Sunday School: Doktrina sa Ebanghelyo
Leksyon 26: ‘Alang Niini nga Katuyoan Ako Nagpakatawo’

Leksyon 26

“Alang Niini nga Katuyoan Ako Nagpakatawo”

Mateo 26:47–27:66; Marcos 14:43–15:39; Lucas 22:47–23:56; Juan 18–19

Katuyoan

Aron pagtabang sa mga sakop sa klase nga mobati sa gugma sa Manluluwas alang kanila ug motubo ang ilang gugma alang kaniya ug ang ilang pagpasalamat alang sa iyang matubsanon nga sakripisyo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mateo 26:47–75; Marcos 14:43–72; Lucas 22:47–71; Juan 18:1–27. Human dayon sa iyang hilabihan nga pag-antus didto sa Getsemani, si Jesus gibudhian ni Judas, kinsa mipakita uban sa pangulo sa mga pari, mga Pariseo, ug mga sundalo. Si Jesus mitugyan sa iyang kaugalingon ngadto sa iyang mananakop, kinsa mikuha kaniya gikan sa tanaman ug mitugyan kaniya ngadto sa hukmanan sa mga Judeo. Siya gipangutana pag-una ni Anas, usa ka kanhi labaw nga pari, ug unya ngadto ni Caifas, ang sumusunod ug umagad ni Anas. Ang labaw nga mga pari ug ang mga anciano miluwa ni Jesus, mibugal-bugal kaniya, migapos kaniya ug mipasangil kaniya nga nanamastamas sa Dios, usa ka kalapasan nga pagasilotan sa kamatayon. Sa gawas sa palasyo ni Caifas, si Pedro milimud nga siya nakaila ni Jesus.

    2. Mateo 27:1–26; Marcos 15:1–15; Lucas 23:1–25; Juan 18:28–19:16. Kay ang labaw nga mga pari ug mga anciano wala may gahum sa paghukom ni Jesus ngadto sa kamatayon, sila mipadala kaniya aron pagahusayon ni Poncio Pilato, ang gobernador sa Roma didto sa Judea (Ang Giya ngadto sa mga Kasulatan, “Pilato.”) Sa atubangan ni Pilato, si Jesus gipasanginlan nga usa ka kaaway ni Cesar. Pagkasayud nga si Jesus taga-Galilea, si Pilato mipadala kaniya ngadto ni Herodes, usa ka gobernador sa Galilea. Si Herodes midumili sa paghukom ni Jesus ug mipadala kaniya og balik ngadto ni Pilato, kinsa misugot sa mga pagpugos sa pundok sa katawhan nga si Jesus ilansang sa krus.

    3. Mateo 27:27–66; Marcos 15:16–39; Lucas 23:26–56; Juan 19:17–42. Si Jesus gibunalan ug gilansang sa krus. Diha sa krus siya nakasinati sa tumang pag-antus samtang mihalad sa iyang kaugalingon isip sakripisyo alang sa katawhan.

  2. Dugang nga basahonon: Isaias 53; Marcos 15:39–47; Juan 3:16; 15:13; 1 Nephi 11:32–33; 19:7–9; 2 Nephi 9:21–22; Ang Giya ngadto sa mga Kasulatan, “Ang Paglansang sa Krus.”

  3. Andama ang pito ka ginunting nga mga pulong nga gihulagway diha sa pahina 136 (o pag-andam sa pagsulat sa mga pamahayag diha sa pisara).

  4. Kon ang mosunod nga mga materyal anaa, gamita kini sa panahon sa leksyon:

    1. Ang mga hulagway nga Ang Pagbudhi kang Jesus (62468 853; Pakete sa mga Hulagway sa Ebanghelyo 228); Ang Paglimud ni Pedro (62177 853; Pakete sa mga Hulagway sa Ebanghelyo 229); ug Ang Paglansang sa Krus (62505; Pakete sa mga Hulagway sa Ebanghelyo 230).

    2. “To This End Was I Born,” usa ka dise sais ka mga minuto nga bahin sa New Testament Video Presentations (53914).

  5. Sugyot alang sa pagtudlo: Kon ang mga magtutudlo ug mga sakop sa klase magbaton og balaan nga pagtahud, sila magdapit sa Espiritu aron maanaa sa klase. Ang mga sakop sa klase kinahanglan nga “may kagawasan sa paghisgut, may kagawasan sa pagsulti, may kagawasan sa pag-apil sa buluhaton sa klase, apan walay sakop sa klase nga adunay katungod sa pagsamok sa laing sakop pinaagi sa pagtulud o paghimo sa walay pulos ug binuang nga mga sulti” (David O. McKay, Gospel Ideals [1954], 224). Pagpakita og ehemplo sa balaan nga pagtahud ngadto sa Dios ug pagtahud alang sa matag sakop sa klase.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipaabli sa mga sakop sa klase ang mapa sa Jerusalem sa panahon ni Jesus” (mapa 12 sa LDS nga edisyon sa Biblia nga giimprinta niadtong 1999 o lapas pa, mapa 17 nga giimprinta sa wala pay 1999).

Ipasabut nga kini nga leksyon nagpunting sa Pagkalansang sa Krus sa Manluluwas ug sa mga hitabo sa mga takna nga nag-una niini. Kining mga butanga nahitabo sa mga dapit nga makit-an diha sa mapa. Tabangi ang mga sakop sa klase nga makakaplag sa mosunod nga mga dapit: (1) ang Tanaman sa Getsemani, (2) ang balay ni Caifas, (3) Kota sa Antonia (ang balay ni Pilato), ug Golgota (Kalbaryo).

Kon ang mga sakop sa klase nakakita na sa Bungtod sa Golgota, ipasabut nga si Jesus gilansang sa krus didto. Ipakita ang hulagway sa Paglansang sa Krus. Hangyoa ang mga sakop sa klase sa paghunahuna og usa ka bata nga nagtan-aw sa hulagway ug nangutana, “Ngano nga si Jesus kinahanglan man nga mamatay?” Dapita ang mga sakop sa klase sa paggahin og panahon diha sa leksyon aron sa pagpamalandong unsa ang ilang itubag ngadto sa bata. Sultihi sila nga kamo maghisgut sa pangutana ngadto na sa katapusan niini nga leksyon.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, tabangi ang mga sakop sa klase nga makasabut sa gugma sa Manluluwas nga gipakita alang kanila sa dihang iyang gitugotan ang iyang kaugalingon nga pagadagmalan ug ilansang sa krus.

1. Si Jesus gibudhian, gidakop, ug gipasanginlan nga nanamastamas sa ngalan sa Dios; Si Pedro milimud ni Jesus sa tulo ka mga higayon.

Hisguti ang Mateo 26:47–75; Marcos 14:43–72; Lucas 22:47–71; ug Juan 18:1–27. Dapita ang mga sakop sa klase sa pagbasa og kusog sa pinili nga mga bersikulo. Ikaw mahimo nga mo-summarize niini nga kasayuran sama sa gi-outline sa aytem 1a diha sa seksyon sa “Pagpangandam.” Ipakita ang hulagway ni Jesus nga gibudhian didto sa Getsemani.

  • Unsay gibuhat ni Pedro ngadto sa mga tawo nga miadto sa Tanaman sa Getsemani aron pagkuha ni Jesus? (Tan-awa sa Juan 18:10.) Unsay gibuhat ni Jesus niining mga tawhana? (Tan-awa sa Lucas 22:51–53; Juan 18:11–12.) Ngano nga si Jesus misugot man nga siya dad-on? (Tan-awa sa Mateo 26:53–54; Juan 10:17–18. Ipasabut nga kadto mao ang pagbuot sa Langitnong Amahan nga si Jesus mohatag sa iyang kinabuhi alang kanato.)

  • Ang labaw nga mga pari ug mga anciano sa mga Judeo mipasangil ni Jesus nga nanamastamas sa ngalan sa Dios, usa ka krimen nga pagasilotan og kamatayon (Marcos 14:64). Unsa ang pagpanamastamas sa ngalan sa Dios? (Ang pagkawalay pagtahud ngadto sa Dios o nag-angkon nga sama sa Dios.) Unsa ang gisulti ni Jesus nga gituohan sa labaw nga mga pari ug mga anciano nga panamastamas sa ngalan sa Dios? (Tan-awa sa Marcos 14:60–63.)

  • Samtang si Jesus gidala gikan sa tanaman, kadaghanan sa iyang mga tinun-an “mitalikod kaniya ug mipahilayo” (Mateo 26:56). Hinoon, si Pedro ug si Juan mipadayon sa pagsunod kaniya (Mateo 26:58; Juan 18:15; kini gituohan nga ang wala hinganli nga tinun-an diha sa Juan 18:15 mao si Juan). Unsa ang gibuhat ni Pedro sa dihang ang mga tawo sa gawas sa palasyo ni Caifas miingon nga siya nakaila ni Jesus? (Tan-awa sa Mateo 26:69–74.) Unsa ang gibuhat ni Pedro sa dihang siya nakaamgo nga iyang gilimud si Jesus sa tulo ka mga higayon? (Tan-awa sa Mateo 26:75; tan-awa usab sa mga bersikulo 33–35.)

Ipakita ang hulagway ni Pedro nga naglimud ni Jesus.

  • Sa unsa nga paagi nga ang pipila kanato, sama ni Pedro, usahay molimud sa atong hugot nga pagtuo? Unsa ang atong makat-unan gikan sa kinabuhi ni Pedro human siya milimud sa Ginoo?

    Si Presidente Gordon B. Hinckley miingon:

    “Ako mibati og kalooy ni Pedro. Daghan kaayo kanato nga sama gayud kaniya. Kita manumpa sa atong kamaunongon; kita mipamatuod sa atong determinasyon sa pagkamadasigon; kita mipahayag, usahay gani sa dayag, nga bisan unsa ang mahitabo kita mobuhat sa matarung nga butang, nga kita mopaluyo alang sa matarung nga katuyoan, nga kita magmatinud-anon sa atong mga kaugalingon ug ngadto sa uban.

    “Unya ang mga kalisud magsugod sa pagdaghan. Usahay kini sosyal nga mga kalisud. Usahay kini personal nga mga kagana. Usahay kini sayop nga mga pangandoy. Adunay pagkaluya sa kabubut-on. Adunay pagkahinay sa pagdisiplina. Adunay pagtugyan ngadto sa pagpakasala. Ug dayon adunay pagbasol, pagasundan sa pag-akusar sa kaugalingon ug mapait nga luha sa pagmahay …

    “… Kon adunay ingon niana sa tibuok Simbahan nga pinaagi sa pulong o lihok milimud sa hugot nga pagtuo, ako nag-ampo nga kamo makakuha og kahupayan ug kasulbaran gikan sa ehemplo ni Pedro, kinsa, bisan tuod siya milakaw matag adlaw uban ni Jesus, sa panahon sa kakuyaw sa makadiyut milimud sa Ginoo ug sa pagpamatuod usab nga iyang gidala diha sa iyang kaugalingon nga kasingkasing. Apan siya mibuntog niini ug nahimong usa ka bantugan nga tigpanalipod ug gamhanan nga manlalaban. Ingon man, usab, adunay paagi alang sa bisan kinsa nga tawo sa pagbalik ug pagdugang sa iyang kalig-on ug hugot nga pagtuo ngadto sa kalig-on ug hugot nga pagtuo sa uban sa pagtukod sa gingharian sa Dios” (“And Peter Went Out and Wept Bitterly,” Ensign, Mar. 1995, 2–4, 6).

2. Si Jesus gihukman nga ilansang sa krus.

Basaha ug hisguti ang pinili nga mga bersikulo gikan sa Mateo 27:1–26; Marcos 15:1–15; Lucas 23:1–25; ug Juan 18:28–19:16. Ikaw mahimo nga molakbit pagistorya niini nga saysay sama sa gi-outline sa aytem 1b diha sa seksyon sa “Pagpangandam.”.

  • Sa dihang si Pilato nasayud nga si Jesus taga-Galilea, siya mipadala kaniya ngadto ni Herodes, kinsa mao ang gobernador sa Galilea (Lucas 23:6–7). Ngano kaha nga si Herodes “nalipay sa hilabihan” sa pagkakita ni Jesus? (Tan-awa sa Lucas 23:8.) Giunsa pagtubag sa Manluluwas ang mga pangutana ni Herodes? (Tan-awa sa Lucas 23:9; itandi kini nga bersikulo diha sa panagna sa Isaias 53:7.)

  • Human si Herodes ug ang iyang mga tawo mipasangil ug mitamay ni Jesus, sila mipadala kaniya pagbalik ngadto ni Pilato (Lucas 23:11). Unsa ang gihukom ni Pilato ngadto ni Jesus? (Tan-awa sa Lucas 23:13–17; tan-awa usab sa Lucas 23:4.) Ngano nga si Pilato mihukom man ni Jesus nga ilansang sa krus? (Tan-awa sa Mateo 27:15–24; Marcos 15:6–15; Lucas 23:18–25; Juan 19:1–16.) Sa unsa nga paagi nga kita, sama ni Pilato usahay mosulay paglikay sa kapangakohan tungod sa malisud nga mga paghukom?

  • Ngadto sa usa sa mga pangutana ni Pilato kon siya ba ang hari, si Jesus mitubag: “Alang niini nga katuyoan Ako nagpakatawo, ug alang niini mianhi Ako sa kalibutan, aron Ako magapanghimatuod sa kamatuoran” (Juan 18:37). Sa unsa nga paagi nga si Jesus usa ka Hari? (Tan-awa sa Salmo 24:10; Isaias 44:6; Pinadayag 11:15; 15:3; 2 Nephi 10:14.) Unsa ang gipasabut nga ang iyang “gingharian dili iya niini nga kalibutan”? (Juan 18:36).

3.Si Jesus gilatigo ug gilansang sa krus.

Basaha ug hisguti ang pinili nga mga bersikulo gikan sa Mateo 27:27–66; Marcos 15:16–39; Lucas 23:26–56; ug Juan 19:17–42. Ipakita ang hulagway sa Paglansang sa Krus.

  • Unsa ang gibuhat sa mga katawhan ngadto ni Jesus human siya gihukman nga ilansang sa krus? (Tan-awa sa Mateo 27:27–44; Lucas 23:34–39.) Ngano nga si Jesus mitugot sa mga katawhan sa pagdagmal kaniya? (Tan-awa sa 1 Nephi 19:9.)

Ang mga kasulatan mirekord og pito ka mga pulong nga gisulti ni Jesus samtang siya diha sa krus. Basaha ug hisguti ang mga bersikulo nga gilista sa ubos. Samtang ikaw maghisgut niini, ipakita ang ginunting nga mga pulong sa mga gipamahayag o isulat ang mga pamahayag diha sa pisara.

  1. Lucas 23:34. “Amahan, pasayloa sila; kay wala sila masayud sa ilang gibuhat.”

    • Gikan sa Hubad ni Joseph Smith kita nakakat-on nga sa dihang si Jesus misulti niini, siya nag-ampo alang sa mga sundalo nga taga-Roma nga milansang kaniya sa krus (Hubad ni Joseph Smith, Lucas 23:35). Unsa ang gipakita niini kabahin sa iyang pagkatawo? Unsa ang paagi sa kalibutan ngadto ni bisan kinsa nga mopasakit o mopalagut kanato? Sa unsa nga paagi nga kita mapanalanginan kon kita mosunod sa ehemplo ni Jesus?

  2. Lucas 23:43. Ngadto sa mahinulsulon nga kawatan: “Sa pagkatinuod magaingon ako kanimo, nga karong adlawa adto ikaw sa paraiso uban kanako.”

  3. Juan 19:26–27. Ngadto sa iyang inahan, nga si Maria: “Babaye, tan-awa ang imong anak!” Ngadto ni Juan: “Tan-awa ang imong inahan!”

    • Kang kinsang mga panginahanglan ang gihunahuna ni Jesus sa panahon sa iyang mapait nga kaagi? (Tan-awa sa Lucas 23:43; Juan 19:26–27.) Unsa ang atong makat-unan gikan niini? (Kon adunay mga pangutana nga moabut mahitungod sa pamahayag ni Jesus diha sa Lucas 23:43, tan-awa sa ikatulong dugang nga ideya sa pagtudlo.)

  4. Mateo 27:46; Marcos 15:34. “Dios ko, Dios ko, nganong gitalikdan mo ako?”

    • Unsa ang nasinati ni Jesus sa krus nga nakapahimo kaniya sa pagsabut ug pagtabang kanato kon kita mobati nga nag-inusara? Nganong mahinungdanon man nga mahibalo nga ang Manluluwas mopas-an dili lamang sa atong mga sala apan sa ato usab nga kamingaw, kasubo ug kahadlok?

      Si Elder Jeffrey R. Holland miingon: “Tungod kay siya kinahanglan nga sa katapusan motunob sa pigsanan sa katubsanan nga mag-inusara, siya ba makalahutay sa pinakamapait nga higayon niining tanan, ang kalisang sa hilabihang kasakit? Kini dili tungod sa mga tunok ug sa mga lansang, apan tungod sa kahadlok sa gibati nga tumang pag-inusara … ‘Dios ko, Dios ko, nganong gitalikdan mo ako?’ (Marcos 15:34). Siya ba makapas-an sa atong tanan nga mga sala ug sa atong mga kahadlok, ug sa atong mga kamingaw? Siya nakahimo ug iyang gihimo ug siya mohimo” (sa Conference Report, Okt. 1989, 32; o Ensign, Nob. 1989, 26).

  5. Juan 19:28. “Giuhaw ako.”

    • Bisan pa sa tanang pag-antus ni Jesus, kini lamang ang iyang gisulti nga pisikal nga kabalisa. Unsa ang gihatag kaniya sa diha nga siya miingon nga siya giuhaw? (Tan-awa sa Juan 19:29.)

  6. Juan 19:30. “Natapos na.”

    • Sumala sa Hubad ni Joseph Smith, si Jesus misulti, Amahan, natapos na, ang imong pagbuot natuman na (tan-awa sa Hubad ni Joseph Smith, Mateo 27:54). Ngano nga ang Manluluwas kinahanglan man nga mamatay aron pagtuman sa pagbuot sa Langitnong Amahan? (Tan-awa sa 2 Nephi 9:5; 3  Nephi 27:13–16. Kon ikaw mogamit sa pang-atensyon nga kalihokan, dapita ang mga sakop sa klase sa pagpaambit sa ilang mga ideya kon unsaon sa pagtubag sa pangutana sa bata.)

      Si Spencer W. Kimball miingon: “Siya kinahanglan nga mamatay, aron iyang maablihan ang mga lubnganan sa tanan nga katawhan sama nga ang iyang kaugalingon nga lubnganan naabli. Kon wala pa ang hilabihang kangiub sa takna sa paglansang sa krus, wala unta magsugod ang pagpanggawas gikan sa lubnganan” (sa Conference Report, Abr. 1975, 4; o Ensign, Mayo 1975, 4).

  7. Lucas 23:46. “Amahan, nganha sa imong mga kamot itugyan ko ang akong espiritu.”

Kon ikaw naggamit sa video nga “To This End Was I Born,” ipasalida kini karon.

Panapos

Ipasabut nga ang unang narekord nga mga pulong sa Manluluwas mao ang “Ania ako, ipadala ako” (Abraham 3:27). Uban sa iyang unang narekord nga mortal nga mga pulong mao ang “Ako kinahanglan magapadayon sa mga butang nga iya sa akong Amahan” (Lucas 2:49). Uban sa katapusan nga mga pulong nga iyang gisulti diha sa pagkamortal mao ang Amahan, natapos na, ang imong pagbuot natuman na (tan-awa sa Hubad ni Joseph Smith, Mateo 27:54). Si Jesus wala gayud kawad-i og panan-aw sa pagbuot sa iyang Amahan ug sa iyang kaugalingon nga misyon. Siya unta makatawag sa mga panon sa mga anghel aron pagtabang kaniya, apan siya wala mobuhat niini (Mateo 26:53–54). Bisan pa man sa iyang kasakit, siya wala gayud magduhaduha sa iyang pagpaubos ug sa iyang pagkamauyonon sa pagtuman sa walay kinutuban nga Pag-ula.

Ipamatuod ang mga kamatuoran nga gihisgutan sa leksyon. Kon angay, dapita ang mga sakop sa klase sa pagpaambit sa ilang mga pagpamatuod.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Pagsunod sa ehemplo sa Manluluwas sa panahon sa mga kalisdanan

Ang mga lihok sa Manluluwas sa panahon sa katapusan nga adlaw sa iyang mortal nga kinabuhi nagpakita sa labing kamahinungdanon sa iyang kinaiya. Ribyuha ang pipila ka mga pagsulay nga gilahutay ni Jesus nianang adlawa. Unya ipangutana ang mosunod nga mga pangutana.

  • Unsa nga matang sa kinaiya ang makita diha ni Jesus niining malisud nga panahon? (Ang tubag mahimong maglakip nga siya mas nabalaka sa uban kay sa iyang kaugalingon, nga siya mapasayloon, nga siya mauyonon sa pagbuot sa Langitnong Amahan, nga siya wala mohukom sa uban tungod sa ilang mga kahuyang, ug nga siya wala mobagulbol. Ilista ang mga tubag diha sa pisara. Hangyoa ang mga sakop sa klase sa paghatag og piho nga mga higayon nga ang mga kinaiya makita.)

  • Unsa nga mga kinaiya ang kasagarang makit-an diha kanato sa higayon sa atong pinakalisud nga panahon? Unsaon nato sa pagsunod sa ehemplo sa Manluluwas sa mga panahon sa kalisdanan?

2. “Nakasala ako sa akong pagtugyan sa dugo nga matarung” (Mateo 27:4)

  • Unsa ang gibuhat ni Judas sa iyang pagsulay sa paghinulsol sa iyang pagbudhi sa Manluluwas? (Tan-awa sa Mateo 27:3–5.) Unsa ang atong makat-unan gikan sa iyang kasinatian mahitungod sa “bayad” nga gihatag sa kalibutan kanato agi og bugti sa atong mga sala?

3. “Karong adlawa adto ikaw sa paraiso uban kanako” (Lucas 23:43)

Dangup ngadto sa mosunod nga kasayuran kon ikaw nagkinahanglan og pagpasabut sa mga pulong sa Manluluwas diha sa Lucas 23:43.

Si Propeta Joseph Smith miingon nga si Jesus misulti ngadto sa kawatan, “Karong adlawa adto ikaw uban kanako sa kalibutan sa mga espiritu” (Teachings of the Prophet Joseph Smith, sel. Joseph Fielding Smith [1976], 309).

Gikan sa Doktrina ug mga Pakigsaad 138:36–37 kita nakakat-on nga si Jesus miadto sa kalibutan sa mga espiritu sulod sa mga panahon tali sa iyang kamatayon ug Pagkabanhaw ug nga didto siya miandam sa matinud-anon nga mga espiritu sa pagsangyaw sa iyang ebanghelyo ngadto sa mga espiritu kinsa wala makadawat niini dinhi sa yuta.