“Kini Mao ang Kinabuhing Dayon”

Katuyoan

Aron pag-awhag sa mga sakop sa klase nga mahimong madawaton sa impluwensya sa Espiritu Santo ug mas mahiduol sa Langitnong Amahan ug ni Jesukristo.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Juan 16:1–15. Si Jesus miandam sa iyang mga Apostoles alang sa malisud nga mga panahon nga mosunod human sa paglansang kaniya sa krus. Siya nagtudlo kanila mahitungod sa misyon sa Espiritu Santo ug misaad nga sila makadawat sa gasa sa Espiritu Santo.
2. Juan 16:16–33. Si Jesus nanagna sa iyang kamatayon ug pagkabanhaw ug mitambag sa mga Apostoles nga “magmaya.”
3. Juan 17. Si Jesus mihalad sa mahinungdanon nga mapangaliyupoong pagampo alang sa iyang mga Apostoles ug sa tanan kinsa mituo kaniya.
Dugang nga basahonon: Juan 14:16–31; 15:18–27; 3 Nephi 19:19–36; Doktrina ug mga Pakigsaad 132:21–24; Ang Giya ngadto sa mga Kasulatan, “Maghuhupay,” ug “Espiritu Santo.”
Kon ikaw mogamit sa pang-atensyon nga kalihokan, pagdala diha sa klase og duha ka mga kahon sa mga regalo (o pagdrowing diha sa pisara og duha ka mga kahon sa regalo). Pag-andam og duha ka ginunting nga mga pulong nga ibutang diha sa mga kahon sa panahon sa leksyon: ang usa nga mag-ingon nga Gasa sa Espiritu Santo ug ang usa nga mag-ingon nga Kinabuhing Dayon.
Sugyot alang sa pagtudlo: Agi og dugang sa pag-ampo nga ikaw magtudlo uban sa Espiritu, pag-ampo nga ang mga sakop sa klase makakat-on pinaagi sa Espiritu ug makadawat sa iyang panghimatuod sa mga kamatuoran nga gitudlo.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipakita ang duha ka mga kahon sa mga regalo (o pagdrowing diha sa pisara og hulagway sa duha ka mga kahon sa mga regalo. Dapita ang mga sakop sa klase sa pagsulti og mubo bahin sa mga regalo nga ilang gusto nga madawat.

Ipasabut nga usa sa mga kahon sa regalo nga imong gipakita nagpasabut sa usa sa labing dako nga mga gasa nga atong madawat niini nga kinabuhi. Ang lain nga kahon nagpasabut unsa ang gitawag sa Ginoo nga “ang labing mahinungdanon sa tanan nga mga gasa sa Dios” (D&P 14:7).

Ipasabut nga niini nga leksyon ang mga sakop sa klase makahibalo unsa kining duha ka mga gasa ug makakat-on unsaon sa pagkadawat niini.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi nga ang mga pulong sa Manluluwas ngadto sa iyang mga Apostoles magamit alang kanatong tanan. Awhaga ang mga sakop sa klase sa pagpaambit og mga kasinatian nga may kalabutan sa leksyon.

1. Si Jesus misaad sa iyang mga Apostoles nga sila makadawat sa gasa sa Espiritu Santo.

Tukia ang Juan 16:1–15. Dapita ang mga sakop sa klase sa pagbasa og kusog sa pinili nga mga bersikulo.

Sa katapusang mga takna sa iyang mortal nga pangalagad, si Jesus mitudlo ug milig-on sa iyang mga Apostoles. Ngano nga ang mga Apostoles kinahanglan man nga lig-unon niining panahona? (Tan-awa sa Juan 16:1–6; tan-awa usab sa Juan 15:18–20.)
Ang Manluluwas miingon sa mga Apostoles nga siya mopadala sa Maghuhupay (ang Espiritu Santo) ngadto kanila (Juan 16:7). Unsa ang misyon sa Espiritu Santo? (Tan-awa sa Juan 14:26; 15:26; 16:7–14. Ilista ang mga tubag diha sa pisara sumala sa gipakita sa ubos.)

Ang Espiritu Santo:
1. Mohupay (Juan 14:26).
2. Motudlo (Juan 14:26).
3. Modala sa mga kamatuoran ngadto sa atong mga panumduman (Juan 14:26).
4. Mopamatuod sa Manluluwas (Juan 15:26).
5. Mogiya kanato ngadto sa tanan nga kamatuoran (Juan 16:13).
6. Mopakita kanato sa mga butang nga moabut (Juan 16:13).
7. Mohimaya sa Manluluwas (Juan 16:14).
Ang Napulog Duha ka mga Apostoles nakasinati sa mga pagpakita sa impluwensya sa Espiritu Santo sa panahon sa mortal nga pangalagad ni Jesus, apan sila wala makadawat sa gasa sa Espiritu Santo hangtud pagkahuman sa iyang kamatayon ug pagkabanhaw (Juan 20:22). Unsa ang kalainan tali sa pagpadayag sa Espiritu Santo ug sa gasa sa Espiritu Santo? (Tan-awa ang kinutlo sa ubos.) Sa unsa nga paagi nga ang pagdawat sa gasa sa Espiritu Santo nakatabang kaninyo?

Si Elder Dallin H. Oaks mitudlo:

“Ang mga pagpadayag sa Espiritu Santo gihatag aron pagtultol sa matinudanon nga mga tigpangita sa mga kamatuoran sa ebanghelyo nga mag-awhag kanila ngadto sa paghinulsol ug pagbunyag. Ang gasa sa Espiritu Santo mas malukpanon…. [Kini] maglakip sa katungod sa kanunay nga pagpakig-uban, nga kita ‘kanunay nga makabaton sa Espiritu nga mag-uban [kanato]’ (D&P 20:77).

“Ang usa ka bag-o nga gibunyagan nga sakop misulti kanako unsa ang iyang gibati sa dihang siya nakadawat niana nga gasa. Kini siya usa ka matinudanon nga babayeng Kristiyano nga migugol sa iyang kinabuhi sa pag-alagad sa uban. Siya nakaila ug nahigugma sa Ginoo, ug iyang gibati ang pagpadayag sa Iyang Espiritu. Sa diha nga iyang nadawat ang dugang kahayag sa gipahiuli nga ebanghelyo, siya gibunyagan ug ang mga elder mibutang sa ilang mga kamot diha sa ibabaw sa iyang ulo ug mihatag kaniya sa gasa sa Espiritu Santo. Siya nahinumdom nga, ‘Ako mibati sa impluwensya sa Espiritu Santo nga misulod kanako uban sa tumang kainit kay sa akong gibati sukad masukad. Siya sama sa usa ka daan na nga higala kinsa migiya kanako kaniadto apan karon miabut aron magpabilin’ ” (sa Conference Report, Okt. 1996, 80; o Ensign, Nob. 1996, 60).

Kon ikaw naggamit sa pang-atensyon nga kalihokan, ibutang diha sa usa ka kahon sa mga regalo ang ginunting nga pulong nga nag-ingon nga Gasa sa Espiritu Santo.

Human kita makadawat sa gasa sa Espiritu Santo, sa unsa nga paagi nga kita mahimong takus sa kanunay nga pagpakig-uban sa Espiritu Santo? (Tan-awa sa Mga Buhat 5:32; D&P 6:14; 20:77, 79; 76:116; 121:45–46.) Sa unsa nga paagi nga kita makaila sa impluwensya sa Espiritu Santo? (Tan-awa sa Mga Taga-Galacia 5:22–23; D&P 6:15, 23; 11:13.)

Si Presidente Boyd K. Packer nagtudlo: “Ang Espiritu Santo mosulti ginamit ang usa ka tingog nga mas bation nimo kay sa imong madungog. Kini gihulagway ingon nga usa ka gamay nga ligdong nga tingog. Ug samtang kita naghisgut og ‘pagpaminaw’ ngadto sa mga hunghong sa Espiritu, sa kasagaran ang usa ka tawo mohulagway sa usa ka espirituhanon nga pag-aghat pinaagi sa pag-ingon, ‘Gibati nako nga … ’ … Ang pagpadayag moabut ingon sa mga pulong nga atong mabati kay sa madungog” (sa Conference Report, Okt. 1994, 77; o Ensign, Nob. 1994, 60.)

Diha sa usa ka damgo ni Presidente Brigham Young, si Propeta Joseph Smith mipahimangno kaniya sa pagtudlo sa mga Santos nga “ang Espiritu sa Ginoo…mohunghong sa kalinaw ug hingpit nga kalipay diha sa ilang mga kalag, kini mokuha sa malisya, kalagut, kagubot ug tanan nga dautan gikan sa ilang mga kasingkasing; ug ang ilang tibuok nga tinguha mao ang paghimo og maayo, magdala sa pagkamatarung ug magtukod sa gingharian sa Dios” (Manuscript History of Brigham Young, 1846–1847, comp. Elden J. Watson [1971], 529).

2. Si Jesus nanagna sa iyang kamatayon ug pagkabanhaw.

Basaha ug tukia ang pinili nga mga bersikulo gikan sa Juan 16:16–33.

Human tudloi ni Jesus ang mga Apostoles mahitungod sa Espiritu Santo, siya misulti kanila nga siya hapit na mamatay ug pagabanhawon (Juan 16:16–20). Dayon siya miingon, “Ako misulti kaninyo niining mga butanga aron kamo makabaton og kalinaw” (Juan 16:33). Unsa sa inyong hunahuna ang gipasabut sa makabaton og kalinaw diha kaniya? (Tan-awa usab sa Mga Taga-Filipos 4:7–9; D&P 59:23.) Unsa ang atong makat-unan gikan sa pagtulun-an ni Jesus diha sa Juan 16 nga makatabang kanato aron makaangkon og kalinaw diha kaniya?
Si Jesus miingon ngadto sa iyang mga Apostoles, “Dinhi sa kalibutan kamo adunay kalisdanan; apan sumalig kamo; gidaug ko na ang kalibutan” (Juan 16:33). Sa unsa nga paagi nga ang kahibalo nga si Jesus mibuntog na sa kalibutan makatabang kanato nga magmaya kon kita magsagubang sa kagul-anan? Ngano nga mahinungdanon nga magmaya?

3. Si Jesus mitanyag sa labing mahinungdanon nga mapangaliyupoon nga pag-ampo.

Basaha ug tukia ang Juan 17, nga naglakip sa pag-ampo nga gihalad ni Jesus sa hapit na ang iyang pag-antus didto sa Tanaman sa Getsemani ug didto sa krus. Kini nga pag-ampo sa kasagaran gitawag nga mao ang mahinungdanon nga mapangaliyupoong pag-ampo tungod kay samtang si Jesus nag-ampo, siya milaban, o mibarug taliwala kanato ug sa Langitnong Amahan, aron paghangyo alang sa atong kaluwasan. Pangayo sa giya sa Espiritu sa pagpili sa mga bersikulo nga basahon ug hisgutan.

Sa diha nga si Jesus nagsugod sa iyang pag-ampo, giunsa niya paghulagway ang iyang misyon sa kalibutan? (Tan-awa sa Juan 17:1–2; tan-awa usab sa Moises 1:39.) Giunsa niya pagtuman kini nga misyon?
Sa iyang pag-ampo, ang Manluluwas miingon, “Mao kini ang kinabuhing dayon, nga sila unta makaila kanimo nga mao ang bugtong tinuod nga Dios, ug kang Jesukristo, kinsa imong pinadala” (Juan 17:3). Sa unsa nga paagi nga ang pagkaila sa Langitnong Amahan ug ni Jesukristo lahi gikan sa pagkaila lamang mahitungod kanila? Sa unsa nga paagi nga kita makaila kanila? (Tan-awa sa 1 Juan 4:7–8; Mosiah 5:10–13, Alma 22:18; D&P 18:33–36; 132:21–24.)

Kon ikaw naggamit sa pang-atensyon nga kalihokan, ibutang ang ginunting nga pulong nga nag-ingon nga Kinabuhing Dayon diha sa ikaduhang kahon sa regalo. Pagdapit og usa ka sakop sa klase sa pagbasa sa Doktrina ug mga Pakigsaad 14:7.

Sa unang bahin sa iyang pag-ampo, si Jesus mihulagway sa mga butang nga iyang nabuhat ngadto sa katumanan sa iyang misyon (Juan 17:4–8). Unsaon nato pagtaho sa atong mga kakugi ngadto sa Langitnong Amahan? Sa unsa nga paagi nga kini malagmit makaapekto sa atong mga lihok kon sa matag gabii kita maglakip diha sa atong mga pag-ampo sa pagreport sa atong mga kakugi sa pag-alagad kaniya nianang adlawa?
Bisan tuod nga si Jesus nahibalo nga siya hapit na mag-antus sa hilabihan, kang kinsa siya nag-ampo? (Tan-awa sa Juan 17:6–9, 20.) Unsa ang atong makat-unan gikan niini?
Sa unsa nga paagi nga kita sama ni Jesus ug sa iyang mga Apostoles, nga magpuyo sa kalibutan ug nga “dili magpakalibutanon”? (Juan 17:14; tan-awa usab sa mga bersikulo 15–16).

Si Elder M. Russel Ballard miingon:

“Sa Simbahan, kita kanunay nga mopahayag sa panultihon, ‘Pagpakaanaa sa kalibutan apan dili magpakalibutanon.’ Samtang kita magtan-aw sa mga sa salida sa telebisyon nga nagpakita nga ang pagpanamastamas, pagdagmal, ug pagluib, komon ra kaayo ug madanihon, kita sa kasagaran mangandoy nga atong masirad-an ang kalibutan ug mapalayo ang atong mga pamilya gikan niining tanan ….’

“Tingali kita makapahayag sa panultihon nga gihisgutan sa unahan ingon nga duha ka managlahi nga mga pahimangno. Una, ‘Pagpakaanaa sa kalibutan.’ Magmaapilon; magpakisayud. Paninguha nga magmasinabuton ug mauyonon ug matinahuron sa mga kalainan sa kultura, pagtuo ug uban pa. Paghimo og makahuluganon nga pagtampo sa katilingban pinaagi sa pag-alagad ug pagpakabana. Ikaduha, ‘Dili magpakalibutanon.’ Ayaw pagsunod sa sayup nga mga dalan o moduko aron sa pag-uyon o pagdawat sa unsay dili matarung.

“Kita kinahanglan maninguha sa pag-usab sa dunot ug imoral nga mga tumong sa telebisyon ug sa katilingban pinaagi sa pagsanta sa mga butang nga makasakit ug makapaulaw sa atong mga panimalay. Bisan pa sa tanan nga mga pagkadautan sa kalibutan, ug bisan pa sa tanan nga mga pakigbatok sa maayo nga atong makit-an sa matag dapit, kita kinahanglan dili mosulay sa pagkuha sa atong mga kaugalingon o sa atong mga anak gawas sa kalibutan. Si Jesus miingon, ‘Ang gingharian sa langit sama ngadto sa igpapatubo,’ o yeast (Mateo 13:33). Kita kinahanglan nga mobayaw sa kalibutan ug motabang sa tanan sa pagpataas ibabaw sa pagkadautan nga naglibot kanato. Ang Manluluwas nag-ampo ngadto sa Amahan:

“ ‘Ako dili mag-ampo nga kuhaon mo sila gikan sa kalibutan, kon dili himoon nimo unta silang ilikay gikan sa dautan’ (Juan 17:15)” (sa Conference Report, Abr. 1989, 101; o Ensign, Mayo 1989, 80).
Sa unsa nga paagi nga ang Langitnong Amahan ug si Jesukristo “usa,” nga giingon sa Juan 17:21–22?

Kon magsulti mahitungod sa Langitnong Amahan, ni Jesukristo, ug sa Espiritu Santo, si Presidente Gordon B. Hinckley miingon: “Sila managlahi nga mga linalang, apan sila usa ra sa katuyoan ug paningkamot. Sila nagkahiusa sa pagpahinabo sa dako, balaanon nga plano alang sa kaluwasan ug kahimayaan sa mga anak sa Dios…. Kini mao ang hingpit nga paghiusa tali sa Amahan, sa Anak, ug sa Espiritu Santo nga magbugkos niining tulo ngadto sa pagkausa diha sa balaan nga Dios nga Kapangulohan” (sa Conference Report, Okt. 1986, 69; o Ensign, Nob. 1986, 51).
Ngano nga mahinungdanon man alang sa mga Apostoles nga mahimong usa? (Tan-awa sa Juan 17:22–23.) Ngano nga kita kinahanglan man nga maghiusa uban sa Langitnong Amahan ug ni Jesukristo? uban sa mga sakop sa Simbahan? uban sa atong mga pamilya? Unsaon man nato pagtabang sa pagpalambo og panaghiusa niining mga relasyona? (Tan-awa sa Juan 17:26; Mosiah 18:21; D&P 35:2.)

Panapos

Hangyoa ang mga sakop sa klase sa paghunahuna kon unsa ang ilang bation kon sila mahibalo nga adunay usa ka tawo nga nag-ampo alang kanila. Dapita sila sa pagpamalandong unsa kaha ang ilang bation kon sila uban pa ni Jesus sa dihang siya mihalad sa mapangaliyupoong pag-ampo. Ipasabut nga ang mapangaliyupoon nga pag-ampo makatabang kanato sa pagpasalamat sa bililhon nga mga gasa sa kinabuhing dayon nga gitanyag sa Manluluwas kanato. Ipamatuod nga kita mapanalanginan samtang kita magtinguha sa pagsunod sa pag-aghat sa Espiritu Santo ug mahimong usa uban sa Langitnong Amahan ug ni Jesukristo.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

Pagdapit sa Espiritu

Aron pagtabang sa mga sakop sa klase nga mobati ug makaila sa impluwensya sa Espiritu Santo, pakigsulti og sayo sa pipila kanila, magdapit sa kada usa nila sa pagpili sa usa sa mosunod nga mga pasundayag nga buhaton isip kabahin sa leksyon:

Pagbasa og usa ka paborito nga tudling sa kasulatan.
Paghatag og pagpamatuod.
Kanta og usa ka himno o awit sa Primary mahitungod sa Manluluwas.
Pahayag og gugma alang sa Langitnong Amahan ug ni Jesukristo.
Pakigbahin og usa ka espirituhanon nga kasinatian (kon angay).

Human nga ang mga pagpahayag nahatag na diha sa klase, pagdapit og mga sakop sa klase sa paghulagway kon unsa ang ilang gibati sa panahon sa pagpasundayag. Basaha ang pamahayag ni Presidente Boyd K. Packer diha sa mga pahina 124, ug tabangi ang mga sakop sa klase sa pag-ila sa ilang mga pagbati nga moabut gikan sa Espiritu Santo. Sulti mahitungod kon unsa ang imong gibati sa dihang ikaw nakadawat sa paggiya gikan sa Espiritu Santo.