“Unsa ang Akong Buhaton aron Makapanunod Ako sa Kinabuhing Dayon?”

Marcos 10:17–30; 12:41–44; Lucas 12:13–21; 14; 16

Katuyoan

Aron pagtabang sa mga sakop sa klase nga makasabut nga kita kinahanglan andam gayud sa pagsakripisyo sa mga butang niining kalibutana aron kita makaangkon og luna sa gingharian sa langit.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Marcos 10:17–30; 12:41–44. Usa ka batan-on nga adunahan nangutana unsa ang iyang buhaton aron makaangkon og kinabuhing dayon, ug si Jesus nagtudlo nga ang pagsalig sa mga katigayunan makapahilayo sa tawo gikan sa gingharian sa Dios. Si Jesus midayeg sa usa ka kabus nga biyuda nga mihulog og duha ka diyot ngadto sa panudlanan.
2. Lucas 12:13–21. Pinaagi sa sambingay sa adunahan nga buangbuang si Jesus nagtudlo sa mga kakuyaw sa pagkamasinahon. Siya nag-awhag sa iyang mga sumusunod sa pagpangita sa langitnon, kay sa kalibutanong mga bahandi.
3. Lucas 14:15–33. Pinaagi sa sambingay sa katapusang panihapon, si Jesus nagtudlo nga kadtong mosunod kaniya kinahanglan nga andam nga mosalikway sa tanang butang.
4. Lucas 16:1–12. Pinaagi sa sambingay sa malimbongon nga tinugyanan, si Jesus nagtudlo sa iyang mga sumusunod sa pagtinguha sa espirituhanong bahandi uban sa sama nga kadasig parehas niadtong nagtinguha sa kalibutanong bahandi.
Dugang nga basahonon: Mateo 19:16–30; Lucas 18:18–30; 21:1–4; Jacob 2:18–19.
Kon anaa ang hulagway nga Si Kristo ug ang Batan-ong Adunahan nga Magmamando (Pakete sa mga Hulagway sa Ebanghelyo 244), gamita kini sa panahon sa leksyon.
Kon ikaw mogamit sa pang-atensyon nga kalihokan, paghimo og lit-ag sa unggoy o drowinga kini diha sa pisara (tan-awa sa gihulagway sa sunod nga pahina). Aron makahimo og usa ka laang sa unggoy, pagkuha og usa ka karton nga may lid. Ihigot ang lid diha sa karton, ug paghimo og lungag igo nga makasulod ang gibukhad nga kamot apan dili ang kinumo. Butangi og usa ka prutas o mga mani sa sulod sa karton.
Sugyot alang sa pagtudlo: Si Nephi miingon, “Ako migamit sa tanan nga mga kasulatan ngari kanato, nga unta kini makahimo alang sa atong kaayohan ug pagkat-on” (1 Nephi 19:23). Tun-i ang Teaching, No Greater Call (36123), mga pahina 74, 159–60, ug 170–71, aron masuta kon sa unsang paagi nga matabangan nimo ang mga sakop sa klase sa pagpahiangay, o paggamit, sa mga kasulatan sa ilang mga kinabuhi.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang lit-ag nga imong gihimo o gidrowing (tan-awa sa seksyon sa “Pagpangandam”). Ipasabut nga ang lit-ag nga sama niini mahimong magamit aron pagdakup og unggoy. Usa ka sudlanan nga gibutang og maayo diha sa yuta, ug usa ka paon (sama sa mani o prutas) ang ibutang sa sulod. Ang lungag sa sudlanan may igo nga gidak-on alang sa walay dala nga kamot sa unggoy aron sayon ang pagsulod apan gamay ra kaayo alang sa kamot sa unggoy ug sa paon nga magdungan paggawas (ikaw mahimo nga modemonstrar niini). Ang unggoy nakakita sa paon ug mokab-ot aron pagkuha niini. Kon ang unggoy nakakuha na sa paon, kini motugot sa iyang kaugalingon nga madakpan kay sa buhian ang paon. Kini dili mosakripisyo niini nga ganti alang sa usa nga labaw pa––ang iyang kagawasan.

Itudlo nga usahay kita makahimo og mga sayop sama sa unggoy. Kon kita makaangkon og usa ka butang nga maanindot, kita malagmit dili mauyonon nga kini mawala bisan pa nga sa paghupot niini malagmit makapahimo kanato nga mawad-an og mas maayo pa kay niini. Kini nga leksyon mao ang kabahin sa uban pang mga butang nga kinahanglan nga atong isakripisyo aron sa pagdawat sa pinaka mahinungdanon nga panalangin: kinabuhing dayon uban sa atong Langitnong Amahan ug ni Jesukristo.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, tabangi ang mga sakop sa klase nga makasabut nga ang matag usa kanato mahimong hangyoon sa pagsakripisyo sa nagkalainlain nga mga butang alang sa gingharian sa Dios. Kita kinahanglan nga magmauyonon sa pagsakripisyo bisan unsa ang ihangyo sa Dios kanato.

1. Ang pagsalig diha sa mga katigayunan makapahilayo sa usa ka tawo gikan sa gingharian sa Dios.

Basaha ug hisguti ang Marcos 10:17–30; 12:41–44. Ipakita ang hulagway ni Kristo ug ang batan-ong adunahan nga magmamando.

Unsa ang gisulti ni Jesus ngadto sa batan-ong adunahan nga nangutana unsaon nga makadawat sa kinabuhing dayon? (Tan-awa sa Marcos 10:17–21.) Ngano nga kini nga mga panudlo nakapasubo sa batan-ong lalaki? (Tan-awa sa Marcos 10:22.) Sa inyong hunahuna ngano nga ang Ginoo mihangyo man kaniya sa paghatag sa tanan niyang mga kabtangan? Sa unsa nga paagi nga ang mga panudlo sa Manluluwas ngadto sa batan-ong adunahan magamit ngari kanato?

Si Presidente Joseph F. Smith miingon: “Ang nakalisud sa batan-ong lalaki [mao nga] siya daghan og mga kabtangan ug siya mipalabi sa pagsalig diha sa iyang bahandi kaysa pagsalikway sa tanan ug pagsunod ni Kristo…. Walay tawo nga makaangkon sa gasa sa kinabuhing dayon gawas kon siya mauyonon sa pagsakripisyo sa tanan nga kalibutanong mga butang aron makaangkon niini” (Gospel Doctrine, 5th ed. [1939], 261).
Unsa ang gitudlo ni Jesus mahitungod sa relasyon tali sa pag-angkon og katigayunan ug sa pagpanunod sa gingharian sa Dios? (Tan-awa sa Marcos 10:23–25.) Unsa ang kalainan tali sa pag-angkon og mga katigayunan ug pagsalig niini? Sa unsa nga paagi nga kita makapadayon og usa ka husto nga kinaiya mahitungod sa kalibutanong mga kabtangan? (Tan-awa sa Mosiah 4:19, 21.)

Si Presidente Smith nagtudlo usab: “Ang Dios walay pinalabi nga tawo. Ang adunahan nga tawo mahimong makasulod sa gingharian sa langit sama kagawasnon sa kabus, kon magpaubos siya sa iyang kasingkasing ug pagbati nga magsunod sa balaod sa Dios, ug sa mga baruganan sa kamatuoran; kon siya mobutang sa iyang mga pagbati ngadto sa Dios, sa iyang kasingkasing diha sa mga kamatuoran, ug ang iyang kalag diha sa paghimo sa mga katuyoan sa Dios, ug dili mopunting sa iyang mga pagbati ug sa iyang mga paglaum sa mga butang sa kalibutan” (Gospel Doctrine, 260–61).
Itandi ang adunahan nga batan-on ngadto sa kabus nga biyuda diha sa Marcos 12:41–44. Unsa ang andam nga buhaton sa biyuda diin ang adunahan nga batan-on dili andam? (Tan-awa sa Marcos 12:44. Siya andam sa paghatag sa tanan nga iyang gipanag-iya alang sa gingharian sa Dios.) Sa unsa nga paagi nga kita makapalambo og usa ka kinaiya nga sama sa kabus nga biyuda?

2. Pagtinguha sa langitnon, kaysa kalibutanong mga bahandi.

Basaha ug hisguti ang Lucas 12:13–21.

Unsa ang gisulti ni Jesus sa tawo kinsa nabalaka mahitungod sa iyang kabilin? (Tan-awa sa Lucas 12:13–15.) Unsay buot ipasabut sa pagkamasinahon? (Usa ka dakong tinguha alang sa bahandi o alang sa mga kabtangan sa laing tawo.) Unsa nga mga butang ang kasinahan sa mga tawo karon? Ngano nga kuyaw man ang masina?
Sa kalibutan nga sa kasagaran mobutang og dakong bili sa materyal nga mga kabtangan, sa unsa nga paagi nga atong mahinumduman nga ang bili sa atong pagkatawo wala gitino pinaagi kon pila ang atong gipanag-iya? (Tan-awa sa Lucas 12:15.) Unsa nga mga panalangin ang mas importante kaysa materyal nga mga kabtangan? (Tan-awa sa Lucas 12:31–34; D&P 6:7 alang sa pipila nga mga ehemplo.)
Sa unsa nga paagi nga ang tawo diha sa sambingay sa adunahan nga buangbuang napanalanginan? (Tan-awa sa Lucas 12:16.) Unsa ang iyang desisyon nga buhaton sa iyang sobra? (Tan-awa sa Lucas 12:18.) Unsa man ang gipakita sa iyang mga lihok? (Tan-awa sa Lucas 12:19–21). Ang iyang kasingkasing gibutang diha sa iyang mga katigayunan. Unsa unta ang iyang angayng buhaton sa iyang kaadunahan kon siya nagtinguha pa sa langitnon, kaysa kalibutanon nga mga bahandi? (Tan-awa sa Mosiah 4:26; D&P 52:40.)
Ngano nga kadaghanan sa mga tawo mobutang man sa ilang mga kasingkasing diha sa kalibutanong bahandi bisan tuod kon sila nahibalo nga kini temporaryo lamang? Unsaon man nato pagtino kon kita naghunahuna ba gayud sa materyal nga mga kabtangan? Sa unsa nga paagi nga kita mahimong mas manggihatagon sa atong materyal nga mga bahandi ug uban nga mga panalangin, sama sa panahon ug talagsaon nga kahibalo? (Ikaw mahimo nga moawhag sa mga sakop sa klase sa paghunahuna og maayo niining mga pangutanaha sa gawas sa klase, sa ilang mga kaugalingon o uban sa mga sakop sa pamilya.)

3. Ang mga sumusunod ni Kristo kinahanglan nga andam sa pagsalikway sa tanan aron mahimong tinuod nga mga tinun-an.

Basaha ug hisguti ang pinili nga mga bersikulo gikan sa Lucas 14:15–33.

Sa paghubad sa sambingay sa katapusang panihapon, Si Elder James E. Talmage nagtudlo nga ang dinapit nga mga bisita nagpaila sa mga sinaaran nga katawhan, o sa balay sa Israel. Sa dihang ang sulugoon (Jesus) mihangyo kanila sa pag-adto didto sa kasaulogan (pagdawat sa ebanghelyo), sila mihatag og daghan nga mga pasumangil ug midumili sa pag-adto (Jesus The Christ, 3rd ed. [1916], 425). Ngano nga ang mga Israelita wala man moadto sa kasaulogan? Kinsa ang “mga kabus, ug ang mga pungkol, ug ang mga piang, ug ang mga buta” nga miadto sa kasaulogan? (Lucas 14:21).
Sa unsa nga paagi nga ang sambingay sa katapusang panihapon magamit ngari kanato? Unsa nga mga pasumangil ang atong gihimo sa dili pagkaon diha sa lamesa sa Ginoo–sama pananglit, sa dili pagbasa sa mga kasulatan o sa dili pagadto sa templo? Unsaon nato pagpakita sa atong pagdawat sa pagdapit sa Ginoo ngadto sa kasaulogan?
Si Jesus nagtudlo nga ang iyang mga tinun-an kinahanglan nga andam sa pagsakripisyo sa bisan unsa nga butang nga iyang gihangyo gikan kanila (Lucas 14:26–33). Unsa ang pipila ka mga butang nga gihangyo nga isakripisyo sa unang mga tinun-an? Unsa ang pipila ka mga butang nga gihangyo nga isakripisyo sa mga tinun-an karon? Unsa ang gihangyo sa Ginoo nga inyong isakripisyo? Sa unsa nga paagi nga kamo napanalanginan tungod sa paghimo niini nga mga sakripisyo?

4. Pagtinguha sa espirituhanong bahandi uban sa kadasig ug kalagsik.

Basaha ug hisguti ang pinili nga mga bersikulo gikan sa Lucas 16:1–12. Aron pagtabang sa mga sakop sa klase nga makasabut sa sambingay sa dili makiangayon nga tinugyanan, ipaambit ang mosunod nga kasayuran:

Si Elder James E. Talmage mipasabut nga ang Ginoo migamit niini nga sambingay “aron ipakita ang kalainan tali sa pag-amuma, pagkamanggihunahunaon, ug debosyon sa mga tawo nga anaa sa buluhaton sa pagpangita og salapi dinhi sa yuta, ug sa dili kinasingkasing nga mga paagi sa daghan nga niangkon nga nagtinguha sa espirituhanong mga katigayunan”. Ang Ginoo wala magsugyot nga kita kinahanglan mosunod sa dautan nga mga binuhatan sa dili makiangayon nga sulugoon, apan nga kita kinahanglan nga magtinguha sa espirituhanong bahandi uban sa sama nga kadasig ug kakugi nga gipakita sa sulugoon sa pagtinguha sa materyal nga bahandi.

Si Elder Talmage mipadayon, “Ang kalibutanong hunahuna sa mga tawo wala magpasagad sa mga tagana alang sa ilang umaabut nga katuigan, ug kadaghanan malapason nga nagtinguha sa pagtigum og daghan; samtang ang ‘mga anak sa kahayag,’ o kadtong mituo sa espirituhanong bahandi nga mao ang labing taas sa tanan nga mga kalibutanong mga katigayunan, nga dili kaayo madasigon, mabinantayon o maalamon” (Jesus the Christ, 463).

Hangyoa ang mga sakop sa klase nga hilom nga magtandi sa gidugayon sa panahon, hunahuna, ug enerhiya nga ilang gihatag aron pagpadaghan sa salapi ug mga katigayunan uban sa gidugayon sa panahon, hunahuna ug enerhiya nga ilang gihatag sa pagpaninguha sa espirituhanong mga bahandi. Sa unsa nga paagi nga kita nahimong mas mainiton ug madasigon sa pagtinguha sa espirituhong mga bahandi?

Panapos

Ipamatuod nga aron makadawat og kinabuhing dayon, kita kinahanglan nga andam sa pagsalikway sa mga butang sa kalibutan ug moalagad sa Ginoo sa atong tibuok nga kasingkasing, gahum, hunahuna, ug kusog. Awhaga ang mga sakop sa klase nga magmapasalamaton alang sa yutan-on nga mga panalangin apan magtinguha sa pagsabut niini sa husto nga pagsabut.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Pagpaubos

Basaha ug hisguti ang Lucas 14:7–11.

Sa unsang paagi nga inyong nakit-an ang kamatuoran sa pamahayag ni Jesus diha sa Lucas 14:11?

2. Tinuod nga gugmang putli

Unsa ang atong makat-unan gikan sa Lucas 14:12–14 mahitungod kon unsaon sa pag-alagad? (Ang mga tubag mahimong maglakip nga kinahanglan nga kita moalagad nga walay tuyo sa pagkuha og usa ka butang agi og balos, ug kinahanglan kita dili molimit sa atong pag-alagad ngadto niadtong mobayad pagbalik o gani mopasalamat kanato.) Unsa ang kinahanglan nga atong tumong sa pag-alagad?
Sa unsa nga paagi nga ang tinuod nga gugmang putli makatabang kanato nga maduol ngadto sa Ginoo?

3. Ang sambingay sa adunahan nga tawo ug ni Lazaro

Ipabasa ug pahisguti sa mga sakop sa klase ang sambingay diha sa Lucas 16:19–31.

Pagkamatay sa adunahan nga tawo, unsa ang iyang gihangyo nga buhaton ni Amahang Abraham alang sa iyang mga igsoon? (Tan-awa sa Lucas 16:27–28.) Unsa ang gitubag ni Abraham? (Tan-awa sa Lucas 16:29–31.) Unsa ang gitudlo niini kanato mahitungod sa pagpaminaw sa propeta?
Sa unsa nga paagi nga kini nga sambingay nagtudlo kanato mahitungod sa kamahinungdanon sa pag-amuma sa mga kabus? (Tan-awa sa D&P 104:18.)

Ang mga batan-on tingali malingaw nga ipadrama kini nga sambingay. Ibutang ang duha ka mga sakop sa klase (Abraham ug Lazaro) sa pikas bahin sa mga babag sama sa laray sa mga lingkuranan (ang dakung bung-aw), ug lain nga sakop sa klase (ang adunahan nga tawo) sa pikas bahin. Pagkuha og ikaupat nga sakop sa klase nga mao ang tigsaysay. Ipabasa sa mga sakop sa klase ang ilang mga linya gikan sa Lucas 16:19–31, unya ang tigsaysay mobasa sa tanan nga mga linya nga wala mabasa sa mga miapil.