“Unaha Ninyo Pagpangita ang Gingharian sa Dios”

Mateo 6–7

Katuyoan

Aron pag-awhag sa mga sakop sa klase nga mahimong mas mahalaron nga mga tinun-an ni Jesukristo.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan, diin mao ang sumpay sa Wali sa Bukid:
1. Mateo 6:1–6, 16–21. Si Jesus mitudlo sa iyang mga tinun-an sa paghatag og mga limos, pag-ampo, ug pagpuasa sa tago ug pagtigum og mga bahandi didto sa langit kaysa sa kalibutan.
2. Mateo 6:7–13; 7:7–11. Siya mipakita sa iyang mga tinun-an unsaon sa pag-ampo ug mitudlo nga ang Langitnong Amahan mopanalangin niadto kinsa mangayo kaniya alang sa unsa ang ilang gikinahanglan.
3. Mateo 6:14–15; 7:1–6, 12. Si Jesus mitudlo sa iyang mga tinun-an sa pagpasaylo sa uban, sa paghukom sa matarung nga paagi, ug sa pagtagad sa uban ingon nga sila buot nga pagatagdon.
4. Mateo 6:22–34; 7:13–29. Siya mitudlo sa iyang mga tinun-an nga sila pagapanalanginan tungod sa pag-alagad sa Langitnong Amahan ug sa pagbuhat sa iyang kabubut-on.
Dugang nga basahonon: Lucas 6:37–49; 11:1–13, 34–36; 12:22–34; 16:13; 3 Nephi 13–14.
Kon duna kay hulagway sa Wali sa Bukid (62166 853; Pakete sa mga Hulagway sa Ebanghelyo 212) gamita kini panahon sa leksyon.
Tingali gusto sab nimong andamon ang pagkanta sa “The Wise Man and the Foolish Man” (Children’s Songbook, 281) uban sa mga sakop sa klase.
Sugyot alang sa pagtudlo: Ang mga istorya nga makahulagway sa mga baruganan sa ebanghelyo ug makapabilin sa atensyon sa mga sakop sa klase ingon nga ang ubang mga paagi sa pagtudlo makahimo. Si Jesus pirmi mogamit og mga istorya aron sa pagtudlo og mahinungdanon nga mga leksyon o mopatin- aw og lisud sabton nga mga ideya. Samtang ikaw mag-andam sa imong mga leksyon, paghunahuna kon unsaon nimo paggamit og mga istorya aron sa pagtabang sa mga sakop sa klase sa pagsabut sa mga baruganan sa ebanghelyo. Kon mosaysay ka og istorya, siguroha nga ang mga sakop sa klase makasabut kon ang imong gisulti tinuod ba nga istorya o dili tinuod nga sugilanon nga imong gibuhat aron makahatag og pagtulun-an. (Tan-awa sa Teaching, No Greater Call [36123], mga pahina 179–82.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Isaysay ang mosunod nga sugilanon sa imong kaugalingon nga mga pulong:

Si Elder William R. Bradford sa Seventy sa makausa nakigsulti sa bishop sa usa ka ward kansang mga batan-on nagtrabaho aron makakitag salapi alang sa usa ka kalihokan. Ang bishop mihangyo kang Elder Bradford kon siya mahimong bang makatabang sa mga batan-on nga matagaan og pahalipay alang sa ilang nahimo. Sa katingala sa bishop, si Elder Bradford miingon nga dili siya. Siya miingon nga siya nalipay nga ang batan-on nga mga lalaki mitrabaho og maayo, apan dili mahinungdanon nga sila makadawat og pasidungog sa publiko tungod niana nga buhat.

Sa dihang ang mga batan-on nakahukom sa paghatag sa ilang salapi ngadto sa kinatibuk-ang pundo sa misyonaryo sa Simbahan kay sa paggamit niini alang sa kalihokan, sila buot magpahulagway uban ni Elder Bradford samtang sila naghatag, ug sila buot nga ang hulagway ug usa ka artikulo niini ibutang diha sa mantalaan. Si Elder Bradford nakapatingala kanila pag-usab pinaagi sa pagsulti nga “dili”. Siya misulti sa bishop: “Ikaw mahimong maghunahuna sa pagtabang sa imong mga batan-on sa pagkat-on og labaw pa ka taas nga pasidungog. Ang pasidungog gikan sa langit hilum. Kini mainampingon ug hilum nga girekord didto. Ipatagamtam kanila ang hingpit nga kalipay ug ipaangkon ang bahandi diha sa ilang mga kasingkasing ug kalag nga moabut gikan sa hilum, dili hinakog nga pag-alagad” (sa Conference Report, Okt. 1987, 90–91; o Ensign, Nob. 1987, 75).

Pang-atensyon nga Kalihokan

Unsa nga mga leksyon ang atong makat-unan gikan sa tubag ni Elder Bradford ngadto sa mga batan-on?

Ipasabut nga ang usa ka leksyon nga atong makat-unan mao nga kita kinahanglan nga mohimo og maayo nga mga butang tungod kay kita naghigugma man sa Dios ug buot nga mopahimuot kaniya, dili tungod kay kita buot nga modawat og pasidungog gikan sa uban nga mga tawo. Kini mao ang usa sa mga hiyas sa usa ka tinuod nga tinun-an ni Jesukristo.

Isulat ang Tinuod nga mga Tinun-an diha sa pisara. Samtang ikaw maghisgut sa Wali sa Bukid, ilista ang mga kinaiya sa tinuod nga pagkatinun-an nga gitudlo sa Manluluwas dinhi niini nga wali.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, awhaga ang matag sakop sa klase sa paghunahuna unsa ang iyang angay nga buhaton aron mahimong mas labaw nga matinud-anon nga tinun-an ni Kristo. Awhaga ang matag sakop sa pagpaambit sa personal nga mga kasinatian nga may kalabutan sa mga baruganan sa tinuod nga pagkatinun-an.

1. Ang tinuod nga mga tinun-an mobuhat sa matarung nga mga butang alang sa matarung nga mga rason.

Basaha ug hisguti ang Mateo 6:1–6, 16–21.

Nganong gisaway man ni Jesus ang pipila ka mga tawo nga nagbuhat sa maayo nga mga butang sama sa paghatag og limos (paghatag sa mga kabus), pag-ampo, ug pagpuasa? (Tan-awa sa Mateo 6:1–2, 5, 16. Sila nagbuhat niini nga mga butang tungod sa sayop nga rason.) Si Jesus mitawag niining mga tawhana nga mga maut o hipokrito. Unsa man ang usa ka maut? (Usa ka tawo kinsa nagpakaaron-ingnon nga adunay piho nga mga kinaiya apan wala magbaton niini; usa ka tawo kinsa mosulay sa pagpakita nga matarung apan dili diay. Ang Griyego nga pulong sa maut mahimo usab nga mahubad nga “tigpakaaron- ingon”. Tan-awa sa Mateo 15:8; Lucas 11:39.)
Unsa man unyay ganti sa mga tawo nga mobuhat og maayo nga mga butang aron makit-an sa uban? (Tan-awa sa Mateo 6:2, 5, 16.) Unsa nga mga butang nga malagmit atong buhaton aron makit-an sa uban kaysa pagpahimuot sa Dios? Sa unsa nga paagi nga kita makalimpyo sa atong mga tinguha sa pagalagad ug paghimo og uban pang maayo nga mga buhat?
Dinhi niini nga wali, unsa ang gitudlo ni Jesus mahitungod sa unsay angay natong hatagan og mas dakog bili? (Tan-awa sa Mateo 6:19–21.) Unsa ang gipasabut sa “pagtigum … og mga bahandi sa langit”? Unsa ang pipila nga langitnong mga bahandi nga atong mahimong pangitaon? (Tan-awa sa D&P 18:14–16 ug 130:18–19 alang sa duha ka mga ehemplo.)
Unsa ang gipasabut sa “kay hain gani ang inyong bahandi, atua usab didto ang inyong kasingkasing”? Unsaon nato pag-ila sa unsay atong gipakabahandi? (Usa ka paagi mao ang pagtimbangtimbang sa gidaghanon sa panahon, salapi, ug hunahuna nga atong gihatag ngadto sa usa ka butang.) Unsa ang gipakabahandi karon sa mga katawhan? Hangyoa ang mga sakop sa klase sa paghunahuna mahitungod sa mga butang nga ilang gibahandi ug sa hilum nga paagi maghunahuna unsa ang gisulti niini nga mga bahandi mahitungod kon hain ang ilang mga kasingkasing.

2. Ang tinuod nga mga tinun-an mosunod sa ehemplo sa pag-ampo sa Manluluwas.

Basaha ug tukia ang Mateo 6:7–13; 7:7–11. Ipasabut nga ang Mateo 6:9–13 gitawag ingon nga Pag-ampo sa Ginoo.

Unsa ang gitudlo kanato sa Pag-ampo sa Ginoo mahitungod kon sa unsa nga paagi kita angay nga mag-ampo? (Tan-awa sa Mateo 6:9–13.)
Sa unsa nga paagi nga ang Pag-ampo sa Ginoo nagpakita sa balaan nga pagtahud ug pagrespeto ni Jesus alang sa Langitnong Amahan? Sa unsa nga paagi nga kita makapakita sa balaan nga pagtahud ug pagrespeto alang sa Langitnong Amahan kon kita mag-ampo?

Si Elder Dallin H. Oaks mikomentaryo sa matang sa pinulongan nga atong gamiton kon kita mag-ampo: “Ang espesyal nga pinulongan sa pag-ampo magsunod og nagkalainlain nga mga porma diha sa nagkalainlain nga mga pinulongan, apan ang baruganan kanunay nga managsama. Kinahanglan nga kita makigsulti sa atong mga pag-ampo ngadto sa atong Langitnong Amahan sa mga pulong diin ang magsulti niana nga pinulongan paga-ubanan og paghigugma ug respeto ug balaan nga pagtahud ug pagkasuod…. Mga lalaki ug mga babaye kinsa buot mopakita og respeto mohatag og panahon sa pagkaton sa espesyal nga pinulongan sa pag-ampo” (sa Conference Report, Abr. 1993, 17, 20; o Ensign, Mayo 1993, 16, 18).
Unsaon nato nga malikayan ang paggamit sa “kawang nga mga pagsublisubli” kon kita mag-ampo? (Tan-awa sa Mateo 6:7.)
Tungod kay ang atong Langitnong Amahan nahibalo nang daan unsay atong gikinahanglan sa wala pa kita mag-ampo (Mateo 6:8), ngano nga kinahanglan pa man nga kita mag-ampo? Ngano nga ang pagpangayo, pagpangita, ug pagtuktok (Mateo 7:7) gikinahanglan man alang sa atong espirituhanong pag-uswag? Sa unsa nga paagi nga kita makapangayo og tabang sa mas makugihon nga paagi ngadto sa Langitnong Amahan?
Unsaon nato pagsabut ang saad sa Manluluwas nga “ang tanan nga magapangayo makadawat”? (Mateo 7:8) Ngano man nga usahay dili kita makadawat sa unsay atong gipangayo sa panahon nga kita nangayo niini o sa paagi nga kita gusto niini? (Tan-awa sa 3 Nephi 18:20.) Giunsa ninyo pagkahibalo nga ang Dios nahibalo sa unsay labing maayo alang kaninyo?

3. Ang tinuod nga mga tinun-an mabination ug makiangayon nga motagad sa uban.

Basaha ug tukia ang Mateo 6:14–15; 7:1–6, 12.

Ngano kaha nga ang Manluluwas nagsugo man kanato sa pagpasaylo sa uban? Unsaon nato nga mamahimong mas mapasayloon pa?
Ang Hubad ni Joseph Smith miusab sa Mateo 7:1 nga mabasa, “Ayaw paghukom sa dili matarung nga paagi, aron kamo dili pagahukman; apan hukom sa matarung nga paghukom” (Hubad ni Joseph Smith, Mateo 7:2). Unsa ang matarung nga paghukom? Unsa ang kadaot nga moabut kanato ug niadtong atong hukman kon kita mihukom sa dili matarung nga paagi? Unsaon nato pagsiguro nga kita magahukom gayud sa matarung nga paagi? (Tan-awa sa Mateo 7:3–5; Moroni 7:14–18.)
Si Jesus miingon nga ang tawo nga mosulay sa pagkorihir sa uban sa dili matarung nga paagi usa ka maut o hipokrito (Mateo 7:4–5). Sa unsa nga paagi nga ang paghukom sa dili matarung nga paagi usa ka timaan sa pagkamaut?
Ang pagtulun-an diha sa Mateo 7:12 sa kasagaran gitawag og Buluwanon nga Lagda. Unsa nga mga kasinatian ang nakapakita kaninyo sa bili niini nga baruganan? Sa unsa nga paagi nga ang pagsunod sa Buluwanon nga Lagda nakahimo kanato nga mas maayong mga tinun-an ni Jesukristo?

Si Elder Marvin J. Ashton mihulagway og usa ka miting diin usa ka pundok sa mga miyembro sa Simbahan mituki sa pangutana nga “Unsaon nimo pagkahibalo kon ang usa ka tawo nakabig ba gayud kang Jesukristo?”:

“Sulod sa kwarentay singko minutos kadtong nanambong mihatag og daghan nga mga sugyot agi og tubag niini nga pangutana, ug ang pangulo mainampingong misulat sa kada tubag diha sa pisara. Ang tanan nga mga komentaryo maayo ug angay. Apan sa pagkahuman niana, kining bantugan nga magtutudlo mipapas sa tanan nga gisulat. Dayon nagsulti nga ang tanan nga mga komentaryo maanindot ug kini gipasalamatan, siya mitudlo og usa ka mahinungdanon nga baruganan: ‘Ang labing maayo ug labing tin-aw nga timailhan nga kita nag-uswag sa espirituhanong paagi ug nagduol ngadto ni Kristo mao ang paagi nga kita mitagad sa ubang mga tawo.’ ”

Si Elder Ashton midugang: “Ang atong pagtagad sa mga sakop sa atong mga pamilya, sa atong mga higala, kadto kinsa atong gikauban sa trabaho matag adlaw ingon ka mahinungdanon sa ubang mas makita nga mga baruganan sa ebanghelyo nga usahay atong hatagan og gibug-aton” (sa Conference Report, Abr. 1992, 25; o Ensign, Mayo 1992, 20).

4. Ang tinuod nga mga tinun-an moalagad sa Dios ug mobuhat sa iyang kabubut-on.

Basaha ug tukia ang pinili nga mga bersikulo gikan sa Mateo 6:22–34; 7:13–29.

Ngano nga imposible man ang pag-alagad og dungan sa Dios ug sa mga bahandi, o sa pagkakalibutanon? (Tan-awa sa Mateo 6:24.) Unsa nga mga panalangin ang gisaad sa Dios niadto kinsa moalagad kaniya? (Tan-awa sa Mateo 6:25–33; D&P 11:7.)
Si Jesus misaad nga kon kita “mangita … pag-una sa gingharian sa Dios,” kita pagahatagan sa tanang mga butang nga atong gikinahanglan (Mateo 6:33). Unsa nga mga kasinatian ang nakatabang kaninyo sa pag-angkon og pagpamatuod sa niini nga saad?
Sa unsa nga paagi nga ang pagkakalibutanon makapalayo sa atong pagkamaunongon ug pag-alagad gikan sa Dios? Unsa ang pipila ka mga paagi nga kita malagmit matintal sa pagtinguha sa kalibutanong mga butang una pa sa mga butang sa Dios? (Ang mga tubag mahimong maglakip sa pagdugay sa pagbayad sa ikapulo hangtud human kita makapalit sa mga butang nga atong gikinahanglan o butang nga atong gikagustohan o paghukom nga dili moalagad sa misyon tungod sa usa ka tinguha alang sa kalibutanong mga butang.)
Sa hapit na mahuman si Jesus sa iyang wali, unsa ang iyang gitudlo mahitungod sa pagsulod sa gingharian sa langit? (Tan-awa sa Mateo 7:13–14; 21–23.) Nganong makahuluganon man nga ang dalan paingon sa kinabuhing dayon pig-ot, samtang ang dalan paingon sa pagkalaglag halapad?
Pagkahuman sa Wali sa Bukid, si Jesus misulti sa sambingay sa maalamon nga tawo ug sa buang nga tawo (Mateo 7:24–27). Sa unsa nga paagi nga kini nga sambigay magamit kanato? Unsa ang “bato” diin kita kinahanglan motukod? (Tan-awa sa Helaman 5:12.) Unsa ang gitukod sa uban nga mga tawo diha sa ilang mga kinabuhi nga malagmit matandi sa balas?

Mahimong imong pakantahon ang mga sakop sa klase sa “The Wise Man and the Foolish Man” (Children’s Songbook, 281).

Panapos

Ipamatuod ang kamahinungdanon sa pagsunod ni Jesukristo. Awhaga ang mga sakop sa klase sa paghunahuna unsa ang ilang kinahanglan nga buhaton aron mamahimong mas maayo nga mga tinun-an ni Kristo.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. “Maila ninyo sila pinaagi sa ilang mga bunga” (Mateo 7:20)

Si Jesus mipasidaan sa iyang mga sumusunod mahitungod sa mini nga mga propeta—mga tawo kinsa nagtudlo og mga mini nga doktrina o mosulay pagdala sa mga katawhan palayo gikan ni Kristo (Mateo 7:15). Unsaon nato pag-ila tali sa mini ug tinuod nga mga propeta? (Tan-awa sa Mateo 7:16–20; tan-awa usab sa Moroni 7:5, 10–11.) Unsaon nga ang Mateo 7:20 atong magamit ingon man sa mga propeta?

2. Pagpasalida sa video

Ang ikaduhang bahin sa “New Testament Customs,” usa ka pinili gikan sa New Testament Video Presentations (53914), naghatag og pasabut nga ang mga Judeo migamit sa mga plikteria [phylacteries] ug mga borlas [fringes]. Kon ikaw mopasalida niini nga bahin, hisguti kon sa unsang paagi nga kining mga butanga, nga kaniadto gigamit sa pagpakita og pagkamasulundon ngadto sa Dios, nahimo nga mga simbolo sa mga tinguha sa mga Pariseo “aron makita sa mga tawo” samtang sila nagsimba (Mateo 6:5).

3. Pagpangita sa puling diha sa atong kaugalingon nga mata

Ipaambit ang mosunod nga istorya mahitungod kon giunsa ni Propeta Joseph Smith pagtudlo ang usa ka igsoong babaye pagtan-aw sa puling sa iyang kaugalingong mata kon motagad sa usa ka personal nga kalapasan:

Usa ka babaye miadto kang Propeta Joseph Smith nga nasuko mahitungod sa pipila ka mga butang nga gisulti sa laing miyembro sa simbahan mahitungod kaniya. Ang Propeta misulti kaniya nga kon ang gisulti sa maong tawo dili tinuod, dili kini niya panumbalingon, tungod kay ang kamatuoran magpabilin apan ang mga bakak dili. Ang babaye mibati nga ang mga gipangsulti dili tinuod, pero dili paigo kaniya nga iya ra kining ipakabaliwala. Ang Propeta dayon misulti sa iyang pamaagi sa pagtagad sa ingon niini nga mga komentaryo:

“Kon ang usa ka kaaway misulti og usa ka makaulaw nga istorya mahitungod kaniya, nga kadaghan kini gibuhat, sa dili pa siya mohatag og paghukom siya naghunahuna ug iyang gihunahuna pag-usab ang panahon ug dapit ug nahitaboan sa istorya aron sa pagsuta kon siya wala ba makasulti og dili maayo nga pulong o binuhatan nga nakahimo og babag diin ang istorya gipasiugdahan. Kon iyang makit-an nga siya mibuhat niini, siya miingon nga sa iyang kasingkasing iya dayong pasayloon ang iyang kaaway, ug mibati nga mapasalamaton nga siya nakadawat og pasidaan sa usa ka kahuyang nga wala niya mahibaloi nga anaa kaniya.”

Ang Propeta misulti sa igsoong babaye nga siya kinahanglan mainampingon nga maghunahuna mahitungod kon siya sa wala tuyoa nakahatag sa tawo og bisan unsa nga hinungdan nga siya makasulti niadto nga mga butang. Human sa daghang mga paghunahuna, siya nakaamgo nga siya nakabuhat, ug siya nagpasalamat sa Propeta ug mibiya (Tan-awa sa Jesse W. Crosby, kinutlo ni Hyrum L. Andrus ug Helen Mae Andrus, mga tighugpong, They Knew the Prophet [1974], 144.)

4. Pangbatan-on nga kalihokan

Isulat ang kada usa sa mosunod nga mga hugpong sa mga pulong gikan sa Mateo 6 ug 7 diha sa managlahi nga kard:

Ayaw pahibaloa ang imong tuong kamot (6:3)	Sa gibuhat sa imong walang kamot (6:3)
Ang inyong Amahan nga nagatan-aw sa tago (6:6)	Magabalos kaninyo sa dayag (6:6)
Ayaw kamo pagyamyam (6:7)	Sa mga pamulongpulong nga walay kapuslanan (6:7)
Pasayloa ang mga tawo (6:14)	sa ilang mga paglapas (6:14)
Pagtigum kamo (6:20)	Og mga bahandi alang kaninyo didto sa langit (6:20)
Dili kamo makaalagad (6:24)	Sa Dios ug sa mga bahandi (6:24)
Pangitaa og una (6:33)	Ang gingharian sa Dios (6:33)
Kuhaa ang troso (7:5)	Gikan sa kaugalingon mong mata (7:5)
Pangayo (7:7)	Ug kamo pagahatagan (7:7)
Pangita (7:7)	Ug kamo makakaplag (7:7)
Pagbantay sa (7:15)	Mini nga mga propeta (7:15)
Pinaagi sa ilang mga bunga (7:20)	Maila ninyo sila (7:20)

Ibutang ang mga kard nga kinulob diha sa lamesa o sa salog. Bahina ang mga sakop sa klase sa duha ka mga grupo, ug papulipuliha sila sa pagpili sa mga kard. Kon ang mga kard magkatukma, ang grupo mokuha niini gikan sa lamesa o sa salog ug mokuha og lain nga kard. Kon ang kard wala magkatukma, ang grupo mobutang niini sa orihinal niini nga pagkabutang, ug ang lain nga grupo mokuha og kard. Ipadayon hangtud ang tanan nga mga kard magkatukma.