Sunday School: Doktrina sa Ebanghelyo
Leksyon 15: ‘Ako Mao ang Kahayag alang sa Kalibutan’

Leksyon 15

“Ako Mao ang Kahayag alang sa Kalibutan”

Juan 7–8

Katuyoan

Aron paglig-on sa mga pagpamatuod sa mga sakop sa klase nga si Jesukristo mao ang atong Manluluwas ug nga pinaagi sa pagsunod kaniya kita makaangkon og tinuod nga kagawasan.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Juan 7. Si Jesus mitambong sa Kasaulogan sa mga Tabernakulo ug mitudlo diha sa templo. Ang uban nga katawhan mituo nga siya mao si Kristo, samtang ang uban nagtuo nga siya bakakon.

    2. Juan 8:1–11. Usa ka babaye nga hing-abtan nga nanapaw, gidala ngadto kang Jesus. Siya nalooy kaniya.

    3. Juan 8:12–36. Si Jesus mipahayag, “Ako mao ang kahayag alang sa kalibutan.” Siya mitudlo sa mituo nga mga Judeo nga ang pagsunod kaniya makapalingkawas kanila gikan sa espirituhanong pagkaulipon.

  2. Sugyot alang sa pagtudlo: Ribyuha kanunay ang imong leksyon labing ubos usa ka semana sa dili pa itudlo. Kon ikaw magtuon og sayo sa pinili nga mga kasulatan, ikaw makadawat og mga hunahuna ug mga pagdasig nianang semanaha nga makatabang kanimo sa pagtudlo sa leksyon. Samtang ikaw mamalandong sa leksyon niana nga semana, pag-ampo alang sa Espiritu nga mogiya kanimo ug pagbaton og hugot nga pagtuo nga ang Ginoo manalangin kanimo. (Tan-awa sa Teaching, No Greater Call [36123], mga pahina 22–23, 97–99.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pangitngita gyud ang kwarto pinaagi sa pagpalong sa mga suga ug pagsira sa bisan unsa nga mga kurtina o mga blinds. Hangyoa ang usa ka sakop sa klase sa pagbasa og kusog sa Doktrina ug mga Pakigsaad 93:1–2. Kon nabasa na sa sakop sa klase (o misulay sa pagbasa) niini nga mga bersikulo, pangutan-a siya:

Pang-atensyon nga Kalihokan

  • Malisud ba ang pagbasa niini nga mga bersikulo? Unsay makapasayon niini? (Dugang kahayag.)

Pasigaa ang mga suga ug ablihi ang mga kurtina o mga blinds. Hangyoa ang sakop sa klase sa pagbasa pag-usab sa Doktrina ug mga Pakigsaad 93:1–2. Ipasabut nga ang kahayag nga gigamit sa tibuok mga kasulatan ingon nga simbolo ni Jesukristo. Si Jesus mismo migamit niini nga simbolo samtang nagtudlo diha sa templo. Kini nga leksyon maghisgut sa mga paagi diin si Jesukristo mao ang kahayag alang kanato.

Kon ikaw wala makahimo sa kwarto nga mongitngit gyud kaayo, pagdrowing hinoon og usa ka parola diha sa pisara (o ipakita ang hulagway sa parola). Ipasabut nga ang katuyoan sa usa ka parola mao ang pagpasidaan sa mga barko sa kakuyaw ug paggiya niini ngadto sa luwas nga kahimtang. Unya ipasabut nga ang kahayag mao ang usa sa mga simbolo nga gigamit ni Jesus sa iyang pagtudlo mahitungod sa iyang misyon ug sa iyang relasyon ngari kanato. Kini nga leksyon maghisgut sa unsang mga paagi nga si Jesus mao ang kahayag nga mopakita kanato sa dalan ngadto sa espirituhanong kaluwasan.

Paghisgut ug Paggamit sa Kasulatan

Samtang ikaw magtudlo sa mosunod nga mga kasayuran sa kasulatan, hatag og pagpamatuod ni Jesukristo kon ikaw mibati nga kini angay. Awhaga ang mga sakop sa klase sa paghatag usab og pagpamatuod ni Jesukristo kon sila gibati nga nadani sa pagbuhat sa ingon.

1. Si Jesus mitambong sa Kasaulogan sa mga Tabernakulo ug mitudlo diha sa templo.

Hisguti ang Juan 7. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga ang Kasaulogan sa mga Tabernakulo usa ka tinuig nga kasaulogan sa mga Judeo nga gihimo unom ka bulan human sa kasaulogan sa pagpalabay. Kini molungtad og walo ka mga adlaw ug naghandom sa mga panalangin sa Ginoo ngadto sa mga anak sa Israel sa panahon sa ilang pagpanaw didto sa kamingawan. Kini usab nagsaulog sa tinuig nga pag-ani ug timailhan sa katapusan nga panahon sa pag-ani. Ang mga Judeo miisip niini nga kasaulogan nga labing dako ug labing malipayon sa ilang tanang mga kasaulogan. (Tan-awa sa Levitico 23:34–43.)

Itudlo nga si Jesus mipanaw gikan sa Galilea ngadto sa Jerusalem aron pagtambong niini nga kasaulogan diha sa templo (Juan 7:1–10).

  • Unsa ang gisulti sa mga tawo diha sa kasaulogan mahitungod ni Jesus samtang sila naghulat kaniya nga moabut? (Tan-awa sa Juan 7:12.) Ngano nga ang mga tawo nahibulong sa dihang si Jesus nagsugod sa pagtudlo? (Tan-awa sa Juan 7:14–15.)

  • Unsa ang gisulti ni Jesus sa mga katawhan diha sa templo mahitungod sa iyang mga pagtulun-an? (Tan-awa sa Juan 7:16.) Unsa ang iyang gitudlo sa mga katawhan nga buhaton aron makaangkon og pagpamatuod sa iyang mga pagtulun-an? (Tan-awa sa Juan 7:17.) Sa unsa nga paagi nga kita makagamit niini nga panudlo diha sa atong mga kinabuhi?

    Si Elder John K. Carmack sa Seventy miingon: “Si Jesus mipasabut, ‘Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kaugalingon kong kabubut-on’ (Juan 7:17). Sa laing mga pulong, samtang kamo magsulay niini kamo makahibalo nga kini tinuod. Kini nagkinahanglan sa hugot nga pagtuo aron pagsulay, apan kini makahatag og espirituhanong kalig-on. Ngadto sa tinun-an kinsa misulay sa paghimo sa eksperimento moabut ang hugot nga pagtuo, kahibalo, ug kahayag” (sa Conference Report, Okt. 1988, 32; o Ensign, Nob. 1988, 26).

    Dapita ang mga sakop sa klase sa pagsulti sa unsa nga paagi nga ang pagpamatuod sa ebanghelyo nalig-on samtang sila nagsunod niini (ikaw mahimo nga mopaambit sa imong kaugalingong kasinatian.) Itudlo nga ang tugbang sa saad diha sa Juan 7:17 tinuod usab: kon kita dili magsunod sa mga baruganan sa ebanghelyo, ang atong mga pagpamatuod mahuyang.

  • Samtang si Jesus nagtudlo, ang mga tawo nagpadayon nga wala magkauyon sa ilang mga hunahuna mahitungod kaniya. Unsa ang pipila ka mga rason nga gituohan sa mga tawo nga siya mao ang Kristo? (Tan-awa sa Juan 7:31, 37–41.) Unsa ang pipila ka mga rason nga wala tuohi sa mga tawo nga siya mao ang Kristo? (Tan-awa sa Juan 7:27, 41–42, 52.) Sa unsang paagiha nga ang mga tawo nahibalo diin si Jesus naggikan? (Sila nakahibalo sa iyang pamilya ug sa iyang pinuy-anang lungsod.) Sa unsang paagiha nga ang mga tawo wala mahibalo diin si Jesus naggikan? (Tan-awa sa Juan 7:28–29; 8:14, 19, 23–29.) Sila wala makasabut nga siya gipadala sa Langitnong Amahan.)

  • Sa unsa nga paagi nga kita makapalig-on sa atong mga pagpamatuod sa misyon ni Jesukristo?

2. Usa ka babaye nga hing-abtan nga nanapaw, gidala ngadto ni Jesus.

Basaha ug hisguti ang Juan 8:1–11.

  • Ngano nga ang mga escriba ug mga Pariseo midala sa mananapaw nga babaye ngadto ni Jesus? (Tan-awa sa Juan 8:4–6. Sila buot nga molaang ni Jesus ngadto sa paghukom sa babaye sa kamatayon o sukwahi sa balaod ni Moises.) Unsa ang gisulti ni Jesus ngadto sa mga escriba ug mga Pariseo? (Tan-awa sa Juan 8:7.) Ngano nga sila wala molabay og bato ngadto sa babaye? (Tan-awa sa Juan 8:9.)

  • Samtang si Jesus wala mouyon sa sala sa babaye, siya wala mohukom kaniya tungod niini (Juan 8:10–11). Unsa ang atong makat-unan gikan sa ehemplo sa Manluluwas mahitungod kon unsaon nato pagtagad ang mga tawo nga grabe kaayo ang sala?

    Si Elder Marvin J. Ashton mipasabut: “Ang mga escriba ug mga Pariseo midala diha sa atubangan sa Manluluwas sa usa ka babaye nga hing-abtan nga nanapaw. Ang ilang katuyoan dili aron pagpakita og gugma sa babaye ni sa Manluluwas, apan sa pagpakaulaw ug paglaang ni Jesus … Si Jesus wala mopasaylo sa pagpanapaw; walay pagduhaduha mahitungod sa Iyang kinaiya ngadto sa husto nga moral nga pamatasan. [Apan] Siya mipili sa pagtudlo uban sa gugma aron pagpakita sa mga escriba ug mga Pariseo sa panginahanglan sa pag-alagad ngadto sa usa ka tawo unsa ang labing maayo alang kaniya ug sa pagpakita sa magun-ubon nga mga kusog sa pagpanglaang ug pagpakaulaw” (sa Conference Report, Abr. 1981, 31–32; o Ensign, Mayo 1981, 24).

3. Si Jesus mipahayag, “Ako mao ang kahayag alang sa kalibutan.”

Basaha ug hisguti ang Juan 8:12–36.

  • Sa panahon sa Kasaulogan sa mga Tabernakulo, ang templo sa Jerusalem gidan-agan sa mga dilaab nga siga gikan sa upat ka hilabihan ka dagko nga kandilahan. Kini nga mga dilaab nga siga makita sa tibuok dakbayan. Ngano nga kini usa ka haum nga kahimtang alang ni Jesus sa pagpahibalo nga” Ako mao ang kahayag alang sa kalibutan”? (Juan 8:12). Unsa ang gipasabut nga si Jesus mao ang kahayag alang sa kalibutan? (Tan-awa sa Juan 8:12; Alma 38:9; 3 Nephi 15:9; D&P 88:6–13.)

  • Samtang ang mga tawo nagtinguha nga mahimong sama ni Jesus, sila usab mahimo nga kahayag sa kalibutan, mag-aninag sa iyang kahayag (Mateo 5:14; 3 Nephi 18:24). Sa unsa nga paagi nga kita makatabang sa uban nga makakita sa kahayag nga gitanyag ni Kristo? (Tan-awa sa Mateo 5:16; 28:18–20; Mga Taga-Filipos 2:14–15.)

  • Si Jesus misulti sa mga tawo diha sa templo nga siya kanunay nga nagbuhat sa mga butang nga makapahimuot sa iyang Amahan (Juan 8:29). Sa unsa nga paagi nga kita mahimo nga mas matinguhaon pa sa pagbuhat sa mga butang nga makapahimuot sa Langitnong Amahan?

  • Samtang si Jesus mipamatuod sa iyang Amahan sa Langit, “daghan ang misalig kaniya” (Juan 8:30). Unsa ang gisaad ni Jesus ngadto niini nga mga tawo kon sila mopadayon sa pagsunod kaniya? (Tan-awa sa Juan 8:31–32.) Unsa ang gihatag sa kamatuoran nga mopalingkawas kanato? (Tan-awa sa Juan 8:33–34.) Sa unsa nga paagi nga ang pagbuhat og sala makapahimo kanato nga ulipon? (Tan-awa sa Alma 12:11; 34:35.) Sa unsa nga paagi nga ang pagkahibalo sa kamatuoran nakapahimo kaninyo nga gawasnon?

  • Si Jesus sa kaulahian mitawag sa iyang kaugalingon nga “ang kamatuoran” (Juan 14:6). Sa unsa nga paagi nga kini nakaapekto sa inyong pagsabut sa saad diha sa Juan 8:32? Sa unsa nga paagi nga ang pag-ila sa Manluluwas makahimo kanato nga gawasnon? Sa unsa nga paagi kita makaila kaniya?

Panapos

Ipamatuod nga si Jesukristo mao ang atong Manluluwas ug nga siya lamang ang makapalingkawas kanato gikan sa pagkaulipon sa sala. Awhaga ang mga sakop sa klase sa pagsunod ni Kristo, “ang kahayag alang sa kalibutan,” aron siya mahimong mogiya kanila ngadto sa espirituhanong kaluwasan.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. Tubig nga buhi

Diha sa usa sa mga seremonya nga gipahigayon sa panahon sa Kasaulogan sa Tabernakulo, usa ka pari mibutang og tubig gikan sa tubod sa Siloe diha sa altar. Kini nga paghalad gihimo aron paghangyo og ulan ug maayong ani sa sunod nga tuig. Samtang si Jesus mitudlo diha sa templo sa katapusang adlaw sa kasaulogan siya midapit sa mga tawo sa pag-inom sa tubig nga buhi (Juan 7:37–38).

  • Sa unsang lain nga kahimtang nga si Jesus mihisgut sa buhing tubig? (Tan-awa sa Juan 4:5–15.) Unsa ang “tubig nga buhi”? Sa unsa nga paagi nga kita makainom niini?

2. Si Jesukristo mao si Jehova

Basaha ug hisguti ang Juan 8:37–59.

  • Ngano nga si Jesus misulti sa wala motuo nga mga Judeo nga sila dili mga anak ni Abraham? (Tan-awa sa Juan 8:39–40. Bisan tuod sila tinuod mga kaliwat ni Abraham, sila wala mohimo sa matarung nga mga buhat ingon sa gibuhat ni Abraham.) Ngano nga si Jesus misulti kanila nga sila dili mga anak sa Dios? (Tan-awa sa Juan 8:41–44.) Sa unsa nga paagi kita makapakita pinaagi sa atong mga lihok nga kita mga anak sa Langitnong Amahan?

  • Ngano nga ang mga Judeo nalibog man sa mga komentaryo sa Ginoo mahitungod ni Abraham? (Tan-awa sa Juan 8:51–53, 56–57. Sila wala makaamgo nga si Jesus nagpasabut sa iyang gahum sa pagbuntog sa espirituhanong kamatayon [bersikulo 51] ug ngadto sa iyang kinabuhi sa wala pa dinhi sa yuta [bersikulo 56–57].) Sa unsa nga paagi nga ang pamahayag ni Jesus, “Sa wala pa si Abraham, mao na Ako” (Juan 8:58) makatabang kanato nga makasabut mahitungod kaniya? (Tan-awa sa Exodo 3:13–14. Si Jesus mao si Jehova, ang Bantugan nga “mao Ako,” ang Dios ni Abraham, Isaac, ug Jacob.) Ngano nga mahinungdanon nga mahibalo nga si Jesus mao si Jehova sa wala pa ang iyang mortal nga kinabuhi?