Sunday School: Doktrina sa Ebanghelyo
Leksyon 12: ‘Ako Mao ang Pan nga Nagahatag og Kinabuhi’

Leksyon 12

“Ako Mao ang Pan nga Nagahatag og Kinabuhi”

Juan 5–6; Marcos 6:30–44; Mateo 14:22–33

Katuyoan

Aron pagtabang sa mga sakop sa klase nga motan-aw ni Jesukristo ingon nga “ang pan nga nagahatag og kinabuhi,” ang tinubdan sa walay katapusan nga kinabuhi (Juan 6:47–48).

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Juan 5. Si Jesus nag-ayo sa usa ka tawo sa Igpapahulay. Ang mga lider sa mga Judeo nagtinguha sa pagpatay ni Jesus tungod sa iyang pamahayag nga siya mao ang Anak sa Dios.

    2. Juan 6:1–14; Marcos 6:30–44. Si Jesus milagroso nga mipakaon sa sobra sa 5,000 ka mga tawo.

    3. Juan 6:15–21; Mateo 14:22–33. Si Jesus naglakaw sa ibabaw sa tubig, midapit kang Pedro sa pagduol kaniya, ug mipahunong sa hangin.

    4. Juan 6:22–71. Si Jesus mipahayag nga siya mao ang “pan nga nagahatag og kinabuhi” ug nga kadto kinsa motuo kaniya makaangkon og walay katapusan nga kinabuhi. Daghan ang misalikway niini nga pagtulun-an, apan si Pedro ug ang uban nga mga Apostoles nagpabilin uban ni Jesus.

  2. Dugang nga basahonon: Mateo 14:1–21; Marcos 6:1–29, 45–52; Lucas 9:10–17.

  3. Hangyoa ang usa ka sakop sa pag-anha sa klase nga andam sa pagpaambit og mubo nga summary sa istorya ni Jesus nga nag-ayo sa usa ka tawo diha sa tuburan sa Betsata (Juan 5:1–9).

  4. Kon anaa ang mga hulagway nga Nagpakaon sa Lima ka Libo (62143) ug Si Kristo Naglakaw Ibabaw sa Tubig (Pakete sa mga Hulagway sa Ebanghelyo 243), gamita kini sa panahon sa leksyon.

  5. Sugyot alang sa pagtudlo: Ang Manluluwas kanunay mogamit sa matag adlaw nga mga butang, sama sa pan o mga liso, aron pagtudlo sa mga baruganan sa ebanghelyo. Samtang ikaw nag-andam sa matag leksyon, hunahunaa kon sa unsa nga paagi ikaw mahimong mogamit sa mga butang aron makuha ang atensyon sa mga sakop sa klase o sa paghulagway og usa ka mahinungdanon nga punto. (Tan-awa sa Teaching, No Greater Call, [36123], mga pahina 163–64.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Drowinga ang mosunod nga mga paghulagway diha sa pisara:

Bato

Kahayag

Pan

Pang-atensyon nga Kalihokan

  • Unsay komon niining mga butanga?

Hatagi og panahon ang mga sakop sa klase nga mohisgut sa lakbit sa posible nga mga tubag sa pangutana. Dayon ipabasa nila ang Helaman 5:12, diin si Helaman mipasabut bahin ni Jesukristo ingon nga “ang bato,” ug sa Juan 8:12, diin si Jesus mipahayag nga siya mao “ang kahayag sa kalibutan.” Ipasabut nga sa ulahi niini nga leksyon ikaw maghisgot sa unsa nga paagi nga si Jesus mao ang “pan nga nagahatag og kinabuhi” (Juan 6:35).

Paghisgut ug Paggamit sa Kasulatan

Samtang ikaw magtudlo niini nga leksyon, tabangi ang mga sakop sa klase “sa pagsiksik sa mga kasulatan” (Juan 5:39). Awhaga sila sa pagpaambit og mga kasinatian nga may kalabutan ngadto sa mga baruganan nga ilang gihisgutan.

1. Si Jesus nag-ayo sa usa ka tawo sa Igpapahulay ug mipahayag sa iyang kaugalingon nga Anak sa Dios.

Hisguti ang Juan 5. Dapita ang mga sakop sa klase sa pagbasa og kusog sa pinili nga mga bersikulo.

  • Dapita ang gihangyo nga sakop sa pag-summarize sa istorya ni Jesus nga nagayo sa usa ka tawo didto sa tuburan sa Betsata (Juan 5:1–9). Unsa nga mga panudlo ang gihatag ni Jesus sa tawo sa dihang iya kining nakit-an didto sa templo pagkahapon nianang adlawa? (Tan-awa sa Juan 5:14.) Ngano nga ang mga sangputanan sa sala “labi pang mangil-ad” kay sa pisikal nga mga kakulangan?

  • Ngano nga ang mga pangulo sa mga Judeo nagtinguha sa pagpatay ni Jesus? (Tan-awa sa Juan 5:16–18.) Samtang si Jesus mitubag sa masuk-anon nga mga Judeo, unsa ang iyang gipadayag mahitungod sa iyang relasyon ngadto sa Amahan? (Tan-awa sa Juan 5:19–23, 30.)

  • Si Jesus misulti sa mga katawhan nga siya sa dili madugay mohimo sa labi pang “mahinungdanon nga mga buhat” kay sa pag-ayo sa sakit (Juan 5:20). Unsa kining iyang gisulti nga labing mahinungdanon nga mga buhat? (Tan-awa sa Juan 5:21–29. Siya mopahinabo sa Pagkabanhaw, mohukom sa tanang katawhan, ug mohatag og walay katapusang kinabuhi ngadto sa mga matinud-anon.)

  • Kinsa nga mga saksi ang gisulti sa Manluluwas nga nagpamatuod kaniya? (Tan-awa sa Juan 5:32–39, 45–47.) Ngano nga importante nga makabaton niini nga mga saksi? (Tan-awa sa Jacob 4:6.) Sa unsa nga paagi nga kita mahimong mga saksi sa Manluluwas?

  • Si Jesus mihagit sa mga lilder sa mga Judeo sa “pagsiksik sa mga kasulatan” (Juan 5:39). Unsa ang kalainan tali sa pagsiksik sa mga kasulatan ug sa pagbasa niini? (Ikaw mahimo nga mogamit sa unang dugang nga ideya sa pagtudlo diha sa katapusan sa leksyon samtang kamo maghisgut niini nga pangutana.) Giunsa ninyo paghimo ang inyong personal ug pamilya nga pagtuon sa kasulatan nga mas makahuluganon? Sa unsa nga paagi nga kamo napanalanginan samtang kamo nagsiksik sa mga kasulatan?

  • Sumala sa Juan 5:39, unsa unta ang mahibaloan sa mga pangulo sa mga Judeo kon sila nagsiksik ug mituo pa sa mga kasulatan? (Sila unta makahibalo nga ang mga kasulatan nagpamatuod ni Jesukristo. Tan-awa usab sa Juan 5:40, 46–47.) Sa unsa nga paagi nga ang mga kasulatan nakapalig-on sa inyong hugot nga pagtuo diha ni Kristo?

2. Si Jesus milagroso nga mipakaon sa sobra sa 5,000 ka mga tawo.

Basaha ug hisguti ang pinili nga mga bersikulo gikan sa Juan 6:1–14 ug Marcos 6:30–44. Ipakita ang hulagway ni Jesus nga nagpakaon sa pundok sa mga katawhan.

  • Ngano man nga si Jesus ug ang iyang mga tinun-an mitungas didto sa bukid? (Tan-awa sa Juan 6:1–3; ang Hubad ni Joseph Smith sa Marcos 6:31 miingon nga si Jesus ug ang iyang mga tinun-an miadto sa mingaw nga dapit.) Giunsa pagtubag ni Jesus ang pundok sa katawhan sa diha nga miapas kini kaniya? (Tan-awa sa Marcos 6:33–34; Mateo 14:14.) Sa unsa nga paagi kita makasunod sa iyang ehemplo sa kalooy?

  • Giunsa pagpakaon ni Jesus ang pundok sa katawhan? (Tan-awa sa Juan 6:5–13; tan-awa usab sa Mateo 14:21.) Unsaon nato pagsunod ang ehemplo sa batang lalaki nga mihatag sa iyang mga pan ug mga isda ngadto ni Jesus? Sa unsa nga paagi nga ang Ginoo makapanalangin kanato kon kita, sama sa bata nga lalaki, mohatag sa bisan unsa nga ania kanato ngadto sa Iyang pag-alagad?

    Si Elder James E. Faust miingon:

    “Daghang wala mailhi nga mga tawo nga adunay mga gasa nga parehas lamang sa lima ka piraso nga pan ug duha ka gagmay nga mga isda ang mipalambo sa ilang balaan nga mga tawag ug mialagad nga wala matagad o walay pasidungog, nagpakaon sa mga liboan…. Kini mao ang mga gatusan ka libo ka mga lider ug mga magtutudlo diha sa tanan nga mga auxiliary ug mga korum sa priesthood, ang mga home teacher, ang mga visiting teacher sa Relief Society. Kini mao ang daghan nga mapainubsanong mga bishop diha sa Simbahan, ang uban walay mga pormal nga pagbansay apan napalambo sa hilabihan, nagkat-on og maayo, uban sa mapainubsanon nga tinguha sa pagalagad sa Ginoo ug sa katawhan sa ilang mga ward …

    “Usa ka dakong rason nga kining simbahan mitubo gikan sa ubos nga sinugdanan ngadto sa kalig-on niini karon mao ang pagkamatinud-anon ug debosyon sa minilyon nga mapainubsanon ug maunungon nga mga katawhan kinsa adunay lima lamang ka piraso nga mga pan ug duha ka gagmay nga mga isda nga gihalad diha sa pag-alagad sa Magtutudlo. Sila mitugyan pag-ayo sa ilang kaugalingon nga mga interes ug sa pagbuhat sa ingon nakaplagan ‘ang kalinaw sa Dios, nga molabaw sa tanang pagsabut’ (Mga Taga-Filipos 4:7)” (sa Conference Report, Abr. 1994, 4–5; o Ensign, Mayo 1994, 5–6).

  • Unsa ang pipila ka mga ehemplo nga inyong nakita sa mga tawo nga gipalambo sa Dios samtang sila nag-alagad kaniya?

  • Sa unsa nga paagi nga ang milagroso nga kasaulogan sa lima ka mga piraso nga pan ug sa duha ka mga isda simbolo sa espirituhanon nga kasaulogan nga gitanyag sa Manluluwas kanato?

3. Si Jesus milakaw ibabaw sa dagat, midapit ni Pedro sa pagduol kaniya, ug mipakalma sa hangin.

Basaha ug hisguti ang Juan 6:15–21 ug Mateo 14:22–33. Ipasabut nga human si Jesus mipakaon sa pundok sa mga katawhan, siya mimando sa iyang mga tinunan sa pagsakay sa barko ug moadto sa pikas bahin sa dagat. Unya Siya mipapauli sa pundok sa katawhan ug mitungas sa bukid aron mag-ampo. Samtang ang mga tinun-an mitabok sa dagat, sila naabtan sa makusog nga unos.

  • Unsa ang reaksyon sa mga tinun-an sa dihang sila nakakita ni Jesus nga naglakaw paingon kanila ibabaw sa tubig? (Tan-awa sa Mateo 14:26; Juan 6:19.) Giunsa pagtubag ni Jesus ang ilang mga kahadlok? (Tan-awa sa Mateo 14:27; Juan 6:20.)

Ipakita ang hulagway ni Kristo nga naglakaw ibabaw sa tubig.

  • Unsa ang gihangyo ni Pedro sa dihang siya nakadungog sa tingog sa Manluluwas? (Tan-awa sa Mateo 14:28–29.) Ngano nga ang hugot nga pagtuo ni Pedro nawala samtang siya naglakaw ibabaw sa tubig? (Tan-awa sa Mateo 14:30.) Sa unsa nga paagi nga kita usahay makahimo og susama nga mga sayop kon ang mga kalisud moabut?

  • Unsa ang gibuhat ni Pedro sa dihang siya nagsugod sa pagka-unlod? (Tan-awa sa Mateo 14:30.) Unsa ang gibuhat ni Jesus? (Tan-awa sa Mateo 14:31–32.) Unsa ang gipahayag niini mahitungod sa atong relasyon ngadto sa Ginoo? Sa unsa nga paagi nga kamo mibati nga ang Manluluwas milig-on kaninyo ug mihupay sa inyong mga kahadlok?

4. Si Jesus mipahayag nga siya mao “ang pan nga nagahatag og kinabuhi.”

Basaha ug hisguti ang pinili nga mga bersikulo gikan sa Juan 6:22–71.

  • Sa adlaw human sa milagro ni Jesus sa mga piraso sa pan ug mga isda, ang mga tawo misunod kaniya ngadto sa Capernaum. Ngano nga sila misunod kaniya? (Tan-awa sa Juan 6:26.) Giunsa ni Jesus paggamit sa mga kadasig sa katawhan mahitungod sa milagro sa miaging adlaw sa pagpamatuod sa iyang misyon? (Tan-awa sa Juan 6:27–35. Hinumdumi nga ang pulong karne diha sa bersikulo 27 nagpasabut nga pagkaon.

    Si Elder Jeffrey R. Holland nakaobserbar nga: “Sa panahon sa pangalagad sa Manluluwas sa Galilea, Siya mibadlong niadtong kinsa nakadungog Kaniya nga nagpakaon sa 5,000 uban lamang sa lima ka pan ug duha ka mga isda, ug karon nagpundok ngadto kaniya nga nagpaabut sa libre nga paniudto. Kana nga pagkaon, ingon nga kini mahinungdanon, nakadugang sa tinuod nga pagkaon nga Iyang gipaningkamutan nga ihatag ngadto kanila (sa Conference Report, Okt. 1997, 87; o Ensign, Nob. 1997, 65).

  • Sa unsa nga paagi nga ang “pan nga naghatag og kinabuhi” usa ka tukma nga paghulagway sa Manluluwas ug sa mga panalangin nga iyang gitanyag kanato? (Tan-awa sa Juan 6:35, 47–51.) Unsa ang gipasabut sa “dili gayud gutumon” ug “dili gayud uhawon”? Sa unsa nga paagi nga kita makakaon sa “pan nga naghatag og kinabuhi”? (Tan-awa sa Juan 6:47, 51–54; Mateo 26:26–28; Alma 5:33–35, D&P 20:77.)

    Si Presidente Howard W. Hunter mitambag: “Kita kinahanglan nga mas makaila pa ni Kristo kay sa atong pagkaila kaniya; kita kinahanglan nga mahinumdom kaniya kanunay kay sa atong paghinumdom kaniya; kita kinahanglan nga mas magmaisugon sa pag-alagad kaniya kay sa atong pag-alagad kaniya. Dayon kita moinum sa tubig nga makahatag sa kinabuhing dayon ug mokaon sa pan nga naghatag og kinabuhi” (sa Conference Report, Abr. 1994, 84; o Ensign, Mayo 1994, 64).

Ipasabut nga ang ubang tawo wala motuo ni Jesus tungod kay sila nakakita lamang kaniya ingon nga “anak nga lalaki ni Jose” (Juan 6:42). Ang pipila nga miangkon nga mga tinun-an ni Jesus nagbagulbol ug mipahilayo gikan kaniya, nag-ingon nga sila wala makasabut sa espirituhanon nga kahulugan sa iyang pamahayag nga siya mao ang pan nga naghatag og kinabuhi ug sa iyang pagtulun-an mahitungod sa panginahanglan nga mokaon sa iyang unod ug moinum sa iyang dugo (Juan 6:51–66).

  • Sa dihang ang ubang mga tawo misalikway sa wali ni Jesus, unsa ang gipangutana ni Jesus sa Napulog Duha ka mga Apostoles? (Tan-awa sa Juan 6:67.) Unsa ang tubag ni Pedro? (Tan-awa sa Juan 6:68.) Unsa ang nasabtan ni Pedro ug sa ubang mga Apostoles mahitungod ni Jesus nga wala masabti niadtong mibiya? (Tan-awa sa Juan 6:69.)

Panapos

Ipamatuod nga si Jesukristo mao “ang pan nga nagahatag og kinabuhi” ug nga siya aduna “sa mga pulong sa kinabuhing dayon” (Juan 6:35, 68). Awhaga ang mga sakop sa klase sa paggamit sa iyang mga saad gikan sa Wali sa Pan nga Naghatag og Kinabuhi: “Siya nga moduol kanako dili gayud gutumon; ug siya nga mosalig kanako dili gayud uhawon…. Siya nga mosalig kanako adunay kinabuhing dayon” (Juan 6:35, 47).

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o tanan niining mga ideya isip kabahin sa leksyon.

1. “Magsiksik sa mga kasulatan” (Juan 5:39)

Dapita ang mga sakop sa klase sa pagbasa og hilum sa Juan 5:20–30 samtang ikaw kusog nga mobasa niini. Basaha kini pagdali, nga dili mohunong aron pagpasabut o paghisgut sa bisan unsa niini nga mga bersikulo.

Ipasabut nga kamo nakabasa na sa Juan 5:20–30 apan nga kamo karon magdungan sa pagsiksik sa mga tudling. Bahina ang mga sakop sa klase ngadto sa mga grupo nga may tulo o upat ka mga sakop sa matag grupo. Hatagi ang matag pundok sa dili moubos sa usa sa mosunod nga mga seksyon gikan sa Juan 5:20–30; mga bersikulo 20–22, 23–24, 25–27, ug 28–30. Hatagi ang mga grupo og pipila ka mga minuto sa paghimo niini. Ipabasa nila ang gihatag nga mga bersikulo, pagpili og tulo ka labing mahinungdanon nga mga pulong diha sa mga bersikulo, ug pag-andam sa pagsulti mahitungod ngano nga kadtong mga pulong mahinungdanon.

  • Unsa ang inyong nakita sa dihang kamo nagsiksik sa mga kasulatan nga wala ninyo makita sa dihang kita nagdali sa pagbasa niini? Unsa ang atong buhaton aron makasiksik sa mga kasulatan sa atong kaugalingon?

Ipasabut nga si Propeta Joseph Smith nakadawat og panan-awon sa mga gingharian sa himaya human mamalandong sa Juan 5:29. Dapita ang usa ka sakop sa klase sa pagbasa sa Doktrina ug mga Pakigsaad 76:15–20.

  • Unsa nga kahibalo ang gipanalangin ngari nato tungod sa pagsiksik ni Joseph Smith sa Juan 5:29?

2. “Tabangi kadtong kinsa naghulat sa may tuburan sa Betsata”

Si Elder Boyd K. Packer migamit sa istorya diha sa Juan 5:1–9 aron sa pagpasabut pag-ayo nga kita kinahanglan motabang sa mga tawo nga adunay kakulangan. Siya miingon nga ang mga lawas ug mga hunahuna nga may kakulian “mamahimong hingpit. Sa pagkakaron, kita kinahanglan nga motan-aw niadtong naghulat diha sa tuburan sa Betsata” (sa Conference Report, Abr. 1991, 8; o Ensign, Mayo 1991, 9).

  • Unsa ang atong buhaton aron makatabang sa mga tawo kinsa adunay mga pisikal o mental nga mga kakulangan?