Sunday School: Doktrina sa Ebanghelyo
Leksyon 13: ‘Hatagan Ko Ikaw sa mga Yawe sa Gingharian’

Leksyon 13

“Hatagan Ko Ikaw sa mga Yawe sa Gingharian”

Mateo 15:21–17:9

Katuyoan

Aron paglig-on sa mga pagpamatuod sa mga sakop sa klase nga si Jesus mao ang Kristo ug nga ang mga yawe sa priesthood nga gihatag didto sa Bungtod sa Transpigurasyon gipahiuli.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mateo 15:21–39. Si Jesus miayo sa anak nga babaye sa usa ka Hentil nga babaye ug milagroso nga mipakaon sa sobra sa 4,000 ka mga tawo, kadaghanan kanila mga Hentil.

    2. Mateo 16:13–19. Si Pedro mipamatuod nga si Jesus mao ang Kristo. Si Jesus nagtudlo nga ang iyang Simbahan gitukod ibabaw sa bato sa pagpadayag ug misaad sa paghatag kang Pedro sa mga yawe sa gingharian.

    3. Mateo 17:1–9. Nahimaya ang panagway ni Jesus sa atubangan nila ni Pedro, Santiago, ug Juan.

  2. Dugang nga basahonon: Marcos 7:24–9:10; Lucas 9:18–36; 12:54–57; Bible Dictionary, “Revelation,” 762; “Transfiguration, Mount of,” 786.

  3. Kon aduna kay kopya sa mapa sa Balaan nga Yuta nga makita sa Bag-ong Tugon, (mapa 11 sa LDS nga edisyon sa Biblia nga giimprinta sa tuig 1999 o lapas pa; mapa 14 nga giimprinta sa wala pay 1999), gamita kini sa panahon sa leksyon. Ikaw mahimo nga mopadako sa kopya sa mapa aron makita pagayo sa mga sakop sa klase.

  4. Sugyot alang sa pagtudlo: Ang LDS nga edisyon sa King James nga Biblia adunay daghang gilakip nga mga tabang sa pagtuon sa kasulatan, naglakip kini sa mga sinulat ubos sa pahina, mga ulohan sa kapitulo, mga mapa, Topical Guide, Ang Giya ngadto sa mga Kasulatan, ug mga kinuha gikan sa Hubad ni Joseph Smith sa Biblia. Gamita kini nga mga kapanguhaan sa pag-andam ug sa pagtudlo sa imong leksyon, ug tabangi ang mga sakop sa klase sa paggamit niini sa ilang personal nga pagtuon sa mga kasulatan.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipaambit ang mosunod nga sugilanon:

Daghang mga katuigan ang milabay, si Presidente Spencer W. Kimball ug pipila ka mga lider sa Simbahan mibisita sa gamay nga katedral didto sa Copenhagen, Denmark, nga gibutangan sa binuhat ni Bertel Thorvaldsen nga gibantug nga mga estatuwa ni Jesukristo ug sa Napulog Duha ka mga Apostoles. Naghisgut kabahin niini nga kasinatian, si Elder Rex D. Pinegar miingon: “Samtang kami nagtan-aw niadtong maanindot nga mga trabaho sa art kami nakamatikod nga si Pedro gidrowing nga may dagko nga mga yawe diha sa iyang mga kamot…. sa dihang kami hapit na mobiya sa katedral, ang Danish nga tig-atiman … nagbarug duol sa ganghaan nga naghulat sa among pagbiya. Si Presidente Kimball milamano ug mipasalamat kaniya tungod sa iyang kaayo sa pagpasulod kanamo aron makabisita sa katedral. Unya ang presidente nagsugod sa pagpasabut kabahin sa simbahan nga gitukod ni Jesukristo ug sa pagkaimportante niini alang kanamo…. Iyang gipundok sila si Presidente Tanner, Elder Monson, ug Elder Packer, paduol kaniya, ang presidente mipadayon, “Kami mao ang buhi nga mga apostoles ni Ginoong Jesukristo. Adunay Napulog Duha ka mga Apostoles ug lain pang tulo kinsa mao ang kapangulohan sa Simbahan. Kami naghupot sa tinuod nga mga yawe, sama sa gibuhat ni Pedro, ug kami migamit niini matag adlaw. Kini kanunay nga gigamit” (sa Conference Report, Okt. 1976, 104; o Ensign Nob. 1976, 69).

Ipasabut nga kini nga leksyon maghisgut sa mga yawe sa priesthood ug giunsa ni Pedro pagkadawat niini didto sa Bungtod sa Transpigurasyon.

Paghisgut ug Paggamit sa Kasulatan

Sa mainampoong paagi pagpili og mga tudling sa kasulatan, mga pangutana, ug ubang mga materyal sa leksyon nga maoy labing makatubag sa panginahanglan sa mga sakop sa klase. Hisguti kon sa unsang paagi nga ang gipili nga mga kasulatan magamit sa inadlaw-adlaw nga kinabuhi. Awhaga ang mga sakop sa klase sa pagpaambit sa ilang mga kasinatian nga may kalabutan sa maong mga baruganan sa kasulatan.

1. Si Jesus miayo sa anak nga babaye sa usa ka Hentil ug mipakaon sa sobra sa 4,000 ka mga tawo.

Hisguti ang Mateo 15:21–39. Dapita ang mga sakop sa klase sa pagbasa og kusog sa pinili nga mga bersikulo.

  • Unsa ang gihangyo sa babaye nga gikan sa Canaan nga buhaton ni Jesus? (Tan-awa sa Mateo 15:22.) Ngano nga si Jesus wala mosugot sa iyang hangyo diha-diha dayon? (Tan-awa sa Mateo 15:24. Usa siya ka Hentil—dili sakop sa pamilya ni Israel. Niadtong panahona, ang ebanghelyo wala pa ipaambit sa mga Hentil.) Ngano nga si Jesus sa katapusan miayo sa anak nga babaye niadto nga babaye? (Tan-awa sa Mateo 15:28.) Unsa ang atong makat-unan gikan niini nga babaye? (Mga tubag mahimong maglakip nga kadtong wala makabaton sa kahingpitan sa ebanghelyo mahimong makabaton sa hugot nga pagtuo, ug nga kita kinahanglan dili mawad-an sa hugot nga pagtuo kon ang mga panalangin wala ihatag diha-diha dayon sumala sa atong gusto.)

  • Ang Manluluwas mibiya paingon sa Dagat sa Galilea, nagpanaw ngadto sa Decapolis (Marcos 7:31). Ang Decapolis maoy usa ka dapit didto sa silangan nga bahin sa Dagat sa Galilea diin daghan nga mga Hentil ang nagpuyo. Sa unsa nga paagi nga ang Ginoo mipakita og kalooy alang sa mga tawo didto? (Tan-awa sa Mateo 15:29–31.) Unsa ang reaksyon sa pundok sa mga katawhan? Tan-awa sa Mateo 15:31.) Unsa nga mga milagro karon nga makapahimo kaninyo nga mohimaya sa Dios?

  • Ang pundok sa mga katawhan nagpabilin uban ni Jesus sulod sa tulo ka mga adlaw, ug sa dihang panahon nga sila mobiya, si Jesus wala mopalakaw kanila nga gigutom. Unsa nga milagro ang iyang gihimo? (Tan-awa sa Mateo 15:32–38.)

    Ipasabut nga kini nga milagro lahi gikan sa una nga pagpakaon sa 5,000 (Mateo 14:15–21) nga kadaghanan niini mga Hentil. Si Elder Bruce R. McConkie mipasabut nga sa pagpakaon sa 5,000, si Jesus “nagbutang sa tukuranan sa iyang dili ikatandi nga wali sa Pan nga Naghatag og Kinabuhi” (Juan 6:22–69, tan-awa sa leksyon 12). Sa pagpakaon sa 4,000, si Jesus mapasumbingayong mitudlo nga sa umaabut nga panahon, ang buhing pan itanyag ngadto sa mga nasud sa Hentil. (Doctrine New Testament Commentary, 3 vols. [1966–73, 1:375.)

2. Si Pedro gisaaran sa mga yawe sa gingharian.

Basaha ug hisguti ang Mateo 16:13–19.

  • Si Jesus mibiya sa Decapolis ug miadto sa dapit sa Cesarea Filipo, diin siya nangutana sa iyang mga tinun-an, “Unsa may inyong isulti, kinsa man Ako?” (Mateo 16:15). Unsa ang tubag ni Pedro? (Tan-awa sa Mateo 16:16.) Unsa ang tinubdan sa pagpamatuod ni Pedro? (Tan-awa sa Mateo 16:17.) Unsa ang atong makat-unan gikan niini nga kasayuran mahitungod sa atong mga pagpamatuod?

  • Si Jesus miingon ngadto ni Pedro nga “Sa ibabaw niining bato pagatukoron ko ang akong simbahan” (Mateo 16:18). Si Propeta Joseph Smith mitudlo nga ang bato nga gipasabut mao ang pagpadayag (Teachings of the Prophet Joseph Smith, sel. Joseph Fielding Smith [1976], 274). Sa unsa nga paagi nga ang pagpadayag mao ang tukuranan sa Simbahan sa Ginoo?

  • Ang Manluluwas misaad sa paghatag ngadto ni Pedro sa “mga yawe sa gingharian sa langit” (Mateo 16:19). Unsa kini nga mga yawe? Ngano nga kini gikinahanglan? (Tan-awa sa D&P 128:9–10; 132:46.) Kinsa ang naghupot niini karon?

    Si Presidente Joseph F. Smith mitudlo:

    “Ang Priesthood sa kinatibuk-an mao ang usa ka pagtugot nga gihatag sa tawo aron paglihok alang sa Dios. Matag tawo nga gi-orden sa bisan unsa nga buhatan sa Priesthood, aduna niini nga pagtugot nga gihatag ngadto kaniya.

    “Apan kinahanglan nga ang matag lihok nga gipahigayon ubos niini nga pagtugot kinahanglan nga pagahimoon diha sa tukma nga panahon ug dapit, diha sa tukma nga paagi, ug subay sa husto nga han-ay. Ang gahum sa pagdumala niini nga mga paglihok naglangkob sa mga yawe sa Priesthood. Sa kahingpitan niini, ang mga yawe gihuptan sa usa lamang ka tawo sulod sa usa ka higayon, ang propeta ug presidente sa Simbahan. Siya mahimo nga mohatag bisan unsa nga bahin niini nga gahum ngadto sa lain, niana kana nga tawo maghupot sa mga yawe nianang piho nga buhat” (Gospel Doctrine, 5th ed. [1939], 136).

  • Ngano nga ang pagtuo nga ang propeta naghupot niini nga mga yawe usa ka mahinungdanon nga bahin sa atong mga pagpamatuod?

3. Ang transpigurasyon ni Jesus sa atubangan nila ni Pedro, Santiago, ug Juan.

Basaha ug hisguti ang Mateo 17:1–9. Ipasabut nga usa ka semana human si Pedro gisaaran sa mga yawe sa gingharian, siya, si Santiago, ug Juan nakasaksi sa Transpigurasyon sa Manluluwas ug nakadawat og mahinungdanong kahibalo ug mga yawe. Kini mao ang labing mahinungdanong mga hitabo diha sa Bag-ong Tugon. Kini nakatabang ni Jesus pag-andam alang sa iyang Pag-ula ug nakapaligon sa tulo ka mga Apostoles alang sa dugang nga mga responsibilidad nga ilang mabatunan sa dili madugay ingon nga mga lider sa Simbahan.

  • Unsa ang gipasabut sa transpigurasyon? (Usa ka temporaryo nga pagkausab sa panagway ug kinaiyahan sa tawo; usa ka pagkausab ngadto sa mas mahimayaon nga kahimtang. Kini mahitabo pinaagi sa gahum sa Dios. Tan-awa sa D&P 67:11; Moises 1:11.)

  • Sumala sa Mateo 17:1–5, unsa ang nahitabo sa dihang sila si Jesus, Pedro, Santiago, ug Juan didto sa Bungtod sa Transpigurasyon? (Ikaw mahimo nga molista sa mga tubag sa mga sakop sa klase diha sa pisara.)

    1. Ang nawong ni Jesus mihayag ingon sa adlaw, ug ang iyang saput nahimong masilakon sa kaputi.

    2. Si Moises ug si Elias (Elijah) nagpakita.

    3. Usa ka mahayag nga panganud ang milandong kanila, “ug sila nakadungog og tingog sa Amahan nga nagpamatuod sa iyang Anak.”

    Ikaw mahimong mopasabut nga ang ngalan nga Elias gigamit sa daghang mga paagi diha sa mga kasulatan. Diha sa Mateo 17:3–4 kini usa ka Griyego nga tumbas sa Hebreo nga ngalan nga Elijah. Sa uban nga mga dapit (sama sa Mateo 17:10–13), kini mao ang usa ka titulo nga naghulagway sa usa ka tawo nga nag-una, o tig-andam.

    Ipasabut nga ang mga propeta sa ulahing mga adlaw nagtudlo og dugang pa mahitungod sa nahitabo diha sa Bungtod sa Transpigurasyon. Ribyuha ang mosunod nga mga pagtulun-an uban sa mga sakop sa klase ug, kon gitinguha, i-summarize kini sa pisara.

    1. Sila si Pedro, Santiago, ug Juan nakakita sa panan-awon sa transpigurasyon sa yuta sa Ikaduhang Pag-anhi sa Manluluwas (D&P 63:20–21).

    2. “Nahimaya ang ilang panagway sa atubangan ni [Kristo]” (Teachings of the Prophet Joseph Smith, 158).

    3. Sila gitudloan mahitungod sa kamatayon ug pagkabanhaw sa Manluluwas (Hubad ni Joseph Smith, Lucas 9:31).

    4. Sila nakadawat gikan nila ni Jesus, Moises, ug Elijah sa mga yawe sa priesthood nga ilang gikinahanglan aron sa pagdumala sa Simbahan human sa kamatayon sa Manluluwas (Teachings of the Prophet Joseph Smith, 158; Joseph Fielding Smith, Doctrines of Salvation, 3 vols. [1954–56], 2:110).

  • Niadtong 1836 si Moises ug si Elijah mibalik pag-usab dinhi sa kalibutan. Sila mipandong sa ilang mga kamot diha ni Joseph Smith ug Oliver Cowdery aron pagpahiuli sa mga yawe nga gihatag nila ni Pedro, Santiago, ug Juan. Unsa nga mga yawe ang gipahiuli ni Moises? (Tan-awa sa D&P 110:11. Ang mga yawe sa pagpundok sa Israel.) Unsa nga mga yawe ang gipahiuli ni Elijah? (Tan-awa sa D&P 110:13–16. Ang mga yawe sa gahum sa pagbugkos.) Sa unsa nga paagi nga kini nga mga yawe gigamit karon? (Diha sa misyonaryo nga buhat ug sa buhat sa templo, nga gipahigayon ubos sa pagdumala sa Presidente sa Simbahan.)

  • Si Elder David B. Haight mitudlo nga ang Transpigurasyon ni Jesus maoy “alang sa atong espirituhanong kahayag ug ingon man alang niadtong personal nga mga saksi” (sa Conference Report, Abr. 1977, 8; o Ensign, Mayo 1977, 7). Unsa ang atong makat-unan gikan sa Transpigurasyon aron sa pagtabang kanato kon kita nagkinahanglan og espirituhanong kalig-on?

    Ikaw mahimong moribyu sa mosunod nga mga ideya nga gihatag ni Elder Haight (sa Conference Report, Abr. 1977, 9–10; o Ensign, Mayo 1977, 7–9).

    1. Kita kinahanglan nga mosunod sa ehemplo sa Manluluwas pinaagi sa mainitong pag-ampo kon kita nagkinahanglan og espirituhanong kalig-on (Lucas 9:28). Naghisgut mahitungod sa Transpigurasyon, si Elder Haight miingon: “Malagmit si Jesus mibati dili lamang sa usa ka langitnong kalinaw nga nianang mamingaw nga kahigayunan nga ikahatag sa pagpakigsulti uban sa Iyang Amahan, apan labaw pa, usa ka pagsabut nga Siya pagapaluyohan sa umaabut nga takna pinaagi sa pag-alagad dili dinhi niini nga kalibutan…. Samtang Siya nag-ampo ngadto sa Iyang Amahan, Siya gibayaw labaw sa pagduhaduha ug pagkadautan sa kalibutan nga misalikway Kaniya.”

    2. Kita adunay kasiguroan nga si Jesus molig-on kanato sama sa iyang gibuhat nila ni Pedro, Santiago, ug Juan. Si Elder Haight miingon, “Siya midala sa Iyang tulo ka mga apostoles uban Kaniya sa pagtuo nga sila, human makakita sa Iyang himaya … malagmit malig-on, nga ang ilang hugot nga pagtuo mahimong mapalig-on aron pag-andam kanila alang sa mga pang-insulto ug sa mga makapaubos nga mga panghitabo nga mosunod.”

    3. Kita mahimong mapalig-on pinaagi sa pagpamatuod sa Manluluwas (Mateo 17:5) ug pinaagi sa mga doktrina sa ebanghelyo. Si Elder Haight miingon, “Ang tulo nga pinili nga mga apostoles gitudloan [sa Manluluwas] sa nagsingabut nga kamatayon ug usab sa Iyang pagkabanhaw, mga pagtulun-an nga mopalig-on sa matag usa kanila diha sa halandumon nga mga adlaw sa unahan.”

Panapos

Ipasabut og maayo nga isip mga Santos sa Ulahing mga Adlaw kita adunay kasayuran nga magtabang kanato nga makasabut unsa ang nahitabo sa Bungtod sa Transpigurasyon. Ipamatuod ang kamahinungdanon sa pagpadayag diha sa Simbahan karon ug ang panginahanglan sa mga yawe sa priesthood. Ipasalig sa mga sakop sa klase nga kita, sama ni Pedro, makahibalo pinaagi sa Espiritu Santo nga si Jesus mao ang Kristo, ang Anak sa Buhing Dios.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

Mga higayon diin ang Amahan mipamatuod sa Anak

Adunay upat ka mga higayon nga girekord diha sa mga kasulatan diin ang Amahan mipaila ug mipamatuod sa iyang Anak. Usa niini gihisgutan dinhing leksyona. Dapita ang mga sakop sa klase sa paghinumdom sa laing tulo.

  1. Ang pagbunyag ni Jesus (Mateo 3:13–17)

  2. Ang Transpigurasyon (Mateo 17:1–9)

  3. Ang pagpakita ni Jesus ngadto sa mga Nephite (3 Nephi 11:1–7)

  4. Ang Unang Panan-awon ni Joseph Smith (Joseph Smith—Kasaysayan 1:13–17.)