“Diha-diha Gibiyaan Nila ang Ilang mga Baling”

Katuyoan

Aron sa pagtabang sa mga sakop sa klase nga makasabut nga ang mga Apostoles gitawag aron mahimong linain nga mga saksi ni Jesukristo ug nga kita mapanalanginan kon kita mopaluyo ug mosunod kanila.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Lucas 4:14–32. Si Jesus nagtudlo diha sa usa ka sinagoga sa Nazaret, ug nagpamatuod nga siya mao ang Mesiyas kinsa gipanagna ni Isaias. Ang mga tawo masuk-anon nga misalikway kaniya.
2. Lucas 5:1–11, 27–28; 6:12–16. Si Jesus mitawag sa iyang Napulog Duha ka mga Apostoles.
3. Mateo 10. Si Jesus miordinar ug mitudlo sa Napulog Duha ka mga Apostoles ug misugo kanila sa pagsangyaw sa ebanghelyo.
Dugang nga basahonon: Isaias 61:1–2; Mateo 4:18–22; Marcos 1:16–20; 3:13–19; 6:7–13; Lucas 9:1–6; 12:1–12; Doktrina ug mga Pakigsaad 107:23–24, 33–35, 39, 58; Ang Giya ngadto sa mga Kasulatan, “Apostoles.”
Kon ang mosunod nga mga hulagway anaa, gamita kini sa panahon sa leksyon: Ang Pagtawag sa mga Mangingisda (62496 853; Pakete sa mga Hulagway sa Ebanghelyo 209) o Si Jesus ug ang mga Mangingisda (62138 853; Pakete sa mga Hulagway sa Ebanghelyo 210); Si Kristo Nag-orden sa mga Apostoles (62557 853; Pakete sa mga Hulagway sa Ebanghelyo 211); ug ang hulagway sa karon nga Korum sa Napulog Duha ka mga Apostoles (gikan sa labing bag-o nga isyu sa komperensya diha sa Ensign o sa Liahona).
Sugyot alang sa pagtudlo: Ilha ug tawga ang mga sakop sa klase pinaagi sa ilang pangalan. Kon ikaw mobuhat niana, ang mga sakop sa klase makakita nga ikaw nagtagad gayud sa matag usa kanila. Ang pagkahibalo sa mga pangalan sa mga sakop sa klase makatabang usab kanimo sa pagdasig sa pagpaapil pinaagi sa paghatag og mga pangutana ngadto sa piho nga sakop.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron sa pagsugod sa leksyon.

Ipabasa sa usa ka sakop sa klase ang unang bahin sa Mosiah 27:31 (hangtud sa “pagkumpisal nga siya mao ang Dios”). Ipasabut nga sa Ikaduhang Pag-anhi ni Jesukristo, ang tanan makaila kaniya nga mao ang Manluluwas. Dili kini parehas sa iyang unang pag-anhi. Ang mga Judeo nagtuon sa mga panagna kalabut sa pag-anhi sa Manluluwas sulod sa gatusan ka mga katuigan, apan daghan kanila kinsa nakadungog ni Jesus napakyas sa pag-ila kaniya isip mao ang Manluluwas. Tungod kay si Jesus wala mopalingkawas sa mga Judeo gikan sa pagdumala sa mga Romano, ingon sa ilang gipaabut nga buhaton sa Mesiyas, daghan kanila ang misalikway kaniya ug sa iyang mensahe.

Ipasabut nga ang unang bahin niini nga leksyon maghisgut unsa ang nahitabo sa dihang si Jesus unang mipahibalo nga siya mao ang dugay na nga gipaabut mga Mesiyas. Uban nga mga bahin sa leksyon maghisgut sa pagtawag og mga Apostoles aron motabang sa pagsangyaw sa iyang mensahe.

Paghisgut ug Paggamit sa Kasulatan

Samtang ikaw nagtudlo sa mosunod nga mga tudling sa kasulatan, paghisgut sa mga panalangin nga moabut gikan sa pagkahibalo nga si Jesukristo mao ang Manluluwas ug gikan sa pagsunod sa mga Apostoles.

1. Si Jesus mipahibalo nga siya mao ang Mesiyas.

Tukia ang Lucas 4:14–32. Dapita ang mga sakop sa klase sa pagbasa sa pinili nga mga bersikulo. Ipasabut nga si Jesus gidapit sa pagbasa og usa ka tudling sa kasulatan ug pagkomentaryo bahin niiini sa panahon sa pagpangalagad sa sinagoga sa Nazaret.

Ipabasa sa usa ka sakop sa klase ang Lucas 4:16–19. (Ipasabut nga ang bersikulo 18–19 mga kinutlo sa Isaias 61:1–2. Si Isaias gitawag og “Esaias” diha sa Lucas 4:17.) Kabahin sa unsa kini nga mga bersikulo? (Kini mao ang mapanagnaon nga paghulagway sa mga butang nga buhaton sa Mesiyas; tan-awa sa leksyon 1.)
Sa dihang nahuman na si Jesus sa pagbasa sa tudling gikan sa Isaias, unsa nga pagpamatuod ang iyang gihatag? (Tan-awa sa Lucas 4:21. Siya mipahayag nga siya mao ang Mesiyas kinsa gipanagna ni Isaias ug gihulat sa mga Judeo sulod na sa gatusan ka mga katuigan.) Unsay gibuhat sa mga katawhan diha sa sinagoga agig tubag sa pamahayag ni Jesus? (Tan-awa sa Lucas 4:22–29.)
Ngano sa inyong hunahuna nga ang mga katawhan sa sinagoga maglisud man pagdawat ni Jesus isip mao ang Mesiyas? (Tan-awa sa Lucas 4:22.) Ang mga tubag mahimong maglakip nga sila nakaila kaniya ug nakakita kaniya sa iyang pagtubo, busa sila dili makatuo kon sa unsa nga paagi nga siya mao ang bantugan nga Mesiyas nga ilang gipaabut.) Sa inyong hunahuna ngano kaha nga ang uban nga mga tawo karon maglisud man sa pagdawat ni Jesukristo? Unsaon man nato pagpalig-on sa atong mga pagpamatuod nga si Jesus mao ang Manluluwas?

2. Si Jesus mitawag sa iyang Napulog Duha ka mga Apostoles.

Basaha ug tukia ang pinili nga mga bersikuo gikan sa Lucas 5:1–11, 27–28; 6:12–16. Ipakita ang hulagway ni Jesus ug sa mga mangingisda ug ang hulagway sa karon nga Napulog Duha ka mga Apostoles. Samtang ikaw naghisgut sa mga tudling sa kasulatan, tabangi ang mga sakop sa klase nga makasabut nga ang mga Apostoles gitawag aron pagbuhat unsa ang gibuhat ni Jesus mismo didto sa sinagoga sa Nazaret—nagpahayag nga siya mao ang Mesiyas, ang Manluluwas.

Unsa ang gibuhat ni Simon Pedro, Santiago ug Juan sa dihang si Jesus miduol ngadto kanila? (Tan-awa sa Lucas 5:1–2.) Unsa ang gisulti ni Jesus kanila mahitungod kon sa unsa nga paagi nga ang ilang mga kinabuhi mausab kon sila mosunod kaniya? (Tan-awa sa Lucas 5:10.) Sa unsa nga paagi nga ang inyong kinabuhi naapektohan tungod sa inyong paghukom nga mosunod kang Jesukristo?
Sa unsa nga paagi nga ang milagro mahitungod sa mga pukot sa pagpangisda nakapakita sa mga kasinatian nga nasinati ni Pedro, Santiago ug Juan ingon nga “mangingisda sa mga tawo”? (Marcos 1:17). Ipahunahuna sa mga sakop sa klase ang mosunod nga hugpong sa mga pulong:
1. Lucas 5:5: “Sa imong pulong akong itaktak ang mga pukot.” (Sila mobuhat kon unsa ang isugo ni Jesus kanila.)
2. Lucas 5:6: “Ilang nakuha ang mabagang duot sa isda: ug kay nagkabusbos na man ang ilang mga pukot.” (Sila makakaplag og daghan nga mga tawo kinsa modawat sa ebanghelyo.)
3. Lucas 5:7: “Gikamay nila ang ilang mga kauban … aron sa pagduol ug pagtabang kanila.” (Sila motawag sa uban aron pag-abag sa buluhaton.)
Ipasabut nga diha sa Lucas 5:1–11, si Jesus mitawag ni Pedro, Santiago ug Juan nga mahimong iyang mga tinun-an. Sa kaulahian iya silang gitawag nga mahimong mga Apostoles. Isulat ang pulong Tinun-an [Disipulo] ug Apostol diha sa pisara. Unsa ang kalainan tali sa usa ka tinun-an ug usa ka Apostol?

Ipasabut nga ang usa ka tinun-an mao ang bisan kinsa nga mosunod ni Jesukristo (Ang Giya ngadto sa mga Kasulatan, “Tinun-an”). Ang usa ka Apostol usa ka tinun-an kinsa gitawag nga mahimong linain nga saksi ni Kristo (D&P 107:23). Ang pulong Apostol nagpasabut nga “usa [kinsa mao] ang gipadala” (Ang Giya ngadto sa mga Kasulatan, “Apostol”). Ang mga sakop sa Kurom sa Napulog Duha ka mga Apostoles mao ang gipadala aron mopamatuod sa kalibutan nga si Jesus mao ang Manluluwas ug Manunubos sa mga katawhan.
Ngano nga mahinungdanon man nga si Jesus motawag og mga Apostoles? (Tan-awa sa Mateo 9:36–38; 16:19; Marcos 3:14–15; Juan 20:19–21, 23; Mga Taga-Efeso 4:11–15. Sila motabang ni Jesus sa pagsangyaw sa ebanghelyo ug mangulo sa Simbahan ug modala sa pagtugot sa priesthood sa dihang wala na si Jesus.) Ngano nga mahinungdanon man nga ang Ginoo motawag og mga Apostoles karon?
Giunsa ni Jesus pagpili ang orihinal nga Napulog Duha ka mga Apostoles? (Tan-awa sa Lucas 6:12–13.) Giunsa ni Jesus pag-andam ang iyang kaugalingon sa pagtawag kanila? Sa unsa nga paagi kini matandi sa paagi sa pagpili karon sa mga tawo nga mahimong mga Apostoles ug moalagad diha sa uban nga mga katungdanan sa Simbahan? (Ang mga pangulo sa Simbahan mag-ampo ug mangayo og mga pagdasig aron makahibalo kinsa ang buot sa Ginoo nga moalagad sa matag katungdanan.)
Unsa ang gisulti sa mga kasulatan kalabut sa kinaiya ug batasan sa mga tawo nga gitawag ni Jesus isip mga Apostoles? (Tan-awa sa Lucas 5:5, 8, 11, 27–28. Ang mga tubag mahimong maglakip nga sila walay pormal nga pagbansay alang sa pangalagad, apan sila mapainubsanon, masulundon, kugihan motrabaho nga mga tawo kinsa andam nga mosakripisyo sa tanan nga butang aron sa pagsunod sa Ginoo.) Unsa ang gisugyot niini kalabut kon sa unsa nga paagi nga ang usa ka tawo mamahimong takus sa pag-alagad sa Ginoo? (Tanawa usab D&P 4:3, 5–6, Mga Artikulo sa Hugot nga Pagtuo 1:5.)

3. Si Jesus mi-ordinar ug mitudlo sa Napulog Duha ka mga Apostoles.

Basaha ug hisguti ang pinili nga mga bersikulo gikan sa Mateo 10. Ipakita ang hulagway ni Kristo nga nag-ordinar sa mga Apostoles.

Human matawag ni Jesus ang Napulog Duha ka mga Apostoles, siya mihatag kanila sa gahum sa priesthood ug mitudlo kanila sa ilang mga responsibilidad. Unsa ang atong nakat-unan kalabut sa mga gahum ug mga responsibilidad sa mga Apostoles gikan sa tambag ni Jesus sa Mateo 10? (Ilista ang mga tubag sa mga sakop sa klase diha sa pisara. Ang mga tubag mahimong maglakip niining gilista sa ubos.)
1. Sila adunay gahum sa pag-ayo sa espirituhanon ug pisikal nga sakit (bersikulo 1).
2. Sila gipadala didto sa nawala nga mga karnero sa Israel aron sa pagsangyaw nga ang gingharian sa langit haduol na (mga bersikulo 6–7).
3. Sila mogamit sa ilang gahum sa priesthood aron sa pagpanalangin ug pagayo sa mga tawo (bersikulo 8).
4. Sila mangita niadtong kinsa andam na sa pagpaminaw sa ebanghelyo (mga bersikulo 11–14).
5. Sila motudlo ingon nga gigiyahan sa Espiritu (mga bersikulo 19–20).
6. Sila mohatag gayud sa ilang tibuok kinabuhi diha sa buluhaton sa Manluluwas (bersikulo 39).
Sa unsang paagi nga ang mga gahum ug mga responsibilidad nga gihatag ngadto sa orihinal nga mga Apostoles matandi niadtong gihatag sa mga Apostoles sa ulahing mga adlaw? (Tan-awa sa D&P 107:23, 33, 35; 112:14, 19–22, 30–31.) Sa unsa nga paagi ninyo nakita nga ang mga Apostoles sa ulahing mga adlaw nagtuman niini nga mga responsibilidad?
Unsa nga mga panalangin ang gisaad niadtong kinsa mosunod sa mga Apostoles? (Tan-awa sa Mateo 10:40–42; tan-awa usab sa D&P 124:45–46.)

Si Elder Spencer W. Kimball miingon: “Walay usa dinhi niini nga Simbahan ang mahisalaag kinsa matinud-anon nga mosunod sa mga Kadagkoan sa Simbahan kinsa gibutang sa Ginoo diha sa iyang Simbahan. Kini nga Simbahan dili gayud mahisalaag; ang Kurom sa Napulog Duha dili gayud modala kaninyo palayo sa matarung nga dalan; wala gayud ug dili gayud kana mahitabo” (sa Conference Report, Abr. 1951, 104).

Panapos

Ipamatuod nga si Jesukristo mao ang tinuod nga Mesiyas ug nga ang Napulog Duha ka mga Apostoles iyang linain nga mga saksi. Ikaw mahimo nga mopakigbahin og usa ka kasinatian diin ang pagsunod sa tambag sa usa ka Apostol nakapanalangin sa imong kinabuhi.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Ang Napulog Duha ka mga Apostoles karon

Ipakita ang mga hulagway sa Napulog Duha ka mga Apostoles karon ug tabangi ang mga sakop sa klase nga makaila sa ilang mga pangalan. Ikaw mahimo nga mogamit sa mosunod nga pasulit:

Hatagi ang kada sakop sa klase og lapis ug usa ka piraso nga papel, ug hangyoa sila sa pagbutang og numero sa ilang mga papel gikan sa 1 hangtud sa 12. Ipakita ang hulagway sa kada Apostol sa walay pagtug-an sa ilang pangalan, ug hangyoa ang mga sakop sa klase sa pagsulat sa pangalan diha sa ilang mga papel sunod sa husto nga numero. Kon ikaw nakapakita na sa tanan nga mga hulagway, ribyuha ang husto nga mga tubag.

2. Ang orihinal nga Napulog Duha ka mga Apostoles

Tabangi ang mga sakop sa klase nga makaila sa mga pangalan sa orihinal nga Napulog Duha ka mga Apostoles (Mateo 10:2–4). Itudlo ang mosunod nga kasayuran sa imong kaugalingon nga mga pulong aron sa pagtabang sa mga sakop sa klase nga makasabut kon giunsa pagpaila ang nagkalainlain nga mga Apostoles diha sa mga kasulatan:

Duha ka mga Apostoles ang ginganlan og Santiago: Si Santiago nga anak ni Zebedee ug si Santiago nga anak ni Alfeo. Duha ang ginganlan og Simon: Si Simon Pedro ug Simon nga Kananeyo, nga gitawag usab og Simon nga Zelote (“ang zelote”). Duha ang ginganlan og Judas: Si Judas (nga gitawag usab og Libeyo Tadeo) ug si Judas Iscariote, kinsa mibudhi ni Kristo. Si Mateo gitawag og Levi diha sa Lucas 5:27–28. Si Tomas nga nailhan usab nga si Didymus, nga nagpasabut nga “kaluha.” Ang Apostol nga gihisgutan nga si Bartolome diha sa mga ebanghelyo ni Mateo, Marcos, ug Lucas gituohan nga mao ra nga tawo ang gitawag og Natanael diha sa ebanghelyo ni Juan.

3. “Siya nga mahigugma sa iyang amahan o inahan labaw pa kay kanako, dili takus kanako” (Mateo 10:37.)

Ipabasa sa mga sakop sa klase ang Mateo 10:35–38.

Sa unsa nga paagi nga ang mga bersikulo 35 ug 36 usahay matuman kon ang usa ka tawo mopasakop sa Simbahan? Nasayud nga ang Ginoo buot nga ang atong mga pamilya magmalinawon ug magkahiusa, sa inyong hunahuna ngano kaha nga siya mihimo niini nga mga pamahayag? Ngadto kang kinsa kaha kinahanglan ihatag ang atong una ug labing lig-on nga pag-unong? (Tan-awa sa mga bersikulo 37–38; tan-awa usab sa Lucas 14:33.)

4. Pagpasalida sa video

Ang unang bahin sa “New Testament Customs,” usa sa pinili gikan sa New Testament Video Presentations (53914), mahimong magamit niini nga leksyon. Kini nga bahin naglakip sa kasayuran kon unsa ang gipasabut ni Jesus nga mipadayag nga siya mismo ang dinihugan, o Mesiyas (Lucas 4:18); sa pagsimba diha sa sinagoga; ug unsa ang gipasabut sa pagsangyaw sa ebanghelyo nga walay dalang puyo ni puntil, sama sa gisugo ni Jesus nga buhaton sa iyang mga Apostoles (Mateo 10:9–10).