“Mabuhi diha sa Espiritu”

Katuyoan

Aron pag-awhag sa mga sakop sa mga klase nga magtinguha sa pag-aghat gikan sa Espiritu Santo ug sa paglikay sa mga kinaiya ug mga aksyon nga makapahimo nato nga dili makadawat niini nga mga pag-aghat.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Mga Buhat 18:23–19:41. Si Pablo nagsugod sa iyang ikatulong misyonaryo nga pagpanaw. Si Aquila ug si Priscila nagtudlo sa ebanghelyo ngadto ni Apolos. Si Pablo mitudlo, mibunyag, ug mihatag sa gasa sa Espiritu Santo sa mga matuohon sa Efeso. Si Demetrio ug ang uban nga platiro miagni sa mga katawhan sa Efeso nga masuko batok ni Pablo.
2. Mga Buhat 20. Si Pablo mibiya sa Efeso ug misangyaw sa Macedonia ug Gresya. Diha sa iyang pagpauli balik sa Jerusalem, siya nanamilit ngadto sa mga lider sa Simbahan sa Efeso, nagpasidaan batok sa apostasiya.
3. Mga Taga-Galacia. Si Pablo mihimo og usa ka sulat nga nagbadlong sa mga taga-Galacia sa ilang pagbalik ngadto sa balaod ni Moises. Siya mipahinumdom kanila sa panginahanglan sa hugot nga pagtuo diha ni Jesukristo ug nag-awhag kanila sa pagtinguha sa mga bunga sa Espiritu.
Dugang nga basahonon: Ang Giya ngadto sa mga Kasulatan, “Espiritu Santo,” 58 ug “Mga Sulat ni Pablo: Mga sulat ngadto sa mga taga-Galacia.”
Kon anaa ang mapa nga nagpakita sa ikatulong misyonaryo nga panaw ni Pablo (mapa 13 sa LDS nga edisyon sa Biblia nga giimprinta niadtong 1999 o lapas pa; mapa 21 sa mga naimprinta sa wala pay 1999), ikaw mahimo nga mogamit niini panahon sa leksyon.
Sugyot alang sa pagtudlo: Ang uban nga labing maayo nga mga sugilanon ug mga ehemplo mao kadto nga naggikan sa imong kaugalingon nga kinabuhi. Salig sa Espiritu sa pagtabang kanimo nga mahibalo hain sa imong mga kasinatian ang angay ug maggamit sa pagpaambit ngadto sa mga sakop sa klase. (Tan-awa sa Teaching, No Greater Call [36123], mga pahina 179–82.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Hangyoa ang mga sakop sa klase sa paghunahuna og usa ka talento o kahanas (sama sa pagtugtog sa instrumento, pagtahi, pagsulat, o pagdula og sport) nga sa makausa ilang gipalambo apan wala na magamit sulod sa taas nga panahon. Pangutana:

Pang-atensyon nga Kalihokan

Komportable ba kamong mogamit niini nga talento o kahanas karon? Unsa kaha kamo ka malampuson? Unsa ang inyong gikinahanglan nga buhaton aron paggamit niini nga talento o kahanas sama sa kamaayo sa inyong gibuhat kaniadto? (Kon walay sakop sa klase ang makahunahuna sa mao nga talento o kahanas, paghisgut og ehemplo sa imong kaugalingon nga kinabuhi.)

Itudlo nga ang pag-ila sa mga pag-aghat sa Espiritu Santo mahimong isipon ingon nga espirituhanong talento o kahanas. Kon gamiton nato kini nga talento, mas mohanas kita niini.

Pang-atensyon nga Kalihokan

Sa unsa nga paagi nga kita makapalambo sa kahanas sa pag-ila sa mga pagaghat sa Espiritu Santo? (Ang mga tubag mahimong maglakip pinaagi sa pagpuyo sa matarung nga paagi, sa pagtinguha sa inspirasyon pinaagi sa Espiritu Santo, ug pinaagi sa pagsunod sa mga pag-aghat kon kita makadawat niini.) Unsa ang mahitabo kon kita mipalambo niini nga kahanas ug unya wala na magtagad niini?

Ipasabut nga karon nga panaghisgutan sa ikatulong misyonaryo nga panaw ni Pablo ug sa iyang sulat ngadto sa mga taga-Galacia maglakip sa panaghisgut sa mga kahimtang diin kinahanglan nga atong sundon ang mga pag-aghat sa Espiritu Santo ug sa unsa nga paagi nga kita mapanalanginan sa pagbuhat sa ingon.

Paghisgut ug Paggamit sa Kasulatan

Sa mainampoon nga paagi pilia ang mga tudling sa kasulatan ug mga pangutana nga labing makatubag sa panginahanglan sa mga sakop sa klase. Hisguti kon sa unsa nga paagi nga kini nga mga kasulatan magamit sa inadlaw-adlaw nga kinabuhi. Awhaga ang mga sakop sa klase sa pagpaambit sa mga kasinatian nga may kalabutan ngadto sa mga baruganan sa kasulatan.

1. Si Pablo mitudlo, mibunyag, ug mihatag sa Espiritu Santo ngadto sa mga matuohon sa Efeso.

Hisguti ang Mga Buhat 18:23–19:41. Pagdapit og mga sakop sa klase sa pagbasa sa pinili nga mga bersikulo. Ipasabut nga human si Pablo mipauli gikan sa iyang ikaduhang misyon, siya migahin sa ubang panahon didto sa Antioquia ug unya mibiya alang sa iyang ikatulo nga misyon (Mga Buhat 18:22–23). Sa panahon niining ikatulong pagmisyon siya migahin sa iyang panahon—hapit tulo ka mga tuig—nga nagsangyaw didto sa Efeso. (Kon ikaw naggamit sa mapa, itudlo ang nahimutangan ni Pablo sa tukma nga mga panahon samtang ikaw maghisgut sa iyang ikatulong misyonaryo nga panaw.)

Si Apolos usa ka Judeo kinsa nakahibalo mahitungod sa bunyag sumala sa gitudlo ni Juan Bautista apan wala makahibalo mahitungod sa gasa sa Espiritu Santo. Sa dihang si Aquila ug si Priscila, duha ka mga miyembro sa Simbahan kinsa anaa sa Efeso, nakadungog ni Apolos nga nagsangyaw, sila mitudlo kaniya “sa dalan sa Dios nga labawng mahingpiton” (Mga Buhat 18:26). Unsa nga mga hiyas ang nakapahimo ni Apolos nga matudloan. (Mga Buhat 18:24–28.) Sa unsa nga paagi nga kini nga mga kinaiya nakapahimo kaniya nga usa ka epektibo nga magtutudlo? Sa unsa nga paagi nga kita makapalambo niini nga mga kinaiya?
Unsa nga mga espirituhanon nga pagpadayag ang nahitabo sa dihang ang uban nga mga taga-Efeso nakadawat sa Espiritu Santo? (Tan-awa sa Mga Buhat 19:6.) Sa unsang mga panahon nga kini nga matang sa pagpadayag nahitabo? (Tan-awa sa Mga Buhat 2:1–4; 10:44–46. Ang mga Apostoles magsulti og mga pinulongan sa dihang sila nakadawat sa gasa sa Espiritu Santo diha sa adlaw sa Pagkunsad sa Espiritu Santo. Daghan nga mga Hentil sa Cesarea misulti usab og mga pinulongan human si Pedro nakadawat og panan-awon nga ang ebanghelyo kinahanglan itudlo ngadto sa mga Hentil.) Unsa nga mga pagpadayag sa Espiritu Santo ang kalagmitan masinati karon? (Tan-awa sa D&P 6:15, 23; 8:2 alang sa pipila ka mga ehemplo; tan-awa usab sa 1 Mga Hari 19:12.)
Ngano nga si Pablo mibiya sa sinagoga sa Efeso ug nagsugod sa pagtudlo didto sa eskwelahan sa Tirano? (Tan-awa sa Mga Buhat 19:8–9. Ipahibalo nga ang panaglalis niini nga mga bersikulo nagpasabut nga pagsangyaw o pangatarungan.) Unsay atong buhaton agig tubag sa mga tawo kinsa motamay o mosupak sa ebanghelyo? (Tan-awa sa 3 Nephi 11:29–30.)

Si Elder Marvin J. Ashton mitudlo: “Kon ang uban wala makauyon sa atong mga pagtuo dili gayud kita makiglalis, ni makigsumpaki sa ingon, o makiglantugi kanila…. Ang atong responsibilidad mao ang pagpasabut sa atong mga pagtuo pinaagi sa katarungan, mahigalaon nga pag-awhag, ug tukma nga mga kamatuoran. Ang ato mao ang pagbarug nga lig-on ug dili makig-abin sa moral nga mga isyu karon ug sa walay katapusan nga mga baruganan sa ebanghelyo, apan dili makiglantugi ni bisan kinsa nga tawo o organisasyon. Ang pakiglantugi mohimo og mga paril ug mga babag. Ang gugma moabli og mga pultahan…. Ang panaglantugi wala gayud ug dili gayud mahimong kauban sa kauswagan” (sa Conference Report, Abr. 1978, 10; o Ensign, Mayo 1978, 7–8).
Ngano nga si Demetrio ug ang uban nga mga platiro nabalaka man sa pagsangyaw ni Pablo? (Tan-awa sa Mga Buhat 19:23–28. Sila nagbuhat ug nagbaligya og mga urna sa simbahan ni Artemisa, usa ka mini nga dios-dios, ug nabalaka nga mawad-an og kustomer sa dihang si Pablo mitabang sa katawhan nga makabig ngadto sa ebanghelyo ni Jesukristo.) Sa unsa nga paagi nga ang mga kabalaka mahitungod sa bahandi o ubang kalibutanong mga tinguha makaapekto sa atong pagkamaunongon ngadto sa Dios? Sa unsa nga paagi nga ang ingon nga kabalaka makaapekto sa atong kahanas sa pagpaminaw sa mga pag-aghat sa Espiritu?
Itandi ang mga kinaiya ni Demetrio ug sa mga platiro ngadto sa kinaiya sa mga taga-Efeso kinsa misunog sa ilang mga basahon sa pagpamarang sa dihang sila nagsugod sa pagsunod ni Jesukristo (Mga Buhat 19:18–19). Sa unsa nga paagi nga kita adunay sakto nga pagsabut sa kalibutanon nga mga kabtangan?

2. Si Pablo mihatag og pakigpulong sa panamilit ngadto sa mga lider sa Simbahan sa Efeso.

Basaha ug hisguti ang pinili nga mga bersikulo gikan sa Mga Buhat 20. Ipasabut nga si Pablo mibiya sa Efeso ug mipanaw sa tibuok Macedonia ug Gresya, nga nagsangyaw sa ebanghelyo. Siya nagplano sa pagbalik sa Jerusalem alang sa Kasaulogan sa Pagkunsad sa Espiritu Santo. Sa iyang pagpaingon balik sa Jerusalem, siya mipadala og mensahero sa paghangyo sa mga lider sa Simbahan sa Efeso nga makigkita kaniya didto sa Mileto. Siya mihatag sa iyang makapaukay nga pakigpulong agig panamilit ug unya mipadayon sa iyang pagpanaw.

Nagtuo nga kini mao ang katapusan nga higayon nga siya makigsulti ngadto sa mga lider nga taga-Efeso, unsa ang gipasabut pag-ayo ni Pablo sa iyang pakigpulong agig panamilit?(Tan-awa sa Mga Buhat 20:28–35.) Kinsa ang mga “mabangis nga mga lobo” nga gipasidaan ni Pablo? (Tan-awa sa Mga Buhat 20:29. Mga kaaway sa Simbahan.) Kinsa pa ang uban nga gipasidan-an ni Pablo? (Tan-awa sa Mga Buhat 20:30. Ang mga miyembro sa Simbahan kinsa mobiya sa kamatuoran ug mosulay sa pagpahisalaag sa ubang mga miyembro.) Sa unsa nga paagi kita makabantay batok sa apostasiya sa atong mga kinabuhi?
Unsa ang gisulti ni Pablo sa mga anciano nga taga-Efeso nga ilang buhaton aron pagtabang sa pagpanalipod sa mga miyembro sa Simbahan gikan niadto kinsa mosulay sa pagpalayo kanila gikan sa Simbahan? (Tan-awa sa Mga Buhat 20:28; tan-awa usab sa Juan 21:15–17.) Sa unsa nga paagi nga kita makatabang sa pagpanalipod sa mga panon sa Dios gikan sa “mabangis nga lobo”?
Si Pablo mitapos sa iyang pakigpulong ngadto sa mga kaigsoonan nga taga-Efeso pinaagi sa pagpahinumdom kanila sa mga panudlo sa Ginoo nga “labi pang bulahan ang paghatag kay sa pagdawat” (Mga Buhat 20:35). Sa unsa nga paagi nga kamo nakakita nga kini tinuod diha sa inyong kinabuhi?

3. Si Pablo mibadlong ug mitambag sa mga Santos nga taga-Galacia.

Basaha ug hisguti ang pinili nga mga bersikulo gikan sa mga sulat ni Pablo ngadto sa mga taga-Galacia. Ipasabut nga samtang si Pablo nagpaingon sa iyang ikatulong misyonaryo nga pagpanaw, siya mihimo og sulat ngadto sa mga Santos sa Galacia, kadaghanan kanila kinsa mibalik sa pagtuman sa balaod ni Moises. Siya mibadlong kanila kinsa mituo nga ang kaluwasan moabut pinaagi sa mga buhat nga gikinahanglan pinaagi sa balaod ni Moises kay sa pinaagi sa hugot nga pagtuo diha ni Ginoong Jesukristo.

Unsa ang katuyoan sa balaod ni Moises? (Tan-awa sa Mga Taga-Galacia 3:23–26; Jacob 4:4–5; Mosiah 13:29–30. Ang Ginoo mihatag sa mga Israelita niini nga balaod aron pagtabang kanila sa paghinumdom kaniya ug sa pag-andam kanila sa pagdawat sa kaluwasan pinaagi sa iyang Pag-ula.) Sa unsa nga paagi nga ang balaod ni Moises natuman? (Tan-awa sa 3 Nephi 15:2–5; Alma 34:10; 3 Nephi 9:19. Si Jesus mituman sa balaod ni Moises pinaagi sa iyang Pag-ula, diin gisimbolo sa daghan nga mga ordinansa sa balaod.)
Si Pablo natingala nga ang mga Santos nga taga-Galacia mibalik ngadto sa balaod ni Moises sa ingon ka dali human nila makat-uni ang ebanghelyo ni Jesukristo (Mga Taga-Galacia 1:6; 4:9). Ngano nga kini nga pagbalik ngadto sa balaod ni Moises nagpakita sa kakulang sa hugot nga pagtuo diha sa Ginoo? (Tan-awa sa Mga Taga-Galacia 2:16; 3:1–5; 5:1–6.)
Sa panahon ni Pablo, ang uban nga mga tawo nagtinguha sa pagtuis, o pagusab, sa ebanghelyo ni Jesukristo (Mga Taga-Galacia 1:7–8). Unsa ang uban nga kamatuoran niini sa kapanahonan karon? Unsay atong mabuhat agig tubag sa mga paninguha sa pagtuis sa ebanghelyo?
Unsa ang atong makat-unan gikan sa Mga Taga-Galacia 1:11–12 mahitungod kon sa unsa nga paagi kita modawat sa pagpamatuod sa ebanghelyo? Ngano nga mahinungdanon nga ang atong mga pagpamatuod ibase sa pagpadayag gikan ni Jesukristo? (Ikaw mahimo nga maghisgut kon sa unsa nga paagi nga ang mga pagpamatuod nga natukod sa lain nga mga sukaranan, sama sa sosyal nga mga relasyon o sa salabutan nga pagtuki, kadaghanan dili makasagubang sa mga pagsulay sa hugot nga pagtuo.)
Si Pablo mipasidaan sa mga taga-Galacia batok sa paghimo “sa mga buhat sa unod” (Mga Taga-Galacia 5:19). Unsa ang mga buhat sa unod? (Tan-awa sa Mga Taga-Galacia 5:19–21.) Unsa ang mga sangputanan sa paghimo niini nga mga buhat? (Tan-awa sa Mga Taga-Galacia 5:21.) Bisan sa pagkaylap sa mga buhat sa unod dinhi sa kalibutan karon, unsa ang inyong mabuhat niini nga semana aron sa pagpalambo sa espirituhanon nga kahimtang nga inyong gipuy-an?
Si Pablo miawhag sa mga taga-Galacia sa pagtinguha sa mga bunga, o mga sangputanan, sa pagpuyo uban sa Espiritu (Mga Taga-Galacia 5:16, 25). Unsa ang uban niini nga mga bunga? (Tan-awa sa Mga Taga-Galacia 5:22–23.) Sa unsa nga paagi nga kini nga mga bunga makita sa inyong kinabuhi? Unsa ang atong buhaton kon kita mobati nga kini nga mga bunga wala sa atong mga kinabuhi?
Unsa ang gitudlo ni Pablo ngadto sa mga Santos nga taga-Galacia mahitungod kon unsaon sa pagtagad sa ilang mga silingan? (Tan-awa sa Mga Taga-Galacia 5:14; 6:2; tan-awa usab sa Mosiah 18:8–10.) Sa unsa nga paagi nga kita “mopas-an … sa salagubangon sa usag usa”? Sa unsa nga paagi nga sa pagbuhat sa ingon makapaduol kanato ngadto ni Jesukristo?
Unsa ang gipasabut ni Pablo sa dihang siya miingon nga ang “Dios dili mabiaybiay”? (Tan-awa sa Mga Taga-Galacia 6:7; tan-awa usab sa D&P 63:58. Usa sa kahulugan mao nga kadto kinsa malapason sa Dios ug dili maghinulsol nagbiaybiay kaniya ug pagasilotan.) Sa unsa nga paagi nga ang katawhan karon mibiaybiay sa Dios?
Unsa ang gipasabut sa “unsay ipugas sa tawo, mao usab kana ang iyang pagaanihon”? (Tan-awa sa Mga Taga-Galacia 6:7–9.) Sa unsa nga paagi nga kini nga baruganan magamit sa atong kahanas sa pagpaminaw ug sa pagsunod sa mga pag-aghat sa Espiritu Santo? Sa unsa nga paagi nga kini magamit sa atong relasyon uban sa laing mga tawo? Sa unsa nga paagi nga kini magamit sa uban nga mga kahimtang diha sa atong mga kinabuhi?

Panapos

Ipamatuod nga ang dili matarung nga mga kinaiya ug mga aksyon, sama sa pakiglantugi, pagkakalibutanon, ug apostasiya, makapugong kanato gikan sa pagdawat sa mga pag-aghat gikan sa Espiritu Santo. Apan kon kita maninguha sa pagpuyo sa matarung nga paagi ug mosunod sa mga pag-aghat nga atong madawat, ang atong kahanas sa pag-ila ug pagsunod sa mga pag-aghat molambo. Awhaga ang mga sakop sa klase sa pagtinguha ug pagsunod sa mga pag-aghat gikan sa Espiritu Santo.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Ikaw mahimong mogamit niini nga ideya isip kabahin sa leksyon.

Pagtudlo sa ebanghelyo sama sa gibuhat ni Pablo

Unsa ang atong makat-unan gikan sa panudlo ni Pablo mahitungod sa ebanghelyo? (Tan-awa sa Mga Buhat 19:8–10, 21; 20:7–12, 18–24, 27, 31, 35–36. Tan-awa usab ang panaghisgutan sa 1 Mga Taga-Tesalonica 1:5 ug 2:2–12 diha sa leksyon 31.)

Ilista ang mga tubag sa mga sakop sa klase diha sa pisara, ug hisguti kon sa unsa nga paagi nga kita makasunod sa ehemplo ni Pablo diha sa atong panudlo.