Sunday School: Doktrina sa Ebanghelyo
Leksyon 5: ‘Pagpakatawo Pag-usab’

Leksyon 5

“Pagpakatawo Pag-usab”

Juan 3–4

Katuyoan

Aron pagtabang sa mga sakop sa klase nga makasabut nga aron makadawat og walay katapusan nga kinabuhi, kita kinahanglan “magpakatawo pag-usab” ug magpadayon sa pagsunod si Jesukristo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Juan 3:1–22, si Jesus nagtudlo ni Nicodemo nga ang tanan kinahanglan magpakatawo diha sa tubig ug sa Espiritu aron makasulod sa gingharian sa Dios. Si Jesus nagtudlo nga siya mao ang bugtong Anak sa Dios, nga gipadala aron pagluwas sa katawhan.

    2. Juan 4:1–42. Si Jesus nagtudlo sa usa ka babayeng Samarianhon sa Atabay ni Jacob. Daghan nga mga Samarianhon ang nakabig.

  2. Dugang nga basahonon: Ang Giya ngadto sa mga Kasulatan, “Buhi nga Tubig.”

  3. Kon ikaw mogamit sa pang-atensyon nga kalihokan, pagdala sa klase og:

    1. Usa ka himsog, maayong pagkabisbis nga tanum ug usa ka tanum nga nalaya tungod sa kakulang sa tubig (o pagdrowing diha sa pisara og usa ka tanum nga himsog ug usa ka nalaya nga tanum, sumala sa gipakita sa pang-atensyon nga kalihokan.)

    2. Usa ka pitsel nga may tubig.

  4. Kon ang mosunod nga mga materyal anaa, gamita ang uban niini sa panahon sa leksyon:

    1. Ang hulagway nga Si Kristo ug ang Samarianhon nga Babaye (62169 853; Pakete sa mga Hulagway sa Ebanghelyo 217).

    2. “The Woman at the Well,” walo ka minuto nga yugto gikan sa New Testament Video Presentations (53914).

    3. Usa ka mapa sa Balaan nga Yuta sa mga panahon sa Bag-ong Tugon (mapa 11 diha sa LDS nga edisyon sa Biblia nga giimprinta niadtong 1999 o lapas pa, mapa 14 sa gipang-imprinta sa wala pay 1999).

  5. Sugyot alang sa pagtudlo: Nasayud nga ang matag tawo maoy responsable sa pagkat-on sa ebanghelyo, tingali makapangutana kita, Unsa may katungdanan sa mga magtutudlo? Kana mao ang pagtabang sa matag tawo aron nga ilang barugan ang responsibilidad nga magkat-on sa ebanghelyo––sa pagpukaw sa ilang tinguha nga magtuon, makasabut, ug magsunod sa ebanghelyo ug pakiton sila kon unsaon ni paghimo” (Teaching, No Greater Call [36123], 61).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang mahimsog nga tanum ug ang nalaya nga tanum (tan-awa sa seksyon sa “Pagpangandam”), o pagdrowing niini diha sa pisara sumala sa gipakita sa ubos. Ipakita usab ang pitsel nga may tubig.

Pang-atensyon nga Kalihokan

  • Unsa ang mahitabo sa usa ka tanum kon kini wala kabubu-i og tubig? Unsa ang mahitabo kanato kon kita dili makadawat og tubig?

Ipasabut nga sama ra nga kita mamatay sa pisikal kon kita dili makadawat sa pisikal nga tubig, kita mamatay sa espirituhanong paagi kon kita dili makadawat sa espirituhanong tubig. Kini nga leksyon naghisgut sa mga pagtulun-an kalabut sa pagpakatawo diha sa tubig ug sa Espiritu ug kalabut sa buhi nga tubig nga iyang gitanyag.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi kini magamit sa inadlaw-adlaw nga kinabuhi. Awhaga ang mga sakop sa klase sa pagpaambit og mga kasinatian nga may kalabutan sa mga baruganan nga anaa sa kasulatan.

1. Si Jesus nagtudlo ni Nicodemo nga ang tanan kinahanglan magpakatawo diha sa tubig ug sa Espiritu aron makasulod sa gingharian sa Dios.

Hisguti ang Juan 3:1–22. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga si Nicodemo usa ka lider sa komunidad sa mga Judeo. Siya miduol ni Jesus sa pagkahibalo nga si Jesus usa “ka magtutudlo nga gikan sa Dios” (Juan 3:2).

  • Unsa ang gitudlo ni Jesus ni Nicodemo nga kinahanglan nga iyang buhaton aron makasulod sa gingharian sa Dios? (Tan-awa sa Juan 3:5.) Unsa ang buot ipasabut sa “magpakatawo sa tubig”? (Juan 3:5; pagabunyagan.) Sa unsa nga paagi nga ang bunyag nahimong usa ka simbolo sa pagpakatawo pag-usab? (Pinaagi sa pag-unlod diha sa tubig nagsimbolo kini sa kamatayon o paglubong sa atong nangaging mga sala; kon kita mohaw-as gikan sa tubig, kita magsugod og usa ka bag-ong kinabuhi.) Unsa ang gipasabut sa “magpakatawo … sa Espiritu”? (Juan 3:5; ang pagdawat sa gasa sa Espiritu Santo).

  • Si Elder Bruce R. McConkie nagtudlo nga “ang mga miyembro sa Simbahan wala magpakatawo pag-usab pinaagi sa usa ka bunyag lamang” (Doctrinal New Testament Commentary, 3 vols. [1996–73], 1:142). Gawas nga gibunyagan ug nakadawat sa gasa sa Espiritu Santo, unsa pa ang gikinahanglan aron mamahimong matawo pag-usab? (Tan-awa sa Juan 3:16, 18; Mosiah 5:1–7; 27:25–26; Alma 5:14–35; 22:15–18. Mahimo nimong pamarkahan sa mga sakop sa klase kining mga bersikulo nga may kalabutan sa pagpakatawo pag-usab. Usa ka ehemplo nga lista gihatag sa ubos. Ipasabut nga ang mga bersikulo gikan sa Basahon ni Mormon nagtin-aw unsa ang gipasabut sa pagpakatawo pag-usab.)

    1. Nagtuo diha ni Jesukristo (Juan 3:16, 18).

    2. Nakasinati “og usa ka daku nga kausaban … sa among mga kasingkasing, nga kami wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2; tan-awa usab sa Alma 5:12–14, 26).

    3. Pagka “usab gikan [sa] kalibutanon ug napukan nga kahimtang, ngadto sa usa ka kahimtang sa pagkamatarung” (Mosiah 27:25).

    4. Mahimong “anak nga mga lalaki ug anak nga mga babaye [sa Dios]” (Mosiah 5:7; 27:25).

    5. Mahimong “bag-o nga mga nilalang” (Mosiah 27:26).

    6. Aduna “sa hitsura sa Dios nga nakulit sa [atong] mga panagway” (Alma 5:19; tan-awa usab sa bersikulo 14).

    7. Maghinulsol aron ang atong “mga saput mahugasan hangtud kini malimpyo gikan sa tanan nga mansa, pinaagi sa dugo ni [Kristo]” (Alma 5:21; tan-awa usab sa Alma 5:19, 33–34; 22:18).

  • Si Elder McConkie nagtudlo usab nga ang pagpakatawo pag-usab “dili mahitabo diha-diha dayon. [Kini] usa ka proseso” (“Jesus Christ and Him Crucified,” sa 1976 Doctrinal Speeches of the Year, 399). Unsay atong mabuhat aron mapadayon kini nga proseso sa atong tibuok kinabuhi? (Tan-awa sa 2 Nephi 31:19–20.) Unsaon nato sa pagbuntog sa kawalay paglaum diha sa atong espirituhanon nga pag-uswag? Unsa nga mga kausaban ang inyong namatikdan sa inyong kaugalingon o sa laing tawo sa panahon sa proseso sa pagpakatawo pag-usab?

  • Pagdapit og usa ka sakop sa klase sa pagbasa og kusog sa Juan 3:14–18. Unsay kalabutan niini nga mga kamatuoran kabahin sa misyon sa Manluluwas ngadto sa iyang sugo nga kita magpakatawo pag-usab?

  • Si Jesus migamit og mga konsepto kabahin sa kahayag ug kangitngit aron pagtudlo ni Nicodemo (Juan 3:19–21). Ngano nga ang uban mipili man sa kangitngit kay sa kahayag? Unsaon man nato sa pagpadayon sa atong abilidad sa paghigugma sa kahayag ug pagsalikway sa kangitngit? Unsa nga mga saad ang gihimo sa Ginoo ngadto niadtong moduol sa kahayag? (Tan-awa sa D&P 50:24; 88:67.)

2. Si Jesus nagtudlo sa usa ka babayeng Samarianhon sa Atabay ni Jacob.

Basaha ug hisguti ang pinili nga mga bersikulo gikan sa Juan 4:1–42. Ipakita ang mapa sa Balaan nga Yuta. Ipasabut nga samtang si Jesus ug ang iyang mga tinun-an nagpanaw gikan sa Judea paingon sa Galilea (mahimo nimong itudlo kining mga dapita diha sa mapa), sila mihunong aron sa pagpahulay sa Atabay ni Jacob didto sa Samaria. Samtang si Jesus naglingkod sa kilid sa atabay, usa ka babayeng Samarianhon ang miabut aron pagkuha og tubig.

Ipakita ang hulagway sa babaye diha sa atabay. Kon ikaw naggamit sa video nga “The Woman at the Well,” ipasalida kini karon.

  • Ang mga Judeo “dili motagad sa mga Samarianhon” (Juan 4:9) ug kasagaran maglikay sa Samaria kon magpanaw. Apan si Jesus mituyo pag-adto sa Samaria. Unsa may gipadayag niini kabahin sa iyang pagkatawo? Kinsa man ang ubang mga “Samarianhon” sa kalibutan karon? (Ang mga tubag mahimong maglakip ni bisan kinsa nga tawo o pundok nga giisip nga ubos kaayo.) Unsaon man nato sila pagtagad?

  • Unsa may gibuhat sa babayeng Samarianhon nga nahimo na lang sayon para ni Jesus ang pagtudlo kaniya? (Tan-awa sa Juan 4:9, 11–12, 15, 19, 25. Ang mga tubag mahimong maglakip nga siya mapailubon, siya matinguhaon nga makahibalo pa og dugang, ug siya mituo sa mga pulong ni Jesus.) Unsa ang atong buhaton aron mahimong mas madawaton sa mga pagtulun-an sa Manluluwas?

  • Sa unsa nga paagi nga ang babayeng Samarianhon nausab man samtang si Jesus nagsulti ngadto kaniya? Giunsa pagtabang ni Jesus ang pagpahinabo niini nga kausaban? (Ang mga tubag mahimong maglakip nga si Jesus nagtudlo kaniya sa paagi nga sayon ra niyang masabtan, mipamatuod si Jesus sa iyang kaugalingon, migamit siya sa simbolo sa tubig sa talagsaon gyud nga paagi, ug mipakita siya og kalooy.) Unsaon man nato sa pagsunod sa iyang ehemplo samtang nagtudlo kita sa uban?

  • Si Jesus miingon sa babayeng Samarianhon nga siya makahatag kaniya og “buhi nga tubig” (Juan 4:10) Unsa sa inyong pagtuo ang gipasabut sa “buhi nga tubig”? (Tan-awa sa 1 Nephi 11:25; D&P 63:23. Ang mga tubag mahimong maglakip sa mga doktrina sa ebanghelyo, sa gugma sa Dios, ug sa Pagula.) Unsaon man nato pag-angkon ang buhi nga tubig? Giunsa man niining buhi nga tubig pagpanalangin kaninyo?

  • Ang babayeng Samarianhon miadto sa atabay alang sa tubig (Juan 4:7). Hinoon, human siya nakigsulti ni Jesus, iyang gibiyaan ang iyang pitsel sa atabay ug miadto aron pagsulti sa uban mahitungod sa kasinatian (Juan 4:28–29). Unsa ang atong makat-unan gikan sa iyang ehemplo?

  • Sa unsang paagiha nga ang ubang tawo napanalanginan tungod sa hugot nga pagtuo sa babayeng Samarianhon? (Tan-awa sa Juan 4:39–42.) Sa unsang paagi kamo napanalanginan o nakakita sa uban nga napanalanginan tungod kay mituo sa Ginoo? Sa unsa nga paagi nga ang atong hugot nga pagtuo makaapekto niadtong naglibot kanato?

Panapos

Kon ikaw naggamit sa pang-atensyon nga kalihokan, ipakita pag-usab ang mga tanum ug ang pitsel nga may tubig. Ipasabut nga sama sa tanum nga nanginahanglan og tubig aron mabuhi, kita gikinahanglan usab nga mosunod sa Manluluwas ug sa iyang mga pagtulun-an aron matawo pag-usab ug makabaton sa kinabuhing walay katapusan.

Ipamatuod ang mga kamatuoran nga imong gihisgutan sa panahon sa leksyon. Hagda ang mga sakop sa klase nga magtinguha kang Jesukristo, mosunod kaniya, ug magpadayon diha sa proseso sa pagpakatawo pag-usab.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Ako dili mao si Kristo, apan … gipadala ako sa pag-una kaniya” (Juan 3:28)

  • Diha sa Juan 3:25–36, unsa ang gipakitang kinaiya ni Juan kabahin sa iyang tahas nga may kalabutan sa tahas sa Manluluwas? Sa unsa nga paagi nga ang gipakitang kinaiya ni Juan nagpadayag og tinuod nga pagkatinun-an? Unsaon nato paggamit niini nga kinaiya sa atong pag-alagad diha sa Simbahan?

2. “Ang mga umahan … puti na aron pagaanihon.” (Juan 4:35)

  • Unsa ang gitudlo ni Jesus sa iyang mga tinun-an kalabut sa misyonaryo nga buhat diha sa Juan 4:35–38? Unsay iyang gipasabut sa dihang siya miingon nga ang mga umahan … puti na aron pagaanihon? Giunsa sa Manluluwas paggamit kining sama nga simbolo diha sa Doktrina ug mga Pakigsaad 4:1–4 ug 75:3–5? Hangyoa ang mga sakop sa klase sa pagpaambit og mga kasinatian nga ilang nasinati sa dihang sila nagpaambit sa ebanghelyo ngadto sa uban.

3. Si Jesus nag-ayo sa anak nga lalaki sa halangdon nga tawo

Basaha ug hisguti ang Juan 4:46–54.

  • Unsa ang gusto sa halangdon nga tawo gikan ni Jesus? (Tan-awa sa Juan 4:46–47.) Unsa ang unang tubag ni Jesus ngadto kaniya? (Tan-awa sa Juan 4:48.) Unsa ang tubag sa halangdon nga tawo? (Tan-awa sa Juan 4:49.)

  • Unsa ang ikaduhang tubag ni Jesus ngadto sa halangdon nga tawo? (Tan-awa sa Juan 4:50.) Unsa ang tubag sa halangdon nga tawo? (Tan-awa sa Juan 4:50.) Unsa ang nahimong resulta sa hugot nga pagtuo sa halangdon nga tawo? (Tan-awa sa Juan 4:51–54.) Unsa ang atong makat-unan gikan niini nga istorya kalabut sa gahum sa hugot nga pagtuo?