“Nanghimatuod Ikaw Kanako”

Katuyoan

Aron pag-awhag sa mga sakop sa klase sa pagsunod sa ehemplo ni Pablo ug sa matinud-anon nga mga saksi ni Jesukristo bisan anaa sa taliwala sa mga pagsulay ug kalisdanan.

Pagpangandam

Basaha, pamalandongi ug i-ampo ang mahitungod sa mosunod nga mga kasulatan:
1. Mga Buhat 21:1–22:21. Bisan pa sa mga pagsupak sa iyang mga kauban, kinsa nahadlok alang sa iyang kinabuhi, si Pablo miadto sa Jerusalem. Siya mitaho sa iyang misyonaryo nga mga panaw ngadto sa iyang mga kaigsoonan didto. Siya miadto sa templo ug siya gidala sa mga nasuko nga mga panon sa katawhan. Ang labaw nga kapitan midakop kaniya apan mitugot kaniya sa pagsulti ngadto sa mga katawhan. Si Pablo misulti mahitungod sa iyang pagkakabig sa ebanghelyo ni Jesukristo.
2. Mga Buhat 22:22–23:35. Ang panon sa mga katawhan misalikway ni Pablo ug nagtinguha sa iyang kinabuhi. Ang labaw nga kapitan mikuha ni Pablo gikan sa panon sa katawhan ug mibutang kaniya diha sa kastilyo. Sa sunod adlaw ang labaw nga kapitan midala ni Pablo sa atubangan sa Sanhedrin. Lain pa nga panag-away ang nahitabo ug ang labaw nga kapitan mikuha pag-usab ni Pablo ug mipadala kaniya ngadto sa kastilyo. Nianang gabhiona ang Ginoo mipakita ngadto ni Pablo ug misulti kaniya nga siya gitawag aron sa paghatag og pagsaksi sa Roma ingon man sa Jerusalem. Sobra sa 40 ka mga Judeo sa tago naglaraw sa pagpatay kaniya, ug siya gidala ngadto ni Felix, ang gobernador, aron maluwas sa kakuyaw.
3. Mga Buhat 26. Human sa daghan nga mga tuig sa pagkaginukod ug pagkabilanggo, si Pablo gidala aron magpamatuod sa atubangan ni Haring Agripa. Si Agripa misalikway sa pagpamatuod ni Pablo ug mipadala kaniya ngadto sa Roma aron ipakita ni Cesar.
4. Mga Buhat 27–28. Nalunod ang gisakyang barko ni Pablo sa iyang pagpaingon sa Roma human ang kapitan sa barko mibaliwala sa iyang tambag. Sa dihang sa katapusan siya miabut sa Roma, siya gibilanggo, apan siya nagsangyaw sa tanan kinsa maminaw.
Kon ang mosunod nga mga materyal anaa, gamita kini sa panahon sa leksyon:
1. “Paul—A Chosen Vessel,” onse ka minuto nga bahin sa New Testament Video Presentations (53914). Tan-awag una kini nga bahin, kon mahimo, aron ikaw mahibalo kanus-a ipahunong ang video alang sa panaghisgutan.
2. Usa ka mapa sa panaw ni Pablo ngadto sa Roma (mapa 13 sa LDS nga edisyon sa Biblia nga giimprinta niadtong 1999 o lapas pa; mapa 22 sa mga naimprinta sa wala pay 1999).
Sugyot alang sa pagtudlo: “Mahinungdanon nga kadtong kinsa imong gitudloan mabusog, nga sila matudloan og usa ka butang. Matag higayon nga sila motambong sa klase kinahanglan nga sila adunay labing ubos bisag usa lang ka hunahuna, usa ka ideya, kadasig nga ilang maangkon tungod sa ilang pagtambong sa klase. Mahimong gamay lang kini nga hunahuna, yano lamang— sa tinuod lang, kon mas daling sabton kana nga ideya, mas dako kag nahimo” (Boyd K. Packer, Teach Ye Diligently [1975], 154).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pang-atensyon nga Kalihokan

Aduna bay usa ka tawo diha sa kasulatan, nga sa inyong hunahuna ikasinabut ninyo, tungod sa managsama nga mga hunahuna, mga kasinatian, o mga kahimtang? Ngano nga kamo mobati og piho nga pagkasuod niining tawhana?

Tuguti ang daghan nga mga sakop sa klase sa pagkomentaryo. Dayon itudlo nga pinaagi sa paghinumdom sa iyang mga kasinatian human sa Unang Pananawon, si Propeta Joseph Smith mibati nga ang iyang mga kasinatian sama ngadto sa kang Apostol Pablo. Ipabasa sa mga sakop sa klase ang Joseph Smith––Kasaysayan 1:23–25 aron makahibalo kon ngano.

Ipasabut nga ang pagpakita ni Apostol Pablo sa atubangan ni Haring Agripa maoy usa sa mga panghitabo nga pagahisgutan niini nga leksyon. Diha niini nga kahimtang ug sa tibuok niyang pagpanaw isip usa ka misyonaryo, bisan pa sa pagsalikway ug pagpanggukod, si Pablo nagpabilin nga lig-on sa iyang hugot nga pagtuo ug maisugon nga mihatag sa iyang pagpamatuod ni Jesukristo.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi nga kita makapalambo sa atong kadasig ug hugot nga pagtuo ingon ka lig-on sa kang Pablo. Awhaga ang mga sakop sa klase sa pagsulti sa mga higayon nga sila madasigong mihatag sa ilang pagpamatuod pinaagi sa ilang mga pulong ug mga lihok.

1. Si Pablo mitaho sa iyang pagpanaw ug miatubang sa masuk-anong mga panon sa katawhan sa Jerusalem.

Kon ikaw naggamit sa video nga “Paul—A Chosen Vessel,” ipasundayag ang unang bahin karon. Ihunong ang video human ang tigsaysay mosulti, “Siya mituman sa mga pulong sa Ginoo nga siya modala sa iyang ngalan sa atubangan sa mga hari ug mga magmamando” (sa panahon niini nga mga pulong, si Pablo gikuyogan sa daghan nga mga sundalo paingon sa alagian.)

Tukia ang Mga Buhat 21:1–22:21. Dapita ang mga sakop sa klase sa pagbasa sa mga pinili nga mga bersikulo. Ipasabut nga human sa tulo ka malampuson nga misyonaryong mga panaw nga maoy hinungdan nga nalukop niya ang tibuok kagamhanan sa Roma, si Pablo mibalik sa Jerusalem, bisan tuod siya nakahibalo nga makuyaw ang pagbuhat sa ingon.

Ngano nga ang mga higala ni Pablo misulay sa pagpugong kaniya pagbalik sa Jerusalem? (Tan-awa sa Mga Buhat 21:10–12.) Giunsa ni Pablo pagtubag ang mga kabalaka sa iyang mga higala? (Tan-awa sa Mga Buhat 21:13.) Sa unsa nga paagi nga kini nagpakita sa pasalig ni Pablo ngadto ni Kristo?
Unsa ang gibuhat ni Pablo human sa usa ka adlaw nga pag-abut sa Jerusalem? (Tan-awa sa Mga Buhat 21:17–19.) Sa unsa nga paagi nga kini sama ngadto sa buhaton sa mga misyonaryo karon human sila mibalik gikan sa ilang mga misyon? (Sila mitaho sa ilang mga kasinatian sa misyon ngadto sa stake president ug high council ug kasagaran ngadto sa mga sakop sa ward o branch diha sa katiguman sa sakramento.) Sa unsa nga paagi nga kamo nakakuha og kaayohan gikan sa pagpaminaw kalabut sa uban nga mga kasinatian sa misyonaryo?
Daghang mga Kristiyanong Judeo ang misupak sa mga panudlo ni Pablo nga ang kaluwasan moabut pinaagi ni Jesukristo, dili pinaagi sa balaod ni Moises (Mga Buhat 15:1–35). Aron pagpahimuot niini nga mga tawo, ang mga kaigsoonan sa Jerusalem mihangyo ni Pablo sa pag-adto sa templo ug mohimo sa tulumanon sa paghugas ingon nga timailhan nga siya sa gihapon mituman sa balaod (Mga Buhat 21:20–25). Unsay nahitabo samtang si Pablo didto sa templo? (Tan-awa sa Mga Buhat 21:26–30. Siya gilabni sa mga panon sa katawhan kinsa mipasangil kaniya nga nagtudlo batok sa balaod ni Moises ug sa paghugaw-hugaw sa templo pinaagi sa pagdala og usa ka dili Judeo ngadto niini.) Sa unsa nga paagi nga si Pablo naluwas gikan niining panon sa katawhan? (Tan-awa sa Mga Buhat 21:31–36.) Unsa ang gibuhat ni Pablo sa dihang ang labaw nga kapitan mitugot kaniya sa pagpakigsulti ngadto sa mga tawo? (Tan-awa sa Mga Buhat 21:37–22:21.) Ngano nga kini nagkinahanglan og kaisug?

Ikaw mahimo nga mosugod sa paglista sa pisara sa tanan nga mga higayon diha sa Mga Buhat 21–28 diin gipakita ni Pablo ang dakong kaisug sa iyang pagsaksi ni Jesukristo. Pun-i ang lista kon angay sa panahon sa leksyon.

Kanus-a kamo mihatag sa inyong pagpamatuod sa usa sa kahimtang nga nagkinahanglan og kaisug? Sa unsa nga paagi nga kamo nakaangkon og kaisug sa pagbuhat niini? Sa unsa nga paagi nga ang pagkat-on gikan sa mga lihok ni Pablo makatabang kanato sa pagbaton og mas dakong kaisug sa pagpaambit sa atong mga pagpamatuod ngadto sa uban?

2. Si Pablo gidala sa atubangan sa Sanhedrin.

Basaha ug hisguti ang pinili nga mga bersikulo gikan sa Mga Buhat 22:22–23:35.

Unsay gibuhat sa mga panon sa mga katawhan, nga diha sa gawas sa templo agig tubag sa istorya ni Pablo mahitungod sa iyang pagkakabig? (Tan-awa sa Mga Buhat 22:22.) Unsa ang katuyoan sa labaw nga kapitan sa iyang pagkuha ni Pablo gikan sa mga panon sa katawhan? (Tan-awa sa Mga Buhat 22:24.) Sa unsa nga paagi nga si Pablo nakalikay sa kastigo? (Tan-awa sa Mga Buhat 22:25–26.) Siya misulti nga siya usa ka Romanhon. Kini nakahatag kaniya og talagsaon nga mga katungod ug mga kahigayunan diha sa Romanhon nga kagamhanan, diin kabahin ang Jerusalem.)
Unsa ang unang butang nga gisulti ni Pablo sa dihang siya gidala sa atubangan sa Sanhedrin (ang konseho sa mga Judeo)? (Tan-awa sa Mga Buhat 23:1; ug tan-awa usab sa Mga Buhat 24:16. Tan-awa usab sa D&P 135:4 alang sa susama nga pamahayag nga gihimo ni Propeta Joseph Smith.) Unsa sa inyong hunahuna nga ang kang Pablo nga “maayong tanlag sa atubangan sa Dios” nakatabang kaniya niadtong higayona? Dapita ang mga sakop sa klase sa paghunahuna unsa nga mga kausaban ang gikinahanglan nga buhaton diha sa ilang kaugalingong mga kinabuhi aron makabaton og usa ka “maayo nga tanlag sa atubangan sa Dios.”
Unsa ang gisulti sa Dios sa dihang siya nagpakita ngadto ni Pablo human sa pakisusi nga gihimo sa Sanhedrin ni Pablo? (Tan-awa sa Mga Buhat 23:11.) Sa unsa nga paagi nga ang Ginoo mitabang kaninyo “nga magmadasigon” sa higayon sa mga kalisdanan?
Sa adlaw human ang Ginoo nagpakita ngadto ni Pablo, sobra sa 40 ka mga Judeo sa tago nagplano sa pagpatay ni Pablo, nanumpa nga dili mokaon ni moinum hangtud nga sila magmalampuson (Mga Buhat 23:12–15). Sa unsa nga paagi nga si Pablo gipanalipdan gikan sa ilang plano? (Tan-awa sa Mga Buhat 23:16–35.) Ikaw mahimong motudlo nga kini mao ang ikatulo ka higayon sa pipila lamang ka mga adlaw nga si Pablo gipanalipdan gikan sa kamatayon.)

3. Si Pablo mipamatuod ngadto ni Agripa, apan ang iyang pagpamatuod gisalikway.

Basaha ug hisguti ang Mga Buhat 26. Ikaw mahimong mohatag og minubo nga asoy sa mosunod nga kasayuran gikan sa Mga Buhat 24–25: Si Pablo gipadala ngadto ni Felix, ang gobernador, ug maisugong mimatuod sa iyang atubangan. Si Pablo nagpabilin nga usa ka binilanggo sulod sa duha ka mga tuig samtang si Felix naglaum nga makadawat og kwarta aron sa pagpagawas kaniya. Sa dihang si Felix gipulihan ni Festo isip gobernador, ang mga Judeo mihangyo ni Festo nga ipadala si Pablo ngadto sa Jerusalem aron hukman. Si Pablo midumili pag-adto, nahibalo nga didto siya dili makaangkon og kaangayan sa paghukom. Hinoon, si Pablo mipakilooy ngadto ni Cesar, ingon nga iyang katungod nga usa ka Romanhon. Si Festo miuyon sa pagpadala ni Pablo ngadto sa Roma, apan si Pablo magpakita una sa atubangan ni Herodes Agripa, ang Romanhon nga gitudlo nga magmamando.

Kon ikaw naggamit sa video, ipasundayag ang ikaduha nga bahin karon. Ihunong ang video human sa pamahayag ni Pablo, “Ako nagapangamuyo ngadto sa Dios nga dili ikaw lamang, apan usab ang tanan kinsa nakadungog kanako karon, mamahimo untang ingon kanako, gawas lang niining mga gapus” (sa wala pa kuyugi si Pablo ngadto sa korte ni Haring Agripa).

Unsa ang nakapadani kaninyo mahitungod sa mga pulong ni Pablo ngadto ni Haring Agripa? (Tan-awa sa Mga Buhat 26:2–27.) Unsa ang gitubag ni Agripa sa mga pulong ni Pablo? (Tan-awa sa Mga Buhat 26:28.) Unsa ang malagmit nga nakapugong ni Agripa nga mahimong usa ka Kristiyano? Unsa nga mga kinaiya ug uban nga mga problema ang nakapugong sa mga katawhan karon sa pagdawat sa ebanghelyo ni Jesukristo?
Sa unsa nga paagi nga ang mga reaksyon ni Festo ug ni Agripa ngadto ni Pablo managlahi? (Tan-awa sa Mga Buhat 26:24, 28. Itudlo nga walay lain kon dili ang hingpit nga debosyon mao ang dawaton sa Ginoo. Bisan tuod nga si Agripa nakamatikod sa mensahe ni Pablo nga katuohan samtang si Festo misalikway dihadiha dayon, silang duha nahagbong sa pagsulay sa hugot nga pagtuo nga gitanyag ni Pablo kanila.)

4. Ang barko nga gisakyan ni Pablo nalunod sa iyang pagpaingon sa Roma.

Basaha ug hisguti ang pinili nga mga bersikulo gikan sa Mga Buhat 27–28. Ipasabut nga si Agripa andam sa pagpagawas ni Pablo (Mga Buhat 26:32), apan si Pablo nagpakilooy ni Cesar ug busa siya gipadala ngadto sa Roma. Samtang ikaw maghisgut sa mga panaw ni Pablo sa Roma, ipakita ug itudlo ang mahinungdanon nga mga dapit, sama sa Mga Maayong Dunggoanan, diin si Pablo mitambag sa mga katawhan sa pagpabilin alang sa tingtugnaw, ug sa Malta (Melita), diin ang nalunod nga mga pasahero milangoy paingon sa baybayon.

Unsa ang nahitabo sa dihang ang kapitan sa barko misalikway sa mga pasidaan ni Pablo nga hilabihan kakuyaw ang paglawig gikan sa Mga Maayong Dunggoanan? (Tan-awa sa Mga Buhat 27:7–20.) Unsa ang nakahimo sa kapitan sa pagsalikway sa tambag ni Pablo? (Tan-awa sa Mga Buhat 27:11–12.) Ngano nga ang uban kanato usahay mosalikway sa mga tambag sa mga lider sa Simbahan? Sa unsa nga paagi nga ikaw nakakat-on sa kamahinungdanon sa pagsunod sa mga tambag sa mga lider sa Simbahan?
Sa unsa nga paagi nga si Pablo nahibalo nga ang tanan nga mga pasahero moabut sa daplin nga luwas, bisan tuod ang sakayan maguba tungod sa unos? (Tan-awa sa Mga Buhat 27:21–26.) Sa unsa nga paagi nga kini nga panagna natuman? (Tan-awa sa Mga Buhat 27:27–44.)
Sa unsa nga paagi nga si Pablo migamit sa iyang gahum sa priesthood samtang didto sa isla sa Malta? (Tan-awa sa Mga Buhat 28:7–9.) Unsa ang gisugyot niini nga panghitabo mahitungod sa katuyoan sa gahum sa priesthood? Sa unsa nga paagi nga ang pagtahud sa priesthood makatabang kanato nga mahimong mga saksi ni Kristo?
Human sa pipila ka mga bulan, si Pablo sa katapusan miabut sa Roma, diin siya gibilanggo pag-usab. Unsay iyang gihimo aron nga kining mga kalisdanan makahatag kaniya og kaayohan? (Tan-awa sa Mga Buhat 28:16–31. Siya gihatagan og kagawasan, busa siya migugol sa iyang panahon sa pagtudlo sa ebanghelyo ug sa pagpamatuod ni Kristo.) Unsa ang atong makat-unan gikan ni Pablo mahitungod sa iyang pagkamatinud-anon nga saksi ni Jesukristo? (Kon imong nalista sa pisara ang mga panahon nga si Pablo mipakita og kaisug sa pagkamatinud-anon nga saksi, itudlo kini.)

Kon ikaw naggamit sa video, ipasundayag ang nahabilin karon.

Panapos

Ipasabut nga ang mga historyan nagtuo nga si Pablo namatay sama sa kamatayon sa martir didto sa Roma sa mga A.D. 65. Sa iyang tibuok nga kinabuhi, siya mituman sa iyang responsibilidad ingon nga Apostol nga “panglakaw kamo ug himoa ninyong mga tinun-an ang tanan nga mga kanasuran” (Mateo 28:19). Siya mituman usab sa panagna sa Ginoo nga siya mosangyaw sa ebanghelyo “sa atubangan sa mga Hentil, mga hari, ug mga anak sa Israel” (Mga Buhat 9:15). Siya usa ka matinud-anon nga saksi ni Kristo bisan pa sa mga pagdaug-daug sa pulong ug sa pisikal sa dili makiangayon nga pagkabilanggo, ug mga katalagman sa kinaiyahan.

Ipamatuod nga kon kita mosunod sa ehemplo ni Pablo pinaagi sa pagkamatinud-anon nga mga saksi ni Jesukristo sa tanan nga mga kahimtang, siya mohatag kanato sa kalig-on sa paglahutay sa atong mga pagsulay.

Dugang nga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit niini nga ideya isip kabahin sa leksyon.

Pagribyu sa kinabuhi ni Pablo

Aron pagtabang sa mga sakop sa klase nga makadayeg kon giunsa ni Pablo pagtuman ang iyang misyon sa kinabuhi sa pagmatuod ni Kristo, ipaabli nila ang Ang Giya ngadto sa mga Kasulatan ubos sa “Pablo.” Papilia ang matag sakop sa klase og usa ka hitabo sa kinabuhi ni Pablo sa dihang siya mimatuod ni Kristo. (Ang mga hitabo nga wala malista diha sa Ang Giya ngadto sa mga Kasulatan mahimo usab nga magamit. Dapita ang matag sakop sa klase sa pagpaambit sa ilang napili ngadto sa klase, ug ilista ang tanan nga mga nahitabo diha sa pisara. Dayon hangyoa ang mga sakop sa klase sa pag-abli ngadto sa mga mapa sa mga panaw ni Pablo (mapa 13 sa LDS nga edisyon sa Biblia nga giimprinta niadtong 1999 o lapas pa; mga mapa 19–22 sa mga naimprinta sa wala pay 1999) ug ipatan-aw kon diin nahitabo ang matag hitabo. Tabangi ang mga sakop sa klase sa pagribyu sa tukma nga mga kasulatan kon kinahanglan aron pagtino sa dapit nga nahitaboan.