“Ang Magmadaugon Makapanag-iya Niining Mao nga Panulundon”

Katuyoan

Aron pagtabang sa mga sakop sa klase nga makasabut sa uban nga mga panalangin nga moabut niadtong kinsa makabuntog sa mga pagsulay sa pagkamortal pinaagi sa ilang pagpamatuod ni Jesukristo.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Pinadayag 1:1–3, 9–20. Si Juan gisugo sa pagrekord sa pagpadayag nga iyang nadawat gikan sa Ginoo pinaagi sa usa ka anghel. Nakita ni Juan pinaagi sa pagpadayag ang pipila ka mga timailhan nga nagpaila sa mga bahin sa Simbahan ni Jesukristo.
2. Pinadayag 2–3. Pinaagi ni Juan, ang Ginoo mitudlo sa pito ka mga branch sa Simbahan sa Asya mahitungod sa dagkong mga panalangin nga naghulat niadtong makabuntog sa mga pagsulay ug sa mga pagtintal sa pagkamortal.
3. Pinadayag 12. Si Juan nakakita sa panan-awon sa Gubat sa Langit, ug sa pagpadayon niini dinhi sa yuta. Siya nakakat-on nga ang mga Santos makabuntog ni Satanas pinaagi sa Pag-ula sa Manluluwas ug sa ilang mga pagpamatuod.
Dugang mga basahonon: Pinadayag 21:7; Ang Giya ngadto sa mga Kasulatan, “Pinadayag ni Juan.”
Kon ikaw mogamit sa pang-atensyon nga kalihokan, pag-andam sa paggamit sa mga paghulagway diha sa pahina 246. Mahimo nimong drowingon ang dakong bersyon niini nga mga paghulagway diha sa pisara o sa dakong piraso nga papel aron ang tanang mga sakop sa klase makakita niini.
Sugyot alang sa pagtudlo: Ang maayong mga magtutudlo mao ang maayong mga tigpaminaw. Ang pagpaminaw naglakip dili lamang sa pagpaminaw apan usab sa pagsabut unsa ang gisulti. Ang mga magtutudlo kinsa maayo nga maminaw makasulti nga sila nakasabut ug mohatag og bili sa matag sakop sa klase. (Tan-awa sa Teaching, No Greater Call, [36123], mga pahina 66–67).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Hangyoa ang mga sakop sa klase sa paghunahuna og mga simbolo nga gigamit sa Ginoo sa iyang pagtudlo sa panahon sa iyang pangalagad dinhi sa yuta. (Ang mga tubag mahimong maglakip sa asin, trigo ug mga sagbut, pan, ug mga kahoy nga oliba.)

Pang-atensyon nga Kalihokan

Ngano nga ang mga simbolo mapuslanon diha sa pagtudlo? (Kini makatabang nga masabtan ug mahinumduman sa mga sakop sa klase pinaagi sa pagtandi sa dili mga sinati nga mga hunahuna o mga butang ngadto sa mas sinati; Kini adunay nagkalainlaing ang-ang sa kahulugan; makaawhag kini sa mga sakop sa klase sa paghunahuna og maayo kon unsay gitudlo.

Ipasabut nga ang mga simbolo gigamit sa tibuok mga kasulatan, apan labi na diha sa basahon sa Pinadayag. Ipakita ang mga paghulagway diha sa pahina 246, ug itudlo nga kini nga mga paghulagway mipakita sa mga simbolo nga gihisgutan diha sa kapitulo 1 sa Pinadayag. Matag usa niini nga mga simbolo pagahisgutan niini nga leksyon.

Mahimong imong ipasabut nga si Apostol Juan, ang tigsulat sa basahon sa Pinadayag, nagagikan sa kultura nga kusog kaayong mogamit og mga simbolo sa ilang pinulongan ug sa mga basahon. Ang mga magbabasa karon kadaghanan maglisud sa pagsabut sa mga simbolo diha sa mga sinulat ni Juan. Kon kita mohubad sa mga hulagway sa tinuoray, ang basahon sa Pinadayag mahimong makapatingala ug makalibog. Kon atong hinumduman nga kadaghanan sa mga paghulagway nagsimbolo lamang o nagrepresentar og mga tawo, mga butang, o mga hunahuna nga pamilyar alang kanato, ang basahon mamahimong mas daling sabton.

Paghisgut ug Paggamit sa Kasulatan

Sa mainampoong paagi hunahunaa kon unsa nga mga tudling sa kasulatan ug mga pangutana gikan niini nga leksyon ang mas makatubag sa mga panginahanglan sa mga sakop sa klase. Paggahin og taas nga panahon sa klase sa paghisgut niini nga mga tudling ug mga pangutana. Tabangi ang mga sakop sa klase nga makahibalo nga ang basahon sa Pinadayag angay ug mapuslanon kanato karon.

1. Si Juan nakakita sa pipila ka mga simbolo nga nagpaila sa mga bahin sa Simbahan ni Jesukristo.

Basaha ug hisguti ang Pinadayag 1:1–3, 9–20.

Ribyuha uban sa klase ang mosunod nga kinatibuk-ang kasayuran kalabut sa basahon sa Pinadayag:

Si Juan maoy usa sa orihinal nga mga Apostoles sa Manluluwas. Siya gipalayas sa kagamhanan sa Roma ngadto sa Patmos, usa ka gamay nga isla sa may kasadpan nga lapyahan nga karon mao ang Turkey, tungod sa iyang pagpamatuod ni Jesukristo. Samtang didto, si Juan giduaw sa usa ka anghel ug gihatagan og pagpadayag nga iyang gitala sa mga sulat sa pito ka mga branch sa Simbahan sa Asya (Pinadayag 1:1, 9–11). Kini nga mga sulat nahimong ang basahon sa Pinadayag.

Ang basahon sa Pinadayag gisulat sa pinulongan nga naggamit og mga simbolo. Ang iyang tema mao ang “aduna unyay mahitabo nga kadaugan sa Dios batok sa yawa dinhi sa yutaa; makanunayon nga kadaugan sa maayo batok sa dautan, sa mga santos batok sa ilang tigdaug-daug, sa mga gingharian sa Dios batok sa mga gingharian sa mga tawo ug ni Satanas…. Ang detalye kalabut sa upat ka mga binuhat, mga gubat, mga anghel, mga tawo, ug uban pa, nagtampo alang sa kalamboan niini nga tema. Pinaagi sa gamay nga pagtuon, ang tema mahimong masabtan bisan kon ang mga detalye dili hingpit nga maila” (Ang Giya ngadto sa mga Kasulatan, “Pinadayag ni Juan,” 219).

Ang tulo ka pasiuna nga mga kapitulo sa basahon nagtala sa pagpamatuod ni Juan sa kamatuoran sa pinadayag, sa mga panudlo ni Juan gikan sa Ginoo, sa tambag ni Juan sa pito ka mga branch sa Simbahan sa Asya. Ang kapitulo 4 mirekord sa panan-awon ni Juan mahitungod sa langit, ang kapitulo 5 hangtud sa 20 mitala sa panan-awon sa madaugon nga padulngan sa gingharian sa Dios. Kini nga panan-awon nagpakita sa mga pakigsangka batok sa mga gingharian ni Satanas, ang pagkalaglag sa gingharian ni Satanas, ug ang katapusan nga yugto sa kasaysayan sa kalibutan. Human niini mao ang panan-awon sa bag-ong mga langit ug bag-ong yuta—ang kalibutan sa iyang celestial nga kahimtang (Pinadayag 21:1–5). Ang basahon sa Pinadayag natapos uban sa pagpamatuod sa anghel ug sa dugang nga tambag gikan sa Ginoo.

Unsa ang una nga hulagway o simbolo, nga nakita ni Juan niini nga pagpadayag? (Tan-awa sa Pinadayag 1:12.) Unsa ang girepresentaran sa mga kandiliro? (Tan-awa sa Pinadayag 1:20.) Ngano nga ang mga kandiliro mga angay nga simbolo alang sa mga branch sa Simbahan? (Tan-awa sa 3 Nephi 18:24 ug ang kinutlo sa ubos.) Sa unsa nga ang mga ward o mga branch karon naglihok sama sa mga kandiliro?

Si Elder Bruce R. McConkie miingon: “Ang mga kandiliro mohatag og kahayag; wala nila kini himoa. Ang ilang katungdanan mao ang pagdala niini ngadto sa uban, dili ang Paglalang niini. Busa pinaagi sa paggamit sa pito ka mga kandiliro sa paghulagway sa pito ka mga Simbahan ngadto niini si Juan karon mohatag sa tambag, ang Ginoo nagpakita nga ang iyang katiguman dinhi sa yuta mao ang modala sa iyang kahayag ngadto sa kalibutan” (Doctrinal New Testament Commentary, 3 bol. [1966–73], 3:442).
Asa man ang simbolo sa Manluluwas niining pito ka mga kandiliro? (Tan-awa sa Pinadayag 1:13.) Sa unsa nga paagi nga ang Manluluwas anaa diha sa tunga sa iyang Simbahan karon? Ngano nga mahinungdanon man alang kanato nga mahibalo nga siya anaa sa tunga sa iyang mga katawhan?
Unsa ang gigunitan sa tuo nga kamot sa Manluluwas sa dihang siya nagbarug diha sa tunga sa pito ka mga kandiliro? (Tan-awa sa Pinadayag 1:16.) Unsa ang girepresentaran sa pito ka mga bitoon? (Tan-awa sa Pinadayag 1:20 ug sa footnote 20b; tan-awa usab sa Pinadayag 2:1, footnote 1a, ug sa Pinadayag 3:1, footnote 1a. Sa tibuok Hubad ni Joseph Smith sa Pinadayag 1–3, ang pulong mga anghel giusab ngadto sa mga sulugoon, nagpatin-aw niini nga ang mga bitoon nagrepresentar sa mga lider sa pito ka mga branch sa Simbahan.) Sa unsa nga paagi nga ang mga lider sa Simbahan sama sa mga bitoon? (Ang mga tubag mahimong maglakip nga sila makanunayon ug mohatag og padulnganan ngadto niadtong kinsa motan-aw niini.)
Unsa ang migawas sa ba-ba sa Manluluwas diha sa iyang panan-awon? (Tan-awa sa Pinadayag 1:16.) Unsa ang girepresentaran niini nga espada? (Tan-awa sa D&P 6:2.) Sa unsa nga mga paagi nga ang pulong sa Dios sama sa espada? (Tan-awa sa Mga Hebreohanon 4:12; Helaman 3:29.)
Unsa pay laing mga butang nga nagsimbolo sa Ginoo niini nga pagpadayag? (Tan-awa sa Pinadayag 1:18.) Unsa ang buhaton sa Manluluwas niini nga mga yawe? (Siya moluwas sa tanan nga katawhan sa pisikal nga kamatayon, ug siya moluwas sa mga matarung gikan sa espirituhanon nga kamatayon. Tan-awa sa 2 Nephi 9:10–13.)

2. Ang Ginoo misulti sa pito ka mga sanga sa Asya mahitungod sa mga panalangin nga gisaad ngadto niadtong kinsa magmadaugon.

Hisguti ang Pinadayag 2–3. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga ang mga kapitulo 2 ug 3 naglangkub sa mga pulong sa Ginoo ngadto sa matag usa sa pito ka mga branch sa Simbahan sa Asya. Ang Ginoo mibalik pagtan-aw sa uban nga mga kalig-on ug mga kahuyang sa matag sanga ug mipasidaan sa mga Santos sa pagtarung sa ilang mga kahuyang.

Sama nga ang Ginoo nagdayeg ug mikorihir sa mga miyembro sa Simbahan sa Asya, ang Ginoo modayeg ug mokorihir kanato karon. Unsa kaha ang daygon sa Ginoo kanato? Unsa ang gisulti sa Ginoo nga atong tarungon?

Ipasabut nga sa iyang mga panudlo ngadto sa mga branch sa Simbahan sa Asya, ang Ginoo misaad usab og dako nga mga panalangin ngadto niadtong kinsa magmadaugon sa mga pagsulay ug mga pagtintal sa pagka-mortal. Isulat diha sa pisara ang Mga Saad Niadtong Kinsa Makabuntog. Samtang ikaw maghisgut sa matag saad, ilista diha sa pisara ubos niini nga ulohan.

Ngadto sa Mga Taga-Efeso (Pinadayag 2:1–7)

Ang Ginoo mipasidaan ngadto sa mga taga-Efeso sa ilang panginahanglan sa paghinulsol, apan siya usab misaad nga, “Ngadto kaniya nga magmadaugon Ako magatugot sa pagkaon sa kahoy sa kinabuhi.” Unsa ang gipaila sa kahoy sa kinabuhi? (Tan-awa sa 1 Nephi 11:21–22.) Ngano nga kini ang labing gitinguha sa tanan nga mga panalangin?

Ngadto Sa Esmirna (Pinadayag 2:8–11)

Ang Ginoo mipasidaan sa mga Santos sa Esmirna nga sila mag-antus sa mga kasakit, apan misaad usab siya, “Kaniya nga magmadaugon walay gahum ang ikaduhang kamatayon sa pagsakit kaniya.” Unsa ang ikaduhang kamatayon? (Tan-awa sa Alma 12:16, 32; Helaman 14:18.) Sa unsa nga paagi nga ang saad sa Ginoo ngadto sa mga Santos sa Esmirna makatabang kanato sa pagtan-aw sa atong mga kasakitan diha sa husto nga panglantaw?

Ngadto sa Pergamo (Pinadayag 2:12–17)

Ang Ginoo misaway sa uban nga mga tawo sa Pergamo tungod sa pagsunod sa doktrina ni Balaam, usa ka propeta sa Daang Tugon kinsa nagtinguha sa kalibutanong mga dungog ug mga ganti labaw kay sa iyang tinguha sa pagsunod sa kabubut-on sa Ginoo. Unsa nga mga kalibutanon nga mga dungog ug mga ganti ang malagmit atong isalikway aron pagsunod sa kabubut-on sa Ginoo?
Ngadto sa mga Santos sa Pergamo ang Ginoo misaad, “Ngadto kaniya nga magmadaugon, pagahatagan ko sa mana nga tinagoan.” (Ang pulong tinagoan nagpasabut nga mao ang sagrado, o dili makita ngadto sa matag usa.) Unsa ang malagmit girepresentaran sa tinagoan nga mana? (Tan-awa sa Juan 6:35, 49–51.)

Ngadto sa Tiatira (Pinadayag 2:18–29)

Sa iyang mga pulong ngadto sa mga Santos sa Tiatira, unsa ang gisaad sa Ginoo niadtong magmadaugon? (Tan-awa sa Pinadayag 2:26–28. Ipasabut nga kini nga mga saad nagpasabut sa mga panalangin sa kahimayaan ug kinabuhing dayon, kon ang matarung momando ibabaw sa langitnong mga gingharian.) Unsa ang gunitanan nga puthaw nga gamiton sa mga matarung sa pagmando sa mga nasud? (Tan-awa sa 1 Nephi 11:25; Hubad ni Joseph Smith, Pinadayag 2:27.) Sa unsa nga paagi nga kita makagamit sa pulong sa Dios aron pagdumala sa atong kaugalingon nga mga kinabuhi?
Kinsa ang bitoon nga kabugason nga gisulti diha sa Pinadayag 2:28? (Tan-awa sa Pinadayag 22:16.) Unsa kaha ang ipasabut sa pagahatagan sa bitoon sa kabugason? (Ang mga tubag mahimong maglakip sa pagdawat ni Kristo sa atong mga kinabuhi ug sa pagdawat sa mga panalangin sa iyang Pag-ula.)

Ngadto sa Sardis (Pinadayag 3:1–6)

Unsa nga mga panalangin ang gisaad sa Ginoo sa mga Santos sa Sardis? (Tan-awa sa Pinadayag 3:5.) Sa unsa nga paagi nga ang pag-apil sa mga ordinansa diha sa templo makaandam kanato nga paga- “sul-oban sa saput nga puti” sa kahangturan? Unsa ang basahon sa kinabuhi? (Tan-awa sa D&P 128:7; tan-awa usab sa Exodo 32:33; Alma 5:58; Ang Giya ngadto sa mga Kasulatan, “Basahon sa Kinabuhi,” 27.) Unsa ang mahitabo kanila kansang mga ngalan nahisulat diha sa basahon ug unya pagapapason tungod sa pagkadautan? (Tan-awa sa Pinadayag 21:10, 23–27; Alma 5:58; D&P 88:2.)

Ngadto sa Filadelfia (Pinadayag 3:7–13)

Unsa ang gisulti sa Ginoo nga iyang buhaton alang sa mga Santos sa Filadelfia tungod kay sila “naghupot [sa iyang] pulong, ug wala mosalikway [sa iyang] ngalan”? (Tan-awa sa Pinadayag 3:10.) Sa unsa nga paagi nga ang matarung nga pagpuyo makapasayon sa pagsalikway sa tintasyon?
Ang Ginoo misaad ngadto niadtong magmadaugon, “ Ako mosulat diha kaniya sa ngalan sa akong Dios, ug sa ngalan sa dakbayan sa akong Dios. Unsa ang gipasabut sa ang ngalan sa Dios ug ang ngalan sa iyang dakbayan isulat diha kanato? (Kita mahimong sama sa Dios ug mahimong mga lumulupyo sa iyang mahangturong gingharian.)

Ngadto sa Laodicea (Pinadayag 3:14–22)

Ang Ginoo misaway sa mga Santos sa Laodicea kinsa mga “dagaang, ug dili mabugnaw ni mainit” (Pinadayag 3:15–16). Sa unsa nga paagi nga malagmit kita usahay espirituhanon nga “dagaang”? Sa unsa nga paagi kita makapalambo sa atong pasalig ngadto sa ebanghelyo ni Jesukristo?
Ang Ginoo misaad ngadto sa mga taga-Laodicea, “Ngadto kaniya nga magmadaugon pagatugotan ko sa paglingkod sa akong trono uban kanako, maingon nga ako usab nagmadaugon ug maglingkod uban sa akong Amahan diha sa iyang trono” (Pinadayag 3:21). Unsa nga mga panalangin ang gisimbolo pinaagi sa saad sa paglingkod uban sa Ginoo diha sa iyang trono? (Tan-awa sa Mga Taga-Roma 8:16–17.)

Itudlo sila ngadto sa lista sa mga saad diha sa pisara, ug ipasabut nga kon kining tanang mga saad moabut, naghulagway kini sa mahangturon nga padulngan sa mga matarung. Ipabasa sa mga sakop sa klase ang Doktrina ug mga Pakigsaad 132:20 isip maoy katingbanan niini nga mga saad.

3. Si Juan nahibalo nga ang mga Santos magmadaugon batok ni Satanas pinaagi sa Pag-ula ni Jesukristo ug sa ilang mga pagpamatuod.

Basaha ug hisguti ang pinili nga mga bersikulo sa Pinadayag 12. Ipasabut nga ingon nga kabahin sa iyang pagpadayag, si Juan nakakita sa simbolo nga panan-awon sa Gubat sa Langit ug sa pagpadayon niini dinhi sa yuta.

Ipasabut nga ang babaye nga gihulagway sa Pinadayag 12:1–2, 5 nagpaila sa Simbahan sa Dios. Ang bata nga iyang gidala nagpaila sa gingharian sa Dios—ang kagamhanan nga maanaa dinhi sa yuta sulod sa paghari ni Kristo sa panahon sa milenyum. (Tan-awa sa Pinadayag 12:7.)

Kinsa ang girepresentaran sa dragon diha sa Pinadayag 12? (Tan-awa sa Pinadayag 12:9.) Unsa ang nahitabo ngadto sa dragon ug sa iyang sumusunod didto sa Gubat sa Langit? (Tan-awa sa Pinadayag 12:3–4, 7–9.) Unsa ang gibuhat sa dragon human sila gipapahawa? (Tan-awa sa Pinadayag 12:17.) Kinsa ang gikaaway karon ni Satanas? (Tan-awa sa Pinadayag 12:12.)

Si Presidente Wilford Woodruff miingon: “Adunay duha ka gahum dinhi sa yuta ug diha sa mga katawhan sa yuta—ang gahum sa Dios ug ang gahum sa yawa…. sa dihang ang Dios miatubang sa mga katawhan diha sa yuta, wala magsapayan unsa nga pangidaron, si Lucifer, ang anak sa kabuntagon, ug ang minilyon nga napukan nga mga espiritu nga gisalikway nga gipapahawa gikan sa langit, makiggubat batok sa Dios, batok ni Kristo, batok sa buluhaton sa Dios, ug batok sa mga katawhan sa Dios. Ug sila dili magduhaduha sa pagbuhat niini sa atong panahon ug henerasyon. Sa matag higayon nga ang Ginoo mibutang sa Iyang kamot aron pagpahigayon sa bisan unsang buluhaton, kana nga mga gahum maningkamot sa paggun-ob niini” (sa Deseret Evening News, 17 sa Okt. 1896, 9; gikutlo ni Gordon B. Hinckley, sa Conference Report, Okt. 1986, 56; o Ensign, Nob. 1986, 43).
Sa unsa nga paagi nga ang Simbahan ug ang gingharian sa Dios sa katapusan magmadaugon batok ni Satanas? (Tan-awa sa Pinadayag 12:11.) Sa unsa nga paagi nga ang Pag-ula ni Kristo ug ang atong mga pagpamatuod niini makatabang sa atong tagsa-tagsa ka mga pakigbisog batok ni Satanas?

Panapos

Ipamatuod nga kadtong kinsa magmadaugon sa mga pagtintal ug mga pagsulay sa kalibutan makapanunod sa mga panalangin sa kinabuhing dayon. Ipahinumdom sa mga sakop sa klase nga ang Pag-ula sa Manluluwas maghatag og paagi kanato sa pagdaug kon kita maghinulsol ug magmatinud-anon.

Dugang nga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit niini nga ideya isip kabahin sa leksyon.

“Tan-awa, Ako nagatindog sa pultahan” (Pinadayag 3:20)

Ipakita ang hulagway nga Si Jesus diha sa Pultahan (62170; Pakete sa mga Hulagway sa Ebanghelyo 237).

Unsa ang gitudlo sa Pinadayag 3:20 mahitungod sa Ginoo? (Tan-awa sa Pinadayag 22:17.) Giunsa ninyo pagkahibalo nga tinuod kini?