Sunday School: Doktrina sa Ebanghelyo
Leksyon 37: ‘Jesukristo: Ang Mag-uugmad ug Maghihingpit sa Atong Hugot nga Pagtuo

Leksyon 37

“Jesukristo: Ang Mag-uugmad ug Maghihingpit sa Atong Hugot nga Pagtuo

Mga Hebreohanon

Katuyoan

Aron pagpahinumdom sa mga sakop sa klase nga ang kaluwasan moabut pinaagi sa hugot nga pagtuo diha ni Jesukristo ug sa pagkamasulundon sa iyang mga sugo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mga Hebreohanon 1–4. Si Pablo mipamatuod nga si Jesukristo, ang Bugtong Anak sa Langitnong Amahan, mao ang atong Manluluwas.

    2. Mga Hebreohanon 5; 6:20; 7. Si Pablo mipasabut nga ang Melchizedek Priesthood usa ka bahin diha sa kahingpitan sa ebanghelyo.

    3. Mga Hebreohanon 8:4–10:18. Si Pablo mitudlo nga ang balaod ni Moises mao ang daan nga pakigsaad tali sa Dios ug sa iyang mga anak, samtang ang ebanghelyo ni Jesukristo mao ang bag-o nga pakigsaad. Ang daan nga pakigsaad mao ang matang, o sumbanan, sa bag-o nga pakigsaad, apan ang bag-o nga pakigsaad lamang ang adunay gahum sa pagluwas.

    4. Mga Hebreohanon 10: 19–11:40. Si Pablo miawhag sa mga Santos sa pagpakita sa hugot nga pagtuo diha ni Jesukristo aron sila mahimong makapanunod og usa ka luna diha sa gingharian sa Dios.

  2. Dugang nga basahonon: Mga Hebreohanon 6; 12–13; Ang Giya ngadto sa mga Kasulatan, “Mga sulat ni Pablo: Taga-Filipos, Mga Taga-Colosas, Mga Taga-Efeso, Filemon, Mga Hebreohanon.”

  3. Sugyot alang sa pagtudlo: Pagbantay nga dili ka mahimong usa ka tig-lektyur. Usahay ikaw kinahanglan nga molektyur og gamay aron sa paghatag og kasayuran, apan ang paglektyur dili mahimong epektibo kon mao lamang kini ang paagi nga gamiton sa pagtudlo. Human ka makahatag sa kasayuran o makapasabut og usa ka baruganan, siguroha ang paghatag og mga kahigayunan alang sa mga sakop sa klase sa pagtubag ug sa pag-apil. (Tan-awa sa Teaching, No Greater Call [36123], mga pahina 61–72, 89–90, 170.)

Gisugyot nga Pagpalambo sa Leksyon

Pang-atensyon nga Kalihokan

Kon angay gamita ang mosunod nga kalihokan o usa kalihokan nga imong hinimo aron pagsugod sa leksyon.

Ihulagway ang mosunod nga kahimtang, ug hangyoa ang mga sakop sa klase sa pagpangita og usa ka kasulatan nga mahimong magamit sa usa sa mga kahimtang. (Pipila ka mga kasulatan gisugyot diha sa sulod sa parentheses.)

Pang-atensyon nga Kalihokan

  1. Usa ka bata nga imong nailhan nga mao pay pagkakat-on sa Primary nga si Jesukristo milalang sa kalibutan ug buot masayud kon asa kini gipasabut diha sa kasulatan. (Mga Hebreohanon 1:2; Juan 1:1–3; Mga Taga-Efeso 3:9; Mosiah 3:8)

  2. Usa ka higala adunay personal nga problema ug naglibog kon sa unsa nga paagi nga ang Manluluwas makaatiman kaniya sa personal gayud ug makasabut unsa ang iyang giagian. (Mga Hebreohanon 2:6–8, 18; 2 Nephi 1:15; Alma 7:11–12)

  3. Usa ka higala nga dili miyembro naglibog kon gikinahanglan ba gayud alang sa usa ka tawo nga adunay priesthood aron makapahigayon sa mga bunyag ug sa uban nga mga ordinansa. (Mga Hebreohanon 5:1, 4; Exodo 28:41; Juan 15:16)

Pagdapit og usa o duha ka mga sakop sa klase sa pagbasa sa mga kasulatan nga ilang napili alang sa matag kahimtang. Itudlo nga ang sulat ni Pablo ngadto sa Mga Hebreohanon naglangkub sa mga kasulatan nga mahimong magamit diha sa matag usa niining tulo ka mga kahimtang. Dapita ang mga sakop sa klase sa pagpaminaw niini nga mga kasulatan samtang ikaw maghisgut sa basahon sa Mga Hebreohanon.

Paghisgut ug Paggamit sa Kasulatan

Samtang ikaw nagtudlo sa mosunod nga mga tudling sa kasulatan, hisguti sa unsa nga paagi kini magamit sa inadlaw-adlaw nga kinabuhi. Awhaga ang mga sakop sa klase sa pagpaambit og kasinatian nga may kalabutan ngadto sa mga baruganan sa kasulatan.

Ipasabut nga sa iyang tibuok nga misyonaryo nga mga panaw, si Pablo naninguha sa pagpasabut sa mga miyembro sa Simbahan nga sila dili na gayud mosunod sa balaod ni Moises. Samtang ang mga Kristiyano nga mga Judeo gitudloan nga ang kaluwasan moabut pinaagi sa hugot nga pagtuo diha ni Jesukristo, daghan kanila ang mituo gihapon nga ang pagkamasulundon ngadto sa balaod ni Moises mahinungdanon alang sa kaluwasan. Si Pablo misulat ngadto sa mga Hebreohanon aron sa pagpasabut nga ang balaod ni Moises natuman diha ni Kristo.

1. Si Jesukristo, ang Bugtong Anak sa Langitnong Amahan, mao ang atong Manluluwas.

Hisguti ang Mga Hebreohanon 1–4. Dapita ang mga sakop sa klase sa pagbasa sa pinili nga mga bersikulo.

  • Unsa ang atong makat-unan mahitungod ni Jesukristo gikan sa Mga Hebreohanon 1? (Ilista ang mga tubag sa mga sakop sa klase diha sa pisara. Ang mga tubag mahimong maglakip niining gilista sa ubos.)

    1. Siya milalang sa kalibutan (mga bersikulo 2, 10).

    2. Siya sama sa panagway sa Dios nga Amahan (bersikulo 3).

    3. Siya miula alang sa atong mga sala (bersikulo 3).

    4. Siya mao ang Unang Anak sa Dios nga Amahan (mga bersikulo 5–6).

    5. Ang iyang himaya ug gahum mahangturon ug dili mausab-usab (mga bersikulo 8, 12).

  • Si Pablo miingon nga ang Anak sa Dios, kinsa “ gihimo nga labawng maayo kay sa mga anghel” (Mga Hebreohanon 1:4), siya usab “gihimo nga ubos og diyutay kay sa mga anghel” (Mga Hebreohanon 2:9). Sa unsa nga paagi nga si Jesus “ gihimo nga ubos og diyutay kay sa mga anghel”? (Tan-awa sa Mosiah 13:34–35. Siya mianhi sa yuta nga mortal ug nga moagi sa kasakit ug kamatayon.) Ngano nga kini gikinahanglan? (Tan-awa sa Mga Hebreohanon 2:9–10, 16–18; 4:15–16; tan-awa usab sa Mateo 23: 10–11.)

  • Si Pablo miawhag sa mga Santos sa pagpuyo sa matarung nga paagi aron sila makasulod ngadto sa kapahulayan sa Dios (Mga Hebreohanon 3:7–19; 4:1–11). Unsa ang gipasabut sa pagsulod ngadto sa kapahulayan sa Dios? (Tan-awa sa D&P 84:23–24; 3 Nephi 27:19.) Unsa ang gipasabut ni Pablo kalabot kon ngano nga ang uban nga mga anak sa Israel sa panahon ni Moises wala makasulod ngadto sa kapahulayan sa Dios? (Tan-awa sa Mga Hebreohanon 3:7–11, 16–19; 4:1–2.) Sa unsa nga paagi nga kita makatabang sa usag usa nga mahimong takus sa pagsulod ngadto sa kapahulayan sa Dios? (Tan-awa sa Mga Hebreohanon 3:13–14; 4:11; Alma 13:12–13, 16.)

2. Ang Melchizedek Priesthood kabahin sa kahingpitan sa ebanghelyo.

Basaha ug hisguti ang pinili nga mga bersikulo gikan sa Mga Hebreohanon 5; 6:20; 7.

  • Unsa ang gitudlo ni Pablo mahitungod kon sa unsa nga paagi nga ang usa ka tawo makadawat ug makagamit sa awtoridad sa priesthood? (Tan-awa sa Mga Hebreohanon 5:1–4.) Ngano nga ang usa ka tawo nga naghupot sa priesthood “pagatawgon sa Dios” kay sa mangunay sa [pagpahiluna] sa iyang kaugalingon sa maong katungdanan”?

  • Unsa nga awtoridad sa priesthood ang anaa sa balaod ni Moises? (Ang Aaronic Priesthood, nga gitawag usab og Levitical, ubos, o igpangandam nga priesthood. Tan-awa sa D&P 84:25–27.) Unsa nga pagtugot sa priesthood ang gihuptan ni Jesukristo? (Tan-awa sa Mga Hebreohanon 5:5–6; 6:20.) Ipasabut nga sa dihang si Jesus miabut ug mituman sa balaod ni Moises, siya usab mipahiuli sa Melchizedek Priesthood. Ngano nga kini gikinahanglan man? (Tan-awa sa Mga Hebreohanon 7:11. Ang Aaronic Priesthood walay awtoridad sa pagpahigayon sa tanang mga ordinansa nga gikinahanglan alang sa kaluwasan.)

    “Dili ang balaod ni Moises ni ang Aaronic priesthood nga maoy nag-administrar niini ang makahimo sa pagdala sa mga anak sa Dios ngadto sa kahingpitan. Ang Aaronic Priesthood usa ka ubos, ug kini mag-alagad sa igpangandam nga ebanghelyo lamang. Ang Melchizedek Priesthood, sa laing bahin, mao ang labaw nga priesthood, gitahasan sa pagpangalagad sa mga ordinansa sa ebanghelyo diha sa kahingpitan niini ug makahimo sa atong mga kinabuhi nga putli aron kita makasulod pag-usab ngadto sa atubangan sa Ginoo” (The Life and Teachings of Jesus and His Apostles [manwal sa Church Educational System, 1979], 385–86; tan-awa usab sa D&P 107:18–20).

  • Nganong ato mang gitawag nga Melchizedek Priesthood ang labaw nga priesthood? (Tan-awa sa D&P 107:2–4.) Sa unsa nga paagi nga ang mga miyembro sa Simbahan karon napanalanginan pinaagi sa pagbaton sa Melchizedek Priesthood ingon man usab sa Aaronic Priesthood? Sa unsa nga paagi nga ang priesthood nakapanalangin sa inyong kinabuhi?

3. Ang ebanghelyo ni Jesukristo mao ang bag-o nga pakigsaad tali sa Dios ug sa iyang mga anak.

Basaha ug hisguti ang pinili nga mga bersikulo gikan sa Mga Hebreohanon 8:1–10:18. Ipasabut nga si Pablo mipahinumdom sa mga miyembro sa Simbahan nga ang pagsimba ubos sa balaod ni Moises gipunting ngadto ni Ginoong Jesukristo.

  • Sumala sa Mga Hebreohanon 8:5, unsa ang gisulti sa Ginoo nga buhaton ni Moises samtang nagtukod sa tabernakulo nga pagagamiton sa mga Israelita alang sa pagsimba? (Ipasabut nga ang mga tulumanon diha sa tabernakulo nagsimbolo sa “langitnong mga butang” ingon sa gilatid sa ubos.)

    Ordinansa diha sa tabernakulo:

    Unsa ang gisimbolo niini:

    1. Ang mga pari mihalad og mga hayop ingon nga mga sakripisyo ngadto sa Dios (Mga Hebreohanon 10:1–4, 11).

    Si Jesus mihalad sa iyang kaugalingon ingon nga sakripisyo alang sa atong mga sala (Mga Hebreohanon 9:26–28; 10:4–12).

    1. Ang mga pari mibutang sa dugo gikan sa gihalad nga hayop diha sa altar aron pagsimbolo sa paghugas ug paglimpyo sa mga katawhan (Mga Hebreohanon 9:6–7, 19–23).

    Ang dugo ni Jesus, nga gipaagas atol sa Pag-ula, mihugas ug milimpyo kanato gikan sa sala (Mga Hebreohanon 9:11–15).

    1. Ang halangdong pari misulod ngadto sa mga tabil sa Balaan sa mga Balaan (Mga Hebreohanon 9:1–7).

    Si Jesus ang labing halangdon nga pari, misulod ngadto sa tabil sa langit mismo (Mga Hebreohanon 9:24).

  • Si Pablo mipasabut nga ang balaod ni Moises mao ang daan nga pakigsaad tali sa Dios ug sa iyang mga katawhan (Mga Hebreohanon 8:9; tan-awa usab sa Mga Taga-Galacia 3:24–25). Unsa ang bag-o nga pakigsaad nga gidala ni Jesukristo? (Tan-awa sa Mga Hebreohanon 8:6–8, 10–13. Ang kahingpitan sa ebanghelyo.) Itudlo nga ang daan nga pakigsaad anaa sa Daang Tugon diha sa Biblia, samtang ang bag-o nga pakigsaad gihulagway diha sa Bag-ong Tugon.

  • Ngano nga ang daan nga pakigsaad dili makahimo sa paghingpit sa mga nagbuhat niini? (Tan-awa sa Mga Hebreohanon 10:1–4.) Ngano nga ang bago nga pakigsaad makahatag kanato ug mas dako nga paglaum alang sa kahingpitan? (Tan-awa sa Mga Hebreohanon 10:9–18.)

4. Kadtong kinsa mipakita sa ilang hugot nga pagtuo diha ni Jesukristo makapanunod og luna diha sa gingharian sa Dios.

Basaha ug hisguti ang pinili nga mga bersikulo gikan sa Mga Hebreohanon 10:19–11:40. Itudlo nga human mapasabut ni Pablo ang mga paagi diin ang kahingpitan sa ebanghelyo mao ang mas hingpit nga balaod nga gipuli sa balaod ni Moises, siya miawhag sa mga Santos sa pagsunod niining “bag-o ug buhi nga agianan” pinaagi sa pagpakita sa ilang hugot nga pagtuo diha ni Jesukristo (Mga Hebreohanon 10:19–22).

  • Unsa ang una, o pinaka sukaranan nga baruganan sa ebanghelyo? (Tan-awa sa Mga Artikulo sa Hugot nga Pagtuo 1:4.) Unsa ang hugot nga pagtuo? (Tan-awa sa Mga Hebreohanon 11:1; Alma 32:21; Ether 12:6.) Sa unsa nga paagi nga ang hugot nga pagtuo labaw pa kaysa pagtuo? Ngano nga ang hugot nga pagtuo diha ni Jesukristo mahinungdanon man sa atong kaluwasan?

  • Si Pablo mihatag og daghan nga mga ehemplo sa mga katawhan kinsa nakakab-ot sa dagko nga mga butang pinaagi sa hugot nga pagtuo diha ni Jesukristo? Kinsa ang iyang gihisgutan? (Tan-awa sa Mga Hebreohanon 11:4–12, 17–34.) Ilista diha sa pisara ang mga ngalan nga iyang gisulti, ug hisguti kon sa unsa nga paagi nga ang lihok sa matag tawo nagkinahanglan og hugot nga pagtuo.

  • Ikaw mahimo nga mobahinbahin sa mga sakop sa klase ngadto sa gagmayng mga grupo alang niini nga panaghisgutan. Sugoa ang kada grupo sa paghunahuna og pipila ka mga tawo nga gihisgutan diha sa Mga Hebreohanon 11. Hatagi ang kada grupo og pipila ka mga minuto aron paghisgut kon sa unsa nga paagi nga ang mga lihok sa mga tawo nagkinahanglan og hugot nga pagtuo, ug dayon sugoa ang kada grupo sa paghatag og minubo nga pahayag mahitungod sa ilang nahimong mga konklusyon.

  • Si Pablo usab mitudlo nga ang hugot nga pagtuo makatabang kanato sa mga panahon sa kakulian o panagsumpaki (Mga Hebreohanon 11:32–38). Sa unsa nga paagi nga ang hugot nga pagtuo nakatabang kaninyo sa pag-atubang sa kalisdanan? Unsa ang uban nga mga panalangin nga kamo (o usa nga inyong nailhan) nakadawat pinaagi sa pagpakita sa inyong hugot nga pagtuo diha ni Jesukristo?

Panapos

Itudlo nga kita bulahan gyud nga makapuyo sa panahon diin ang kahingpitan sa ebanghelyo anaa. Ipamatuod nga ang kaluwasan moabut pinaagi sa hugot nga pagtuo diha ni Jesukristo ug sa pagkamasulundon sa iyang mga sugo sa gipahiuli nga ebanghelyo.

Dugang nga mga Ideya sa Pagtudlo

Ang mosunod nga materya makadugang sa gisugyot nga outline sa leksyon. Ikaw mahimo nga mogamit sa usa o sa tanan niini nga mga ideya isip kabahin sa leksyon.

1. Ang Dios motuman sa iyang mga saad

  • Unsa ang gitudlo sa Mga Hebreohanon 6:10–19 mahitungod sa mga saad sa Dios ngadto sa Iyang mga anak? Unsa ang gitudlo sa bersikulo 15 mahitungod sa relasyon tali sa paglahutay sa mga pagsulay ug pagdawat sa mga saad gikan sa Dios? (Tan-awa usab sa D&P 82:10.) Unsa nga mga kasinatian ang inyong nasinati uban sa Dios nga mituman sa iyang mga saad diha kaninyo?

2. “Kay ang Ginoo nagapanton kaniya nga iyang ginahigugma” (Mga Hebreohanon 12:6)

Ipabasa sa mga sakop sa klase ang Mga Hebreohanon 12:5–11.

  • Giunsa sa Ginoo pagpanton kanato? Sa unsa nga paagi nga ang pagpanton gikan sa Ginoo “alang sa atong kaayohan”? (Tan-awa sa Mga Hebreohanon 12:10; D&P 61:8; 95:1; 101:5.) Sa unsa nga paagi nga kita makagamit sa pagpanton ingon nga kahigayunan sa pagkat-on ug sa pagtubo? (Dapita ang mga sakop sa klase sa pagsulti mahitungod sa mga panahon diin ang Ginoo mipanton kanila ug unsa ang ilang nakat-unan gikan niini nga kasinatian.