“Ang Dios Walay Pinalabi sa mga Tawo”

Katuyoan

Aron pagtabang sa mga sakop sa klase sa pag-ila nga ang ebanghelyo alang sa tanang mga tawo ug nga ang Simbahan gigiyahan pinaagi sa mapadayonon nga pagpadayag.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Mga Buhat 10:1–11:18. Usa ka anghel nagpakita ngadto ni Cornelio diha sa panan-awon ug misulti kaniya sa pagpadala ni Apostol Pedro. Si Pedro nakakat-on diha sa panan-awon nga ang ebanghelyo kinahanglan isangyaw ngadto sa mga Hentil (mga katawhan nga dili mga Judeo). Siya miadto sa Cesaria aron pagtudlo ni Cornelio ug sa iyang pamilya ug mga higala. Ang Espiritu Santo mikunsad diha ni Cornelio ug sa uban, ug sila gibunyagan. Ang uban nga mga miyembro sa Simbahan misaway ni Pedro tungod sa iyang pagtudlo sa mga Hentil, apan sa dihang siya misulti sa iyang pananawon, sila midawat niini ingon nga pagpadayag alang sa Simbahan.
2. Mga Buhat 12. Si Haring Herodes mipatay ni Santiago ug mipabilanggo ni Pedro. Ang mga Santos nag-ampo alang sa kagawasan ni Pedro, ug usa ka anghel sa Ginoo ang miluwas kaniya. Si Herodes gihampak sa usa ka anghel sa Ginoo ug namatay.
3. Mga Buhat 13–14. Si Saulo (karon gitawag na og Pablo) ug si Bernabe mihimo sa ilang unang misyonaryo nga panaw, nagtukod sa mga Simbahan taliwala sa mga Hentil diha sa pipila ka mga dakbayan.
4. Mga Buhat 15:1–35. Ang uban nga Judeo nga mga Santos nagtudlo nga ang mga Hentil nga mipasakop sa Simbahan kinahanglan nga motuman sa balaod ni Moises, naglakip sa pagtuli sa mga lalaki. Ang mga Apostoles mitino nga kini wala gimando sa Ginoo.
Dugang nga basahonon: Ang Giya ngadto sa mga Kasulatan, “Pagtuli,” ug “Cornelio.”
Kon duna kay kopya sa mapa nga nagpakita sa unang misyonaryo nga panaw ni Pablo (mapa 13 sa LDS nga edisyon sa Biblia nga giimprinta niadtong 1999 o lapas pa; mapa 19 sa giimprinta sa wala pay 1999), ikaw mahimo nga mogamit niini sa panahon sa leksyon.
Sugyot alang sa pagtudlo: Si Elder Gordon B. Hinckley miingon: “Ang imong mga estudyante nagkinahanglan og labaw pa kay sa imong kahibalo. Sila nagkinahanglan ug nangandoy sa imong pagdasig. Sila gusto sa mainitong pagbati sa personal nga relasyon. Kini mao kanunay ang timailhan nga kinaiya sa usa ka bantugan nga magtutudlo” (sa Conference Report, Okt. 1965, 52; o Improvement Era, Dis. 1965, 1124). Sa mainampoong paagi paghunahuna kon unsaon nimo sa pagpalambo ug pagpakita og gugma alang sa matag sakop sa klase. (Tan-awa sa Teaching, No Greater Call [36123], mga pahina 12, 31–36.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ihatag ang mosunod nga mga timailhan, usa sa matag higayon, ug hangyoa ang mga sakop sa klase sa pagtino unsa ang mahinungdanon nga hitabo diha sa kasaysayan sa Simbahan nga gipasabut niini:

Pang-atensyon nga Kalihokan

Pagpadayag
8 sa Hunyo 1978
Presidente Spencer W. Kimball
Priesthood
Opisyal nga Pamahayag 2

Ipaabli sa mga sakop sa klase ang Opisyal nga Pamahayag 2 (nga anaa sa katapusan sa Doktrina ug mga Pakigsaad) ug ipabasa nila ang ikaduha nga parapo (magsugod sa “Diha sa sayo sa Hunyo”). Itudlo nga ang Opisyal nga Pamahayag 2 nagrekord sa pagpadayag nga ang priesthood mahimo nang itugyan ngadto sa tanang takus nga mga lalaking miyembro sa Simbahan.

Kon adunay mga sakop sa klase nga mahinumdom sa adlaw sa pagpahibalo sa pagpadayag, dapita sila sa paghulagway kon unsa ang ilang gibati sa dihang sila nasayud niini.

Pang-atensyon nga Kalihokan

Kinsa ang mihatag sa priesthood sa tanang takus nga mga lalaking mga miyembro sa Simbahan? (Ang Ginoo.) Giunsa sa Ginoo pagpahibalo ang iyang kabubut-on ngadto sa Simbahan? (Siya mipadayag niini ngadto sa propeta, kinsa mipahibalo dayon niini ngadto sa mga miyembro sa Simbahan. Sa unsa nga paagi nga kini nga pagpadayag nakaapekto sa Simbahan?

Ipasabut nga kini nga pagpadayag usa ka ehemplo kon giunsa sa Ginoo sa pagpadayon sa pagdumala ang iyang Simbahan pinaagi sa pagpadayag. Kini nga leksyon naghisgot sa susama nga pagpadayag nga gihatag ngadto sa mga miyembro sa Simbahan human gyud dayon sa Pagkabanhaw ni Jesukristo.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, ipasabut pag-ayo ang kamahinungdanon sa mapadayunon nga pagpadayag gikan sa Ginoo ngadto sa iyang Simbahan. Awhaga ang mga sakop sa klase sa pagpaambit sa ilang mga pagpamatuod sa mapadayunon nga pagpadayag.

1. Si Pedro nakakat-on diha sa usa ka panan-awon nga ang ebanghelyo kinahanglan masangyaw ngadto sa mga Hentil.

Hisguti ang Mga Buhat 10:1–11:18. Dapita ang mga sakop sa klase sa pagbasa sa pinili nga mga bersikulo.

Unsa nga klase sa tawo si Cornelio? (Mga Buhat 10:1–2, 30–31. Siya usa ka matarung nga tawo kinsa mituo sa Dios, apan siya usa ka Hentil, o dili Judeo.) Unsa ang mensahe sa anghel ngadto ni Cornelio? (Tan-awa sa Mga Buhat 10:3–6.) Unsa ang reaksyon ni Cornelio niini nga mensahe? (Tan-awa sa Mga Buhat 10:7–8, 33.) Ngano nga mahinungdanon man ang pagbuhat dihadiha dayon sa mga panudlo o mga pag-aghat gikan sa Dios?
Samtang ang mga tawo ni Cornelio nagpanaw ngadto sa Jope, si Pedro adunay usa ka panan-awon (Mga Buhat 10:9–16). Unsa ang nakita ni Pedro niini nga panan-awon? (Tan-awa sa Mga Buhat 10:11–12.) Unsa ang gisulti ngadto ni Pedro nga iyang buhaton? (Tan-awa sa Mga Buhat 10:13.) Ngano nga si Pedro midumili man? (Tan-awa sa Mga Buhat 10:14. Siya dili buot nga mokaon sa mga hayop nga gituohan nga dili limpyo ubos sa balaod ni Moises.) Unsay gibuhat sa Ginoo kalabut sa kabalaka ni Pedro? (Tan-awa sa Mga Buhat 10:15–16.)
Sa dihang nakigkita siya ni Cornelio, si Pedro nakasabut sa iyang damgo. Unsa ang gipasabut niini? (Tan-awa sa Mga Buhat 10:28, 34–35. Ang ebanghelyo alang sa tanang katawhan, dili lamang alang sa mga Judeo. Ipasabut nga ang “Dios walay pinalabi sa mga tawo” nangahulugan nga ang Dios mohatag sa matag tawo sa kahigayunan sa pagdawat sa mga panalangin nga anaa pinaagi sa plano sa kaluwasan.) Ngano nga ang mga Hentil girepresentaran man sa dili limpyo nga mga hayop diha sa damgo? (Ang mga Judeo naghunahuna nga ang mga Hentil sa espirituhanong paagi dili takus ug dili limpyo, sama sa mga hayop nga gidili sa balaod ni Moises nga kan-on sa mga Judeo. Pinaagi sa pag-ingon nga ang mga hayop diha sa damgo sa pagkakaron “limpyo na” ang Ginoo nagsulti ni Pedro nga ang ebanghelyo kinahanglan nga isangyaw karon ngadto sa tanang mga tawo.)
Human gipasabut ni Pedro ang iyang damgo, nagsugod siya sa pagtudlo ni Cornelio ug sa iyang mga higala. Unsa ang iyang gitudlo diha sa iyang unang wali ngadto kanila? (Tan-awa sa Mga Buhat 10:36–43.) Unsa ang nahitabo samtang si Pedro nagsangyaw? (Tan-awa sa Mga Buhat 10:44, 46.) Ngano nga kini nakapakombinser man ni Pedro nga si Cornelio ug ang iyang mga higala kinahanglan nga bunyagan? (Tan-awa sa Mga Buhat 10:47–48; tan-awa usab Mga Buhat 11:15–17.)
Unsa ang reaksyon sa ubang mga miyembro sa Simbahan sa dihang sila nakadungog nga si Pedro nagtudlo sa ebanghelyo ngadto sa mga Hentil? (Tan-awa sa Mga Buhat 11:1–3.) Ngano nga kini nga mga miyembro nasuko man? (Sila wala maghunahuna nga ang mga Hentil kabahin sa pinili nga mga katawhan sa Dios.)
Sa unsa nga paagi nga ang mga hunahuna sa mga miyembro sa Simbahan nausab human si Pedro misulti kanila mahitungod sa iyang panan-awon ug sa iyang kasinatian uban ni Cornelio? (Tan-awa sa Mga Buhat 11:4–18.) Unsa ang atong buhaton kon kita makadawat og bag-o nga mga panudlo gikan sa atong mga lider sa Simbahan, bisan kon kita sa sinugdanan wala makauyon sa mga panudlo o nakakita niini nga lisud sabton? (Tan-awa sa Juan 7:17; 2 Nephi 28:30; D&P 6:11, 14–15.)
Ngano nga si Pedro mao man ang tawo nga nakadawat sa pagpadayag sa pagtudlo sa ebanghelyo ngadto sa mga Hentil? (Siya mao ang lider sa Simbahan niadtong higayona. Kinsa man ang makadawat sa pagpadayag karon alang sa tibuok Simbahan? Ngano nga kini mahinungdanon nga usa lamang ka tawo ang modawat sa pagpadayag alang sa tibuok Simbahan? (Tan-awa sa D&P 43:2–6.)

2. Si Pedro sa milagroso nga paagi nakagawas gikan sa bilanggoan.

Basaha ug hisguti ang pinili nga mga bersikulo gikan sa Mga Buhat 12.

Si Haring Herodes mipatay ni Apostol Santiago, unya mibalhog ni Pedro ngadto sa bilanggoan ug mibutang kaniya og daghang mga bantay (Mga Buhat 12:1–4). Unsay gibuhat sa mga miyembro sa Simbahan kalabut sa pagkabilanggo ni Pedro? (Tan-awa sa Mga Buhat 12:5.) Sa unsa nga paagi nga ang atong mga pag-ampo makatabang sa propeta ug sa ubang mga lider sa Simbahan karon? (Tan-awa sa D&P 43:12; 93:51; 107:22.)

Si Presidente Joseph F. Smith mipahayag: “Wala gayuy usa ka adlaw nga angay nga palabyon nga ang tanang mga katawhan nga ginsakupan sa Simbahan kinahanglang mopataas sa ilang mga tingog sa pag-ampo ngadto sa Ginoo aron sa pagpaluyo sa iyang mga sulugoon” (Gospel Doctrine, 5th ed. [1939], 223).
Sa unsa nga paagi nga si Pedro nakagawas gikan sa bilanggoan? (Tan-awa sa Mga Buhat 12:6–10.) Sa unsang laing mga higayon nga ang Ginoo sa milagroso nga paagi mipatunhay sa kinabuhi sa usa ka tawo hangtud nga kana nga tawo mahuman sa iyang misyon sa kalibutan? (Mga ehemplo gikan sa mga kasulatan naglakip nila ni Daniel; Sadrach, Mesach, ug Abednego; Abinadi; Alma ug Amulek, ug ni Joseph Smith.)
Unsa ang nahitabo ni Haring Herodes human makagawas si Pedro? (Tan-awa sa Mga Buhat 12:21–23.) Itandi unsa ang nahitabo ni Herodes ngadto sa unsay mahitabo sa Simbahan, sama sa gihulagway diha sa sunod nga bersikulo (Mga Buhat 12:24). Unsay inyong nakita kalabut sa pag-uswag sa Simbahan bisan pa man sa mga pagpaninguha sa ubang mga tawo sa pagguba niini?

3. Si Saulo (karon gitawag na og Pablo) ug si Bernabe nagsangyaw sa ebanghelyo ngadto sa mga Hentil.

Basaha ug hisguti ang pinili nga mga bersikulo gikan sa Mga Buhat 13–14. Kon ikaw naggamit sa mapa, itudlo ang mga dapit nga gibisitahan ni Pablo ug ni Bernabe samtang ikaw maghisgut niini.

Unsa may gipakita kabahin sa tawag ni Saulo ug ni Bernabe ngadto sa kon sa unsang paagi nga ang mga miyembro sa Simbahan gitawag sa pag-alagad sa Dios? (Tan-awa sa Mga Buhat 13:1–3. Hisguti ang panginahanglan sa pag-ampo ug pagpuasa, pagpadayag, ug awtoridad sa priesthood sa pagtawag sa mga miyembro aron sa pag-alagad diha sa Simbahan.) Unsa nga mga kasinatian ang nakatabang kaninyo nga mahibalo nga ang mga katungdanan diha sa Simbahan mga dinasig sa Espiritu?
Ang mga magmamando sa sinagoga sa Antioquia midapit ni Pablo sa pagpamulong atol sa tulumanon sa Igpapahulay (Mga Buhat 13:14–15). Unsa ang mahinungdanong mensahe ni Pablo? (Mga Buhat 13:23–31, 38–41.). Unsay gibuhat sa mga Hentil sa Antioquia kalabut sa mga misyonaryo ug sa ilang mensahe? (Tan-awa sa Mga Buhat 13:42–44, 48.) Ngano nga ang ubang mga Judeo migukod man nila ni Pablo ug ni Bernabe? (Mga Buhat 13:45–47.)
Unsa ang reaksyon sa mga katawhan sa Listra sa dihang si Pablo miayo sa bakul nga tawo (Tan-awa sa Mga Buhat 14:8–13. Ipasabut nga si Zeus ug si Hermes mga mini nga mga dios-dios nga gisimba sa mga tawo.) Unsay gibuhat nila ni Pablo ug ni Bernabe kalabut niining maong pagdayeg ug pagtagad? (Tan-awa sa Mga Buhat 14:14–18.) Ipasabut nga ang tinuod nga mga magtutudlo sa pulong sa Dios kanunay nga magtinguha sa paghatag sa Dios sa himaya ug ipalayo ang pagtagad gikan sa ilang mga kaugalingon. Unsay inyong nakita kalabut niining maong kinaiya nga gipakita sa mga lider sa Simbahan karon?
Diha sa matag dakbayan nga giduaw ni Pablo ug Bernabe, sila nakakita nga ang mga tawo matinguhaon nga modawat sa ebanghelyo, apan sila usab nakakita og mga tawo kinsa migukod kanila ug midani sa uban batok sa Simbahan (Mga Buhat 13:43–45, 50; 14:1–6, 19). Ngano nga si Pablo ug si Bernabe mibalik ngadto sa matag dakbayan bisan pa man nga sila gigukod didto? (Tan-awa sa Mga Buhat 14:21–23. Sila mitukod og mga branch sa Simbahan didto sa mga dakbayan, ug sila mibalik aron pagdasig ug pagtudlo sa bag-ong mga miyembro niini nga mga branch.) Unsa ang atong mabuhat aron pag-abag sa bag-ong mga miyembro sa atong ward o branch?

Si Presidente Gordon B. Hinckley nagsulti: “Uban sa pagtubo sa gidaghanon sa mga kinabig, kita kinahanglan mohimo og dugang sa gikinahanglan nga paningkamot aron pagtabang kanila samtang sila mangita sa ilang agianan. Matag usa kanila nagkinahanglan sa tulo ka mga butang: usa ka higala, usa ka responsibilidad, ug usa ka pag-amuma uban “sa maayong pulong sa Dios” (Moroni 6:4). Kini atong katungdanan ug kahigayunan sa paghatag niini nga mga butang (sa Conference Report, Abr. 1997, 66; o Ensign, Mayo 1997, 47).

4. Ang mga Apostoles mitino nga ang mga Hentil dili kinahanglan nga mosunod sa balaod ni Moises.

Basaha ug hisguti ang pinili nga mga bersikulo gikan sa Mga Buhat 15:1–35.

Unsa nga panaglalis ang giadto ni Pablo ug ni Bernabe sa Jerusalem aron husayon? (Tan-awa sa mga Buhat 15:1–2; Ang Giya ngadto sa mga Kasulatan, “Pagtuli,” 205. Ipasabut nga ang pagtuli usa ka simbolo sa kinatibuk-ang balaod ni Moises. Ang usa ka tinuli nga tawo mao ang usa nga mituman sa balaod. Bisan tuod og si Jesukristo mituman sa balaod ni Moises, ang ubang mga Kristiyanos nga mga Judeo mihimo gihapon niini ug buot nga ang mga kinabig nga Hentil mohimo usab niini.) Giunsa pagsulbad ang panaglalis? (Human sa hingpit nga paghisgut, ang mga Apostoles mihukom pinaagi sa inspirasyon nga dili na kinahanglanon ang pagtuli.)
Sa unsa nga paagi nga ang mga hitabo nga gihulagway diha sa Mga Buhat 15:6–31 nagpakita sa sumbanan diin ang mga paghukom mahitungod sa lagda ug buluhaton sa Simbahan gihimo?
1. Ang mga pangulo sa Simbahan maghimo og katiguman aron pagtimbangtimbang sa hilisgutan (bersikulo 6).
2. Sila hingpit nga maghisgut sa hilisgutan (mga bersikulo 7–21).
3. Sila maghimo og paghukom sumala sa pagbuot sa Ginoo (mga bersikulo 19–21).
4. Ang Espiritu Santo mopamatuod nga ang paghukom husto (bersikulo 28).
5. Ang paghukom ipahibalo ngadto sa mga Santos alang sa pagpaluyo (mga bersikulo 22–31).

Panapos

Ipamatuod nga ang Simbahan sa kanunay gigiyahan pinaagi sa balaan nga pagpadayag ug nga kana nga pagpadayag nagpadayon karon. Awhaga ang mga sakop sa klase sa pagsunod sa tambag sa buhing propeta ug sa ubang mga lider sa Simbahan.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

Ang tibuok kalibutan nga Simbahan

Aron pagpakita sa mga sakop sa klase sa unsang paagi milambo ang Simbahan, ipakita ang mapa sa kalibutan. Itudlo ang mga dapit diin ang mga miyembro sa Simbahan nagpuyo sa panahon ni Cornelio ( sa karon nga panahon nga Israel, Turkey, Greece, ug uban pang naglibut nga mga dapit). Dayon ipatudlo sa mga sakop sa klase ang mga dapit diin ang mga miyembro sa Simbahan nagpuyo karon. Ipasabut nga sa sinugdanan sa 2002, ang Simbahan adunay sobra sa 11 ka milyon ka mga sakop nga nagpuyo sa 160 ka mga nasud. Adunay sobra sa 60,000 ka mga misyonaryo nga nagmisyon sa 120 ka mga nasud, nga adunay mga 50 ka nagkadaiyang mga pinulongan ug daghan pang mga sinultihan. (Pwede kang mangita sa labing bag-o nga estatistika sa bag-ong mga magasin sa Simbahan.)