“Ako Makahimo sa Tanan nga mga Butang Pinaagi kang Kristo”

Mga Taga-Filipos; Mga Taga-Colosas; Filemon

Katuyoan

Aron pag-awhag sa mga sakop sa klase sa pagpalambo sa mga kinaiya sa tinuod nga sumusunod ni Jesukristo.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Mga Taga-Filipos. Si Pablo mipasalamat sa mga Santos sa Filipos sa ilang gipadala nga tabang ngadto kaniya ug nag-awhag kanila nga maghiusa, magmatinud-anon nga mga sumusunod ni Kristo.
2. Mga Taga-Colosas 1. Si Pablo mipahinumdom sa mga Santos sa Colosas nga ang katubsanan moabut lamang pinaagi ni Jesukristo.
3. Mga Taga-Colosas 2:1–8, 16–23; 3; 4. Si Pablo mitudlo sa mga Santos nga taga-Colosas mahitungod sa mga butang nga kinahanglan ilang buhaton ug sa mga kinaiya nga kinahanglan nga ilang ipalambo ingon nga pinili sa Dios.
4. Filemon. Si Pablo miawhag ni Filemon nga magmapasayloon ngadto ni Onesimo, usa ka ulipon nga milayas.
Dugang nga basahonon: Ang Giya ngadto sa mga Kasulatan, “Mga Epistola ni Pablo: Mga Sulat ngadto sa Mga Taga-Filipos,” 55; “Mga Sulat ni Pablo: Mga Epistola ngadto sa Mga Taga Colosas,” 55; ug “Mga Epistola ni Pablo: Sulat ngadto ni Filemon,” 55.
Sugyot alang sa pagtudlo: Ang usa ka outline sa leksyon o basahonon nga kasulatan mahimong maglangkub og daghan ra kaayo nga mga materyal nga wala nay igong panahon sa paggamit niini sa klase. Samtang ikaw mag-andam sa matag leksyon, sa mainampoong paagi desisyoni hain nga mga doktrina ug mga baruganan ang labing maayong gamiton alang sa imong klase. Ibutang sa imong plano nga kini maoy unahon sa pagtudlo, lakip sa ubang mga bahin sa leksyon kon adunay panahon. Hinuon, samtang ikaw magtudlo, pagmabination ug pagmasulundon sa hunghong sa Espiritu kon suguon ka sa pag-usab sa imong plano.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Isulat diha sa pisara ang pipila ka mahinungdanon nga mga pulong gikan sa ikatrese nga artikulo sa hugot nga pagtuo, sama sa tinuod, matinud-anon, mahiyason, ug dalaygon.

Pang-atensyon nga Kalihokan

Unsa nga artikulo sa hugot nga pagtuo ang naglangkub niini nga mga pulong? (Kon ang mga sakop sa klase wala mahibalo, ipatan-aw nila ang Mga Artikulo sa Hugot nga Pagtuo, nga makit-an sa katapusan sa Perlas nga Labing Bililhon.)

Kon ang mga sakop sa klase nakatubag sa sakto, hangyoa ang usa ka sakop sa klase sa pagsulti o pagbasa sa ikatrese nga artikulo sa hugot nga pagtuo. Unya ipasulti pag-usab sa maong sakop sa klase ang unang katungang bahin sa artikulo sa hugot nga pagtuo, hangtud sa “mga tambag ni Pablo.”

Pang-atensyon nga Kalihokan

Unsa ang “mga tambag ni Pablo”? Asa kini makit-an?

Ipaabli sa mga sakop sa klase ang Mga Taga-Filipos 4:8 ug itandi kini ngadto sa ikatrese nga artikulo sa hugot sa pagtuo. Ipasabut nga sa dihang si Joseph Smith misaysay sa mga tambag ni Pablo diha sa ikatrese nga artikulo sa hugot nga pagtuo, siya nagpasabut ngadto sa Mga Taga-Filipos 4:8, nga kabahin sa sulat nga gisulat ni Pablo ngadto sa mga Santos sa Filipos. Ang karon nga leksyon maglangkob niini nga sulat ug sa mga sulat ni Pablo ngadto sa Mga Taga-Colosas ug ni Filemon, diin tanan niini gisulat sa panahon sa iyang pagkabilanggo didto sa Roma. Kini nga mga sulat naghisgot sa mga hiyas nga kinahanglan atong palamboon ingon nga matinud-anon nga mga sumusunod ni Jesukristo.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi nga kini atong magamit karon sama nga kini nagamit sa mga Santos sa panahon ni Pablo. Awhaga ang mga sakop sa klase sa pagpaambit sa mga kasinatian nga may kalabutan ngadto sa mga baruganan sa kasulatan.

1.Si Pablo miawhag sa mga Santos nga taga-Filipos sa pagsunod ni Jesukristo.

Hisguti ang mahitungod sa mga sulat ni Pablo ngadto sa Mga Taga-Filipos. Dapita ang mga sakop sa klase sa pagbasa og kusog sa pinili nga mga bersikulo.

Si Pablo gibilanggo didto sa Roma sa dihang siya misulat ngadto sa Mga Taga-Filipos. Unsa ang reaksyon sa uban nga mga sakop sa Simbahan sa pagkabilanggo ni Pablo? (Tan-awa sa Mga Taga-Filipos 1:12–18.) Sa unsa nga paagi nga kamo natabangan pinaagi sa pagkakita o pagkadungog sa uban kinsa mga maisugon diha sa pag-alagad sa Ginoo?
Diha sa Mga Taga-Filipos 2:2–3, unsa ang gitambag ni Pablo nga buhaton sa mga miyembro sa Simbahan? Sa unsa nga mga paagi nga ang mga miyembro sa Simbahan kinahanglan nga magbaton sa “samang panghunahuna”? (Tanawa sa Mga Taga-Filipos 1:27; 2:14–15.) Ngano nga kita usahay mobuhat sa mga butang nga “kawang pagpagarbo sa kaugalingon”? Ngano sa inyong hunahuna nga si Pablo mitambag batok niini? Ngano nga mahinungdanon nga dili mohunahuna nga kita mas maayo kay sa ubang mga tawo? (Tan-awa sa D&P 38:24–26.)
Unsa ang gitudlo ni Pablo mahitungod ni Jesus diha sa Mga Taga-Filipos 2:5–8? Sa unsa nga paagi nga si Jesus mipakita sa hingpit nga ehemplo sa pagpaubos ug masugtanon sa kabubut-on sa iyang Amahan? (Tan-awa sa Juan 8:29.) Sa unsa nga paagi nga kita mahimong mas mapainubsanon ug masugtanon sa kabubut-on sa Langitnong Amahan?
Unsa sa inyong hunahuna ang gipasabut ni Pablo sa dihang siya miingon sa mga taga-Filipos, “Buhata ninyo ang inyong kaugalingon nga kaluwasan uban sa kahadlok ug pagkurog”? (Mga Taga- Filipos 2:12).

Si Presidente David O. McKay mipasabut: “ ‘Buhata ang inyong kaugalingon nga kaluwasan’ mao ang usa ka pag-awhag sa pagpakita pinaagi sa paglihok, pinaagi sa paghunahuna, masulundon nga kakugi sa katinuod sa hugot nga pagtuo. Apan kini kinahanglan nga pagabuhaton uban sa pagkaamgo nga ang bug-os nga pagsalig sa kaugalingon malagmit mosangput sa garbo ug mga kahuyang nga magdala og kapakyasan. Uban sa ‘kahadlok ug pagkurog’ kita kinahanglang magtinguha sa kalig-on ug sa grasya sa Dios alang sa pagdasig aron makaangkon sa katapusang kadaugan” (sa Conference Report, Abr. 1957, 7).
Si Pablo misubli sa pagtambag mga taga-Filipos nga “paglipay kamo diha sa Ginoo” (Mga Taga-Filipos 3:1; 4:4). Sa unsang paagi nga kita maglipay diha sa Ginoo?
Si Pablo misulti sa mga taga-Filipos nga siya misakripisyo sa tanang mga butang alang ni Kristo (Mga Taga-Filipos 3:7–8). Unsa ang gisakripisyo ni Pablo? Ngano nga mahinungdanon nga kita mobuhat og mga sakripisyo alang ni Kristo? (Tan-awa sa Mga Taga-Filipos 3:9–12.)

Si Propeta Joseph Smith mitudlo: “Ang usa ka relihiyon nga wala magkinahanglan og sakripisyo sa tanan nga mga butang dili gayud makaangkon og gahum nga makapakita og hugot nga pagtuo nga gikinahanglan diha sa kinabuhi ug sa kaluwasan: tungod, kay gikan sa unang pagpuyo sa tawo, ang hugot nga pagtuo nga gikinahanglan diha sa paglipay sa kinabuhi ug sa kaluwasan dili gayud maangkon kon walay sakripisyo sa tanan nga kalibutanong mga butang” (Lectures on Faith [1985], 69).
Sa unsang paagi nga kita makaangkon sa “kalinaw sa Dios” nga gisulti diha sa Mga Taga-Filipos 4:7? (Mga Taga-Filipos 4:6–7.) Kanus-a kamo mibati sa kalinaw sa Dios?
Sa unsa nga paagi nga kita makagamit sa tambag ni Pablo diha sa Mga Taga-Filipos 4:8? (Tan-awa usab sa Mga Artikulo sa Hugot nga Pagtuo 1:13.) Sa unsa nga paagi nga kita mapanalanginan kon kita mosunod niini nga tambag?
Si Pablo mipamatuod nga, “Ako makabuhat sa tanan nga mga butang pinaagi ni Kristo diin makapalig-on kanako” (Mga Taga-Filipos 4:13). Sa inyong hunahuna giunsa ni Pablo pag-angkon niini nga pagpamatuod ni Kristo? Sa unsa nga paagi nga kamo nakakita nga kamo “nakahimo sa tanang mga butang pinaagi ni Kristo”?

2.Si Pablo mipahinumdom sa mga taga-Colosas nga ang kaluwasan moabut lamang pinaagi ni Kristo.

Hisguti ang Mga Taga-Colosas 1. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga ang mga Santos sa Colosas, usa ka gamay nga dakbayan sa silangan sa Efeso, naimpluwensya pinaagi sa mga panudlo nga nagpaminos sa kamahinungdanon sa Manluluwas ug mipunting sa pag-angkon sa kahingpitan pinaagi sa paghimo sa mga ordinansa ug pagsimba sa mga anghel. Diha sa iyang sulat ngadto sa mga taga-Colosas, si Pablo mipasidaan batok niini nga mga panudlo, nagtambag sa mga Santos sa pagpadayon sa pagka “dili matarug ug magmalig-on” (Mga Taga-Colosas 1:23; tan-awa usab sa Mga Taga-Colosas 2:5–7) diha sa kahibalo nga ang kaluwasan moabut lamang pinaagi ni Jesukristo.

Unsa nga mga kamatuoran ang gitudlo ni Pablo mahitungod ni Jesukristo ngadto sa mga taga-Colosas? (Tan-awa sa Mga Taga-Colosas 1:12–22. Ilista sa pisara ang mga tubag sa mga sakop sa klase.) Ngano nga mahinungdanon alang sa mga taga-Colosas nga makasabut niini nga mga kamatuoran? Sa unsang paagi nga ang inyong kahibalo ug pagmatuod ni Jesukristo makaapekto sa paagi sa inyong pagpuyo?
Unsa ang mga “panulundon sa mga santos” nga atong mahimong madawat gikan sa Amahan sa Langit? (Tan-awa sa Mga Taga-Colosas 1:12; 2 Nephi 9:18; D&P 50:5.) Kinsa ang mihimo niini nga panulundon nga posible? (Tan-awa sa Mga Taga-Colosas 1:12–14.) Unsa ang atong buhaton aron makadawat niini nga panulundon? (Tan-awa sa Mga Taga-Colosas 1:10–12; 2 Nephi 9:18; Alma 5:51; D&P 50:5.)
Unsa ang gipasabut ni Pablo sa dihang siya mitambag sa mga taga-Colosas nga “dili matarug ug magmalig-on” sa ebanghelyo? (Tan-awa sa Mga Taga-Colosas 1:23.) Unsa ang mga hinungdan sa uban nga mga tawo sa “pagbulag gikan sa paglaum diha sa ebanghelyo”? (Mga Taga-Colosas 1:23). Unsa ang atong buhaton aron pagpalig-on sa atong mga pagpamatuod?

3. Si Pablo mitudlo sa mga taga-Colosa unsa ang kinahanglan nga ilang buhaton ingon nga pinili sa Dios.

Hisguti ang Mga Taga-Colosas 2:1–8, 16–23; 3; 4. Dapita ang mga sakop sa klase sa pagbasa og kusog sa pinili nga bersikulo.

Si Pablo buot nga ang mga kasingkasing sa mga Santos “maghiusa nga matagik diha sa gugma” ug diha sa kahibalo sa Dios nga Amahan ug Jesukristo (Mga Taga-Colosas 2:2–3). Sa unsa nga paagi nga kita makakab-ot niini diha sa atong kaugalingong ward o branch?
Unsa ang gipasabut sa “pinagamot ug pinatubo” diha ni Kristo? (Tan-awa sa Mga Taga-Colosas 2:7.) Sa unsa nga paagi nga kita mahimong mapagamot diha ni Kristo? Sa unsa nga paagi nga ang “pagkagamot ug pagtubo” diha ni Kristo makatabang kanato sa mga panahon sa pagsulay? (Ikaw mahimo nga motandi sa usa ka kahoy nga adunay mugbo, mabaw nga mga gamot ngadto sa usa nga adunay tag-as, lawom nga mga gamot. Hisguti kon hain nga kahoy ang malagmit makalahutay sa mga pagsulay sama sa unos o mga huwaw.)
Unsa nga mga kinaiya sa “pinili sa Dios” ang gilista diha sa Mga Taga-Colosas 3:12–15? (Ilista sa pisara ang mga tubag sa mga sakop sa klase.) Sa unsa nga paagi nga si Jesukristo mipakita og ehemplo niini nga mga kinaiya? (Hangyoa ang mga sakop sa klase sa paghunahuna og piho nga mga higayon diin si Jesus mipakita sa matag kinaiya.) Sa unsa nga paagi kita mas hingpit nga makapalambo niini nga mga kinaiya?
Sa unsa nga paagi nga kita makapahimo sa pulong ni Kristo nga motuhop ngari kanato, ingon sa gi-awhag ni Pablo? (Tan-awa sa Mga Taga-Colosas 3:16–17; tan-awa usab sa D&P 1:37; 18:34–36.) Sa unsa nga paagi nga ang mga himno makapalig-on sa atong pagsabut ug pagpamatuod sa pulong ni Kristo? Sa unsa nga paagi nga kita makagamit og maayo sa mga himno ug sa ubang sagrado nga mga awit?

Si Elder Dallin H. Oaks miingon: “Kinahanglan atong gamiton og maayo ang atong mga himno aron kita mahiuyon uban sa Espiritu sa Ginoo, sa paghiusa kanato ug pagkat-on sa atong doktrina. Kinahanglan atong gamiton og maayo ang atong mga himno diha sa misyonaryo nga pagtudlo, diha sa mga klase sa ebanghelyo, diha sa mga katiguman sa korum, diha sa mga family home evening, ug diha sa pag-visiting teaching sa panimalay. Ang musika maoy usa ka epektibo nga paagi sa pagsimba sa atong Langitnong Amahan ug sa iyang Anak, nga si Jesukristo. Kita kinahanglan mogamit sa mga himno kon kita nagkinahanglan og espirituhanong kalig-on ug kadasig” (sa Conference Report, Okt. 1994, 13; o Ensign, Nob . 1994, 12).
Si Pablo misubli sa paghatag og gibug-aton sa kamahinungdanon sa pagkamapasalamaton (Mga Taga-Colosas 2:7; 3:15, 17). Nganong mahinungdanon man nga kita magmapasalamaton? Sa unsa nga paagi kita makapakita sa atong pagpasalamat sa Langitnong Amahan ug ni Jesukristo sa tanan nga higayon?

4. Si Pablo miawhag ni Filemon nga magmapasayloon ngadto ni Onesimo.

Hisguti ang sulat ni Pablo ngadto ni Filemon. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga si Pablo misulat og usa ka personal nga sulat ngadto ni Filemon nga usa ka sakop sa Simbahan sa Colosas, mahitungod sa ulipon ni Filemon nga si Onesimo. Si Onesimo nangawat ni Filemon ug milayas ngadto sa Roma, diin gikakita si Pablo ug nga nakabig ngadto sa Simbahan. Si Pablo mihangyo ni Filemon sa pagpasaylo ni Onesimo ug nga dawaton siya ingon nga igsoon diha sa ebanghelyo.

Unsa ang atong makat-unan mahitungod ni Pablo gikan sa iyang sulat ni Filemon?
Sa unsa nga paagi nga si Pablo mipakita og pagtahud sa kabubut-on ni Filemon? (Tan-awa sa Filemon 1:14.) Sa unsa nga paagi nga si Pablo mipakita sa iyang tinguha sa kaayohan ni Onesimo?
Unsa ang atong makat-unan gikan niini nga sulat mahitungod sa gahum sa ebanghelyo sa pagpausab sa relasyon sa tawo? (Tan-awa sa Filemon 1:16.) Sa unsa nga paagi nga ang ebanghelyo nakaapekto sa inyong relasyon sa mga tawo nga naglibot kaninyo?

Panapos

Ipamatuod ang kamahinungdanon sa pagpalambo sa mga hiyas nga makatabang kanato nga mas mahimong sama ni Jesukristo, sama sa gisulti sa sulat ni Pablo ngadto sa mga taga-Filipos, sa mga taga-Colosas, ug ni Filemon. Dapita ang mga sakop sa klase sa pagbasa sa Mga Taga-Filipos 4:8 ug Mga Taga-Colosas 3:12–15 ug pagpili og usa ka hiyas gikan niana nga mga bersikulo aron mapalambo karon nga semana.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o pipila niini nga mga ideya isip kabahin sa leksyon.

1. Relasyon tali sa mga ginikanan ug sa mga anak

Ipabasa sa mga sakop sa klase ang Mga Taga-Colosas 3:20–21.

Sumala ni Pablo, unsa ang obligasyon sa anak ngadto sa iyang mga ginikanan? Unsa ang obligasyon sa mga ginikanan ngadto sa usa ka anak? Sa unsa nga paagi nga kamo makapalambo sa relasyon tali sa mga ginikanan ug mga anak diha sa inyong pamilya?

2. “Kamo magaalagad ni Ginoong Kristo” (Mga Taga-Colosas 3:24)

Ipabasa sa usa ka sakop sa klase ang Mga Taga-Colosas 3:23–24.

Sa unsa nga paagi nga kita makasunod sa mga panudlo ni Pablo niini nga mga bersikulo? (Tan-awa usab sa Mateo 25:34–40.) Unsa nga kalainan ang malagmit mahimo niini nga kinaiya kon sa unsa nga paagi kita moalagad?