Sunday School: Doktrina sa Ebanghelyo
Leksyon 35: ‘Magpasig-uli Kamo Ngadto sa Dios’

Leksyon 35

“Magpasig-uli Kamo Ngadto sa Dios”

2 Mga Taga-Corinto

Katuyoan

Aron pag-awhag sa mga sakop sa klase nga mahimong tinuod nga mga tinun-an ni Jesukristo pinaagi sa paggamit sa tambag ni Pablo diha sa 2 Mga Taga-Corinto.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. 2 Mga Taga-Corinto 1:3–11; 4; 6:1–10; 11:21–33; 12:1–10. Si Pablo mitudlo mahitungod sa pagbuntog sa kalisdanan.

    2. 2 Mga Taga-Corinto 2:5–11. Si Pablo mitambag sa mga Santos sa pagpasaylo sa usag usa.

    3. 2 Mga Taga-Corinto 7:8–10. Si Pablo mitudlo mahitungod sa pagbati sa diosnong kasubo alang sa mga sala.

    4. 2 Mga Taga-Corinto 5:7–21. Si Pablo miawhag sa mga Santos nga magpasiguli ngadto sa Dios.

  2. Kon ang New Testament Video Presentations (53914) anaa, ipasundayag ang “Godly Sorrow,” usa ka onse ka minuto nga bahin, sa panahon sa leksyon.

  3. Kon ikaw mogamit sa pang-atensyon nga kalihokan, pagdala og diyutay nga balas diha sa klase.

  4. Sugyot alang sa pagtudlo: Paggahin og panahon diha sa katapusan sa klase aron sa pag-summarize unsa ang imong gitudlo. Usa ka maayo kaayong pagkaplano nga katingbanan makatabang sa mga sakop sa klase sa pag-organisar ug pagtin-aw unsa ang ilang nakat-unan ug maghunahuna unsaon sa paggamit niini sa ilang mga kinabuhi. (Teaching, No Greater Call [36123], mga pahina 94–95.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa klase.

Ipakita sa mga sakop sa klase ang balas nga imong gidala diha sa klase.

Pang-atensyon nga Kalihokan

  • Kon adunay usa ka tawo nga mohatag kaninyo og balas uban sa saad nga kini adunay bulawan, unsa ang inyong buhaton?

Tuguti ang mga sakop sa klase sa pagtubag sa mga pangutana. Unya ipabasa ang mosunod nga pamahayag ni Elder Henry B. Eyring mahitungod sa pagdawat og tambag gikan sa mga propeta:

“Ayaw og isalikway ang tambag, apan himoa kini nga bililhon. Kon adunay usa ka tawo nga mohatag kaninyo ug makita nga walay lain kon dili ang balas uban sa saad nga kini adunay bulawan, guniti kini ninyo og maayo diha sa inyong kamot sa makadiyut, nga hinayng mouyog niini. Sa matag panahon nga ako mobuhat niana uban sa tambag gikan sa usa ka propeta, sa wala madugay ang mga hup-ak sa bulawan magsugod pagpakita ug ako mapasalamaton” (sa Conference Report, Abr. 1997, 35; o Ensign, Mayo 1997, 26).

Pang-atensyon nga Kalihokan

  • Unsa ang kahulugan sa pamahayag ni Elder Eyring?

Ipasabut nga ang basahon sa 2 Mga Taga-Corinto naglangkob sa mapanagnaon nga tambag nga magamit sa atong panahon karon. Ang mga panudlo ni Pablo sa iyang sulat sama ngadto sa mga panudlo nga kanunay natong madungog diha sa kinatibuk-ang komperensya. Si Elder Eyring nakamatikod, “Nga kon ang mga pulong sa mga propeta ingon og nagbalik-balik, kinahanglan nga atong ipunting ang atong tanang atensyon [diha niini]” (sa Conference Report, Abr. 1997, 32; o Ensign, Mayo 1997, 25). Awhaga ang mga sakop sa klase sa pagdawat sa mga tambag niini nga leksyon ug “himoa kini nga bililhon.”

Paghisgut ug Paggamit sa Kasulatan

Kini nga leksyon gibahin ngadto sa upat ka mga seksyon nga nagpunting sa mahinungdanon nga mga hilisgutan diha sa 2 Mga Taga-Corinto. Sa mainampoong paagi pilia kon hain niini nga mga hilisgutan ang hisgutan uban sa mga sakop sa klase.

1. Pagbuntog sa kalisdanan

Basaha ug hisguti ang 2 Mga Taga-Corinto 1:3–11; 4; 6:1–10; 11:21–33; 12:1–10. Dapita ang mga sakop sa klase sa pagbasa og kusog sa pinili nga mga bersikulo.

  • Ang sulat ni Pablo ngadto sa mga taga-Corinto gisulat human sa panahon sa hilabihang pagdaug-daug sa dihang si Pablo ug si Timoteo “nawad-an og paglaum nga mabuhi pa” (2 Mga Taga-Corinto 1:8). Ngano nga si Pablo ug si Timoteo nakabuntog sa ka walay paglaum bisan pa nga sila gisamok, gisakit, gigukod, ug gidaug-daug? (Tan-awa sa 2 Mga Taga-Corinto 1:3–5; 4:5–15.) Ngano nga ang Langitnong Amahan ug si Jesukristo mao ang atong labing maayo nga tinubdan sa kahupayan?

    Si Elder Neal A. Maxwell mipasalig kanato nga si Jesukristo motabang kanato sa tanan natong mga kasakitan:

    Kon kita mosangon sa yugo ni Jesus ngari kanato, kini nakapadawat kanato sa unsay gitawag ni Pablo nga ‘pag-ambit sa [kang Kristo] nga mga kasakit’ (Mga Taga-Filipos 3:10). Bisan kon sa sakit o pag-inusara, ka walay hustisya o pagsalikway, … ang atong matandi nga gamay nga matang nga mga kasakit, kon kita maaghup, motuhop ngadto sa kinauyokan nga bahin sa kalag. Kita dayon mas makapasalamat dili lamang sa mga kasakit ni Jesus alang kanato, apan usab sa iyang dili matandi nga kinaiya, diin nag-aghat kanato ngadto sa labawng pagdayeg ug gani sa pagsunod.

    “Si Alma mipadayag nga si Jesus nahibalo unsaon sa pagtabang kanato taliwala sa atong mga kagul-anan ug mga kasakitan tungod kay sa labing tinuod si Jesus nakapas-an na sa atong mga kagul-anan ug mga kasakitan (tan-awa sa Alma 7:11–12). Siya unang nakahibalo niini; busa ang Iyang pagbati anaa na. Dayag na lang, kita dili sa hingpit makasabut niini ni kita makasabut sa unsa nga paagi nga Siya nakapas-an sa mga sala sa tanang mga mortal, apan ang Iyang Pag-ula nagpabilin nga makatabang ug masaligon nga kamatuoran” (sa Conference Report, Abr. 1997, 13; o Ensign, Mayo 1997, 12).

  • Sa unsa nga paagi nga ang Langitnong Amahan ug si Jesukristo nakatabang kaninyo sa panahon sa kalisdanan?

  • Si Pablo mipadayag og tinguha sa pagtabang sa uban nga makadawat sa sama nga paghupay nga iyang nadawat gikan sa Dios (2 Mga Taga-Corinto 1:4). Sa unsa nga paagi nga kita makatabang sa uban nga makadawat og paghupay gikan sa Dios?

  • Si Pablo mipasalamat sa mga Santos kinsa nag-ampo alang kaniya ug ni Timoteo diha sa ilang panahon sa kalisdanan (2 Mga Taga-Corinto 1:11). Ngano nga mahinungdanon alang kanato ang pag-ampo alang sa usag usa? Sa unsa nga paagi nga ang mga pag-ampo sa uban nakapanalangin kaninyo o sa usa ka tawo nga inyong nailhan? Sa unsa nga paagi nga kita napanalanginan kon kita mag-ampo alang sa uban?

  • Sa unsa nga paagi nga ang mga pagtulun-an sa 2 Mga Taga-Corinto 4:17–18 makatabang kanato sa panahon sa kalisdanan? (Tan-awa usab sa D&P 121:7–8.) Ngano nga makatabang nato ang pagtan-aw sa atong mga pagsulay gikan sa usa ka mahangturon nga panglantaw? Sa unsa nga paagi nga kita makakat-on sa pagtan-aw sa atong mga kalisdanan gikan sa mahangturon nga panglantaw?

  • Si Pablo misulti sa mga taga-Corinto sa mga pagsulay nga iyang giantus ug sa daghang mga Santos tungod sa ilang pagtuo ni Jesukristo (2 Mga Taga-Corinto 6:4–5; 11:23–33). Unsa nga mga kinaiya ang gitudlo ni Pablo nga kinahanglan nga atong palamboon aron pagtabang kanato sa paglahutay sa mga pagsulay? (Tan-awa sa 2 Mga Taga-Corinto 6:4, 6–7.) Sa unsa nga paagi nga ang usa o labaw niini nga mga kinaiya nakatabang kaninyo sa panahon sa pagsulay?

  • Si Pablo miingon nga ang Ginoo mihatag kaniya og kahuyang—usa ka “tunok diha sa lawas” (2 Mga Taga-Corinto 12:7). Ngano nga ang Ginoo mihatag ni Pablo niini nga kahuyang? (Tan-awa sa 2 Mga Taga-Corinto 12:7.) Unsa ang nakat-unan ni Pablo sa dihang ang Ginoo wala mokuha sa iyang “tunok diha sa lawas” sumala sa iyang gipangayo? (Tan-awa sa 2 Mga Taga-Corinto 12:8–10.) Sa unsa nga paagi nga ang atong mga kahuyang makatabang kanato pagdawat sa kalig-on gikan ni Jesukristo? (Tan-awa sa Ether 12:27.) Sa unsa nga paagi nga kamo nakakita sa kamatuoran sa pamahayag ni Pablo nga “sa diha nga magmahuyang ako, magmalig-on man hinoon ako”?

2. Pagpasaylo sa uban

Basaha ug hisguti ang 2 Mga Taga-Corinto 2:5–11.

  • Si Pablo mitambag sa mga Santos sa pagpasaylo sa usag usa (2 Mga Taga-Corinto 2:5–8). Ngano nga mahinungdanon nga kita mopasaylo sa uban? (Tan-awa sa Mateo 6:14–15; 2 Mga Taga-Corinto 2:7–8; D&P 64:9–10. Hisguti kon sa unsa nga paagi nga kita ug ang uban—maapektohan kon kita mapasayloon ug kon kita dili mapasayloon.)

    Si Presidente Gordon B. Hinckley miingon:

    “Kita nakakita sa panginahanglan alang sa [pagpasaylo] diha sa mga panimalay sa katawhan, diin ang gagmay nga pagka dili pagsinabtanay mahimong dagko nga mga panaglalis. Kita nakakita niini sa mga silingan, diin ang walay hinungdan nga panaglalis mosangpot ngadto sa walay katapusang kapait. Kita nakakita niini diha sa mga kaubanan sa patigayon kinsa mag-away ug magdumili sa pag-uyon ug magpasaylo nga, sa kasagaran sa mga higayon, kon adunay panagsabut nga manglingkod ug magsultihanay og hinay sa usag usa, ang problema masulbad alang sa kaayohan sa tanan. Hinoon, sila migahin sa ilang mga adlaw sa paghunahuna sa mga kaligutgut ug nagplano sa pagbalos….

    “Kon ugaling adunay usa kinsa nag-amuma diha sa ilang mga kasingkasing sa makadaut nga mga pagbati sa pagdumot ngadto sa usa, ako naghangyo kaninyo sa pagpangayo sa Ginoo sa kalig-on aron makapasaylo. Kini nga pagpahayag sa inyong tinguha mahimong labing mahinungdanong butang sa inyong paghinulsol. Mahimong dili kini sayon, ug kini mahimong dili moabut pagdali. Apan kon kamo magtinguha niini sa kinasingkasing ug mag-amuma niini, kini moabut….

    “ … Walay kalinaw sa paghunahuna sa kasakit sa daan nga mga samad. Adunay kalinaw lamang diha sa paghinulsol ug pagpasaylo. Kini mao ang tam-is nga kalinaw diha ni Kristo, kinsa miingon, ‘bulahan ang mga tighimo sa kalinaw: kay sila pagatawagon og mga anak sa Dios.’ (Mateo 5:9.)” (“Of You It Is Required to Forgive,” Ensign, Hunyo 1991, 2, 5).

  • Unsa ang atong mabuhat aron mahimong mas mapasayloon?

3. Pagbati sa diosnong kasubo alang sa atong mga sala

Basaha ug hisguti ang 2 Mga Taga-Corinto 7:8–10.

  • Human makadungog nga usa sa iyang mga sulat “nakapasubo sa [mga taga-Corinto],” si Pablo nalipay (2 Mga Taga-Corinto 7:8–9). Ngano nga si Pablo gibati sa ingon nga paagi ngadto sa mga kasubo sa mga taga-Corinto? (Tan-awa sa 2 Mga Taga-Corinto 7:9–10.) Unsa ang gipasabut sa pagbaton og “diosnong kasubo” alang sa atong mga sala?

Kon ikaw maggamit sa video nga “Godly Sorrow,” ipasundayag kini karon.

  • Unsa ang kalainan tali sa diosnong kasubo ug “ang kasubo diha sa kalibutan”? Ngano nga ang diosnong kasubo usa ka mahinungdanon nga bahin sa paghinulsol?

    Si Presidente Spencer W. Kimball mipasabut: “Kon ang usa nagsubo lamang tungod kay adunay usa nga nakahibalo mahitungod sa iyang sala, ang iyang paghinulsol dili hingpit. Ang diosnong kasubo mosangput sa usa nga buot mohinulsol, bisan tuod siya wala mahibaloi sa uban, ug mohimo kaniya nga maglig-on sa pagbuhat sa matarung bisan unsa pa ang mahitabo. Kini nga matang sa kasubo mosangput sa pagkamatarung ug mosangko ngadto sa pagpasaylo” (Repentance Brings Forgiveness [pamphlet, 1984], 8).

4. Magpasig-uli ngadto sa Dios

Basaha ug hisguti ang 2 Mga Taga-Corinto 5:17–21.

  • Si Pablo ug si Timoteo mitambag sa mga taga-Corinto nga “ magpasig-uli ngadto sa Dios” (2 Mga Taga-Corinto 5:20). Unsa ang gipasabut sa magpasiguli ngadto sa Dios?

    Si Elder Bruce R. McConkie mitudlo: “Ang pagpakig-uli maoy usa ka paagi sa paglukat sa tawo gikan sa iyang kahimtang sa sala ug espirituhanon nga kangitngit ug sa pagpahiuli kaniya diha sa kahimtang sa panag-uyon ug paghiusa uban sa Dios…. Ang tawo, kinsa sa makausa kalibutanon ug dautan, kinsa mipuyo sumala sa mga paagi sa kalibutan, mahimo nga usa ka bag-o nga binuhat diha sa Espiritu Santo; siya natawo pag-usab; ug, gani ingon sa gamay nga bata, siya nabuhi diha ni Kristo” (Doctrinal New Testament Commentary, 3 vols. [1965–73], 2:422–23).

  • Sa unsa nga paagi nga kita mahimong magpasig-uli sa Dios? (Tan-awa sa 2 Mga Taga-Corinto 5:17–19, 21; 2 Nephi 25:23; Jacob 4:10–11.)

Panapos

Ipamatuod ang mga kamatuoran nga imong gihisgutan. Awhaga ang mga sakop sa klase sa paghinumdom ug pagsunod sa tambag ni Pablo diha sa 2 Mga Taga-Corinto.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o sa tanan niini nga mga ideya isip kabahin sa leksyon.

1. Ang “pagkatawo nga makita sa gawas” ug ang “pagtakawo sa kinasuloran” (2 Mga Taga-Corinto 4:16)

  • Si Pablo misulti diha sa “pagkatawo nga makita sa gawas” ug sa “pagkatawo diha sa kinasuloran” (2 Mga Taga-Corinto 4:16). Unsa ang gipasabut niining duha ka mga hugpong sa mga pulong?” Sa unsa nga paagi nga ang “pagkatawo diha sa kinasuloran [mahimo] nga mabag-o sa adlaw-adlaw”? (2 Mga Taga-Corinto 4:16).

2. “Mga tinugyanan nga pinadala ni Kristo” (2 Mga Taga-Corinto 5:20)

  • Si Pablo miingon nga siya ug si Timoteo “mga tinugyanan nga pinadala ni Kristo” (2 Mga Taga-Corinto 5:20). Unsa ang usa ka tinugyanan? (Ang usa ka tinugyanan mao ang usa ka opisyal nga representante kinsa mosulti alang sa kapangulohan diha sa nasud o sa organisasyon. Ang usa ka tinugyanan mobuhat aron pagtukod og maayo nga pakigrelasyon tali sa mga katawhan nga iyang girepresentar ug sa uban nga katawhan.) Sa unsa nga paagi nga si Pablo ug si Timoteo mga tinugyanan nga pinadala ni Kristo? Sa unsa nga paagi nga ang matag usa kanato mahimong usa ka tinugyanan nga pinadala ni Jesukristo?