“Nga Gihigugma sa Dios, nga Gipanagtawag aron Mamahimong mga Balaan”

Katuyoan

Aron pagpahinumdom sa mga miyembro sa klase nga mga anak sila sa Dios ug aron awhagon sila sa pagpakabuhi nga takus sa ilang balaan nga kabilin.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Mga Taga-Roma 2–5. Si Pablo nagtudlo nga ang tanang tawo hatagan og kaangayan pinaagi sa hugot nga pagtuo diha ni Jesukristo, nga makita pinaagi sa matarung nga mga buhat.
2. Mga Taga-Roma 6; 8. Si Pablo nagtudlo nga ang mga anak sa Dios mahimong matawo pag-usab ug mahimong mga isigkamanununod uban kang Kristo.
3. Mga Taga-Roma 12–13; 15:17. Si Pablo mitambag sa mga taga-Roma sa pagpuyo sama sa mga Santos.
Dugang nga basahonon: Ang Giya ngadto sa mga Kasulatan, “Grasya,” 72; “Mga sulat ni Pablo, Mga Taga-Roma,” 55.
You may want to invite a soloist or small group to sing or play “I Am a Child of God” (Hymns, no. 301, or Children’s Songbook, 2–3) or “I Feel My Savior’s Love” (Children’s Songbook, 74–75). If this is not feasible, you may want to prepare to sing one or both of these songs with class members.
Sugyot alang sa pagtudlo: Diha sa iyang sulat ngadto sa mga taga-Roma, si Pablo mipahinumdom sa mga magtutudlo sa kamahinungdanon sa pagpuyo sa mga baruganan nga ilang gitudlo (Mga Taga-Roma 2:23–22). Ang imong ehemplo makatudlo sa mga sakop sa klase sa labaw pa kay sa imong pulong. Ipakita sa imong klase nga ang imong pagpamatuod sa mga baruganan sa ebanghelyo nagagikan sa pagpuyo niadtong mga baruganan matag adlaw (Juan 7:17). (Tan-awa sa Teaching, No Greater Call [36123], mga pahina 18–19.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipabasa sa usa ka sakop sa klase ang Mga Taga-Roma 3:10. Ipasabut nga niini nga bersikulo si Pablo wala magpasabut nga walay bisan usa nga mibuhat og matarung nga mga lihok; hinoon, siya nagtudlo nga walay tawo sa kalibutan nga hingpit nga matarung. Si Kristo mao lamang ang tawo kinsa mipuyo sa usa ka walay sala nga kinabuhi. Ang tanan makasala (tan-awa usab sa Mga Taga-Roma 3:23).

Kon kita makasala, unsay kinahanglan natong buhaton aron mahimong limpyo pag-usab? (Magbaton og hugot nga pagtuo diha ni Kristo ug maghinulsol sa atong mga sala aron kita mahimong makadawat sa makalimpyo nga gahum sa iyang Pag-ula.)

Ipasabut nga kon kita nakabuhat og sala, kita dili mahimong hingpit nga limpyo pag-usab sa atong kaugalingon. Kini nga leksyon maghisgut sa unsa nga paagi nga kita mahimong limpyo pinaagi sa Pag-ula ni Jesukristo, usa ka paagi nga gitawag ni Pablo og paghatag og kaangayan.

Paghisgut ug Paggamit sa Kasulatan

Sa mainampoong paagi pagpili og mga tudling sa kasulatan ug mga pangutana nga mas makatubag sa mga panginahanglan sa mga sakop sa klase. Awhaga ang mga sakop sa klase sa pagpaambit sa ilang mga pagpamatuod sa mga doktrina ug mga baruganan nga gihisgutan diha sa leksyon.

1. Kita mahatagan og kaangayan pinaagi sa hugot nga pagtuo diha ni Jesukristo.

Basaha ug hisguti ang Mga Taga-Roma 2–5. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga si Pablo nagsige og sulat ngadto sa mga miyembro sa Simbahan sa pipila ka mga dapit kinsa miusab sa pagbuhat sa balaod ni Moises, nagtuo nga ang estrikto nga pagsunod niini nga balaod gikinahanglan alang sa kaluwasan. Bisan tuod nga ang mga Santos sa Roma mga lig-on diha sa ebanghelyo (Mga Taga-Roma 1:8), si Pablo misulat niini nga sulat aron pagpasabut nga ang pagkadawat og kaangayan ug kaluwasan moabot pinaagi sa hugot nga pagtuo diha ni Kristo, dili pinaagi sa mga buhat diha sa balaod ni Moises.

Diha sa iyang sulat, si Pablo naninguha sa pagtabang sa mga Santos nga taga-Roma nga makasabut sa doktrina sa pagkadawat og kaangayan. Unsa ang gipasabut nga mahimong makadawat og kaangayan? (Aron mapasig-uli ngadto sa Dios, mapasaylo gikan sa silot tungod sa sala, ug mapadayag nga matarung ug walay sala.)
Ngano nga kita kinahanglan man nga makadawat og kaangayan? (Tan-awa sa Mga Taga-Roma 3:10–12, 23; tan-awa usab sa Alma 7:21. Kitang tanan nakasala sa Dios ug nahimong dili limpyo tungod sa sala. Tungod kay walay dili limpyo nga butang nga makapuyo uban sa Dios, kita kinahanglan mahatagan og kaangayan aron makabalik ngadto kaniya.)
Unsa ang gitudlo ni Pablo kon sa unsa nga paagi kita makadawat og kaangayan? (Tan-awa sa Mga Taga-Roma 3:24, 28; 5:1–2; tan-awa usab sa 2 Nephi 2:6. Kita makadawat og kaangayan pinaagi sa grasya ni Jesukristo ug sa atong hugot nga pagtuo diha kaniya.) Unsa man ang grasya? (Balaan nga tabang ug kaligon; tan-awa diha sa Ang Giya ngadto sa mga Kasulatan, “Grasya.”) Sa unsa nga paagi nga kini nga balaan nga tabang mahimong maanaa kanato? (Tan-awa sa Mga Taga-Roma 5:8–11; 2 Nephi 2:7–8. Ang grasya ni Jesukristo mahimong maanaa kanato pinaagi sa iyang Pag-ula.) Ngano nga gikinahanglan alang kanato nga magbaton og hugot nga pagtuo aron hingpit nga makadawat sa grasya sa Manluluwas?
Si Pablo mipasabut nga ang pagkadawat og kaangayan moabut pinaagi sa grasya ni Jesukristo, dili pinaagi “sa buhat sa balaod” (Mga Taga-Roma 3:20, 24, 28). Ngano nga kita dili makaangkon og kaangayan ug kaluwasan pinaagi lamang sa atong mga buhat? (Tan-awa sa Mosiah 2:20–21, Alma 22:14.)
Daghan ang mga tawo nga mihubad sa mga sulat ni Pablo nga nagpasabut nga kita mahatagan og kaangayan pinaagi sa hugot nga pagtuo lamang bisan walay maayo nga mga buhat. Unsa ang relasyon tali sa atong mga lihok (o mga buhat) ug sa pagkadawat og kaangayan pinaagi sa grasya ni Kristo? (Tan-awa sa Mga Taga-Roma 3:31; Santiago 2:14–18, 24; 2 Nephi 25:23; D&P 88: 38–39.)

Si Propeta Joseph Smith miingon: “Aron mahatagan og kaangayan sa atubangan sa Dios kita kinahanglang maghigugmaay sa usag usa: kita kinahanglang mobuntog sa dautan; kita kinahanglang moduaw sa mga walay amahan ug sa biyuda diha sa ilang mga kasakitan, ug kinahanglang magpabilin kita nga walay lama gikan sa kalibutan: tungod kay ang ingon nga mga hiyas modagayday gikan sa dakong tuburan sa tinuod nga relihiyon, maglig-on sa atong hugot nga pagtuo pinaagi sa pagdugang sa matag maayo nga kinaiya nga magdayandayan sa mga anak sa bulahan nga Jesus. Kita makaampo diha sa angay nga pag-ampo; kita makahigugma sa atong mga silingan sama sa atong mga kaugalingon, ug nga magmatinud-anon diha sa kalisdanan, nakahibalo nga ang ganti sa ingon mas dako diha sa gingharian sa langit. Makapahupay! Makapalipay!” (Teachings of the Prophet Joseph Smith, pinili ni Joseph Fielding Smith [1976], 76.

2. Kita mahimong matawo pag-usab ug mahimong isigkamanununod ni Kristo.

Basaha ug hisguti ang pinili nga mga bersikulo gikan sa Mga Taga-Roma 6 and Mga Taga-Roma 8.

Si Pablo mitandi sa bunyag ngadto sa kamatayon, paglubong, ug pagkabanhaw. Sa unsa nga paagi nga ang bunyag nagrepresentar sa kamatayon, paglubong, ug pagkabanhaw (bag-ong natawo)? (Tan-awa sa mga Taga-Roma 6:3–4; D&P 76:50–52.) Sa unsa nga paagi nga ang bunyag maoy bag-o nga pagpakatawo alang kaninyo?

Ipasabut nga ang bunyag pinaagi sa pag-unlod maoy simbolo sa atong espirituhanon nga pagpakatawo pag-usab. Sa dihang kita anaa sa ilawom sa tubig, kini usa ka simbolo nga kita naglubong sa atong daan nga kaugalingon diha sa lubnganan. Sa dihang kita migawas gikan sa tubig, usa kana ka simbolo nga kita nalimpyohan. Kita nahimong bag-o nga tawo kinsa nakigsaad sa pagsunod ni Kristo.
Sa unsa nga paagi nga kita magpabilin sa kalimpyo ug sa “kabag-o sa kinabuhi” (Mga Taga-Roma 6:4) nga atong nasinati diha sa bunyag? (Ang mga tubag mahimong maglakip pinaagi sa pagbag-o sa atong mga pakigsaad diha sa bunyag samtang kita moambit sa sakramento matag semana, pinaagi sa paghinulsol ug pagpangayo og pasaylo gikan sa Ginoo, ug pinaagi sa pagsunod sa matag adlaw uban sa bag-o nga paninguha sa pag-alagad sa Dios.)
Unsa ang gipasabut sa pagka “kalibutanong panghunahuna”? (Tan-awa sa Mga Taga-Roma 8:5–6.) Unsa ang mga sangputanan sa pagkakalibutanon og panghunahuna? (Tan-awa sa Mga Taga-Roma 8: 6–8, 13.) Sa unsa nga paagi nga kita makasalikway sa pagkakalibutanon gikan sa atong mga hunahuna ug kasingkasing? Sa unsang paagi nga kamo napanalanginan sa dihang gipili ninyo ang pagka-espirituhanon sa panghunahuna?
Si Pablo mipamatuod “nga kita mga anak sa Dios” (Mga Taga-Roma 8:16). Sa unsa nga paagi nga kamo naapektohan pinaagi sa kahibalo nga kamo anak sa Dios? Unsa ang gipasabut niini mahitungod sa inyong kapasidad ug potensyal?

Si Elder Dallin H. Oaks miingon: “Hunahunaa ang gahum sa pagtuo nga gitudlo diha sa atong minahal nga awit nga ‘Ako Anak sa Dios’ (Mga Himno ug mga Awit sa mga Bata, 58). … Ania ang tubag sa usa mahinungdanong mga pangutana sa kinabuhi, ‘Kinsa ako?’ Ako anak sa Dios nga adunay espiritu nga nagagikan sa langitnong mga ginikanan. Kana nga pagkaginikanan nagpasabut sa atong mahangturong potensyal. Kana nga gamhanan nga hunahuna maoy usa ka kusog nga makapawala sa kaguol. Kini makapalig-on sa matag usa kanato sa paghimo og matarung nga mga pagpili ug pagpangita sa labing maayo nga anaa kanato. Ugmara diha sa hunahuna sa usa ka batan-on kanang gamhanan nga pagtuo nga siya anak sa Dios, ug nga ikaw mihatag sa pagtahud sa kaugalingon ug pagdasig sa paglihok batok sa mga suliran sa kinabuhi” (sa Conference Report, Okt. 1995, 31; o Ensign, Nob. 1995, 25.)
Kon imong giplano daan ang pagpakanta o pagpatukar sa “Ako Anak sa Dios” ingon nga usa ka espesyal nga pasundayag sa musika, ipakanta kini karon sa solowista o sa gamayng grupo. O kantaha kini uban sa mga sakop sa klase (tan-awa sa seksyon sa “Pagpangandam”).
Unsa ang dakong saad nga gisulti ni Pablo nga madawat sa mga anak sa Dios? (Tan-awa sa Mga Taga-Roma 8:17.) Unsa ang gipasabut nga mahimong isigkamanununod ni Kristo? (Tan-awa sa D&P 76:50, 54–70.) Unsa ang atong buhaton aron makadawat niining dako nga panulundon? (Tan-awa sa D&P 76:51–53.)
Sa unsa nga paagi nga ang pagkahibalo nga kita mga anak sa Dios ug may potensyal nga mahimong isigkamanununod ni Kristo makatabang kanato sa paglahutay sa mga pagsulay niini nga kalibutan? (Tan-awa sa Mga Taga-Roma 8:18, 28, 31; tan-awa usab sa Mga Taga-Roma 5:3–5.) Sa unsa nga paagi nga kamo nakakita nga ang “tanan nga butang magkahiusa alang sa kaayohan ngadto kanila nga nahigugma sa Dios”? (Mga Taga-Roma 8:28).
Unsa ang gitudlo ni Pablo diha sa Mga Taga-Roma 8:35–39 mahitungod sa gugma ni Jesukristo? Sa unsang paagi nga kamo mibati sa gugma sa Manluluwas diha sa inyong kinabuhi? Unsa ang kalainan nga nahimo sa iyang gugma diha sa inyong kinabuhi?

Kon imong giplano daan ang pagpakanta o pagpatukar sa “I Feel My Savior’s Love” isip usa ka espesyal nga pasundayag sa musika, ipakanta kini karon sa solowista o sa gamay nga grupo. O kantaha kini uban sa mga sakop sa klase (tan-awa sa seksyon sa “Pagpangandam”).

3. Kita kinahanglan nga magpuyo ingon nga mga Santos.

Basaha ug hisguti ang pinili nga mga bersikulo gikan sa Mga Taga-Roma 12-13; 15:1–7.

Si Pablo miawhag sa mga Santos nga taga-Roma sa pagtugyan sa ilang mga kaugalingon ingon nga “usa ka buhi nga halad, balaan, hinangponon sa Dios” (Mga Taga-Roma 12:1). Sa unsa nga paagi nga kita makatugyan sa atong mga kaugalingon ingon nga buhi nga mga halad sa Dios? (Tan-awa sa 3 Nephi 9:20; D&P 59:8.)

Si Elder Bruce R. McConkie mipasabut, “Ang pagtugyan [sa kaugalingon] ingon nga usa ka buhi nga sakripisyo mao ang pagpakita sa mapainubsanon nga kasingkasing ug mahinulsulon nga espiritu pinaagi sa pagkamasulundon” (Doctrinal New Testament Commentary, 3 vols. [1966–73], 2:292).
Paul counseled the RoSi Pablo mitambag ngadto sa mga Santos nga taga-Roma sa “dili pagpahiuyon niini nga kalibutan” (Mga Taga-Roma 12:2). Unsa ang uban nga mga paagi nga kita mosulay sa pagpahiuyon sa kalibutan karon? Sa unsa nga paagi nga kita makabuntog niini nga kahimtang? (Tan-awa sa Mga Taga-Roma 12:2.)
Ang Mga Taga-Roma 12 ug Mga Taga-Roma 13 naglista sa daghan nga mga hiyas sa tinuod nga mga Santos. Ipaila kini nga hiyas sa mga sakop sa klase ug ipasulat kanila diha sa pisara. (Ikaw mahimo nga mobahin sa klase ngadto sa gagmay nga mga pundok ug mohangyo sa matag pundok sa pagpangita sa kabahin niini nga kapitulo.) Dayon hisguti ang mosunod nga mga pangutana mahitungod sa pipila niini nga mga hiyas. Ngano nga kini nga hiyas importante nga mapalambo? Unsa ang atong buhaton niining semanaha aron pagpadayon sa pagpalambo niini nga hiyas?
Giunsa ni Pablo pagtudlo kanato sa pagtagad sa atong mga kaaway? (Tan-awa sa Mga Taga-Roma 12:19–21.) Unsa nga mga panalangin ang moabut sa atong mga kinabuhi kon kita motagad sa atong mga kaaway niini nga paagi? Unsa nga mga ehemplo ang inyong nakita sa usa ka tawo nga nagmabination aron pagbuntog sa dautan o sa dautan nga buot?
Unsa nga sugo ang gisulti ni Pablo nga naglakip sa tanang mga sugo? (Tan-awa sa Mga Taga-Roma 13:8–9.) Sa unsa nga paagi nga kini nga sugo naglakip sa tanan nga mga sugo? (Tan-awa sa Mga Taga-Roma 13:10.)
Unsa ang gitudlo ni Pablo mahitungod kon unsaon pagtagad sa mga sakop kinsa lig-on diha sa hugot nga pagtuo ang mga sakop kinsa huyang diha sa hugot nga pagtuo? (Tan-awa sa Mga Taga-Roma 15:1–7.) Unsaon pagtabang sa usa ka tawo kinsa lig-on diha sa hugot nga pagtuo ang usa ka tawo kinsa huyang?

Panapos

Hatagi og gibug-aton nga pinaagi sa hugot nga pagtuo diha ni Jesukristo ug sa matarung nga pagpuyo kita mahimong mapamatarung––mapadayag nga matarung ug nagpasig-uli ngadto sa Dios. Ipamatuod nga kita anak sa Dios ug adunay potensyal nga mahimong isigkamanununod ni Kristo kon kita adunay hugot nga pagtuo diha kaniya ug magpuyo sama sa iyang gisugo kanato.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o tanan niini nga mga ideya isip kabahin sa leksyon.

1. “Ako dili maulaw sa ebanghelyo ni Kristo” (Mga Taga-Roma 1:16)

Ipabasa sa usa ka sakop sa klase ang Mga Taga-Roma 1:16.

Sa unsa nga paagi kita makapakita nga kita dili maulaw sa ebanghelyo ni Jesukristo? (Tan-awa sa 1 Pedro 3:15 alang sa usa ka sugyot. Ilista ang mga tubag sa mga sakop sa klase diha sa pisara, ug awhaga ang matag sakop sa klase sa pagbuhat sa labing ubos usa niini nga mga butang niining mosunod nga semana.)

2. Pangbatan-on nga kalihokan

Hatagi ang matag sakop sa klase og usa ka buok papel ug usa ka bolpen o lapis. Ipasulat sa mga sakop sa klase diha sa ilang mga papel ang mosunod nga pangutana gikan sa Mga Taga-Roma 8:31:

“Kon ang Dios anaa kanato, kinsa ang makabatok kanato?” (Ikaw mahimo nga mogamit sa mga pulong gikan sa Hubad ni Joseph Smith, nga naghatag sa katapusang bahin sa sentence sama sa “kinsa ang magmadaugon batok kanato?”)

Hisguti kon sa unsa nga paagi nga kini nga pamahayag makapalig-on sa mga sakop sa klase sa ilang inadlaw-adlaw nga mga kinabuhi. Awhaga ang mga sakop sa klase sa pagbutang sa kard diin sila makakita niini kanunay.