“Alaot Kamo, … Mga Maut”

Katuyoan

Aron pagtabang sa mga sakop sa klase nga makaila ug makalikay sa pagminaut ug sa ingon niini makapalig-on sa ilang pasalig ngadto ni Jesukristo.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Juan 12:1–8. Si Jesus mipanaw ngadto sa Betania, diin si Maria midihog sa iyang mga tiil. Si Judas misaway sa paggamit ni Maria sa mahalon nga lana.
2. Mateo 21:1–11. Si Jesus mibalik ngadto sa Jerusalem alang sa Kasaulogan sa Pagpalabay. Siya mihimo sa usa ka madaugon nga pagsulod ngadto sa dakbayan, nga nagsakay sa asno, sa nati nga anak sa asno.
3. Mateo 21:23–46. Ang labaw sa mga pari ug mga anciano miadto ni Jesus didto sa templo ug mihagit sa iyang awtoridad. Imbis nga tubagon ang ilang mga pangutana, si Jesus misulti kanila sa sambingay sa duha ka anak nga mga lalaki ug sa sambingay sa pangulo sa panimalay.
4. Mateo 22:15–46. Ang mga escriba ug mga Pariseo misulay sa paglaang ni Jesus ngadto sa pagsulti og usa ka butang nga makapahimo kanila sa pagdaut ug paghukom kaniya.
5. Mateo 23. Si Jesus mihukom sa mga escriba ug mga Pariseo tungod sa ilang pagkamaut.
Dugang nga basahonon: Mateo 26:6–13; Marcos 11–12; 14:3–9; Lucas 11:37–51; 19:29–48; 20; Juan 12:12–18; Ang Giya ngadto sa mga Kasulatan, “Pariseo,” ug “Saduceo.”
Kon ikaw mogamit sa pang-atensyon nga kalihokan, pagdala og usa ka tasa nga limpyo sa gawas ug sa sulod ug usa nga susama nga tasa nga limpyo sa gawas apan hugaw sa sulod.
Kon anaa ang hulagway nga Madaugon nga Pagsulod (62173 853; Pakete sa mga Hulagway sa Ebanghelyo 223), gamita kini sa panahon sa leksyon.
Sugyot alang sa pagtudlo: Samtang ikaw mangandam sa pagtudlo, ikaw kinahanglan nga mobuhat og labaw pa kay sa pagbasa lamang sa gihatag nga mga kasulatan. Tun-i ang matag kasulatan labing ubos makatulo ka mga higayon. Sa unang higayon, basaha kini aron makasabut unsa ang mga sulod sa mga tudling. Unya tun-i kini og maayo, nga mangita sa mga baruganan, mga doktrina, ug mahinungdanong mga hitabo. Unya basaha kini pag-usab, nga magsiguro kon hain sa mga tudling ang mas motubag sa mga panginahanglan sa mga sakop sa klase ug magplano og mga paagi aron paghisgut niadto nga mga tudling.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang duha ka mga tasa (tan-awa ang seksyon sa “Pagpangandam”.) Siguroha nga ang mga sakop sa klase makakita lamang sa gawas sa matag tasa.

Pang-atensyon nga Kalihokan

Hain niining duha ka tasa ang gusto ninyong imnan?

Ipakita sa mga sakop sa klase ang sulod sa matag tasa.

Pang-atensyon nga Kalihokan

Karon asa nga tasa ang gusto ninyong imnan? Ngano man?

Ipasabut nga si Jesus mitandi sa mga Pariseo ngadto sa usa ka tasa nga limpyo sa gawas apan hugaw ang sulod (Mateo 23:25–26). Ang mga Pariseo mihatag og dakong pagtagad ngadto sa dayag nga mga ordinansa ug mga lihok nga mopakita kanila nga kunohay matarung, apan sila wala kaayo magtagad sa tinuoray nga pagkamatarung diha sa ilang mga kasingkasing. Tungod niini si Jesus mitawag kanila nga mga maut. Kini nga leksyon maghisgut sa pagsaway sa Manluluwas sa mga maut—mga tawo nga mopakita nga ingon nga matarung apan wala maninguha sa pagpuyo sa matarung nga paagi.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, hisguti kon unsa ang gitudlo niini mahitungod sa paglikay sa kamaut. Awhaga ang mga sakop sa klase sa pagpukos sa pag-ila ug pagtul-id sa kamaut diha sa ilang kaugalingon nga mga kinabuhi, kay sa pag-ila niini diha sa uban.

1. Si Maria midihog sa mga tiil ni Jesus.

Basaha ug hisguti ang Juan 12:1–8. Ipasabut nga lima ka adlaw sa wala pa ang Paglansang kaniya sa krus, si Jesus migahin og usa ka gabii uban sa iyang mga higala didto sa Betania. Didto si Maria, ang igsoon ni Marta ug ni Lazaro, nga midihog sa mga tiil sa Manluluwas sa lunsayng nardo [spikenard], usa ka mahalon nga pahumot (Juan 12:1–3). Si Elder James E. Talmage mipasabut ngano nga mibuhat siya niini:

“Ang pagdihog sa ulo sa usa ka dinapit ginamit ang ordinaryo nga lana mao ang pagpasidungog kaniya; sa pagdihog sa iyang mga tiil mao ang pagpakita sa dili kasagaran ug talagsaon nga pagtagad; apan ang pagdihog sa ulo ug mga tiil sa lunsayng nardo [spikenard], ug sa ingon ka daghan, mao ang paghatag og balaanong pagtahud nga dili kasagaran ihatag bisan gani sa mga hari. Ang gibuhat ni Maria mao ang pagpahayag og pagdayeg; kadto mao ang nangalimyon nga tubod gikan sa kasingkasing nga nag-awas uban sa pagsimba ug paghigugma” (Jesus the Christ, 3rd ed. [1916], 512).

Si Maria midihog sa mga tiil sa Ginoo aron pagpakita sa iyang gugma ngadto kaniya. Unsaon man nato sa pagpakita sa atong gugma ngadto sa Ginoo?
Ang mga lihok ni Maria gisaway ni Judas. Unsa ang iyang gisulti nga unta pagabuhaton sa pahumot? (Tan-awa sa Juan 12:4–5.) Sa unsa nga paagi nga si Judas usa ka maut? (Tan-awa sa Juan 12:6). Kon ikaw wala maggamit sa pang-atensyon nga kalihokan, gamita ang kasayuran diha sa kalihokan aron sa pagpasabut unsa ang usa ka maut. Ipasabut nga ang ulahing bahin sa leksyon maghisgut unsa ang gibati sa Manluluwas mahitungod sa mga maut.)

2. Si Jesus mihimo ug usa ka madaugon nga pagsulod ngadto sa Jerusalem.

Basaha ug hisguti ang Mateo 21:1–11. Ipakita ang hulagway sa madaugon nga pagsulod ni Jesus. Ipasabut nga sa dihang si Jesus mibalik sa Jerusalem alang sa Pagpalabay, daghang mga tawo ang miadto aron motan-aw kaniya tungod kay sila nakadungog nga siya mipabuhi og balik ni Lazaro gikan sa patay (Juan 12:17–18). Samtang si Jesus nagsingabut sa dakbayan, siya gisugat sa dakong panon sa mga katawhan kinsa mibutang sa ilang mga saput diha sa iyang agianan ug mihimaya kaniya uban sa mga sanga sa palma, usa ka pasidungog nga kasagaran gitagana alang sa mga hari ug mga conquistador. Kini katumanan sa panagna ni Zacarias (Zacarias 9:9) ug nga usa pa ka lain nga pagmatuod nga si Jesus mao ang gisaad nga Mesiyas.

Unsa ang nakadani kaninyo mahitungod sa istorya ni Jesus nga mapainubsanong nagsakay apan nagmadaugon ngadto sa Jerusalem? Unsa sa inyong hunahuna ang inyong bation kon didto pa kamo niadtong higayona?
Ang katawhan kinsa mihimaya ni Jesus ginamit ang mga sanga sa palma miila kaniya ingon nga usa ka propeta ug hari (Mateo 21:9, 11; Lucas 19:38), apan ang uban wala makasabut sa iyang misyon ug misalikway kaniya. Sa unsa nga mga paagi nga ang mga tawo wala makasabut o misalikway sa Manluluwas karon? Sa unsa nga paagi nga kita mas modawat kaniya sa hingpit ug modawat kaniya diha sa atong mga kinabuhi?

3. Si Jesus mihatag sa sambingay sa duha ka anak nga mga lalaki ug sa sambingay sa pangulo sa panimalay.

Basaha ug hisguti ang pinili nga mga bersikulo gikan sa Mateo 21:23–46.

Diha sa sambingay sa duha ka anak nga mga lalaki, sa unsa nga paagi nga ang unang anak nga lalaki mipamatuod nga mas masulundon kay sa ikaduhang anak nga lalaki? (Tan-awa sa Mateo 21:28–30.) Giunsa ni Jesus paggamit kini nga sambingay ngadto sa iyang mga tigpaminaw? (Tan-awa sa Mateo 21:31–32; tan-awa usab sa Hubad ni Joseph Smith sa Mateo 21:33.) Sa unsa nga paagi nga ang mga publikano ug mga puta sama sa unang anak nga lalaki? (Sa sinugdanan sila misalikway sa mga sugo sa Dios, apan sa dihang si Juan misangyaw ngadto kanila, sila midawat ni Kristo ug naghinulsol sa ilang mga sala.) Sa unsa nga paagi nga ang labaw nga mga pari ug mga anciano sama sa ikaduhang anak nga lalaki? (Sila miangkon nga misunod sa Dios, apan sila misalikway sa mga pagtulun-an ni Juan ug misalikway ni Jesus bisan human sila nakakita kaniya.) Sa unsa nga paagi nga ang ikaduhang anak nga lalaki usa ka maut?
Unsa nga mga saad ang atong gihimo ngadto sa Ginoo? (Ikaw mahimo nga mohisgut sa mga saad sama sa atong gihimo sa bunyag, kon kita moambit sa sakramento, ug kon kita modawat sa priesthood.) Sa unsa nga paagi nga usahay kita sama sa ikaduhang anak nga lalaki? Unsaon nato pagpalig-on sa atong pasalig ngadto sa Ginoo? Unsaon nato pagtabang sa matag usa nga makatuman sa mga saad nga atong gihimo ngadto sa Ginoo?
Diha sa sambingay sa pangulo sa panimalay (Mateo 21:33–41), kinsa ang girepresentaran sa pangulo sa panimalay, o sa tag-iya sa ubasan? (Ang atong Amahan sa Langit.) Sa mga saop? (Ang relihiyoso nga mga pangulo sa mga Judeo sa panahon ni Jesus.) Sa mga sulugoon? (Ang mga propeta.) Sa anak nga lalaki nga gipatay sa mga saop? (Si Jesukristo.)
Sa unsa nga paagi nga ang relihiyoso nga mga pangulo sa mga Judeo sama sa mga saop? Unsa ang nahibaloan sa pangulo sa mga pari ug mga anciano nga mahitabo ngadto sa mga saop kon ang tag-iya sa ubasan moabut? (Tan-awa sa Mateo 21:41.)
Kinsa ang “bato nga gisalikway sa mga magtutukod”? (Tan-awa sa Mateo 21:42; Mga buhat 4:10–12.) Kinsa ang mga magtutukod? Unsa ang gisulti ni Jesus nga mahitabo ngadto sa mga magtutukod nga misalikway sa tukurang bato? (Tan-awa sa Mateo 21:43–44.) Sa unsa nga paagi nga ang mga pulong ni Jesus diha sa bersikulo 43 magamit ngari nato?
Unsa ang gibati sa labaw nga mga pari ug mga Pariseo sa dihang sila nakaamgo nga si Jesus nagsulti mahitungod kanila niini nga mga sambingay? (Tan-awa sa Mateo 21:45–46.) Unsaon nato pagbuntog ang bisan unsa nga garbo o kaligutgut nga ato untang bation kon sultihan sa paghinulsol?

4. Ang mga escriba ug mga Pariseo misulay sa paglaang ni Jesus.

Basaha ug hisguti ang pinili nga mga bersikulo gikan sa Mateo 22:15–46. Ipasabut nga kini nga mga bersikulo girekord katulo ka mga higayon sa dihang ang mga Pariseo ug mga Saduceo misulay sa paglaang ni Jesus sa pagsulti og usa ka butang nga makapahimo kanila sa pagdaut ug paghukom kaniya.

Giunsa sa mga Pariseo sa pagsulay sa paglingla ni Jesus? (Tan-awa sa Mateo 22:15–17. Ipasabut nga kon si Jesus mitubag og oo sa pangutana, sila mahimong makapasangil kaniya nga nagpaluyo sa gikasilagan nga pangagamhanan sa Roma. Kon siya mitubag og dili, sila makapasangil og pagsukol batok sa kagamhanan.) Unsa ang nakita ni Jesus mahitungod sa iyang mga tigpangutana? (Tan-awa sa Mateo 22:18. Itudlo nga ang Ginoo nahibalo sa atong mga kasingkasing ug mga hunahuna. Kita dili makatago bisan unsa gikan kaniya.) Giunsa ni Jesus pagtubag ang pangutana? (Tan-awa sa Mateo 22:19–21.) Sa unsa nga paagi nga kini nga tubag mogiya kanato sa paghatag og pagpaluyo sa Dios ug sa kalibutanon nga mga pangagamhanan? (Tan-awa usab sa Artikulo sa Hugot nga Pagtuo 1:12.)
Giunsa sa mga Saduceo sa pagsulay og lingla ni Jesus? (Tan-awa sa Mateo 22:23–28.) Sa unsa nga paagi nga ang mga Saduceo nagminaut sa ilang mga pangutana? (Tan-awa sa Mateo 22:23. Sila nagpakaaron-ingnon nga nabalaka mahitungod sa kaminyoon diha sa pagkabanhaw, apan sila wala motuo sa pagkabanhaw.) Giunsa ni Jesus pagtubag ang ilang pangutana? (Tan-awa sa Mateo 22:29–30. Ipasabut nga ang Doktrina ug mga Pakigsaad 132:15–16, 19 nagtin-aw sa mga panudlo ni Jesus. Kadtong wala makahimo ug wala mohupot sa mga pakigsaad sa kaminyoon sa templo mahimong mag-inusara didto sa langit. Alang niadtong mihimo ug mituman niini nga mga pakigsaad, ang kaminyoon mohangtud sa kahangturan.
Unsa ang ikatulo nga pagsulay sa paglingla ni Jesus? (Tan-awa sa Mateo 22:34–36.) Sa unsang paagi nga ang tubag ni Jesus nakasulbad niini nga pangutana? (Tan-awa sa Mateo 22:37–40.) Sa inyong hunahuna ngano nga kining duha ka dagkong mga sugo mahinungdanon man kaayo? Unsa ang atong mahimo aron makasunod sa hingpit niining mga sugo?

Si Elder Howard W. Hunter miingon: “Siya nahigugma sa Ginoo sa tibuok niyang kasingkasing kinsa … andam sa paghatag, pagbuhat o pag-antus sa bisan unsa aron sa pagpahimuot kaniya ug paghimaya kaniya. Siya nahigugma sa Dios sa tibuok niyang kalag … kinsa andam magpakamatay alang kaniya ug nga pagakuhaan sa mga kaharuhay sa kalibutan aron sa paghimaya kaniya. Siya nahigugma sa Dios sa tibuok niyang kusog kinsa naninguha sa tanang gahum sa iyang lawas ug kalag sa pag-alagad sa Dios. Siya nahigugma sa Dios sa tibuok niyang hunahuna nga migamit sa iyang kaugalingon aron lamang makaila sa Dios ug sa iyang kabubut-on, kinsa nakakita sa Dios diha sa tanang butang ug midawat kaniya sa tanan nga mga paagi” (sa Conference Report, Abr. 1965, 58; o Improvement Era, Hunyo 1965, 512).

5. Si Jesus misaway sa sala sa pagminaut.

Basaha ug hisguti ang pinili nga mga bersikulo gikan sa Mateo 23.

Ang mga escriba ug mga Pariseo mibayad sa ikapulo, mihatag ngadto sa mga kabus, mitambong sa mga pagsimba, ug moadto kanunay sa templo. Unsa ang hinungdan nga ang Ginoo misaway kanila? (Tan-awa sa Mateo 23:5; 14, 23–28. Sila mibuhat niini nga mga butang dili tungod sa hugot nga pagtuo, apan tungod sa tinguha nga makit-an sa uban ingon nga matarung.) Unsa ang “labaw nga bug-at nga mga butang” nga giingon sa Ginoo nga wala nila mabuhat? (Tan-awa sa Mateo 23:23.) Unsaon man nato pagsiguro nga kita nagbuhat niini nga “labaw nga bug-at nga mga butang” diha sa atong kaugalingong mga kinabuhi?
Sa unsa nga paagi nga kita isip mga sakop sa Simbahan usahay mahimong mga maut? (Sama pananglit, kon kita motambong sa mga miting sa Simbahan kita malagmit mas maghunahuna nga makit-an sa uban kay sa pagsimba sa Dios. Kita mahimong magbagulbol bahin sa mga buluhaton sa Simbahan diin kita wala makadawat og dakong pagtagad alang sa atong pag-alagad. Kita mahimong mopaluyo sa atong mga lider sa Simbahan ug unya mosaway sa ilang mga desisyon.)
Unsa ang atong buhaton aron makalikay sa pagminaut? Hangyoa ang mga sakop sa klase sa paghunahuna sa hilom niining mga pangutana: Ako ba nagbayad sa ikapulo, naghatag sa mga kabus, nagtambong sa akong mga miting, ug nag-alagad sa uban alang sa akong kaugalingong himaya o alang sa himaya sa Dios? Sa tanan nakong mga lihok, ako ba naninguha nga mas maduol ngadto sa akong Amahan sa Langit ug ni Jesukristo?

Panapos

Awhaga ang matag sakop sa klase sa pagsuta sa ilang mga kinabuhi mahitungod sa pagminaut ug sa pagpaninguha sa pagwagtang niini. Ipamatuod nga ang kinasingkasing nga tinguha sa pag-alagad ug pagsunod ni Jesukristo, nga dinasig tungod sa gugma ug hugot nga pagtuo diha kaniya, makahimo kanato nga mas maduol ngadto kaniya ug mopalambo sa atong gugma ug hugot nga pagtuo.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Si Jesus mitunglo sa walay bunga nga kahoy nga igira, usa ka simbolo sa kamaut.

Basaha ug hisguti ang Mateo 21:17–22. Ipasabut nga ang lain nga simbolo sa kamaut mao ang kahoy nga igira nga nakita ni Jesus sa iyang pagpaingon ngadto sa Jerusalem.

Unsa ang gibuhat ni Jesus sa diha nga iyang nakita nga ang kahoy daghan og mga dahon apan walay bunga? (Tan-awa sa Mateo 21:19.) Sa unsa nga paagi nga ang kahoy nga igira sama sa usa ka maut?

Si Elder James E. Talmage mipasabut: “[Ang kahoy] mao ang hingtungdan sa tunglo ug ang hilisgutan sa mga panudlo nga pakigpulong sa Ginoo, tungod kay, ang pagbaton og mga dahon, kini malimbungon kay walay bunga. Kon ang kahoy nakabaton pa og moral nga kaugalingong kabubut-on, kita mosaway gyud niini nga usa ka maut; ang pagkawalay bunga pinarisan sa daghang mga dahon mihimo niini nga usa ka simbolo sa tawhanong kamaut” (Jesus the Christ, 3rd ed. [1916], 527).

2. Pagpasalida sa video

Ang ikaduhang bahin sa “New Testament Customs,” usa ka pinili gikan sa New Testament Video Presentations (53914), mipasabut sa paggamit sa mga Judeo sa mga pilakteria [phylacteries] ug mga borlas [fringes]. Kon wala nimo mapasalida kining bahina diha sa leksyon 9, mahimo nga imo kining ipasalida karon aron pagtabang sa mga sakop sa klase nga makasabut sa Mateo 23:5 (“sila mipalapad sa ilang mga pilakteria, ug mipadako sa mga borlas diha sa ilang mga saput”). Hisguti kon sa unsang paagi nga kining mga butanga nahimong simbolo sa kamaut sa mga escriba ug mga Pariseo.

3. “Sila nahigugma sa mga pagdayeg sa mga tawo” (Juan 12:43)

Si Juan mirekord nga daghang mga tawo nga mituo ni Jesus dili moangkon sa ilang mga pagtuo tungod kay “sila nahigugma sa mga pagdayeg sa mga tawo labaw pa kay sa pagdayeg sa Dios” (Juan 12:42–43). Sa unsa nga paagi nga kita usahay mahimong mas interesado sa pagdawat “sa pagdayeg sa mga tawo”? Unsa ang mga sangputanan sa pagtinguha “sa pagdayeg sa mga tawo”? Unsaon nato pagbuntog sa tinguha nga maghunahuna sa pagdayeg ug pasidungog gikan sa uban? (Tan-awa sa D&P 82:19; 88:67.)