Sunday School: Doktrina sa Ebanghelyo
Leksyon 14: ‘Kinsa ang Akong Silingan?’

Leksyon 14

“Kinsa ang Akong Silingan?”

Mateo 18; Lucas 10

Katuyoan

Aron pagtabang sa mga sakop sa klase nga magpaubos sa ilang mga kaugalingon, mopasaylo sa uban, ug mopakita og gugmang putli sa usag usa.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mateo 18:1–6, 10–11, 14. Si Jesus mitudlo nga kita kinahanglan nga makabig ug mahimo nga ingon sa gagmay nga mga bata aron makasulod ngadto sa gingharian sa langit.

    2. Mateo 18:15, 21–35. Pinaagi sa sambingay sa walay kalooy nga sulugoon, si Jesus nagtudlo mahitungod sa pagpasaylo.

    3. Lucas 10:25–37. Pinaagi sa sambingay sa maayong Samarianhon, si Jesus mitudlo mahitungod sa gugmang putli.

  2. Dugang nga basahonon: Marcos 9:33–50; Mosiah 3:17–21; 4:16–19, 26.

  3. Kon anaa ang mga hulagway nga Si Kristo ug ang mga Bata (62467 853; Pakete sa mga Hulagway sa Ebanghelyo 216) ug Ang Maayo nga Samarianhon (62156 853; Pakete sa mga Hulagway sa Ebanghelyo 218), gamita kini panahon sa leksyon.

  4. Kon ikaw mogamit sa pang-atensyon nga kalihokan, pagdapit og usa ka ginikanan nga mosulti diha sa klase ingon sa gilatid diha sa kalihokan.

  5. Sugyot alang sa pagtudlo: Matag karon ug unya dapita ang mga sakop sa klase (o uban nga mga sakop sa ward) nga motabang sa leksyon pinaagi sa paghatag og report, magpaambit og sugilanon, mohatag og pagpamatuod, o motabang sa uban nga paagi. Kon maghatag og assignment, klaroha kon unsay buot nimong ipabuhat ug kon unsa ang gidugayon niini.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pag-imbitar og usa ka ginikanan nga may gamay nga bata (tulo ngadto sa lima ka mga tuig ang edad) sa pagdala sa bata diha sa klase, mopaila kaniya, ug sa makadiyot ipahulagway ang pipila ka maanindot nga mga kinaiya sa bata. Pagkahuman sa ginikanan, hangyoa ang mga sakop sa klase sa paghunahuna og mga hiyas sa bata nga buot ni Jesus nga atong batunan. Ilista ang mga tubag diha sa pisara.

Ipasabut nga kini nga leksyon naghisgut sa kamahinungdanon sa pagpalambo sa mga hiyas nga sama sa bata ug pagtagad sa tanang katawhan uban sa pagpaubos ug pagkamabination.

Paghisgut ug Paggamit sa Kasulatan

Samtang ikaw nagtudlo sa mosunod nga mga tudling sa kasulatan, hisguti kon unsaon nato pagsunod sa mga pagtulun-an sa Manluluwas mahitungod sa pagpaubos, pagpasaylo ug gugmang putli.

1. Si Jesus mitudlo nga kita kinahanglan nga mahimong sama sa gagmay nga mga bata.

Basaha ug hisguti ang Mateo 18:1–6, 10–11, 14.

  • Sa inyong hunahuna ngano man nga ang mga tinun-an nabalaka mahitungod kon kinsa man ang labing dako sa gingharian sa langit? (Mateo 18:1; Marcos 9:33–34). Sa unsa nga paagi nga kita usahay makabuhat og sama nga mga sayop? Sa unsa nga paagi nga kita makabaliwala sa ingon nga mga kabalaka?

  • Ipakita ang hulagway ni Kristo ug sa mga bata. Unsa ang tambag ni Jesus ngadto niadtong kinsa nagtinguha sa pagkab-ot og tinuod nga kabantug diha sa iyang gingharian? (Tan-awa sa Mateo 18:2–4; Marcos 9:35.) Ngano nga usahay malisud man ang pagsunod niini nga tambag? Sa unsa nga paagi nga kini nga tambag matandi kon unsa ang gitudlo sa kalibutan mahitungod kon unsaon pagkab-ot niana nga kabantug?

  • Unsay gipasabut sa mahimong sama sa gagmay nga mga bata? (Tan-awa sa Mosiah 3:19). Ipasabut nga bisan tuod nga ang mga bata dili hingpit, sila adunay daghang mga hiyas nga kinahanglan nga atong palamboon aron makapanunod sa gingharian sa langit. Kini nga mga hiyas naglakip sa pagpaubos, pagkamaaghup ug pagkamauyonon sa pagtuo.) Unsa ang inyong nakat-unan gikan sa mga bata? Sa unsa nga paagi nga kita mahimong mas mahisama sa bata ug mas masugtanon ngadto sa kabubut-on sa atong Amahan sa Langit?

  • Unsa ang gipasabut sa “pag-angin aron makasala ang usa niining mga gagmay”? (Sa kinatibuk-ang kahulugan niini, ang pag-angin nagpasabut nga aron masayop.) Unsa ang pipila ka mga paagi nga ang mga tawo mao ang makaingon nga masayop ang mga bata? (Ang mga tubag mahimong maglakip sa dili maayo nga ehemplo ngadto kanila, dili mabination nga pagsaway, kapakyas sa pagtudlo kanila, ug pag-abuso kanila.) Unsay buhaton sa Ginoo niining maong mga kalapasan? (Tan-awa sa Mateo 18:6.)

    Si Elder M. Russell Ballard miingon: “Kami nakadungog og makapahasol nga mga taho sa mga ginikanan o mga magbalantay kinsa hangtud karon layo kaayo sa Espiritu ni Kristo nga ilang giabusohan ang mga bata. Bisan kon kini nga pag-abuso pisikal, sa pulong, o sa dili kaayo makita apan managsama ang gidak-on sa pag-abuso sa emosyon, kini usa ka salawayon ug usa ka hilabihan ka dako nga sala ngadto sa Dios” (sa Conference Report, Abr. 1991, 107; o Ensign, Mayo 1991, 80).

  • Sa unsa nga paagi nga ang pagkasama sa bata makatabang nato sa pag-amuma sa mga bata? Unsa ang atong mahimo aron matuman ang kabubut-on sa Dios nga “[walay] bisan usa niining mga gagmay ang malaglag”? (Mateo 18:14).

2. Pinaagi sa sambingay sa walay kalooy nga sulugoon, si Jesus nagtudlo mahitungod sa pagpasaylo.

Basaha ug hisguti ang Mateo 18:15, 21–35.

  • Diha sa Mateo 18:15, unsa ang gisulti sa Ginoo nga kinahanglan atong buhaton kon kita nasakitan? Ngano nga kini mao ang labing maayo nga paagi sa pagsulbad sa mga panagbingkil?

  • Unsa ang gitubag ni Jesus sa dihang si Pedro nangutana kon makapila siya kinahanglan nga mopasaylo? (Tan-awa sa Mateo 18:22. Ipasabut nga si Jesus migamit niining taas nga numero aron pagtudlo nga kita kinahanglan nga mopasaylo kanunay sa uban.) Ngano nga usahay malisud man ang pagpasaylo? Sa unsa nga paagi nga kamo napanalanginan sa diha nga kamo nagpasaylo sa uban o ba kaha napasaylo nila?

  • Aron pagdugang sa pagpasabut sa kamahinungdanon sa pagpasaylo sa uban, si Jesus mihatag sa sambingay sa walay kalooy nga sulugoon (Mateo 18:23–35). Si kinsa man ang girepresentaran sa hari ug sa mga sulugoon? (Tan-awa sa Mateo 18:35. Ang hari nagrepresentar sa Langitnong Amahan, ug ang mga sulugoon nagrepresentar kanato.) Sa unsa nga paagi nga kita sama sa mga sulugoon sa hari sa atong mga utang sa Ginoo? (Tan-awa sa Mateo 18:24–27.) Unsa ang atong buhaton aron mapasaylo sa atong “utang”?

  • Unsa ang atong makat-unan gikan sa ehemplo sa hari sa pagpasaylo sa uban? (Tan-awa sa Mateo 18:33.) Unsa ang pipila ka mga kakuyaw sa dili pagpasaylo sa uban? (Tan-awa sa Mateo 18:34–35.)

3. Pinaagi sa sambingay sa maayong Samarianhon, si Jesus nagtudlo mahitungod sa gugmang putli.

Basaha ug hisguti ang Lucas 10:25–37. Ipakita ang hulagway sa maayong Samarianhon.

  • Unsa ang gitubag ni Jesus sa abogado nga nangutana unsa ang iyang kinahanglan nga buhaton aron makapanunod sa kinabuhing dayon? (Tan-awa sa Lucas 10:25–28.) Sa unsa nga paagi nga ang mga sugo sa paghigugma sa Dios ug sa atong mga silingan naglukop sa tibuok ebanghelyo? Unsaon nato sa pagtuman sa hingpit niining duha ka mga sugo?

  • Unsa ang gitubag ni Jesus sa pangutana sa abogado, “Kinsa ang akong silingan?” (Tan-awa sa Lucas 10:29–37.) Unsa ang gitudlo niini nga sambingay mahitungod kon si kinsa ang atong silingan?

    Si Presidente Howard W. Hunter miingon: “Kita kinahanglan nga mahinumdom nga bisan tuod kita ang makighigala, ang Dios maoy mihimo sa atong mga silingan––bisag asa. Ang gugma kinahanglan walay utlanan; kita kinahanglan dili mohikaw sa atong pagkamaunongon” (sa Conference Report, Okt. 1986, 44; o Ensign, Nob. 1986, 35).

  • Unsa ang gibuhat sa pari ug sa Levita sa dihang sila nakakita sa tawo nga gitulis ug nasamdan? (Tan-awa sa Lucas 10:33–35.) Unsa ang ubang mga paagi nga ang mga tawo nagkinahanglan og tabang karon? Unsa ang uban nga mga katarungan nga kita dili motabang sa uban nga nagkinahanglan? (Tan-awa sa Mosiah 4:16–19 alang sa usa ka ehemplo.)

  • Giunsa sa maayong Samarianhon pagtabang ang tawo kinsa gitulis ug nasamdan? (Tan-awa sa Lucas 10:33–35.) Unsa ang mga kinaiya sa usa ka maayo nga silingan nga diha sa Samarianhon? Sa unsa nga paagi nga kamo napanalanginan “sa maayong mga Samarianhon”? Unsaon man nato aron mahimong “maayong mga Samarianhon”? (Tan-awa sa Mosiah 4:26.)

Panapos

Ipamatuod ang pagkamahinungdanon sa pagsunod sa ehemplo sa Manluluwas pinaagi sa pagpaubos sa atong mga kaugalingon, pagpasaylo sa uban, ug pagpakita og gugmang putli sa usag usa. Hagita ang mga sakop sa klase sa pagsunod niini nga mga pagtulun-an.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. Si Maria ug si Marta

Ipabasa sa usa ka sakop sa klase ang Lucas 10:38–42.

  • Sa unsang paagi nga si Marta mialagad sa Ginoo? Unsa ang “maayong bahin” nga gipili ni Maria? Sa unsa nga paagi nga kita usahay mahimong “magkapuliki og maayo sa hilabihang pag-atiman” nga wala na hinoon nato madawat si Jesus sama sa angay natong buhaton? Unsa ang atong makat-unan gikan niining mga bersikuloha?

2. “Paduola kanako ang gagmayng kabataan” (Marcos 10:14)

Samtang ikaw maghisgut sa pagtulun-an sa Manluluwas nga kita kinahanglang mahimo nga ingon sa gagmayng mga bata, ikaw mahimo usab nga mohisgut sa istorya sa iyang pagpanalangin sa mga bata diha sa Marcos 10:13–16.

  • Unsa ang gitubag sa mga tinun-an ni Jesus sa dihang ang gagmay nga mga bata gidala ngadto kaniya? (Tan-awa sa Marcos 10:13.) Unsa ang gisulti ni Jesus sa iyang mga tinun-an? (Tan-awa sa Marcos 10:14–15.) Unsa ang gibuhat ni Jesus alang sa mga bata? (Tan-awa sa Marcos 10:16.) Unsa ang atong makat-unan mahitungod ni Jesus gikan niini nga istorya? Unsaon man nato aron mas makasunod sa ehemplo nga iyang gipakita niini nga istorya?

3. Dugang nga panaghisgutan sa Mateo 18

  • Hisguti ang Mateo 18:8–9 ug Marcos 9:43–48 (tan-awa usab sa Mateo 5:29–30). Unsa ang gipasabut niini nga mga bersikulo? (Ang Hubad ni Joseph Smith niila niining malapason nga mga elemento isip mga tawo nga maoy mopahisalaag kanato. Mas maayo pang tapuson na lang nato ang atong pakig-uban sa mga tawo kay sa pagtugot kanila nga moganoy kanato ngadto sa sala. Tan-awa usab sa Hubad ni Joseph Smith, Marcos 9:40–48.)

  • Ang Hubad ni Joseph Smith sa Mateo 18:11 mirekord ni Jesus nga nag-ingon nga ang gagmay nga mga bata wala magkinahanglan og paghinulsol. Ngano nga ingon man niini? (Tan-awa sa Moroni 8:11–12.) Sa unsa nga paagi nga ang gagmay nga mga bata “buhi diha ni Kristo” (Tan-awa sa Moroni 8:12; D&P 29:46–47.) Unsa ang angay natong buhaton aron mahimong “buhi diha ni Kristo”? (Tan-awa sa Mateo 18:4; Mosiah 3:19; Moroni 8:10.)

  • Basaha ang Mateo 18:11–14. Unsaon nato paggamit ang sambingay sa nawala nga karnero diha sa atong mga kinabuhi? Sa unsa nga paagi nga kamo o usa sa inyong kaila napanalanginan pinaagi sa usa ka tawo kinsa misunod sa baruganan niini nga sambingay?

4. “Ang Ginoo mitudlo sa laing kapitoan pa” (Lucas 10:1)

  • Hisguti ang Lucas 10:1–24. Sa unsa nga paagi nga ang mga panudlo sa Ginoo ngadto sa Seventy matandi uban sa mga panudlo nga iyang gihatag ngadto sa Napulog Duha diha sa Mateo 10? Unsa ang mga responsibilidad sa Seventy karon? (Tan-awa sa D&P 107:25, 34, 38, 93–97.)

5. Ang pagkabalaan sa relasyon sa kaminyoon

Ipasabut nga ang Mateo 19:1–12 naghulagway sa usa ka kahimtang diin ang mga Pariseo misulay sa paglaang ni Jesus pinaagi sa pagpangutana kaniya mahitungod sa gitugotan sa balaod nga panagbulag (tan-awa usab sa Marcos 10:1–12). Ang panagbulag mao ang labing gihisgutan nga isyu tali sa mga iskolar ug mga pangulo sa mga Judeo, ug ang mga Pariseo naglaum nga ang tubag ni Jesus sa ilang pangutana makapasuko sa mga Judeo. Ipabasa og kusog sa usa ka sakop sa klase ang Mateo 19:3–9.

  • Unsa ang tubag ni Jesus ngadto sa pangutana sa mga Pariseo diha sa bersikulo 3? (Tan-awa sa Mateo 19:4–6. Siya miingon kanila nga ang pagpakigbulag wala gi-orden sa Dios.) Ngano nga gitugot man ni Moises ang pagpakigbulag diha sa mga Israelita? (Tan-awa sa Mateo 19:7–8.)

Ipasabut nga sa karaan nga Israel, ang usa ka tawo mahimo nga mobiya, o makigbulag, sa iyang asawa sa walay igo nga katarungan. Si Jesus mitudlo nga diha sa hingpit nga kalibutan, sama sa celestial nga gingharian, ang panagbulag wala itugot. Tungod kay ang kalibutan dili pa hingpit, ang panagbulag gitugutan apan dili kini angayng mahitabo gawas lamang sa pinaka bug-at nga katarungan. Sa Mateo 19:9 gipasabut nga ang usa ka tawo kinsa mobiya sa iyang asawa tungod sa walay igong hinungdan kasado gihapon ngadto kaniya diha sa mga mata sa Dios, ug busa siya nakapanapaw kon siya magpakasal sa laing babaye. (Tan-awa sa James E. Talmage, Jesus the Christ, 3rd ed. [1916], 473–75, 484.)

  • Unsa may papel sa pagpaubos, pagpasaylo, ug gugmang putli diha sa malampusong kaminyoon? Sa unsa nga paagi nga ang pagpaninguha nga mahimong sama ni Kristo makatabang kanato sa kaminyoon ug sa uban nga mga relasyon?

  • Unsaon man nato pagtabang sa mga tawo nga nag-antus sa samad sa panagbulag?

6. Pangbatan-on nga kalihokan

Isulat (o ipasulat sa mga sakop sa klase) ang mga pangutana mahitungod sa leksyon diha sa gagmay nga mga piraso nga papel. (Isip usa ka pang-ribyu nga kalihokan, ikaw mahimong mopili sa aktwal nga mga pangutana gikan sa matag seksyon sa leksyon.) Ibutang ang mga piraso nga papel diha sa sako o sa kahon. Ipahan-ay sa mga sakop sa klase ang ilang mga nga anaa sa nga magliyok, ug ibutang ang sako o kahon diha sa lingkuranan nga anaa sa tunga sa liyok. Ipapuli-puli pagkuha ang mga pangutana gikan sa sako o sa kahon sa mga sakop sa klase ug ipatubag kini.