Sunday School: Doktrina sa Ebanghelyo
Leksyon 1: ‘Nga Unta Kamo Motuo nga si Jesus Mao ang Kristo’

Leksyon 1

“Nga Unta Kamo Motuo nga si Jesus Mao ang Kristo”

Isaias 61:1–3; Hubad ni Joseph Smith, Lucas 3:4–11; Juan 1:1–14, 20:31

Katuyoan

Aron pag-awhag sa mga sakop sa klase sa paglig-on sa ilang mga pagpamatuod kang Jesukristo pinaagi sa pagtuon sa Bag-ong Tugon.

Pagpangandam

  1. Basaha, pamalandongi, ug i-ampo ang kabahin sa mosunod nga mga kasulatan:

    1. Isaias 61:1–3; Hubad ni Joseph Smith, Lucas 3:4–11. Si Isaias ug si Juan Bautista nanagna kabahin sa misyon sa Manluluwas.

    2. Juan 1:1–14; 20:31. Si Apostol Juan mipamatuod nga si Jesukristo mao “ang tinuod nga Kahayag.” Siya namahayag nga ang iyang katuyoan sa pagsulat sa iyang pagpamatuod mao ang pagtabang sa uban “nga motuo nga si Jesus mao ang Kristo.”

  2. Pagkuha og kopya sa Giya sa Pagtuon sa Sakop sa Klase sa Bag-ong Tugon (35682 853) alang sa matag sakop sa imong klase. (Ang ward kinahanglan nga naka-order na niining mga giya sa pagtuon isip bahin sa ilang tinuig nga order sa kurikulum. Ang sakop sa bishopric kinahanglan mohatag niini ngadto sa kapangulohan sa Sunday School.)

  3. Kon ikaw mogamit sa pang-atensyon nga kalihokan, hangyoa ang pipila ka mga sakop sa klase sa pag-andam sa pagbasa o pag-summarize og usa ka paborito nga tudling sa Bag-ong Tugon ug sa pagpasabut sa minubong paagi ngano nga kana nga tudling nakadasig ug nakatabang kanila.

  4. Kon ang mosunod nga mga hulagway anaa, gamita kini sa panahon sa leksyon: Si Isaias Misulat Kabahin sa Pagkatawo ni Kristo (62339 853; Pakete sa mga Hulagway sa Ebanghelyo 113) ug Si Juan Nagsangyaw sa Kamingawan (62132 853; Pakete sa mga Hulagway sa Ebanghelyo 207). Kon ikaw mogamit sa pang-atensyon nga kalihokan, pagdala usab og pipila ka mga hulagway nga nagpakita sa mga panghitabo gikan sa Bag-ong Tugon, sama sa Pagpangayo ni Kristo sa Buta nga Tawo (62145 853; Pakete sa mga Hulagway sa Ebanghelyo 213) ug Si Maria ug ang Nabanhaw nga Ginoo (62186 853; Pakete sa mga Hulagway sa Ebanghelyo 233).

  5. Sugyot alang sa pagtudlo: Awhaga ang mga sakop sa klase sa pagkompleto sa ilang basahonon matag semana ug sa pagtambong sa klase nga andam mohisgot sa unsa ang ilang nabasa. Kini nga pagpangandam makatabang sa pagtuman sa saad sa Ginoo nga “siya nga nagsangyaw ug siya nga nakadawat [pinaagi sa Espiritu sa kamatuoran] nakasabut sa usag usa, ug ang duha makadawat og kaayohan ug maglipay nga maghiusa” (D&P 50:22).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Iplastar ang mga hulagway nga nagpakita sa mga hitabo gikan sa Bag-ong Tugon.

Hangyoa ang mga sakop sa klase sa paghunahuna mahitungod sa mosunod nga pangutana:

Pang-atensyon nga Kalihokan

  • Unsa nga mga hitabo o mga pagtulun-an nga anaa sa Bag-ong Tugon nga nakapadasig o nakatabang gayud kaninyo?

Hatagi ang mga sakop sa klase og higayon sa paghunahuna, ug unya dapita ang gitudlo nga mga sakop sa klase sa pagbasa o pag-summarize sa ilang paborito nga tudling sa Bag-ong Tugon. Kon ang ubang mga sakop sa klase buot nga mopaambit sa ilang paborito nga tudling, tuguti ang pipila kanila sa pagbuhat sa ingon.

Ipadayag ang imong mga gibati mahitungod sa imong kahigayunan sa pagtudlo ug pagtuon sa Bag-ong Tugon karong tuiga. Ipasabut nga ang katuyoan sa pagtuon sa Bag-ong Tugon niining tuiga mao ang pagtabang sa mga sakop sa klase nga malig-on ang ilang hugot nga pagtuo kang Jesukristo ug mahimo nga mas masinati sa iyang kinabuhi ug misyon.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, hisguti kon sa unsang paagi kini magamit sa adlaw-adlaw nga kinabuhi. Awhaga ang mga sakop sa klase sa pagpaambit og mga kasinatian nga may kalabutan ngadto sa mga baruganan sa kasulatan.

1. Si Isaias ug si Juan Bautista nanagna kabahin sa misyon sa Manluluwas.

Basaha ug hisguti ang Isaias 61:1–3 ug Hubad ni Joseph Smith, Lucas 3:4–11. (Ang Hubad ni Joseph Smith sa Lucas 3:4–11 makita diha sa mga pahina 805–6 sa appendix sa LDS nga edisyon sa King James nga Biblia.)

Ipakita ang hulagway ni Isaias nga nagsulat mahitungod sa pagkatawo sa Manluluwas. Ipasabut nga kita makapalig-on sa atong mga pagpamatuod kang Jesukristo ug sa atong pagpasalamat sa Bag-ong Tugon pinaagi sa pagtuon sa mga pulong ni Isaias ug sa uban kinsa nanagna kabahin sa misyon sa Manluluwas.

  • Unsa nga mga aspeto sa misyon sa Manluluwas ang gihulagway diha sa Isaias 61:1–2? (Ilista ang mga tubag sa mga sakop sa klase diha sa pisara. Ang mga tubag mahimong maglakip sa gilista sa ubos.)

    1. “Pagwali sa maayo nga mga balita ngadto sa mga maaghup” (bersikulo 1).

    2. “Pagbugkos sa mga masulub-on og kasingkasing” (bersikulo 1).

    3. “Pagsangyaw sa kagawasan sa mga binihag” (bersikulo 1).

    4. “Paghupay niadtong tanan nga nagbangutan” (bersikulo 2).

  • Giunsa ni Jesus pagtuman kini nga mga panagna? (Awhaga ang mga sakop sa klase sa paghatag og mga panig-ingnan gikan sa mga kasulatan ug sa pagpaambit og personal nga mga kasinatian.)

    Ipasabut nga si Jesus mikutlo niini nga tudling diha sa sinugdanan sa iyang pangalagad aron pagpahayag nga siya mao ang Mesiyas (Lucas 4:16–21; tanawa sa leksyon 6).

    Ipakita ang hulagway ni Juan Bautista nga nagsangyaw sa kamingawan. Ipasabut nga si Juan Bautista nanagna kabahin sa misyon sa Manluluwas sa wala pa magsugod si Jesus sa iyang mortal nga pangalagad.

  • Giunsa sa paghulagway ni Juan Bautista ang misyon sa Manluluwas? (Tan-awa sa Hubad ni Joseph Smith, Lucas 3:4–9. Ilista ang mga tubag sa mga sakop sa klase diha sa pisara. Kon wala ang Hubad ni Joseph Smith niini nga mga bersikulo, ilista ang mga panagna sama sa gipakita sa ubos.)

    1. “Magwagtang sa mga sala sa kalibutan” (bersikulo 5).

    2. “Magdala og kaluwasan ngadto sa mga nasud sa mga Hentil” (bersikulo 5).

    3. “Magapundok nga maghiusa niadtong kinsa nahisalaag” (bersikulo 5).

    4. “Maghimong posible sa pagsangyaw sa ebanghelyo ngadto sa mga Hentil” (bersikulo 6).

    5. “Mahimong kahayag ngadto sa tanan kinsa naglingkod sa kangitngit” (bersikulo 7).

    6. “Pagpahinabo sa pagkabanhaw gikan sa mga patay” (bersikulo 7).

    7. “Pagpangalagad og kaangayan ngadto sa tanan” (bersikulo 9).

    8. “Pagpatuo sa tanan nga dili diosnon mahitungod sa ilang dili diosnon nga mga buhat” (bersikulo 9).

  • Giunsa ni Jesus pagtuman kini nga mga panagna? (Awhaga ang mga sakop sa klase sa paghatag og mga panig-ingnan gikan sa mga kasulatan ug sa pagpaambit og personal nga mga kasinatian.)

  • Unsa ang inyong gibati samtang kamo naghunahuna mahitungod sa mga butang nga nabuhat ni Jesus alang kanato? Unsa kaha unta ang mahitabo sa atong mga kinabuhi kon si Jesus wala pa mobuhat niining mga butanga alang kanato?

2. Si Apostol Juan mipamatuod nga si Jesukristo mao “ang tinuod nga Kahayag.”

Basaha ug hisguti ang Juan 1:1–14; 20:31. (Gamita ang Hubad ni Joseph Smith sa Juan 1:1–14 kon anaa. Makita kini sa Ang Giya ngadto sa mga Kasulatan.)

  • Unsa ang atong makat-unan mahitungod ni Jesukristo gikan sa Juan 1:1–3, 14? (Tan-awa ang lista sa ubos. Hinumdumi nga “ang Pulong” diha sa Juan 1:1, 14 nagpasabut nga mao ang Manluluwas.)

    1. Siya “diha na sukad pa sa sinugdanan” uban sa Dios nga Amahan (Juan 1:1–2). Ipahibalo nga ang misyon sa Manluluwas nagsugod sa kalibutan nga wala pa dinhi sa yuta, sa wala pa siya matawo sa Bethlehem.

    2. Siya mao ang Dios (Juan 1:1). Ipasabut nga kon kita magsulti sa Dios, kita sa kasagaran nagpasabut sa Langitnong Amahan. Bisan pa niana, “ang personahe nga naila nga Jehova sa mga panahon sa Daang Tugon … mao ang Anak, naila nga Jesukristo … kinsa mao usab ang Dios. Si Jesus mibuhat ubos sa pagdumala sa Amahan…. Daghang mga butang nga gisulti sa kasulatan nga gibuhat sa Dios gihimo ni … Jesus” (Ang Giya ngadto sa mga Kasulatan, “Dios”).

    3. Pinaagi kaniya ang ebanghelyo gisangyaw sa kalibutan sa wala pa dinhi sa yuta (Hubad ni Joseph Smith, Juan 1:1).

    4. Siya mibuhat sa tanan nga mga butang (Juan 1:3).

    5. Siya ang Bugtong Anak sa Dios diha sa unod (Juan 1:14; tan-awa usab 1 Nephi 11:14–21). Kini nga doktrina gihisgutan diha sa leksyon 2.

  • Si Apostol Juan miingon nga “diha ni [Jesus] mao ang kinabuhi” (Juan 1:4). Siya usab mipamatuod nga si Jesus mao “ang tinuod nga Kahayag, nga mihayag sa matag tawo nga moabut sa kalibutan” (Juan 1:9). Sa unsa nga paagi nga ang Manluluwas mihatag kaninyo og kinabuhi ug kahayag? (Samtang ang mga sakop sa klase maghisgut niini nga pangutana, ikaw mahimo nga motudlo sa Juan 8:12; 1 Mga Taga-Corinto 15:20–22; Moroni 7:15–18; 41; D&P 88:6–14; ug Ang Giya ngadto sa mga Kasulatan, “Kahayag ni Kristo”.)

  • Unsa ang katuyoan ni Juan sa pagsulat sa iyang pagpamatuod? (Tan-awa sa Juan 20:31.) Unsa ang gipasabut sa “pagtuo nga si Jesus mao ang Kristo”? (Ipasabut nga ang Kristo usa ka Griyego nga pulong nga nagpasabut og dinihugan. Kon kita adunay pagpamatuod nga si Jesus mao ang Kristo, kita mahibalo nga siya mao ang Anak sa Dios ug nga gidihugan ug gi-orden nang daan nga mahimo natong Manluluwas.) Sa unsa nga paagi nga ang pagtuon sa Bag-ong Tugon diha sa Sunday School karong tuiga makatabang pagpalig-on sa inyong pagpamatuod nga si Jesus mao ang Kristo?

  • Unsa ang atong mabuhat ingon nga tinagsa ug ingon nga usa ka klase aron magiyahan pinaagi sa Espiritu samtang kita magtuon sa Bag-ong Tugon? (Tan-awa sa Santiago 1:5–6; D&P 50:17–22; 88:118.)

  • Sa unsa nga paagi nga ang mga pulong sa Juan 1:10–14 atong magamit, bisan tuod kita wala didto sa panahon sa pagpangalagad dinhi sa yuta sa Manluluwas?

    Si Elder Thomas S. Monson nagtudlo:

    “Kita dili kinahanglang moduaw sa Balaang Yuta aron bation nga duol siya nato. Kita dili kinahanglan nga molakaw subay sa mga baybayon sa Galilea o sa taliwala sa mga bungtod sa Judea aron makalakaw diin si Jesus milakaw.

    “Diha sa tinuod gayud nga hunahuna, ang tanan makalakaw diin si Jesus milakaw kon, uban sa iyang pulong diha sa atong mga ngabil, sa iyang espiritu diha sa atong mga kasingkasing, ug sa iyang mga pagtulun-an diha sa atong mga kinabuhi, kita nagpanaw diha sa pagkamortal” (sa Conference Report, Abr. 1974, 70; o Ensign, Mayo 1974, 48).

Panapos

Pamatuod kabahin ni Jesukristo ug ipadayag ang imong mga gibati mahitungod sa pagkat-on diha kaniya pinaagi sa pagtuon sa Bag-ong Tugon.

Pasaligi ang mga sakop sa klase nga ang ilang mga pagpamatuod sa Manluluwas motubo samtang sila magtinguha sa paggiya sa Espiritu diha sa ilang pagtuon sa Bag-ong Tugon ug samtang sila moapil sa panaghisgutan diha sa klase. Awhaga sila sa paggamit sa Giya sa Pagtuon sa Sakop sa Klase sa Bag-ong Tugon samtang magtuon sila sa mga kasulatan agi og pagpangandam alang sa matag klase.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Overview sa Bag-ong Tugon

Dapita ang mga sakop sa klase sa pag-abli sa pahina sa mga Sulod diha sa Biblia ug ribyuha ang mga ngalan sa 27 ka mga basahon sa Bag-ong Tugon. Ipasabut nga ang Bag-ong Tugon mahimong mabahin ngadto sa upat ka mga bahin (mahimo nimo kining ilista diha sa pisara):

  1. Ang mga Ebanghelyo (Mateo, Marcos, Lucas, ug Juan), nga usa ka talaan ug pagsaksi sa kinabuhi, misyon, ug mga pagtulun-an ni Jesukristo.

  2. Ang basahon sa Mga Buhat, nga mao ang istorya sa pangalagad sa mga Apostoles human sa kamatayon ug Pagkabanhaw ni Jesus. Kini nga basahon nagpukos sa buluhaton ni Pedro uban sa mga Judeo ug buluhaton ni Pedro uban sa mga Hentil.

  3. Ang mga epistola (mga sulat) ni Pablo ug uban pang mga pangulo sa Simbahan, nga gisulat aron pagtudlo ug paglig-on sa mga Santos sa ilang panahon.

  4. Ang pagpadayag sa Ginoo ngadto ni Apostol Juan didto sa isla sa Patmos.

2. Pagpasalida sa video

Kon ang Family Home Evening Video Supplement 2 (53277) anaa, mahimo nimong ipasalida ang lima ka minuto nga bahin nga “What Think Ye of Christ?” Gamita ang pasundayag aron pagpaila sa Bag-ong Tugon ug aron paghatag og gibug-aton sa kamahinungdanon sa pagbaton og usa ka pagpamatuod nga si Jesus mao ang Kristo.

Kon ang New Testament Video Presentations (53914) anaa, mahimo nimong ipasalida ang “The Message of the New Testament,” duha ka minuto nga bahin.

3. “Siya … gipadala aron paghatag og saksi niana nga Kahayag” (Juan 1:8).

Ipabasa sa usa ka sakop sa klase ang Juan 1:6–8.

  • Kinsa ang tawo nga gihisgutan niining bersikuloha? (Si Juan Bautista.) Unsa ang iyang misyon? (Tan-awa sa Juan 1:8.) Sa unsa nga paagi nga kita, sama ni Juan, “maghatag og saksi niana nga Kahayag”?