Sunday School: Doktrina sa Ebanghelyo
Leksyon 3: ‘Diha Kaninyo Natawo … ang Manluluwas’

Leksyon 3

“Diha Kaninyo Natawo … ang Manluluwas”

Lucas 2; Mateo 2

Katuyoan

Aron pag-awhag sa mga sakop sa klase sa paglipay diha sa pagkatawo ni Jesukristo ug pagsunod sa ehemplo nga iyang gipakita sa iyang pagkabatan-on, “[nagtubo] diha sa kaalam ug pamarug, ug sa kahimuot diha sa Dios ug tawo” (Lucas 2:52).

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Lucas 2:1–7. Si Jesukristo natawo.

    2. Lucas 2:8–39. Ang mga anghel ug uban pa nalipay sa pagkatawo ni Jesus.

    3. Mateo 2. Maalamon nga mga tawo gikan sa sidlakan miduaw ni Jesus ug mihatag kaniya og mga gasa. Si Herodes, mibati og kahadlok sa pagkatawo sa hari sa mga Judeo, mimando sa pagpatay sa tanan nga mga bata nga nagpanuigon og duha ka tuig paubos nga nagpuyo sa Bethlehem ug sa kasikbit nga mga dapit. Usa ka anghel sa Ginoo misugo ni Jose sa paglayas ngadto sa Ehipto uban ni Maria ug ni Jesus ug sa ulahiay mobalik sa Israel uban kanila.

    4. Lucas 2:40–52. Gigiyahan pinaagi sa Amahan, si Jesus mitubo ug mi-andam diha sa iyang pagkabatan-on alang sa iyang pagpangalagad.

  2. Dugang nga basahonon: Hubad ni Joseph Smith, Mateo 3:24–26; 1 Nephi 11:1–23; Helaman 14:1–8; 3 Nephi 1:4–21; 27:13–16; Doktrina ug mga Pakigsaad 93:11–20.

  3. Kon ang mosunod nga mga materyal anaa, gamita ang uban niini sa panahon sa leksyon:

    1. “Luke II,” unom ka minuto nga bahin gikan sa New Testament Video Presentations (53914).

    2. Ang mga hulagway nga Walay Lawak diha sa Balay-abutanan (62115 853); Ang Pagkatawo ni Jesus (62116 853; Pakete sa mga Hulagway sa Ebanghelyo 200); Ang Pagkatawo (62495 853; Pakete sa mga Hulagway sa Ebanghelyo 201); Ang Pagpahibalo sa Pagkatawo ni Kristo ngadto sa mga Magbalantay sa mga Karnero (62117 853; Pakete sa mga Hulagway sa Ebanghelyo 202); Ang Maalamon nga mga Tawo (62120 853; Pakete sa mga Hulagway sa Ebanghelyo 203); Ang Panaw ngadto sa Ehipto (62119 853; Pakete sa mga Hulagway sa Ebanghelyo 204); Ang Bata nga Jesus diha sa Templo (62500 853; Pakete sa mga Hulagway sa Ebanghelyo 205); Ang Pagkabata ni Jesukristo (62124 853; Pakete sa mga Hulagway sa Ebanghelyo 206); ug Si Jesus ug ang Iyang Inahan (Pakete sa mga Hulagway sa Ebanghelyo 242).

  4. Sugyot alang sa pagtudlo: Gamit og tukmang mga hulagway ug mga salida sa video aron sa pagdapit sa Espiritu, gamiti og nagkalainlaing mga paagi ang mga leksyon, ug tabangi ang mga sakop sa klase nga mahinumdom sa mga istorya diha sa kasulatan nga ilang gihisgutan (tan-awa sa Teaching, No Greater Call [36123], mga pahina 160, 176).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ilista ang mosunod nga mga tawo diha sa pisara: ang magbalantay sa karnero, Simon, usa ka maalamon nga tawo gikan sa sidlakan, Herodes, usa ka tawo diha sa balay-abutanan, Ana, usa ka anghel, Maria.

Basaha ang mosunod nga mga gipangbuhat kalabut sa pagkatawo ni Jesukristo. Hangyoa ang mga sakop sa klase sa pagparis sa matag gibuhat uban sa tukma nga tawo:

Pang-atensyon nga Kalihokan

  1. Ako mipanaw og layo aron siya makita, mihatag kaniya og mga gasa, ug misimba kaniya. (Usa ka maalamon nga tawo gikan sa sidlakan; Mateo 2:1–2, 9–11.)

  2. Ako wala mohatag og lawak alang kaniya. (Usa ka tawo diha sa balay-abutanan, Lucas 2:7.)

  3. Kay nakadawat na man og pagpamatuod gikan sa Espiritu Santo, ako migakos sa bata ug nahibalo nga ako mamatay sa kalinaw. (Simon; Lucas 2:25–32.)

  4. Ako miingon, “Himaya sa Dios diha sa kalangitan, ug sa yuta kalinaw, panagdait ngadto sa mga tawo.” (Usa ka anghel; Lucas 2:13–14.)

  5. Ako miadto pagdali aron pagtan-aw kaniya. (Usa ka magbalantay sa karnero; Lucas 2:15–16.)

  6. Ako nasuko ug misulay sa pagpatay kaniya. (Herodes; Mateo 2:3–4, 16.)

  7. Human siya nakita didto sa sulod sa templo, ako mipadayag sa pagpasalamat ug misangyaw sa balita sa iyang pagkatawo. (Ana; Lucas 2:36–38.)

  8. Ako namalandong sa panghitabo sulod sa akong kasingkasing. (Maria; Lucas 2:19.)

Hangyoa ang mga sakop sa klase sa pagpamalandong sa mosunod nga mga pangutana panahon sa leksyon:

Pang-atensyon nga Kalihokan

  • Unsay inyong gibuhat kalabut sa kasayuran sa pagkatawo sa Manluluwas? Unsay inyong gibuhat kalabut sa kinabuhi, kamatayon, pag-ula, ug pagkabanhaw?

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, tabangi ang mga sakop sa klase nga makasabut ngano nga kita kinahanglan man nga malipay diha sa pagkatawo sa Manluluwas. Hisguti ang mga paagi sa pagsunod sa mga ehemplo nga iyang gipakita diha sa iyang pagkabatan-on.

1. Si Jesukristo natawo.

Basaha ug hisguti ang Lucas 2:1–7. Ipakita ang uban nga mga hulagway nga gilista diha sa seksyon sa “Pagpangandam.”

  • Si Jesus adunay himaya uban sa Langitnong Amahan “sa wala pa ang kalibutan” (Juan 17:5). Siya milalang sa kalangitan ug sa yuta (Mosiah 3:8). Isip mao si Jehova, siya mipadayag sa mga sugo ug sa mga kamatuoran sa ebanghelyo ngadto sa mga propeta diha sa Daang-Tugon (3 Nephi 15:2–5). Ngano nga si Jesus mianhi man sa kalibutan? (Tan-awa sa 3 Nephi 27:13–16.)

  • Unsa ang mga kahimtang sa pagkatawo ni Jesus? (Tan-awa sa Lucas 2:7.) Sa unsa nga paagi nga kini nga mga kahimtang naghisgot sa iyang mortal nga pagpangalagad ug sa iyang matubsanon nga sakripisyo. Sa unsa nga mga paagi nga ang mga tawo midumili sa paghatag og lawak alang sa Manluluwas diha sa ilang mga kinabuhi? Unsa ang atong buhaton aron makahatag og lawak alang kaniya diha sa atong mga kinabuhi?

2. Mga anghel ug uban pa nalipay sa pagkatawo ni Jesus.

Hisguti ang Lucas 2:8–39. Pagdapit og mga sakop sa klase sa pagbasa og kusog sa pinili nga mga bersikulo. Ipakita ang uban nga mga hulagway nga gilista diha sa seksyon sa “Pagpangandam.”

Kon ikaw naggamit sa video nga “Luke II,” ipasalida kini karon.

  • Unsa ang gisulti sa mga anghel samtang sila mipahibalo sa pagkatawo ni Jesus? (Tan-awa sa Lucas 2:13–14.) Giunsa ni Jesus paghimaya ang Amahan? Giunsa niya pagdala og kalinaw ug panagdait sa tanang katawhan ug diha kaninyo? Sa unsa nga paagi nga kita makapakita sa atong pagpasalamat ngadto sa Dios alang sa gasa sa iyang Anak?

  • Unsa ang gibuhat sa mga magbalantay sa mga karnero human sila nakakita sa bag-ong natawo nga Manluluwas? (Tan-awa sa Lucas 2:17–18.) Unsa ang atong mabuhat aron makasunod sa ilang ehemplo? Pagdapit og mga sakop sa klase sa paghunahuma og usa ka tawo nga ilang mapaambitan sa ilang pagpamatuod bahin sa Manluluwas.

  • Unsa ang gibuhat ni Maria human matawo si Jesus ug sa pagduaw sa mga magbalantay sa mga karnero? (Tan-awa sa Lucas 2:19.) Unsa ang napadayag niini mahitungod ni Maria? Ngano nga mahinungdanon ang paghatag og panahon alang sa paghambin ug pagpamalandong sa mga kasinatian nga sagrado?

  • Sa unsa nga paagi nga si Simon ug si Ana nahimong andam nga makakita sa bata nga si Jesus? (Tan-awa sa Lucas 2:25–26, 37.) Unsay ilang gibuhat sa dihang sila nakakita kaniya? (Tan-awa sa Lucas 2:27–35, 38.) Unsa ang atong makat-unan mahitungod sa Manluluwas gikan sa ilang mga panagna?

3. Ang maalamon nga mga tawo miabut aron pagsimba sa bata nga si Jesus. Si Herodes naninguha sa pagpatay kaniya.

Basaha ug hisguti ang pinili nga mga bersikulo gikan sa Mateo 2. Ipakita ang uban nga mga hulagway nga gilista diha sa seksyon sa “Pagpangandam.”

  • Ngano nga ang mga “mago gikan sa sidlakan” nangita man ni Jesus? (Tan-awa sa Mateo 2:1–2.) Unsa ang ilang gibuhat sa diha nga siya ilang nakit-an? (Tan-awa sa Mateo 2:11. Hinumdumi nga sa diha nga sa katapusan sila miabut ngadto ni Jesus, siya “usa na ka bata,” dili usa ka bag-ong natawo nga masuso.) Unsa nga mga gasa ang atong mahalad ngadto sa Ginoo?

  • Nganong buot man ni Herodes nga makita si Jesus? (Tan-awa sa Mateo 2:3–6, 13. Siya nahadlok, ug siya buot nga mopatay ni Jesus.) Ngano nga ang pagkatawo ni Jesukristo nakapahadlok man sa hari? (Tan-awa sa Mateo 2:2, 6. Sumala sa panagna, si Jesus mao ang mohari sa Israel.)

  • Sa unsa nga paagi nga si Jesus napanalipdan gikan ni Herodes? (Tan-awa sa Mateo 2:13–15.) Giunsa pagkahibalo ni Jose kanus-a mobalik gikan sa Ehipto? (Tan-awa sa Mateo 2:19–23.) Ngano sa inyong hunahuna nga si Jose nakadawat niini nga paggiya gikan sa Dios? Unsa ang buhaton sa mga amahan ug mga inahan karon aron makadawat sa pagpadayag kalabut sa ilang mga pamilya? Giunsa sa Dios pagtabang kaninyo samtang kamo nangayo sa iyang giya alang sa inyong pamilya?

4. Gigiyahan pinaagi sa Amahan, si Jesus miandam sa iyang pagkabatan-on alang sa iyang pagpangalagad.

Basaha ug hisguti ang Lucas 2:40–52. Ipakita ang uban nga mga hulagway diha sa seksyon sa “Pagpangandam”. Ipasabut nga matag tuig si Jose ug si Maria ug ubang matinud-anon nga mga Judeo nagsaulog sa Kasaulogan sa Pagpalabay didto sa Jerusalem. Sa naandan, si Jesus mikuyog kanila sa dihang siya nag-edad na og 12 (Lucas 2:41–42).

  • Human magsaulog sa Pagpalabay didto sa Jerusalem, si Maria ug si Jose nagsugod sa ilang pagpanaw balik ngadto sa Nazaret sa dihang sila nakabantay nga ang 12 anyos nga Jesus wala didto uban kanila (Lucas 2:43–45). Diin nila sa katapusan siya nakaplagi? (Tan-awa sa Lucas 2:46.) Kon ang inyong mga ginikanan o ubang mga minahal wala mahibalo kon hain kamo, makasalig ba sila nga kamo nagbuhat sa mga butang nga makapahimuot sa inyong Langitnong Amahan?

  • Ang Hubad ni Joseph Smith sa Lucas 2:46 miingon nga ang mga tawo didto sa templo “naminaw ni [Jesus], ug nagpangutana kaniya og mga pangutana.” Unsa ang gipadayag niini mahitungod sa pagkabatan-on ug sa pagbansay ni Jesus?

  • Sa dihang nakaplagan ni Maria ug ni Jose si Jesus, si Maria miingon ngadto kaniya, “Ang imong amahan ug ako sa among kabalaka nangita kanimo” (Lucas 2:48). Kinsay iyang gipasabut sa dihang siya miingon “ang imong amahan”? (Jose.) Giunsa ni Jesus pagtubag ang mga kabalaka ni Maria? (Tan-awa sa Lucas 2:49.) Kinsay gipasabut ni Jesus sa dihang siya miingon “sa buluhaton sa akong Amahan”? (Langitnong Amahan.) Unsa ang gipakita niini ngari kanato mahitungod sa batan-on nga Jesus bahin sa iyang pagsabut sa iyang gimando nang daan nga misyon?

  • Ingon nga batan-on, giunsa ni Jesus pagtagad si Maria ug si Jose? (Tan-awa sa Lucas 2:51. Bisan tuod siya mao ang Anak sa Dios, siya ubos pa sa pagmando sa iyang inahan ug ngadto ni Jose.) Unsa ang atong makat-unan gikan niini nga panig-ingnan?

  • Ingon nga batan-on, si Jesus “mitubo sa kaalam ug sa gidak-on ug sa kahimuot diha sa Dios ug sa tawo” (Lucas 2:52). Sa lain nga pagkasulti, siya milambo sa pangsalabutan, sa panglawasnon, sa pagkaespirituhanon, ug sa pagkakatilingbanon. Unsa ang ubang piho nga mga butang nga atong mabuhat aron motubo sa pangsalabutan, sa panglawasnon, sa pagkaespirituhanon ug sa pagkakatilingbanon?

  • Unsa ang atong makat-unan gikan sa Doktrina ug mga Pakigsaad 93:11–17 mahitungod sa kalamboan sa Manluluwas ingon nga batan-on? (Sa iyang pagpangandam nga mahimong atong Manunubos, si Jesus wala makadawat diha-diha sa tanan nga gikinahanglan nga mga salabutan, gahum, kaalam, ug himaya. Siya nakadawat niini nga mga butang “grasya ug dugang pa nga grasya,” gamay sa matag panahon.) Sa unsa nga paagi nga kini nga kamatuoran atong magamit? (Tan-awa sa D&P 93:18–20.)

Panapos

Pagpamatuod sa mga kamatuoran nga imong gihisgutan niini nga leksyon. Awhaga ang mga sakop sa klase nga maglipay diha sa pagkatawo sa Manluluwas ug sa pagsunod sa ehemplo nga iyang gipakita diha sa iyang pagkabatan-on.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. “Apan kining tanan nga mga butanga gitipigan ni Maria nga namalandong niini diha sa iyang kasingkasing.” (Lucas 2:19)

Samtang naghisgut ka sa matahurong buhat nga gihimo ni Maria kalabut sa pagkatawo ni Jesus, pagdapit og usa ka inahan sa pagsulti mahitungod sa iyang gibati human nga usa sa iyang mga anak gipakatawo.

2. Pangbatan-on nga kalihokan

Pagpili og lima ka mahinungdanong mga tudling sa kasulatan gikan sa leksyon, ug ipasinati sa mga sakop sa klase ang mga sulod sa matag tudling. Unya ipasira sa mga sakop sa klase ang ilang mga Biblia. Paghatag og mga timailhan nga motultol sa mga sakop sa klase ngadto sa mga tudling sa kasulatan nga imong giribyu, nga magsulti sa matag timailhan aron walay pagduda kon unsa nga tudling ang imong gipasabut. (Sama pananglit, ikaw moingon, “Kini nga bersikulo naglakip sa mga pulong sa anghel sa pagdayeg sa Dios sa diha nga si Jesus natawo. “Ang mahimong tubag mao lamang ang Lucas 2:14.) Human nimo mabasa ang usa ka timailhan, ipaabli sa mga sakop sa klase ang ilang mga Biblia ug ipapangita ang husto nga linya. Gamita kini nga kalihokan isip paagi aron mahimong mas masinati sa mga tudling sa kasulatan kay sa pag-indigay. Ayaw paggugol og sobra sa pipila ka mga minuto sa pagpahigayon niana.