhat 8:9–11.) Kinsa may gipasidunggan sa mga Apostoles tungod sa mga milagro nga ilang nahimo? (Tan-awa sa Mga Buhat 4:7–10.) Ngano nga kini nga kalainan mahinungdanon man? (Itudlo nga daghang mga tawo kinsa mag-indigay alang sa atong pagtagad ug pag-unong mibuhat sa ingon aron paghimaya sa ilang mga kaugalingon. Ang kalainan, ang mga sulugoon sa Dios mihatag ngadto kaniya sa himaya. Ang pagsabut niini nga kalainan mahimong makatabang kanato sa pagtimbang-timbang sa daghang mga impluwensya diha sa atong mga kinabuhi.)

  • Unsa ang gibuhat ni Simon sa dihang iyang nakita ang mga Apostoles nga mihatag sa gasa sa Espiritu Santo? (Tan-awa sa Mga Buhat 8:18–19.) Giunsa ni Pedro pagtubag ang hangyo ni Simon? (Tan-awa sa Mga Buhat 8:20–23.) Sa unsa nga paagi nga ang usa ka tawo mahimong takus sa pagdawat sa gahum sa priesthood? (Tan-awa sa Mga Hebreohanon 5:4; D&P 121:36.)

    Si Presidente James E. Faust miingon: “Kining labing dako sa tanan nga mga gahum, ang gahum sa priesthood, dili magamit sa paagi sama sa giunsa kini nga gahum paggamit diha sa kalibutan. Kini dili mapalit o mabaligya…. Ang kalibutanon nga gahum kasagarang gigamit sa sinalbahis. Bisan pa niana, nga gahum sa priesthood magamit lamang pinaagi niadtong mga baruganan sa pagkamatarung diin ang priesthood gidumala” (sa Conference Report, Abr. 1997, 59–60; o Ensign, Mayo 1997, 43).

  • Giunsa ni Felipe sa paghimamat ang Etiopiahanon nga eunoco? (Tan-awa sa Mga Buhat 8:25–29.) Unsa nga mga panalangin ang miabut ni Felipe ug ngadto sa Etiopiahanon tungod kay si Felipe misunod sa Espiritu? (Tan-awa sa Mga Buhat 8:30–38.) Unsa nga mga panalangin ang miabut kaninyo (o ngadto sa usa nga inyong nailhan) tungod kay kamo misunod sa Espiritu?

  • Sa unsa nga paagi nga ang Etiopiahanon mipakita sa iyang pagkamapainubsanon? (Tan-awa sa Mga Buhat 8:30–39.) Sa unsa nga paagi nga ang pagkamapainubsanon makatabang kanato nga makasabut ug makadawat sa pulong sa Dios?

4. Si Saulo nakabig ug nabunyagan ug nagsugod sa pagsangyaw sa ebanghelyo.

Basaha ug hisguti ang pinili nga mga bersikulo gikan sa Mga Buhat 8:1–3 ug 9:1–31. Ipasabut nga si Saulo usa ka Pariseo kinsa aktibo nga migukod sa unang mga Santos. Siya didto atol sa pagbato kang Esteban (Mga Buhat 7:58) ug maoy responsable sa pagkabilanggo ug pagkamatay sa daghang mga miyembro sa Simbahan (Mga Buhat 8:3; 22:4). Bisan pa niana, siya nakasinati sa milagroso nga pagkakabig ug nahimong usa ka bantugan nga misyonaryo.

  • Unsa ang hinungdan sa pagkausab ni Saulo gikan sa pagka tiggukod sa mga Santos ngadto sa pagkabantugan nga sulugoon sa Ginoo? (Tan-awa sa Mga Buhat 9:1–9, 17.) Itudlo nga si Saulo nakabig sa dihang siya nakadungog sa tingog sa Ginoo. Sa unsang paagi nga atong madungog ang tingog sa Ginoo? (Tan-awa sa D&P 1:38; 6:23; 8:2; 18:34–36.) Sa unsang paagi nga ang pagkadungog sa iyang tingog makatabang kanato nga mahimong makabig?

  • Pahinumdumi ang mga sakop sa klase nga ang pagkakabig kasagaran usa ka mahilum, inanay nga kasinatian, dili usa ka kalit, milagroso nga kasinatian sama sa kang Saulo. Si Elder Robert D. Hales miingon, “Sa tukmang panahon ang usa ka tawo mahimong [makasinati sama sa kang Saulo] apan sa kasagaran, ang pagkakabig mahitabo sulod sa taas nga panahon, samtang ang pagtuon, pag-ampo, kasinatian, ug hugot nga pagtuo makatabang kanato sa pagpatubo sa atong pagpamatuod ug pagkakabig” (sa Conference Report, Abr. 1997, 111; o Ensign, Mayo 1997, 80).

  • Si Elder Ezra Taft Benson miingon nga ang pangutana ni Saulo, “Ginoo, unsa ang imong buot nga akong buhaton?” mao ang labing mahinungdanon nga pangutana nga kita makapangutana niini nga kinabuhi (sa Conference Report, Okt. 1972, 53; o Ensign, Ene. 1973, 57). Ngano nga mahinungdanon man nga kita mangutana niini nga pangutana? Sa unsa nga paagi nga kamo napanalanginan samtang kamo miuyon sa kabubut-on sa Dios alang kaninyo?

  • Ngano nga si Ananias nagduhaduha sa pagpakigkita ni Saulo? (Tan-awa sa Mga Buhat 9:10–14.) Ngano nga si Ananias miadto bisan pa sa iyang mga pagduhaduha? (Tan-awa sa Mga Buhat 9:15–6.) Unsa ang atong makat-unan gikan sa mga lihok ni Ananias? (Ang mga tubag mahimong maglakip nga ang Dios makahatag kanato og kadasig sa pagbuhat bisan unsa ang iyang gihangyo gikan kanato ug nga kita kinahanglan nga dili gayud mobiya sa usa ka tawo, bisan pa kon siya ingon og dili na matabangan sa espirituhanong paagi.)

  • Unsa ang gibuhat ni Ananias alang ni Saulo? (Tan-awa sa Mga Buhat 9:17–18.) Unsa ang gibuhat ni Saulo human siya mabunyagi? (Tan-awa sa Mga Buhat 9:19–22, 26–29.) Unsa ang atong mga responsibilidad kon kita nakabig na ngadto sa ebanghelyo ni Jesukristo? (Tan-awa sa Lucas 22:32; Juan 8:31; Mosiah 18:8–10; D&P 88:81.)

Panapos

Ipasabut nga kita, sama ni Esteban, Felipe, ug Saulo nagpuyo sa panahon sa dihang ang Simbahan kusog nga nagtubo. Ipamatuod nga ang Ginoo buot nga ang matag usa kanato moalagad diha sa iyang gingharian samtang kini nagtubo. Awhaga ang mga sakop sa klase sa pag-ila ug sa pagpasalamat sa nagkalainlaing mga kinaiya, mga talento, ug mga kasinatian nga ikahatag sa matag miyembro sa ward o branch ngadto sa pag-alagad sa Ginoo.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. “Kini malisud alang kanimo sa pagpatid batok sa mga tuslok” (Mga Buhat 9:5)

  • Ipabasa sa usa ka sakop sa klase ang Mga Buhat 9:5. Unsa ang buot ipasabut sa “pagpatid batok sa mga tuslok”? (Ang pagbatok sa panudlo o pahimangno. Usa ka mahait nga tusok nga usahay gamiton sa pagtuslok sa mga hayop aron pagpalihok kanila pagdali o diha sa piho nga padulngan. Kon ang usa ka hayop mopatid batok niini nga tusok samtang gituslok, kini makapasakit pag-ayo sa hayop.) Sa unsa nga paagi nga ang mga lihok ni Saulo sa wala pa ang iyang panan-awon makadaut man kaniya? Sa unsang paagi nga atong mapasakitan ang atong mga kaugalingon kon kita makigbatok sa kamatuoran?

2. Pangbatan-on nga kalihokan

Isulat ang mosunod nga mga pulong diha sa ginunting nga mga papel o isulat diha sa pisara: Ananias, pagtugot, dautan, mga mata, Espiritu Santo, kahayag, pagsangyaw, mga himbis, dili makatingog, nagkurog, galamiton, tingog.

Patun-i sa mga sakop sa klase ang Mga Buhat 9:1–22 ug ipatino ang sangputanan ug han-ay niini nga mga pulong diha sa sugilanon sa pagkakabig ni Saulo. Unya ipasaysay kanila ang sugilanon, ginamit ang tanang mga pulong.