Sunday School: Doktrina sa Ebanghelyo
Leksyon 7: ‘Gikuha [Niya] ang Atong mga Kaluyahon, ug Gipas-an Niya ang Atong mga Sakit’

Leksyon 7

“Gikuha [Niya] ang Atong mga Kaluyahon, ug Gipas-an Niya ang Atong mga Sakit”

Marcos 1–2; 4:35–41; 5; Lucas 7:11–17

Katuyoan

Aron pagtabang sa mga sakop sa klase nga makasabut sa pipila ka mga rason nga ang Manluluwas mihimo og mga milagro.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Marcos 1:14–15, 21–45. Si Jesus mipanaw sa tibuok Galilea nga nagtudlo sa ebanghelyo, mipapahawa sa mga dautan, ug miayo sa masakiton. Siya mipapahawa sa mahugaw nga espiritu gikan sa usa ka tawo, miayo sa ugangan nga babaye ni Simon Pedro ug milimpyo sa usa ka sanglahon.

    2. Marcos 2:1–12. Si Jesus mipasaylo sa mga sala sa usa ka tawo ug miayo sa usa ka tawo nga paralitiko.

    3. Marcos 4:35–41; 5:1–20; Lucas 7:11–17. Si Jesus mipakalma sa baloron nga dagat, mipapahawa sa dagkong panon sa mga dautan, ug mipabangon sa anak nga lalaki sa usa ka biyuda sa Nain gikan sa patay.

    4. Marcos 5:21–43. Si Jesus miayo sa usa ka babaye kinsa gitalinug-an ug mipabangon sa anak nga babaye ni Jairo gikan sa patay.

  2. Dugang nga basahonon: Mateo 8–9; Lucas 4:33–44; 5:12–32; 8:22–56; Alma 7:11–12; Mormon 9:7–20; Moroni 7:27–29, 33–37; Ang Giya ngadto sa mga Kasulatan, “Milagro.”

  3. Kon anaa ang mga hulagway nga “Nagpahunong sa Unos” (62139 853; Pakete sa mga Hulagway sa Ebanghelyo 214) ug Si Jesus Mipanalangin sa Anak nga Babaye ni Jairo (62231 853; Pakete sa mga Hulagway sa Ebanghelyo 215), gamita kini sa panahon sa leksyon.

  4. Sugyot alang sa pagtudlo: Ang mga sakop sa klase kinahanglan nga makahibalo ngano nga ang mga pagtulun-an sa mga kasulatan mahinungdanon man karon. Samtang ikaw mag-andam sa matag leksyon, mainampoon nga maghunahuna unsa ang imong buhaton aron sa pag-awhag sa mga sakop sa klase sa paggamit sa mga baruganan sa ebanghelyo diha sa ilang mga kinabuhi. (Tan-awa sa Teaching, No Greater Call, [36123], mga pahina 159–60.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron sa pagsugod sa leksyon.

Pang-atensyon nga Kalihokan

  • Unsa ang milagro? (Usa ka dili ordinaryo nga hitabo nga nahinabo pinaagi sa balaanon o espirituhanong gahum; tan-awa sa Ang Giya ngadto sa mga Kasulatan, “Milagro”.)

  • Unsa ang usa sa mga milagro sa Manluluwas nga ikaw buot mopamatuod? Ngano? (Ikaw mahimo nga molista sa mga milagro ni Kristo diha sa pisara aron pagtabang sa mga sakop sa klase nga motubag niini nga pangutana.)

Ipasabut nga kini nga leksyon maghisgut sa uban nga mga milagro sa Manluluwas ug sa iyang mga rason sa paghimo niini.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, paghisgut unsaon niini nga magamit sa inadlaw-adlaw nga kinabuhi. Ipasabut og maayo nga si Jesus nagpadayon sa paghimo og mga milagro diha sa atong mga kinabuhi. Awhaga ang mga sakop sa klase sa pagpaambit, kon angay, sa mga milagro nga ilang nasinati. (Ikaw mahimo nga mopahinumdom sa mga sakop sa klase nga ang pipila ka mga kasinatian sagrado ra kaayo aron ipaambit. Ang Espiritu Santo makatabang kanila nga makahibalo kon kini angay ba nga ipaambit ang usa ka kasinatian.)

1. Si Jesus mipanaw sa tibuok Galilea nga nagtudlo sa ebanghelyo ug mihimo og mga milagro.

Tukia ang Marcos 1:14–15, 21–45. Dapita ang mga sakop sa klase sa pagbasa og kusog sa mga pinili nga mga bersikulo.

  • Samtang si Jesus mipanaw sa tibuok Galilea nga nagtudlo sa ebanghelyo, siya mihimo og daghan nga mga milagro nga naglakip sa pag-ayo sa masakiton ug sa pagpapahawa sa mga dautan (Marcos 1:34, 39). Ngano kaha nga gihimo kini ni Jesus ug sa uban nga mga milagro sa panahon sa iyang pangalagad? (Ang mga tubag mahimong maglakip niining gilista sa ubos.)

    1. Aron sa pagpakita sa gugma ug kalooy (tan-awa sa Marcos 5:19; tan-awa usab sa 3 Nephi 17:6–7).

    2. Aron sa pagpalambo ug pagmatuod sa hugot nga pagtuo (tan-awa sa Mateo 9:27–30).

    3. Aron sa pagpamatuod sa iyang pagkabalaan ug gahum (tan-awa sa Marcos 1:27; 2:10–11).

  • Ilista ang mga tubag sa mga sakop sa klase diha sa pisara, ug ipabilin kini nga lista diha sa pisara sa tibuok nga leksyon. Samtang ikaw naghisgut sa mga milagro nga gihimo ni Jesus, paghisgut og pipila ka mga katuyoan nga natuman pinaagi sa matag milagro. Idugang diha sa mga lista ang bisan unsa nga gidugang nga mga katuyoan nga gihisgutan sa panahon sa leksyon.

  • Ngano nga ang mga tawo didto sa sinagoga sa Capernaum natingala sa mga pagtulun-an ni Jesus ug sa iyang kahanas sa pagpapahawa sa mahugaw nga mga espiritu? (Tan-awa sa Marcos 1:22, 27.) Sa unsa nga katungod nga si Jesus mitudlo ug mihimo sa mga milagro? (Pinaagi sa gahum sa priesthood, nga wala sa mga escriba.) Unsay buhaton aron kita makabaton niini nga gahum ug katungod karon?

  • Sumala sa Marcos 1:41, unsa ang usa ka rason nga si Jesus miayo sa sanglahon? Ipasabut nga si Jesus mihimo sa daghan nga mga milagro nga nanalangin mismo sa usa lang ka tawo. Unsa ang gipakita niini nga mga hitabo kalabut sa pagbati ni Jesus sa tagsa-tagsa kanato? Giunsa niya pagpakita og gugma ug kalooy alang kanimo?

  • Unsaon nato pagpakita og sama nga gugma ug kalooy ni Kristo alang niadto nga anaa sa atong palibut? Giunsa sa ubang mga tawo pagpakita og sama nga gugma ug kalooy ni Kristo kanimo?

2. Si Jesus mipasaylo sa mga sala sa usa ka tawo og miayo sa usa ka tawo nga paralitiko.

Basaha ug tukia ang Marcos 2:1–12.

  • Kang kinsang hugot nga pagtuo ang nakatabang sa pag-ayo sa tawo nga paralitiko? (Tan-awa sa Marcos 2:3, 5.) Sa unsa nga paagi nga kini nga mga tawo mipakita sa ilang hugot nga pagtuo? (Tan-awa sa Marcos 2:1–4.) Sa unsa nga paagi kita makapakita og hugot nga pagtuo ngadto sa uban? Sa unsa nga paagi nga ang hugot nga pagtuo sa uban nakatabang kanimo o sa usa nga imong kaila?

  • Unsa ang gihunahuna sa pipila ka mga escriba sa dihang si Jesus miingon sa tawo nga paralitiko nga ang iyang mga sala gipasaylo na? (Tan-awa sa Marcos 2:5–7.) Unsay gihimo ni Jesus agig tubag ngadto sa mga escriba? (Tan-awa sa Marcos 2:8–11.) Ipasabut nga ingon nga kadto usa ka milagro alang sa tawo nga maayo sa pagkaparalitiko, kadto usa usab ka milagro alang kaniya nga pasayloon sa iyang mga sala. Ipasabut og maayo nga kini nga milagro moabut sa matag usa kanato kon kita maghinulsol.

  • Unsa ang labaw nga makapaayo nga gahum ang nagsimbolo sa pisikal nga mga pagpang-ayo sa Manluluwas? (Tan-awa sa Isaias 53:5; 2 Nephi 25:13; 3 Nephi 9:13.) Sa unsa nga paagi nga ang mga gahum ni Jesus sa pagpang-ayo nakapanalagin kaninyo sa espirituhanong paagi?

3. Si Jesus mipakalma sa dagat, mipapahawa sa mga dautan, ug mipabangon sa anak nga lalaki sa biyuda sa Nain gikan sa patay.

Basaha ug hisguti ang pinili nga mga bersikulo gikan sa Marcos 4:35–41, 5:1–20 ug Lucas 7:11–17. Ipakita ang hulagway ni Jesus nga mipahunong sa unos.

  • Ang pisikal nga mga aspeto sa mga milagro sa Manluluwas sa kanunay nagsimbolo sa espirituhanong mga kamatuoran. Unsa nga espirituhanong mga kamatuoran ang atong makat-unan sa mosunod nga mga milagro? (Posibleng mga tubag gihatag diha sa parentheses.)

    1. Marcos 4:35–41. Si Jesus mipakalma sa dagat. (Siya makadala kanato og kalinaw.)

    2. Marcos 5:1–20. Si Jesus mipapahawa sa dakong panon sa dautan nga mga espiritu. (Siya makapapahawa ni Satanas ug sa iyang impluwensya gikan sa atong mga kinabuhi.)

    3. Lucas 7:11–17. Si Jesus mipabangon sa usa ka batan-on nga tawo gikan sa patay. (Tungod sa iyang Pag-ula, kita mobangon gikan sa patay diha sa Pagkabanhaw.)

    Dapita ang mga sakop sa klase sa pag-istorya og pipila ka mga milagro nga gihimo sa Manluluwas ug sa espirituhanong mga kamatuoran nga atong makat-unan gikan niini nga mga milagro.

  • Unsa pa nga mga pagtulun-an ang inyong nakat-unan tungod sa pagtuon niining tulo ka mga milagro?

4. Si Jesus miayo sa usa ka babaye nga gitalinug-an ug mipabangon sa anak nga babaye ni Jairo gikan sa patay.

Basaha ug hisguti ang pinili nga mga bersikulo gikan sa Marcos 5:21–43..

  • Sa unsa nga paagi nga ang babaye nga gitalinug-an mipakita sa iyang hugot nga pagtuo? (Tan-awa sa Marcos 5:25–29.) Unsa ang hinungdan sa iyang pagkaayo? (Tan-awa sa Marcos 5:34. Ipasabut og maayo nga ang iyang hugot nga pagtuo diha sa gahum ni Jesus, dili ang akto sa paghikap sa iyang saput, ang hinungdan sa iyang pagkaayo.)

  • Ipakita ang hulagway ni Jesus nga nagpanalangin sa anak nga babaye ni Jairo. Sa unsa nga paagi nga si Jairo mipakita sa iyang hugot nga pagtuo diha sa Manluluwas? (Tan-awa sa Marcos 5:22–23.) Unsa ang gisulti ni Jesus aron paglig-on sa hugot nga pagtuo ni Jairo sa dihang si Jairo nakadungog nga ang iyang anak nga babaye namatay? (Tan-awa sa Marcos 5:36.) Sa unsa nga paagi nga kamo makagamit niini nga mga pulong diha sa inyong kinabuhi?

  • Ngano kaha nga ang hugot nga pagtuo kinahanglan man nga mag-una sa mga milagro? (Tan-awa sa Ether 12:12, 18; Moroni 7:37; ug ang mosunod nga kinutlo.) Ngano man nga ang mga milagro dili makahatag og lig-on nga sukaranan alang sa hugot nga pagtuo?

    Si Brigham Young miingon: “Ang mga milagro, o kining talagsaon nga mga pagpakita sa gahum sa Dios, dili alang sa mga walay pagtuo; kini gibuhat aron makahupay sa mga Santos, ug sa paglig-on ug pagmatuod sa hugot nga pagtuo niadto kinsa mahigugma, mahadlok ug moalagad sa Dios” (Discourses of Brigham Young, pin. John A. Widtsoe [1941], 341).

  • Ngano kaha nga ang mga milagro nga gihimo ni Jesus sa panahon sa iyang mortal nga kinabuhi mahinungdanon diha kanimo? Ngano kaha nga mahinungdanon man nga mahibalo nga siya magpadayon sa paghimo og mga milagro karon? Unsa ang uban nga mga ehemplo sa bag-o nga mga milagro?

Panapos

Ipamatuod nga ang Manluluwas makaayo sa espiritwal ug pisikal nga mga kakulangan. Ipahayag ang imong pagpasalamat alang sa tanan nga iyang nahimo alang kanato. Kon angay, ikaw mahimo nga mosulti kalabut sa usa ka milagro nga nakapanalangin sa imong kinabuhi.

Hangyoa ang mga sakop sa klase nga mamalandong sa hilum sa mga milagro nga ilang nasinati. Awhaga sila sa pag-ila ug paghatag og pasalamat sa mga milagro diha sa ilang mga kinabuhi.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. Mga milagro sa Daang Tugon

Ipasabut nga ang mga milagro dili bag-o sa mga Judeo. Ang mga milagro gihimo sa mga propeta sa Daang Tugon nga gipasidunggan sa mga Judeo. Ribyuha sa daklit ang mosunod nga mga ehemplo:

  1. Ang propeta nga si Elias mipabangon sa usa ka batang lalaki gikan sa patay (1 Mga Hari 17:17–24).

  2. Ang propeta nga si Eliseo mipakaon sa dakong panon sa gamay nga pagkaon (2 Mga Hari 4:42–44).

  3. Ang propeta nga si Eliseo miayo ni Naaman, nga usa ka sanglahon (2 Mga Hari 5:1–19).

  • Pinaagi sa unsa nga gahum nga kini nga mga propeta mihimo og mga milagro? (Ang priesthood, ang balaan nga gahum nga gihatag ngadto kanila sa Langitnong Amahan ug ni Jesukristo.)

2. “Ang mga maayo rag lawas wala magkinahanglan og mananambal” (Marcos 2:17)

  • Giunsa sa mga escriba ug mga Pariseo pagtubag sa dihang sila nakakita nga si Jesus mikaon uban sa mga tawo nga sa ilang pagtuo mga makasasala? (Tan-awa sa Marcos 2:15–16.) Unsa ang gisulti ni Jesus kanila? (Tan-awa sa Marcos 2:17.) Unsa ang gipasabut niini? Sa unsa nga mga paagi nga kitang tanan “adunay … panginahanglan og mananambal”?