“Siya Magapuyo uban Kanila, ug Sila Mamahimong Iyang mga Katawhan”

Katuyoan

Aron pag-awhag sa mga sakop sa klase sa pag-atubang sa umaabut nga malaumon tungod kay sila nahibalo nga ang mga pwersa sa dautan mabuntog ug ang Manluluwas maghari nga madaugon.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Pinadayag 5:1–5; 6. Si Juan nakakita pinaagi sa pagpadayag og usa ka basahon nga adunay pito ka mga timbri ug naniid sa uban nga mga panghitabo diha sa unang unom ka mga timbri, o kapanahonan. Siya nakakita nga si Satanas nakig-away batok sa mga matarung sa tanan nga kapanahonan.
2. Pinadayag 19:1–9; 20:1–11. Si Juan nakakita nga si Satanas pagagapuson ug si Kristo maghari nga madaugon sa panahon sa Milenyum.
3. Pinadayag 20:12–22:21. Si Juan nahibalo nga human mahitabo ang katapusang paghukom, ang mga matarung mopuyo uban sa Dios.
Dugang nga basahonon: Doktrina ug mga Pakigsaad 77; Ang Giya ngadto sa mga Kasulatan, “Pinadayag ni Juan,” 219–20.
Sugyot alang sa pagtudlo: “Labaw sa tanan, ang labing mahinungdanon nga pagpangandam mao ang imong kaugalingon. Pag-andam aron makabaton sa impluwensya sa Espiritu Santo” (Boyd K. Packer, Teach Ye Diligently [1975], 219). Matag usa kanato kinahanglan maningkamot sa pagpuyo sama sa pagpuyo sa Manluluwas ug sa pagtudlo sama sa iyang pagtudlo. Sa mainampoon nga paagi paghunahuna unsa ang imong buhaton aron masiguro nga ikaw nagtudlo uban sa impluwensya sa Espiritu Santo.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pang-atensyon nga Kalihokan

Ipakita ang bag-ohay nga mantalaan, ug itudlo ang duha o tulo ka mga makapasubo nga mga artikulo, sama sa mga report sa krimen o kinaiyanhon nga mga katalagman.
Unsa ang inyong bation kon kamo makabasa kalabut sa mga panghinabo nga ingon niini? (Ayaw paghisgut sa detalye sa kada panghitabo.)

Ipabasa sa klase ang 2 Timoteo 3:1.

Ipasabut nga kita nagpuyo niining katapusang mga adlaw, diha sa mga panahon nga gihulagway ni Apostol Pablo nga “makuyaw.” Ipasabut nga usa sa mga hagit sa pagpuyo niining katapusang mga adlaw mao ang pagkat-on sa pagbuntog sa kahadlok ug kasubo aron mabuntog nato ang mga pagsulay ug mga tintasyon. Kini nga leksyon maghisgut kon unsaon nga kita makakaplag sa paglaum ug kaisug pinaagi sa pagsabut sa mga panghitabo nga moabot sa katapusang mga adlaw.

Paghisgut ug Paggamit sa Kasulatan

Tukia kon sa unsa nga paagi nga ang mosunod nga mga tudling sa kasulatan makatabang kanato sa pagbaton sa paglaum samtang kita moatubang sa mga kalisdanan sa katapusang mga adlaw. Tabangi ang mga sakop sa klase sa pagsabut nga ang matarung dili kinahanglan nga mahadlok sa Ikaduhang Pag-anhi.

1. Si Satanas makig-away batok sa mga matarung.

Hisguti ang Pinadayag 5:1–5; 6. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga ang unang tulo ka mga kapitulo sa basahon sa Pinadayag naghisgut mahitungod sa panahon ni Juan (tan-awa sa leksyon 45). Ang nahabilin sa basahon naghisgut sa mga hitabo nga para ni Juan umaabot pa, gikan sa Apostasiya nga nahitabo human sa kamatayon sa mga Apostoles hangtud sa Ikaduhang Pag-anhi ni Jesukristo ug sa katapusang paghukom.

Ipasabut nga ang mga kapitulo 5 ug 6 sa Pinadayag migamit sa simbolo sa usa ka basahon nga “gisilyohan sa pito ka timbri” (Pinadayag 5:1). Matag timbri nagpaila sa usa ka libo ka tuig nga kapanahonan diha sa temporaryo nga pagkaanaa sa yuta (D&P 77:6–7; tan-awa ang ikatulong dugang nga ideya sa pagtudlo alang sa dugang kasayuran sa ikapito nga timbri). Diha sa kapitulo 6, ang Kordero (si Jesukristo) miabli sa unang unom ka mga timbri, nagpakita kang Juan sa uban nga mga panghitabo nga may kalabutan sa matag kapanahonan.

Usa ka butang nga atong makat-unan sa kapitulo 6 mao nga si Satanas nakig-away batok sa mga matarung sa tibuok kasaysayan sa yuta. Sumala sa Pinadayag 6:4–11, unsa ang uban nga mga paagi nga siya mibuhat niini? (Ang mga tubag mahimong maglakip niining gilista sa ubos.)
1. Kabangis ug pakiggubat (Pinadayag 6:4, 8)
2. Kagutom ug kanihit sa pagkaon (Pinadayag 6:5–6, 8. Ipasabut nga ang usa ka sintabo sa Roma mao ang kasagarang usa ka adlaw nga suhol ug usa ka takus sa trigo alang sa usa ka adlaw nga pagkaon sa usa ka tawo; bersikulo 6 nagpaila nga ang usa ka adlaw nga suhol makapalit lamang og pagkaon alang sa usa ka adlaw alang sa usa ka tawo.)
3. Pagpanggukod (Pinadayag 6:9–11)
Unsa ang mga pamaagi nga gigamit ni Satanas karon aron pagsulay sa pagbuntog sa mga matarung?

Si Presidente Gordon B. Hinckley miingon:

“Kana nga gubat, hilabihan ka pait, hilabihan ka mainiton, nagpadayon, ug kana wala gayud mohunong. Kana mao ang gubat tali sa kamatuoran ug sayop, tali sa kabubut-on ug pagpugos, tali sa mga sumusunod ni Kristo ug niadtong misalikway Kaniya. Ang iyang mga kaaway migamit sa tanan nga pamaagi diha niana nga panagsumpaki. Sila nagpatuyang sa mga pagpamakak ug pagpangilad. Sila migamit sa salapi ug katigayunan. Sila milimbong sa mga hunahuna sa mga tawo. Sila mipatay ug migun-ob ug migamit sa tanan nga dili balaan ug dili putli nga kalihokan aron pagtuis sa buluhaton ni Kristo….

“[Ang oposisyon] gibati diha sa walay kamatayon nga paninguha sa daghan, diha sa sulod ug gawas sa Simbahan, aron pagguba sa hugot nga pagtuo, gipakagamay, gipakaulawan, aron, pagsaksi og bakak, aron pagtintal ug paghaylo ug pagpugos sa atong mga katawhan sa mga kalihokan nga supak sa mga pagtulun-an ug mga sumbanan niini nga buluhaton sa Dios….

“Ang gubat nagpadayon. Kini gipakig-awayan sa tibuok kalibutan tungod sa isyu sa kabubut-on ug pagpugos. Kini gisagubang sa kasundalohan sa mga misyonaryo ibabaw sa suliran sa kamatuoran ug sayop. Kini gisagubang sa atong kaugalingon nga mga kinabuhi, matag adlaw, diha sa atong mga panimalay, diha sa atong mga trabaho, diha sa atong mga pakig-uban sa eskwelahan; kini gisagubang ibabaw sa mga pangutana sa gugma ug sa pagtahud, sa pagkamaunungon ug pagkamatinud-anon, sa pagkamasulundon ug pagkamatarung. Kitang tanan nahilakip niini” (sa Conference Report, Okt. 1986, 55–58; o Ensign, Nob. 1986, 42, 44–45).
Human sa paghimo og komentaryo sa kinutlo sa ibabaw, si Presidente Hinckley midugang, “Kita magmadaugon [sa gubat batok ni Satanas], ug wala pay umaabut nga ingon niini ka masidlakon” (sa Conference Report, Okt. 1986, 58; o Ensign, Nov. 1986, 45). Unsaon man nato pagpatunhay sa atong paglaum ug positibo nga panglantaw samtang kita makiggubat ni Satanas? Unsa may mga kapanguhaan nga makahatag kanato og kalig-on batok sa gahum ni Satanas ug sa iyang mga sumusunod? (Ang mga tubag mahimong maglakip sa mga kasulatan ug sa mga pagtulun-an sa buhing mga propeta, katungod sa priesthood, mga templo, ug pakig-uban sa ubang mga miyembro sa Simbahan.)

2. Si Satanas pagagapuson, ug si Kristo maghari nga madaugon sa panahon sa Milenyum.

Basaha ug hisguti ang Pinadayag 19:1–9 ug 20:1–11.

Si Juan mihisgut sa daghang mga sakit nga modagsang, mga gubat, ug mga paghukom nga moabut sa dili pa ang Ikaduhang Pag-anhi ni Jesukristo (Pinadayag 8–16). Unya, diha sa Pinadayag 19, siya mihulagway sa pag-abut sa Ginoo, gisimbolo pinaagi sa panihapon sa kaminyoon (Pinadayag 19:7–9). Unsa ang girepresentaran sa asawa sa Kordero? (Ang Simbahan ni Jesukristo.) Unsa may gihulagway sa simbolo sa panihapon sa kaminyoon, diin si Kristo mao ang pamanhunon ug ang Simbahan mao ang pangasaw-onon, mahitungod sa relasyon sa Ginoo ug sa iyang Simbahan?
Unsa ang atong buhaton aron maimbitar niini nga panihapon sa kaminyoon?

Si Elder Bruce R. McConkie mipasabut: “Ang mga elder sa Israel karon nanghatag sa mga pagdapit ngadto sa panihapon sa kaminyoon sa Ginoo; kadto kinsa motuo ug maghupot sa ebanghelyo sa ingon niana modawat sa pagdapit ug nga molingkod kon moabut ang panahon … diha sa bangkete sa kaminyoon” (Doctrinal New Testament Commentary, 3 bol. [1966–73], 3:563–64).
Ang Ikaduhang Pag-anhi ni Jesukristo mag-una sa Milenyum, ang usa ka libo ka tuig nga kapanahonan, diin si Kristo personal nga mohari sa ibabaw sa yuta. Unsa ang mahitabo ni Satanas sa panahon sa Milenyum? (Tan-awa sa Pinadayag 20:1–3.) Unsa kaha ang kinabuhi kon si Satanas gapuson? (Tan-awa sa 1 Nephi 22:26; D&P 45:55, 58.) Unsaon nato pagpugong sa gahum ni Satanas sa atong mga kinabuhi karon dayon?
Human sa Milenyum, si Satanas pagabuhian sulod sa mubong panahon, ug katapusan nga dakong gubat pakig-awayan tali sa mga kasundalohan sa Dios ug mga kasundalohan ni Satanas (Pinadayag 20:7–8; D&P 88:111–13). Kini usahay pagatawgon og ang gubat sa Gog ug sa Magog. Unsa ang mahimong sangputanan niining dakong gubat pagkahuman sa Milenyum? (Tan-awa sa Pinadayag 20:9–11; D&P 88:114–15.) Tungod kay ang sangputanan sa gubat nahibaw-an na, unsa ang atong responsibilidad mahitungod niini nga kadaugan?

Si Presidente Ezra Taft Benson miingon: “Matag adlaw ang mga pwersa sa dautan ug mga pwersa sa maayo maglista og bag-ong mga sakop. Matag adlaw kita personal nga mohimo og daghan nga mga paghukom gipakita sa katuyoan nga atong gipaluyohan. Ang katapusan nga sangputanan piho—ang mga gahum sa pagkamatarung modaug. Apan unsa ang nagpabilin nga wala pa mahibaloi mao nga asa kitang dapita mobarug niini nga gubat, karon ug sa umaabut---ug unsa kaisug kita nga mobarug. Kita ba magmatinud-anon sa atong katapusan nga mga adlaw ug magtuman sa atong gi-orden nang daan nga mga misyon?” (“In His Steps,” Ensign, Sept. 1988, 2).

3. Human sa katapusang paghukom, ang matarung mopuyo uban sa Dios.

Basaha ug tukia ang mga pinili nga bersikulo gikan sa Pinadayag 20:12–22:21.

Human sa katapusan nga dakong gubat, ang katapusan nga paghukom mahitabo. Unsa ang atong makat-unan gikan sa Pinadayag 20:12 mahitungod kon unsaon kita paghukom? Unsa nga mga panalangin ang moabut ngadto niadtong kinsa gihukman nga mga matarung? (Tan-awa sa Pinadayag 21:3–7. Ilista ang mga tubag sa mga sakop sa klase diha sa pisara. Ang mga tubag mahimong maglakip niadtong gilista sa ubos.)

Ang mga matarung:

Mopuyo diha sa atubangan sa Dios (Pinadayag 21:3).
Dili na makasinati sa kamatayon, kaguol, paghilak, o kasakit (Pinadayag 21:4).
makapanunod sa tanan nga mga butang ingon nga anak nga lalaki ug anak nga babaye sa Dios (Pinadayag 21:7).

Sa unsa nga paagi nga ang kahibalo niining dagko nga mga panalangin makatabang kanato samtang kita mag-atubang sa mga kalisud sa mortalidad?
Ang Pinadayag 21:10–22:5 naghulagway sa celestial nga kahimayaan sa yuta ug sa dakbayan diin kadto kinsa nakakab-ot sa celestial nga kahimayaan mopuyo. Ngano nga walay templo diha sa celestial nga dakbayan? (Tan-awa sa Pinadayag 21:22. Ang katuyoan sa templo mao ang pagdala kanato paduol sa Dios ug magtudlo kanato sa iyang plano. Kon kita magpuyo uban kaniya pag-usab, ang mga templo wala na kinahanglana.) Unsa ang gisulti kanato sa Pinadayag 22:14 nga atong buhaton aron makasulod sa pultahan sa mahangturon nga dakbayan?

Si Presidente David O. McKay miistorya kabahin sa usa ka panan-awon diin siya nakakita sa maanindot nga dakbayan, sa daghang mga tawo nga nagsul-ob og puti, ug sa Manluluwas:

“Ako nakasabut nga ang dakbayan iya [sa Manluluwas]. Kana mao ang Dakbayan nga Mahangturon; ug ang tanan nga mga katawhan nga misunod kaniya mopuyo didto sa kalinaw ug sa kalipay nga mahangturon.

“Apan kinsa sila?

“Nga daw ang Manluluwas mibasa sa akong mga hunahuna, siya mitubag pinaagi sa pagtudlo sa semi-circle nga nagpakita kanila, ug diha gisulat sa bulawan ang mga pulong: Kini Mao Sila Kinsa Nagmadaugon sa Kalibutan––kinsa sa tinuoray natawo pag-usab!” (Cherished Experiences from the Writings of President David O. McKay, hinugpong ni Clare Middlemiss [1976], 60).

Panapos

Itudlo nga ang Bag-ong Tugon gitapos uban sa usa ka mensahe sa dakong paglaum. Mga propeta sama ni Juan nga Tigpadayag nakakita sa mga butang nga moabut ug misulti kanato sa mga panalangin nga atong madawat kon kita magpabilin nga matarung ug molahutay sa katapusan. Ipamatuod nga ang matarung modaug diha sa katapusan sa kalibutan. Awhaga ang mga sakop sa klase nga magbaton sa kaisug ug paglaum gikan niini nga kahibalo samtang sila mobarug batok sa mga dautan ug magtinguha sa pagbuntog sa mga babag niini nga kinabuhi.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o pipila niini nga mga ideya isip kabahin sa leksyon.

1. Ang mga kakuyaw sa pagbutang sa atong mga kasingkasing sa kalibutanon nga mga kabtangan

Ang Pinadayag 18:11–18 nagtudlo nga ang dautan magbangutan sa pagkawala sa ilang kalibutanon nga mga kabtangan ug nga matingala nga ang mahinungdanon nga kalibutanong gingharian mahimong magun-ob sulod sa mubong panahon. Kanus-a nga ikaw nakakita sa kalibutanong mga kabtangan nga nagun-ob o nawala sulod sa mubong panahon?
Unsa ang mga kakuyaw sa pagbutang sa atong mga kasingkasing diha sa kalibutanong mga butang? Sa unsa nga mga paagi nga ang kalibutanong mga butang makapalinga kanato gikan sa espirituhanong mga butang?

2. Ang Unang Pagkabanhaw

Ipabasa sa usa ka sakop sa klase ang Pinadayag 20:4–6. Aron pagtabang sa mga sakop sa klase nga makasabut niini nga mga bersikulo, ipaambit ang mosunod nga kasayuran (sa ubos):

Ang Unang Pagkabanhaw, o ang pagkabanhaw sa mga makiangayon, magsugod diha sa Ikaduhang Pag-anhi sa Manluluwas. Kadto kinsa makadawat sa celestial o terrestrial nga ganti mobangon pag-una niini nga pagkabanhaw (D&P 88:98). Ang Unang Pagkabanhaw, o ang pagkabanhaw sa mga makiangayon, magsugod diha sa Ikaduhang Pag-anhi sa Manluluwas. Kadto kinsa makadawat sa celestial o terrestrial nga ganti mobangon pag-una niini nga pagkabanhaw (D&P 88: 98–99). Ang Ikaduhang Pagkabanhaw, o ang pagkabanhaw sa dili makiangayon, dili magsugod hangtud sa katapusan sa Milenyum. Kadto kinsa makadawat sa telestial nga ganti ug ang mga anak sa kapildihan mobangon niini nga pagkabanhaw (D&P 88:100–102).

3. Ang pito ka mga timbri diha sa basahon sa Pinadayag

Ang mosunod nga tsart maghatag sa dugang nga kasayuran mahitungod sa matag usa sa pito ka mga timbri. Ang tsart mahimo usab nga magamit sa pagsabut sa estruktura sa basahon sa Pinadayag. Imong makita nga ang mga panghitabo gilista sa kronolohikal nga pagkahan-ay, gibasi kon kanus-a kini mahitabo. Dili kinahanglan nga ikalibog kini sa mga dispensasyon sa ebanghelyo.

Timbri	Mahinungdanon nga mga Hitabo
Unang Timbri	Ang paglalang ug ang pagkapukan ni Adan ug ni Eva; ang pagpangalagad ni Enoch ug ang pagbalhin sa iyang dakbayan ngadto sa langit (Pinadayag 6:1–2).
Ikaduhang Timbri	Si Noe ug ang Baha (Pinadayag 6:3–4).
Ikatulong Timbri	Mga pagpangalagad ni Abraham, Isaac, Jacob, Jose, ug ni Moises; ang Exodo; ang kapanahonan sa paghari sa mga maghuhukom (Pinadayag 6:5–6).
Ikaupat nga Timbri	Ang kapanahonan sa pagdumala sa mga hari; ang pagkabahinbahin sa mga gingharian; ang pagkabihag sa mga gingharian (Pinadayag 6:7–8).
Ikaunom nga Timbri	Ang pagkatawo, ang pangalagad, ang pagkabanhaw ni Jesukristo; ang pagtukod sa iyang Simbahan ug ang pangalagad sa mga Apostoles; ang pagpatay sa mga Apostoles; ang Apostasiya (Pinadayag 6:9–11).
Ikaunom nga Timbri	Pagpadayon sa Apostasiya; pagpahiuli sa ebanghelyo pinaagi ni Propeta Joseph Smith; mga timailhan sa mga panahon gipakita (Pinadayag 6:12–17; 7:1–8).
Ikapito nga Timbri	Mga gubat, mga sakit nga midagsang, ug pagkagun-ob; Ikaduhang Pag-anhi sa Ginoo (Pinadayag 8:1–19:21). Milenyum sa Kalinaw (Pinadayag 20:1–6). Si Satanas pagabuhian sulod sa mubo nga panahon, ang katapusang dako nga gubat, ug ang katapusang paghukom (Pinadayag 20:7–15).
Human sa Ikapito	Ang yuta mahimong celestial (Pinadayag 21:1–22:6).

Itudlo nga ang unang lima ka mga timbri nahisgutan sa 11 ka mga bersikulo, ang ikaunom nga timbri nahisgutan sa 14 ka mga bersikulo, ug ang ikapito nga timbri nahisgutan sa 226 ka mga bersikulo. Unsa ang gitudlo kanato niini nga empasis?

Itudlo nga si Juan mihatag og dakung pagtagad sa mga panghitabo sa atong panahon ug sa unsay moabut. Ang basahon sa Pinadayag gisulat alang kanato karon, ug ang atong mga kinabuhi mapanalanginan samtang kita magtuon niini ug mag-andam alang sa Ikaduhang Pag-anhi sa Manluluwas.