Sunday School: Doktrina sa Ebanghelyo
Leksyon 2: ‘Ang Akong Kalag Nagdayeg sa Ginoo’

Leksyon 2

“Ang Akong Kalag Nagdayeg sa Ginoo”

Lucas 1; Mateo 1

Katuyoan

Aron pagtabang sa mga sakop sa klase nga mas mapalambo ang hugot nga pagtuo diha kang Jesukristo pinaagi sa pagtuon sa mga kinabuhi ni Elisabet, Zacarias, Juan Bautista, Maria ug Jose.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Lucas 1:5–25, 57–80. Ang anghel nga si Gabriel nagpakita ngadto ni Zacarias, ug miingon nga, agi og tubag sa pag-ampo, ang asawa ni Zacarias, nga si Elisabet, manganak og usa ka batang lalaki. Kini nga bata, hinganlan og Juan, ang moandam sa mga katawhan alang sa Ginoo. Si Zacarias wala motuo sa mga pulong ni Gabriel ug siya naamang. Si Elisabet nagsabak diha sa iyang katigulangon, ug si Juan natawo. Si Zacarias mipakita sa nabag-ong hugot nga pagtuo sa diha nga siya nanagna sa misyon ni Juan.

    2. Lucas 1:26–56; Mateo 1:18–25. Ang anghel nga si Gabriel misulti ni Maria nga siya mahimong inahan sa Anak sa Dios. Si Maria ug ang iyang ig-agaw nga si Elisabet nalipay sa mga balita sa pag-anhi sa Manluluwas. Si Jose nakahibalo nga si Maria manganak sa Manluluwas.

  2. Kon ang mosunod nga mga hulagway anaa, gamita kini sa panahon sa leksyon: Si Juan Nagsangyaw diha sa Kamingawan (62132 853; Pakete sa mga Hulagway sa Ebanghelyo 207) ug Ang Pagpahibalo: Ang Anghel nga si Gabriel Mipakita ngadto ni Maria (Pakete sa mga Hulagway sa Ebanghelyo 241).

  3. Sugyot alang sa pagtudlo: Kon ang usa ka tawo magtudlo pinaagi sa Espiritu Santo, “ang gahum sa Espiritu Santo modala niini ngadto sa mga kasingkasing sa mga katawhan” (2 Nephi 33:1). Ang pagbati sa impluwensya sa Espiritu makapalig-on sa mga pagpamatuod sa mga sakop sa klase, sa ilang gugma alang sa Ginoo ug alang sa usag usa, ug sa ilang panaad sa matarung nga pagpuyo. Sa mainampoon nga paagi hunahunaa unsa ang imong mahimo aron sa pagdapit sa Espiritu sa panahon sa matag leksyon. (Tan-awa sa mga pahina v–vi niini nga manwal ug sa Teaching, No Greater Call [36123], mga pahina 45–46.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pangutan-a ang mga sakop sa klase sa mosunod nga mga pangutana:

Pang-atensyon nga Kalihokan

  • Kon kamo makaila-ila kang bisan kinsa diha sa Bag-ong Tugon gawas ni Jesus, kinsa ang inyong gustong maila-ila? Nganong gusto man mong makig-ila-ila nianang tawhana?

Human ang pipila ka mga sakop sa klase makatubag sa mga pangutana, ipasabut nga kita sa kasagaran madani ngadto sa matarung nga mga tawo tungod kay sila misunod sa Manluluwas ug mipamatuod mahitungod kaniya. Sa atong pagkasinati niining mga tawhana, kita usab mahimong mas masinati kang Jesukristo. Kini nga leksyon mohisgut sa pipila ka mga tawo kansang matarung nga mga ehemplo makatabang kanato nga mas mahiduol ngadto kaniya.

Paghisgut ug Paggamit sa Kasulatan

Samtang ikaw nagtudlo sa mosunod nga mga tudling sa kasulatan, hisguti kon sa unsa nga paagi kini magamit sa inadlaw-adlaw nga kinabuhi. Awhaga ang mga sakop sa klase sa pagpakigbahin sa mga kasinatian nga may kalabutan ngadto sa mga baruganan sa kasulatan. Tungod kay malisud ang pagpangutana sa matag pangutana o hisgutan ang matag punto sa leksyon, sa mainampoong paagi pilia kadtong makatagbaw gayud sa mga panginahanglan sa mga sakop sa klase.

1. Si Juan Bautista natawo ngadto ni Elisabet ug Zacarias.

Hisguti ang Lucas 1:5–25, 57–80. Dapita ang mga sakop sa klase sa pagbasa og kusog sa pinili nga mga bersikulo.

  • Giunsa paghulagway sila si Elisabet ug Zacarias diha sa mga kasulatan? (Tan-awa sa Lucas 1:6–9.)

  • Unsa nga panalangin ang gi-ampo ni Elisabet ug ni Zacarias? (Tan-awa sa Lucas 1:7, 13.) Sa unsang paagi kini nga pag-ampo natubag sa katapusan? (Tan-awa sa Lucas 1:11–13, 24–25. Itudlo nga si Zacarias ug si Elisabet malagmit nag-ampo sulod sa daghang mga katuigan nga unta sila mapanalanginan og usa ka anak. Bisan pa niana, ang Langitnong Amahan wala mohatag kanila niini nga panalangin hangtud sa panahon nga tukma aron mahimo ang iyang mga katuyoan.) Sa unsang paagi nga kita magpabilin nga matinud-anon ug malikay nga dili mawad-an og kadasig kon ang atong tinud-anay nga mga pag-ampo wala dayon tubaga sa paagi nga atong gitinguha?

  • Unsa ang gipanagna ni Gabriel kalabut sa misyon ni Juan? (Tan-awa sa Lucas 1:14–17. Ipakita ang hulagway ni Juan nga nagsangyaw diha sa kamingawan, ug isulat ang mga panagna ni Gabriel diha sa pisara. Hisguti kon unsa ang gipasabut sa mga panagna, sa unsa nga paagi si Juan nakatuman niini, ug sa unsa nga paagi kita makasunod sa ehemplo ni Juan niana nga mga butang.)

    1. Si Juan “mopabalik [sa daghang mga katawhan] ngadto sa Ginoo nga ilang Dios” (Lucas 1:16).

    2. Siya “mopabalik sa mga kasingkasing sa mga amahan ngadto sa mga anak” (Lucas 1:17).

    3. Siya “mipabalik … sa dili masulundon ngadto sa mga kaalam sa mga makiangayon” (Lucas 1:17).

    4. Siya “mopaandam sa mga katawhan alang sa Ginoo” (Lucas 1:17).

    Hinumdumi: Si Juan Bautista mao “ang labing dungganan nga tighupot sa Aaronic Priesthood sa tibuok kasaysayan” (Bible Dictionary, “John the Baptist,” 714). Mahimo nimong hisgutan kon sa unsa nga paagi nga ang nag-unang mga bahin sa misyon ni Juan mahimong magamit sa mga sakop sa klase kinsa naghupot sa Aaronic Priesthood.

  • Unsa ang nahitabo ni Zacarias sa diha nga siya nagduha-duha sa mga pulong sa anghel? (Tan-awa sa Lucas 1:18–20.) Sa unsa nga paagi nga ang mga lihok ni Zacarias human sa pagkatawo ni Juan nakapakita sa iyang nabag-o nga hugot nga pagtuo? (Tan-awa sa Lucas 1:59–63. Siya ug si Elisabet mihingalan sa ilang anak nga lalaki og Juan, sa ingon nagsunod sa sugo sa Dios kay sa pagsunod sa lokal nga mga tradisyon.)

  • Ingon nga si Zacarias nanagna mahitungod sa misyon sa iyang anak nga lalaki, siya usab misulti mahitungod sa katubsanan, kaluwasan, kapasayloan sa mga sala, malumo nga kalooy, ug kahayag (Lucas 1:68–79). Kinsay iyang gipasabut sa dihang siya misulti niini nga mga butang? (Si Jesukristo.) Pagdapit og usa ka sakop sa klase sa pagbasa sa Juan 1:6–9. Ipamatuod nga sama ni Juan Bautista, kita kinahanglan mopunting sa atong pag-alagad sa pagtabang sa uban nga moduol ngadto kang Kristo.

  • Human sa pagkatawo ni Juan, siya mitubo ug “nalig-on sa espiritu” (Lucas 1:80). Ngano sa inyong hunahuna nga si Juan kinahanglan man nga malig-on sa espiritu aron makatuman sa iyang misyon? Unsa ang atong mabuhat aron malig-on sa espiritu?

2. Si Maria ug si Jose nakahibalo nga si Maria mahimong inahan sa Anak sa Dios.

Basaha ug hisguti ang pinili nga mga bersikulo gikan sa Lucas 1:26–56 ug Mateo 1:18–25. Ipakita ang hulagway sa Ang Pagpahibalo.

  • Unsa ang nahibaloan ni Maria gikan sa anghel nga si Gabriel? (Tan-awa sa Lucas 1:26–33.) Ngano nga ang Manluluwas kinahanglan man nga mahimong anak sa usa ka mortal nga inahan ug usa ka imortal nga Amahan?

    Naghisgut mahitungod ni Jesukristo, si Elder Bruce R. McConkie nagtudlo:

    “Ang Dios mao ang iyang Amahan, nga sa Imortal nga Personahe … iyang napanunod ang gahum sa pagka-imortal, nga mao ang gahum sa pagpakabuhi hangtud sa kahangturan; o, kay mipili nga magpakamatay, kini mao ang gahum sa pagbangon pag-usab ngadto sa pagka-imortal, pagkahuman niana mabuhi sa kahangturan nga dili na mamatay.…

    “ … Si Maria mao ang iyang inahan, nga gikan sa mortal nga babaye … siya nakapanunod sa gahum sa pagkamortal, nga mao ang gahum sa pagpakamatay …

    “Tungod niini … ang pagkasagol sa balaan ug sa mortal diha sa usa ka tawo, nga ang atong Ginoo nakahimo sa pagkab-ot sa walay katapusan nga pag-ula. Tungod kay ang Dios mao ang iyang Amahan ug si Maria mao ang iyang inahan, siya adunay gahum nga mabuhi o gahum nga mamatay, ingon sa iyang pagpili, ug may gahum sa paghalad niini, ug may gahum sa pagbawi niini, ug unya, sa ingon nga paagi nga dili nato masabtan, sa pagpatagamtam sa mga epekto sa pagkabanhaw ngadto sa tanan nga mga katawhan aron ang tanan mahimong mobangon gikan sa mga patay” (The Promised Messiah [1978], 470–71).

  • Unsa ang atong makat-unan mahitungod ni Maria diha sa iyang pagpakigsultihanay sa anghel ug ni Elisabet? (Tan-awa sa Lucas 1:26–38, 45–49, tan-awa usab sa Alma 7:10. Isulat ang mga tubag sa mga sakop sa klase diha sa pisara. Kon ikaw nagtudlo sa mga batan-on, mahimo kang mosugyot nga sila mohunahuna ni Maria isip ehemplo sa usa ka matarung nga batan-ong babaye.)

    1. Si Maria nakaangkon og kahimuot sa Dios (Lucas 1:28, 30). Unsa ang gipasabut sa makaangkon og kahimuot sa Dios? Unsa nga laing mga tinubdan nga ang ubang mga tawo nangita og pabor? Sa unsang paagi nga ang pagpangayo og pabor gikan niini nga laing mga tinubdan makapahimo nga malisud sa pagpangayo og pabor ngadto sa Dios?

    2. Si Maria takus aron ang Ginoo makig-uban kaniya (Lucas 1:28). Unsa ang atong mabuhat aron mahimo nga takus niini nga panalangin?

    3. Si Maria mapainubsanon ug masugtanon ngadto sa kabubut-on sa Ginoo (Lucas 1:38, 48). Ngano nga kini mahinungdanon man alang kanato nga motuman sa kabubut-on sa Ginoo? Sa unsa nga paagi nga kita mahimong mas mapainubsanon ug masugtanon?

    4. Si Maria nalipay diha sa iyang Manluluwas (Lucas 1:47). Sa unsa nga paagi nga kita malipay diha sa Manluluwas?

  • Ngano nga si Elisabet ug ang iyang wala pa matawo nga anak nga lalaki nalipay sa dihang si Maria miabut aron pagduaw kanila? (Tan-awa sa Lucas 1:39–44; tan-awa usab sa Lucas 1:15. Itudlo nga usa sa labing mahinungdanon nga buhat sa Espiritu Santo mao ang pagpamatuod kang Jesukristo.) Kon angay, isulti kon sa unsa nga paagi nga ang Espiritu Santo nakatabang kanimo nga makabaton og pagpamatuod kang Jesukristo, ug dapita ang uban sa paghimo sa ingon.

  • Sa unsa nga paagi nga ang gugma ni Jose alang ni Maria gisulayan? (Tan-awa sa Mateo 1:18). Unsa ang gihimo ni Jose sa diha nga siya nakahibalo nga si Maria nagsabak? (Tan-awa sa Mateo 1:19. Itudlo nga sumala sa balaod, si Jose mahimong mokiha ni Maria sa paglapas sa pakigsaad sa kaminyoon ug modala kaniya ngadto sa paghusay sa publiko. Ang maong paghusay modangat sa silot sa kamatayon. Kay sa buhaton kini, siya mihukom sa pagpalingkawas kaniya sa hilum gikan sa kontrata sa kaminyoon.)

  • Giunsa sa Langitnong Amahan pagtabang ni Jose sa pagdawat sa kahimtang ni Maria ug pag-andam alang sa iyang kaugalingong mga responsibilidad? (Tan-awa sa Mateo 1:20–23.) Unsa ang gibuhat ni Jose agi og tubag niini nga damgo? (Tan-awa sa Mateo 1:24–25.) Unsa ang gipahayag niini nga tubag mahitungod sa iyang kinaiya?

Panapos

Pagdapit og usa ka sakop sa klase sa pagbasa sa Lucas 1:46. Ipasabut nga niini nga bersikulo, ang pulong pagpalambo nagpasabut sa mga paningkamot ni Maria sa pagdayeg sa Ginoo ug motabang sa uban nga makakita sa iyang pagkahalangdon.

Panapos

  • Sa unsa nga paagi nga ang mga ehemplo nila ni Elisabet, Zacarias, Juan Bautista, Maria, ug Jose nakatabang kaninyo nga makakita sa pagkahalangdon sa Manluluwas ug nakapalambo sa inyong hugot nga pagtuo diha kaniya? Sa unsa nga paagi kita makatabang sa uban sa pagpalambo sa ilang hugot nga pagtuo diha ni Jesukristo?

Ipadayag ang imong pagpasalamat alang sa matarung nga mga ehemplo nila ni Elisabet, Zacarias, Juan Bautista, Maria, ug Jose. Ipamatuod ang mga kamatuoran nga imong gihisgutan.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

1. “Aron sa dako nga gahum imong maila ang pagkatinuod sa kadto nga mga butang” (Lucas 1:4).

  • Si Lucas namulong sa iyang pagpamatuod ngadto sa usa ka tawo nga ginganlan og Teofilo (Lucas 1:3). Unsa ang katuyoan ni Lucas sa pagsulat sa iyang pagpamatuod? (Tan-awa sa Lucas 1:3–4. Aron pagtabang ni Teofilo nga mahibalo sa pagkatinuod sa mga butang nga gitudlo na.) Sa unsa nga paagi kamo nalig-on sa dihang nakadungog kamo sa uban nga nipamatuod kabahin sa pamilyar nga mga doktrina ug nasayran na kaayo nga mga istorya sa kasulatan?