“Maghigugmaay Kamo sa Usag Usa, Maingon nga Ako Naghigugma Kaninyo”

Lucas 22:1–38; Juan 13–15

Katuyoan

Aron pagdasig sa mga sakop sa klase sa pagsunod sa ehemplo ni Jesus pinaagi sa paghigugma ug pag-alagad sa uban.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Lucas 22:7–30. Si Jesus nakigkita sa iyang Napulog Duha ka mga Apostoles alang sa Kasaulogan sa Pagpalabay. Siya mipahigayon sa sakramento ug mitudlo sa mga Apostoles nga sila kinahanglan mag-alagad ngadto sa uban.
2. Juan 13. Si Jesus mihugas sa mga tiil sa mga Apostoles ug nagsugo kanila sa paghigugma sa usag usa.
3. Juan 14:1–15; 15. Si Jesus nagtudlo, “Ako mao ang dalan, ang kamatuoran, ug ang kinabuhi.” Siya mitandi sa iyang kaugalingon ngadto sa usa ka tanum nga ubas ug ang iyang mga tinun-an ngadto sa mga sanga sa ubas. (Pahinumdom: ang mga bersikulo gikan sa kapitulo 14 ug 15 nga naghisgut mahitungod sa Maghuhupay pagahisgutan diha sa leksyon 24.)
Dugang nga basahonon: Mateo 26:1–5, 14–35; Marcos 14:1–2, 10–31.
Kon ikaw maggamit sa pang-atensyon nga kalihokan, pakigsabut og usa ka mag-aawit o usa ka gamay nga pundok sa mga dagko o mga bata nga moawit sa “Maghigugmaay sa Usag Usa” diha sa pagsugod sa klase. Kon kini dili mahimo, pagdala og recording sa awit o andama ang mga sakop sa klase sa pag-awit niini nga magdungan.
Kon ang mosunod nga mga materyal anaa, gamita kini sa panahon sa leksyon:
1. Ang mga hulagway sa Ang Katapusang Panihapon (62174 853; Pakete sa mga Hulagway sa Ebanghelyo 225) ug Si Jesus Naghugas sa mga Tiil sa mga Apostoles (62550 853; Pakete sa mga Hulagway sa Ebanghelyo 226).
2. Usa ka gamay nga tanum aron paghulagway sa inyong paghisgut sa Juan 15:1–8.
Sugyot alang sa pagtudlo: Ang pag-awit o pagpatugtog og himno o awit sa Primary nga may kalabutan ngadto sa hilisgutan sa leksyon maoy usa ka maayong paagi aron pagdapit sa espiritu sa panahon sa leksyon. Ang Ginoo miingon, “Ang akong kalag malipay diha sa awit sa kasingkasing, oo, ang awit sa mga matarung usa ka pag-ampo alang kanako, ug kini pagatubagon uban sa panalangin ibabaw sa ilang mga ulo” (D&P 25:12, tan-awa usab sa Mga Taga-Colosas 3:16). Ang mga himno og mga awit sa Primary makatabang usab sa mga sakop sa klase nga makakat-on sa mga doktrina sa ebanghelyo. (Tan-awa sa Teaching, No Greater Call [36123], mga pahina 45–46, 172–74.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipaawit sa mag-aawit o gamay nga pundok ang “Maghigugmaay sa Usag Usa,” o magpatugtog og usa ka recording o ipaawit ang himno nga magdungan (tan-awa sa seksyon sa “Pagpangandam”).

Ipasabut nga ang teksto niining mao nga himno gikuha sa Juan 13:34–35. Ipapakli sa mga sakop sa klase kini nga kasulatan, ug hangyoa ang usa ka sakop sa pagbasa niini og kusog. Itudlo nga si Jesus misulti niini nga mga pulong diha sa Katapusang Panihapon. Kini nga leksyon maghisgut niini nga sugo ug sa uban nga mga butang nga gisulti ug gibuhat ni Jesus sa panahon niini nga tigum uban sa iyang mga Apostoles.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti sa unsa nga paagi nga ang mga pulong ug mga lihok sa Manluluwas sa panahon sa Katapusang Panihapon nagpakita sa iyang gugma alang sa iyang mga Apostoles ug alang kanato. Tabangi ang mga sakop sa klase nga makasabut nga si Jesus buot nga kita mosunod sa iyang ehemplo sa paghigugma ug pag-alagad ngadto sa uban.

1. Si Jesus mipahigayon sa sakramento.

Tukia ang Lucas 22:7–30. Dapita ang mga sakop sa klase sa pagbasa og kusog sa pinili nga mga bersikulo. Itudlo nga kining pagkaon sa Pagpalabay, nga gisaluhan ni Jesus ug sa iyang mga Apostoles sa adlaw nga wala pa siya ilansang, kasagaran gitawag og Katapusang Panihapon. Ipakita ang hulagway sa Katapusang Panihapon.

Sa dihang si Jesus ug ang iyang mga Apostoles nagtigum aron sa pagpangaon sa pagkaon sa pangilin sa Pagpalabay, si Jesus mipaila sa ordinansa sa sakramento. Unsa ang iyang gisulti sa mga Apostoles mahitungod sa katuyoan sa sakramento? (Tan-awa sa Lucas 22:19–20. Kini makatabang kanila sa paghinumdom kaniya ug sa iyang matubsanong sakripisyo.) Sa unsa nga paagi nga ang pag-ambit sa sakramento makatabang kanato sa paghinumdom sa Manluluwas?

Si Elder Jeffrey R. Holland miingon: “Sukad niadtong kasinatian sa lawak sa itaas sa wala pa didto sa Getsemani ug Golgota, ang mga anak sumala sa saad anaa ubos sa pakigsaad sa paghinumdom sa sakripisyo ni Kristo niining bag-o, labawng taas, labawng balaanon ug personal nga paagi…. Kon ang paghinumdom mao ang kinauyokan nga tahas ngari kanato, unsa ang malagmit moabut sa atong mga panumduman kon kadtong yano ug bililhon nga mga simbolo gitanyag kanato?” (sa Conference Report, Okt. 1995, 88, 90; o Ensign, Nob. 1995, 67, 68).

Hisguti ang mga tubag sa mga pangutana ni Elder Holland, lakip na ang pipila sa mosunod nga mga butang nga gisugyot ni Elder Holland nga kita kinahanglan mohinumdom mahitungod sa Manluluwas (sa Conference Report, Okt. 1995, 90–91; o Ensign, Nob. 1995, 68–69):

Ang iyang gugma ug kalig-on diha sa Dakong Konseho sa Langit.
Nga siya ang Tiglalang sa langit ug sa yuta.
Ang tanan nga iyang gibuhat diha sa iyang kinabuhi sa wala pa dinhi ingon nga si Jehova.
Ang yano nga kahalangdon sa iyang pagkatawo.
Ang iyang mga pagtulun-an.
Ang iyang mga milagro ug mga pagpang-ayo.
Nga “ang tanan nga butang nga maayo naggikan ni Kristo” (Moroni 7:24).
Ang dili mabination nga pagtagad, pagsalikway, ug ang dili makiangayon nga iyang giantus.
Nga siya nagpaubos sa tanan nga mga butang aron nga mabayaw ibabaw kanila.
Nga siya mihimo sa iyang mga sakripisyo ug miantus sa iyang mga kagulanan alang sa matag usa kanato.

Ngano nga importante man nga kita moambit sa sakramento kada semana? Sa unsa nga paagi nga kita makaandam sa espirituhanong paagi sa atong mga kaugalingon sa dili pa moambit sa sakramento?
Sa Katapusang Panihapon ang mga Apostoles naglalis pag-usab mahitungod kon “hain nila ang pagaisipon nga maoy labing dako” (Lucas 22:24; tan-awa usab sa Mateo 18:1, Lucas 9:46). Sa unsa nga mga paagi kita usahay mangandoy nga paga-isipon nga labaw pa kay ni bisan kinsa? Sa unsa nga paagi nga kita makabuntog niini nga mga pagbati?
Unsa ang gitudlo sa Ginoo mahitungod sa tinuod nga pinaka bantugan? (Tan-awa sa Lucas 22:25–27; tan-awa usab sa Mateo 20:25–28.) Sa unsa nga paagi nga siya mismo mihatag og ehemplo niini nga pagtulun-an? Sa unsa nga paagi nga kita makasunod sa iyang ehemplo?

2. Human sa paghugas sa ilang mga tiil, si Jesus misugo sa mga Apostoles sa paghigugma sa usag usa.

Basaha ug tukia ang pinili nga mga bersikulo gikan sa Juan 13. Ipakita ang hulagway ni Jesus nga naghugas sa nga tiil sa mga Apostoles. Ipasabut nga sa dihang nahuman na og pangaon si Jesus ug ang iyang mga Apostoles atol sa Katapusang Panihapon, si Jesus mihugas sa mga tiil sa matag Apostoles (Juan 13:4–5). Kini nga tahas kasagaran gipahigayon sa usa ka ulipon kon adunay usa ka dinapit nga moabut. Usa sa rason nga gihimo kini ni Jesus mao ang pagtudlo sa iyang mga Apostoles mahitungod sa pagpaubos ug pag-alagad.

Ngano kaha nga si Simon Pedro midumili sa dihang si Jesus nagsugod paghugas sa iyang mga tiil? (Tan-awa sa Juan 13:6, 8. Siya mibati nga kini dili angay alang sa Ginoo nga molihok sama sa ulipon.) Unsa ang gitubag ni Jesus? (Tan-awa sa Juan 13:8.)
Unsa ang gisulti ni Jesus sa mga Apostoles mahitungod ngano nga siya mihugas sa ilang mga tiil? (Tan-awa sa Juan 13:12–17. Siya misulti kanila nga sila kinahanglan mosunod sa iyang ehemplo sa pag-alagad.) Sa unsa nga paagi nga ang pag-alagad ngadto sa uban makahatag kanimo og kalipay?
Unsa ang atong makat-unan gikan sa mga pulong ug mga lihok ni Jesus mahitungod sa mga hiyas sa maayong mga pangulo? Sa unsa nga paagi kita makasunod sa iyang ehemplo kon kita anaa diha sa katungdanan sa pagpangulo?
Sa panahon sa Katapusang Panihapon, si Jesus misubli sa pag-ingon ngadto sa iyang mga tinun-an sa paghigugma sa usag usa (Juan 13:34–35; 15:12, 17). Unsa ang pipila ka mga piho nga mga butang nga atong mabuhat aron pagsunod sa ehemplo ni Kristo sa gugma?

3. Si Jesus nagtudlo “Ako mao ang dalan, ang kamatuoran, ug ang kinabuhi” ug “Ako mao ang tinuod nga ubas.”

Tukia ang Juan 14:1–15; 15. Dapita ang mga sakop sa klase sa pagbasa og kusog sa pinili nga mga bersikulo.

Ngano nga si Tomas nabalaka sa dihang si Jesus misulti sa mga Apostoles, “Bisan asa Ako moadto kamo mahibalo, ug sa dalan kamo nahibalo”? (Tan-awa sa Juan 14:4–5.) Unsa ang gisulti ni Jesus kang Tomas? (Tan-awa sa Juan 14:6.) Ngano nga si Jesus mao lamang ang agianan nga kita makaduol ngadto sa Langitnong Amahan?
Si Jesus mitudlo sa iyang mga tinun-an sa pagpakita sa ilang gugma alang sa uban pinaagi sa pag-alagad. Unsa ang iyang gisulti kanila nga ilang buhaton aron pagpakita sa ilang gugma alang kaniya? (Tan-awa sa Juan 14:15.) Sa unsa nga paagi nga ang atong pagkamasulundon makapakita sa atong gugma alang sa Ginoo?
Samtang siya nagtudlo sa iyang mga Apostoles, si Jesus migamit sa simbolo sa usa ka ubas (Juan 15:1–8). Kinsa ang gisimbolo sa ubas? sa mga tig-alima (mga hardinero)? sa mga sanga? (Tan-awa sa Juan 15:1, 5.)

Kon ikaw nagdala og usa ka tanum diha sa klase, ipakita kini karon.

Unsa ang mahitabo sa usa ka dahon o sanga nga giputol gikan sa tibuok nga tanum? Sa unsa nga paagi nga ang inyong relasyon ngadto sa Manluluwas sama sa relasyon sa usa ka dahon o sanga ngadto sa tibuok nga tanum?
Agig pagtandi sa Manluluwas, unsa ang gibuhat sa tig-alima ngadto sa mga sanga sa tanum sa ubas nga wala mamunga? (Tan-awa sa Juan 15:2.) Unsa ang iyang gibuhat sa mga sanga nga namunga? (Hinumdumi nga ang dalisay nagpasabut nga hinlo.) Unsa man ang kagamitan niini ngari kanato?
Si Jesus mitudlo, “Siya nga magpabilin kanako, kang kinsa Ako magapabilin, mao siya ang magapamunga og daghan, kay gawas kanako wala gayud kamoy arang mahimo” (Juan 15:5). Sa unsa nga paagi nga kamo nasayud nga kini tinuod?
Sumala sa Juan 15:13, unsa ang pinaka dako nga pagpakita og gugma? Unsa ang gisulti niini kanato mahitungod sa gugma sa Manluluwas alang kanato?

Panapos

Ipamatuod nga si Jesukristo naghigugma kanato ug buot nga kita maghigugmaay ug mag-alagad sa usag usa. Ipahinumdom sa mga sakop sa klase ang Pag-ula ni Kristo ug ang iyang gugma alang kanato sa panahon sa sakramento matag semana.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Dad-on nato ang ngalan ni Kristo

Sa panahon sa inyong paghisgut-hisgot mahitungod sa sakramento, mahimo kang mohisgut sa mosunod nga mga pangutana mahitungod sa pagdala ngari kanato sa ngalan ni Kristo. Ang uban nga gisugyot nga mga tubag gipahiangay gikan sa pakigpulong ni Elder Dallin H. Oaks niadtong Abril 1985 nga kinatibukang komperensya (tan-awa sa Conference Report, Abr. 1985, 101–5; o Ensign, Mayo 1985, 80, 83).

Kanus-a kita modala diha sa atong mga kaugalingon sa ngalan ni Kristo?
1. Sa diha nga kita gibunyagan ngadto sa iyang Simbahan (2 Nephi 31:13; Mosiah 25:23; Moroni 6:3; D&P 18:22–25, 20:37).
2. Sa diha nga kita magbag-o sa atong mga pakigsaad sa bunyag pinaagi sa pag-ambit sa sakramento (Moroni 4:3; 5:2; D&P 20:77, 79).
3. Sa panahon nga kita mosangyaw sa atong pagtuo diha kaniya.
4. Sa panahon nga kita modala diha sa atong mga kaugalingon sa pagtugot sa paglihok sa iyang ngalan ug paggamit niana nga pagtugot.
5. Sa panahon nga kita moapil sa sagrado nga mga ordinansa sa templo.
Unsa ang atong gisaad kon kita modala diha sa atong mga kaugalingon sa ngalan ni Kristo?
1. Kita mopadayag sa atong pagkamauyonon sa pagbuhat sa buluhaton diha sa iyang gingharian ug sa atong kamatinguhaon sa pag-alagad kaniya hangtud sa katapusan (D&P 20:37; Moroni 6:3).
2. Kita mosaad sa pagsunod kaniya uban sa tinuod nga tinguha, pagtuman kaniya ug paghinulsol sa atong mga sala (2 Nephi 31:13; Mosiah 5:8).
Unsa ang gisaad ni Jesukristo kanato kon kita modala ngari kanato sa iyang ngalan? (Kita mahimo nga iyang anak nga mga lalaki ug anak nga mga babaye, nga magdala sa iyang ngalan. Kadto kinsa gitawag sa iyang ngalan diha sa katapusang adlaw pagabayawon; tan-awa sa Mosiah 5:7–9; 15:12; Alma 5:14; 3 Nephi 27:5–6; D&P 76:55, 58, 62).

2. Pagpasalida sa video

Ang ikalima nga bahin sa “New Testament Customs,” usa ka pinili gikan sa New Testament Video Presentations (53914), nga naglakip sa kasayuran diha sa mga kasaulogan sa mga panahon sa Bag-ong Tugon. Kini nga bahin makatabang sa mga sakop sa klase sa pagtan-aw sa gipahigayon nga Katapusang Panihapon ug makasabut sa pakisayran sa mga tinun-an “nga nagpauraray sa dughan ni Jesus” (Juan 13:23).

3. Pagpasundayag sa sakop sa klase

Ang mga pagtandi sama sa “Ako mao ang tinuod nga ubas” malagmit malisud alang sa uban nga tawo, ilabi na sa pagsabut sa mga batan-on. Alang sa dugang nga kinaugalingong pagpasundayag sa gugma ni Jesukristo alang kanato, pagdapit og usa o duha ka mga sakop sa klase sa pagpaambit og usa ka kasinatian diin sila mibati sa gugma sa Manluluwas nga naghatag kanila og kalig-on, sama sa tanum nga ubas nga mohatag og kalig-on ngadto sa iyang mga dahon o mga sanga. Himoa ang pagdapit nga labing ubos usa ka semana sa dili pa ang klase, ug awhaga ang mga sakop sa klase sa pagpangita sa pagdasig sa Espiritu Santo sa pagpili og usa ka kasinatian nga angayng ipaambit.