Sunday School: Doktrina sa Ebanghelyo
Leksyon 27: ‘Wala Na Siya Dinhi, Kay Siya Nabanhaw’

Leksyon 27

“Wala Na Siya Dinhi, Kay Siya Nabanhaw”

Mateo 28; Lucas 24; Juan 20–21

Katuyoan

Aron pagtabang sa mga sakop sa klase nga mobati og pagpasalamat alang sa Pagkabanhaw sa Manluluwas ug sa mga panalangin nga ikahatag niini kanato.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mateo 28:1–15; Lucas 24:1–12; Juan 20:1–10. Si Maria Magdalena ug ubang mga babaye miadto sa lubnganan ni Jesus ug nakit-an kini nga walay sulod. Ang mga anghel misulti nga si Jesus nabanhaw na. Si Pedro ug si Juan miadto aron pagtan-aw sa walay sulod nga lubnganan. Ang nabanhaw nga Ginoo nagpakita ngadto sa mga babaye.

    2. Lucas 24:13–35. Si Jesus naglakaw ug nakigsulti sa duha ka mga tinun-an didto sa dalan sa Emaus. Sila wala makaila kaniya hangtud nga siya mipikas- pikas sa pan alang kanila.

    3. Mateo 28:16–20; Lucas 24:33–53; Juan 20:19–31. Si Jesus nagpakita ngadto sa iyang mga Apostoles, nagpakita kanila nga siya nabanhaw, ug misugo kanila sa pagtudlo sa ebanghelyo ngadto sa tanang mga kanasuran. Si Tomas mihikap sa mga samad ni Jesus diha sa mga kamot, sa mga tiil, ug sa kilid.

    4. Juan 21. Si Jesus nagpakita pag-usab ngadto sa ubang mga Apostoles didto sa Dagat sa Tiberias (sa Dagat sa Galilea). Siya misugo ni Pedro, “Tagda ang akong mga karnero.”

  2. Dugang nga basahonon: Marcos 16; Ang Giya ngadto sa mga Kasulatan, “Pagkabanhaw.”

  3. Hangyoa ang mga sakop sa klase sa pag-andam sa pag-summarize sa istorya ni Jesus ug sa duha ka mga tinun-an didto sa dalan paingon sa Emaus (Lucas 24:13–32).

  4. Kon ang mosunod nga mga hulagway anaa, gamita kini sa panahon sa leksyon: Paglubong ni Jesus (62180 853; Pakete sa mga Hulagway sa Ebanghelyo 231); Ang Lubnganan ni Jesus (62111 853; Pakete sa mga Hulagway sa Ebanghelyo 232) o Ang Walay Sulod nga Lubnganan (Pakete sa mga Hulagway sa Ebanghelyo 245); Si Maria ug ang Nabanhaw nga Ginoo (62186 853; Pakete sa mga Hulagway sa Ebanghelyo 233); Si Jesus Nagpakita sa Iyang mga Samad (62503 853; Pakete sa mga Hulagway sa Ebanghelyo 234); ug ang Nabanhaw nga Jesukristo (62187 853; Pakete sa mga Hulagway sa Ebanghelyo 239).

  5. Sugyot alang sa pagtudlo: Ang sugo sa Ginoo ngadto ni Pedro, “Tagda ang akong mga karnero” (Juan 21:16–17), para usab sa tanan nga mga magtutudlo. Mainampoong mangita og mga paagi aron ang espirituhanong pagkaon diha sa mga kasulatan mahimong mopagana sa mga sakop sa klase aron sila ganahan nga magpakabusog niini. (Tan-awa sa Teaching, No Greater Call [36123], mga pahina 5–7.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

I-istorya ang mosunod nga sugilanon nga gisulti ni Elder James E. Paramore:

“Daghan nga mga katuigan ang milabay…. Usa ka tagsulat alang sa usa ka pamantalaan gipangutana sa usa ka mahinungdanon nga pangutana, ‘Unsa ang labing mahinungdanon nga balita nga madawat sa kalibutan?’ ”

Pang-atensyon nga Kalihokan

  • Unsaon nimo pagtubag niini nga pangutana?

Si Elder Paramore mipadayon: “[Ang tagsulat] naghunahuna og maayo bahin sa pangutana, siya nakigsulti sa daghang mga tawo, ug mibasa kutob sa iyang mahimo sa pagpaningkamot nga makakita og tubag alang sa iyang kaugalingon. Ug sa katapusan, siya miimprinta sa iyang tubag, “Nga mahibalo nga si Jesukristo buhi karon mao ang labing mahinungdanon nga balita nga madawat sa kalibutan. Sa pagkatinuod, kon Siya buhi karon, kita usab mabuhi nga walay katapusan sumala sa Iyang gisulti’ ” (sa Conference Report, Okt. 1990, 80; o Ensign, Nob. 1990, 64).

Ipakita ang mga hulagway nga gilista diha sa seksyon sa “Pagpangandam.” Ipasabut nga ang mga kagul-anan sa mga tinun-an sa kamatayon ni Jesus gipulihan sa dili matukib nga kalipay diha sa iyang Pagkabanhaw. Kita usab malipay sa kahibalo nga si Kristo nabanhaw.

Ipabilin nga nakaplastar ang mga hulagway nga gipakita. Gamita kini sa saktong higayon diha sa leksyon.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, hisguti uban sa mga sakop sa klase kon sa unsa nga paagi nga ang ilang kahibalo sa Pagkabanhaw nakaapekto sa ilang inadlaw-adlaw nga mga kinabuhi. Kay sa maningkamot sa pagtino sa husto nga han-ay sa mga panghitabo nga nagliyok sa Pagkabanhaw (ang matag tagsulat sa Ebanghelyo naghatag og gamay nga panaglahi sa han-ay), pagpukos sa mga pagpamatuod sa Pagkabanhaw nga gihatag sa matag kasayuran sa Ebanghelyo.

1. Si Maria Magdalena ug laing mga babaye mao ang mga saksi sa nabanhaw nga Ginoo.

Hisguti ang Mateo 28:1–15; Lucas 24:1–12; ug Juan 20:1–10. Dapita ang mga sakop sa klase sa pagbasa og kusog sa pinili nga mga bersikulo. Ipasabut nga human sa pagkalansang ni Jesus sa krus, ang iyang lawas giputos sa limpyo nga panapton nga lino ug gibutang sa lubnganan nga gipanag-iya ni Jose nga taga- Arimatea, usa sa mga tinun-an ni Jesus (Mateo 27:57–60; Lucas 23:50–53; Juan 19:38–42). Kini gidali paghimo tungod kay ang Igpapahulay hapit na magsugod. Sa pagkabuntag human sa Igpapahulay, si Maria Magdalena ug laing mga babaye mibalik didto sa lubnganan nga may mga pahumot ug mga panghaplas aron madihugan ug pahumtan ang lawas ni Jesus.

  • Unsa ang nakit-an ni Maria Magdalena ug sa laing mga babaye sa ilang pagabut didto sa lubnganan ni Jesus? (Tan-awa sa Mateo 28:1–4; Lucas 24:1–4. Hinumdumi nga ang Hubad ni Joseph Smith sa Mateo 28 nag-ingon, sama sa giingon ni Lucas, nga dihay duha ka mga anghel. Tan-awa sa Mateo 28:2) Unsa ang gisulti sa mga anghel ngadto sa mga babaye? (Tan-awa sa Mateo 28:5–7; Lucas 24:5–8.)

  • Unsa ang gipasabut sa mga anghel sa dihang sila miingon nga “Siya nabanhaw”? (Si Jesus nabanhaw.) Unsa ang gipasabut sa pagkabanhaw? (Tan-awa sa Alma 11:42–45; tan-awa usab sa Ang Giya ngadto sa mga Kasulatan, “Pagkabanhaw.”) Unsa nga mga panalangin ang atong madawat tungod sa Pagkabanhaw ni Jesus? (Tan-awa sa 1 Mga Taga-Corinto 15:22, 50–58; Alma 11:42–45. Kitang tanan mabanhaw ug pagahatagan og imortal nga mga lawas.)

  • Si Presidente Howard W. Hunter miingon nga ang mga pulong nga “Wala na siya dinhi, kay siya nabanhaw” (Lucas 24:6) “naglangkub sa tanan nga paglaum, kasiguroan, ug pagtuo nga gikinahanglan aron kita makalahutay sa atong mahagiton ug usahay puno sa kagul-anan nga mga kinabuhi” (sa Conference Report, Abr. 1986; o Ensign, Mayo 1986, 15–16). Sa unsa nga paagi nga ang inyong pagpamatuod sa Pag-ula ug sa Pagkabanhaw nakatabang kaninyo sa pagsagubang sa malisud nga mga panahon?

  • Unsa ang gibuhat sa mga babaye human makasulti ang mga anghel? (Tan-awa sa Mateo 28:8; Lucas 24:8–9.) Unsa ang atong makat-unan gikan sa ilang ehemplo?

  • Si Maria ug ang laing mga babaye mao ang una sa daghang mga tawo nga nakakita ni Jesukristo human siya nabanhaw (tan-awa usab ang ikaduha ug ikatulo nga dugang nga mga ideya sa pagtudlo). Ngano sa inyong hunahuna nga mahinungdanon man nga ang nabanhaw nga Ginoo magpakita ngadto sa mga saksi dinhi sa yuta? (Tan-awa sa 2 Mga Taga-Corinto 13:1.)

2. Duha ka mga tinun-an didto sa dalan paingon sa Emaus mga saksi sa nabanhaw nga Ginoo.

Hisguti ang Lucas 24:13–35. Ipa-summarize sa gisangunan nang daan nga sakop sa klase ang tudling sa kasulatan.

  • Ngano nga si Cleofas ug ang iyang kauban masulub-on man samtang naglakaw didto sa dalan paingon sa Emaus? (Tan-awa sa Lucas 24:13–24.) Unsa ang gitudlo sa nabanhaw nga Ginoo ngadto kanila samtang sila nanglakaw? (Tan-awa sa Lucas 24:25–27.)

  • Unsa ang gibati sa duha ka mga tinun-an samtang si Jesus nagtudlo kanila? (Tan-awa sa Lucas 24:32.) Unsa ang nakahatag nila niini nga pagbati? (Ang impluwensya sa Espiritu Santo.) Dapita ang mga sakop sa klase sa pagsaysay og mga kasinatian sa dihang sila nakadawat sa pagpamatuod gikan sa Espiritu samtang nagtuon sa ebanghelyo o nakadungog sa usa ka tawo nga nagtudlo niini.

3. Ang mga Apostoles mga saksi sa nabanhaw nga Ginoo.

Basaha ug hisguti ang pinili nga mga bersikulo gikan sa Mateo 28:16–20; Lucas 24:33–53; ug Juan 20:19–31.

  • Unsa ang gihunahuna sa mga Apostoles nga ilang nakita sa dihang ang Manluluwas nagpakita ngadto kanila pagkagabii nianang adlaw sa iyang pagkabanhaw? (Tan-awa sa Lucas 24:36–37.) Giunsa ni Jesus pagpasalig kanila nga siya usa ka nabanhaw nga nilalang, dili usa ka espiritu? (Tan-awa sa Lucas 24:38–43.)

  • Unsay gibuhat ni Tomas kalabut sa pagpamatuod sa ubang mga Apostoles nga ang Ginoo nabanhaw? (Tan-awa sa Juan 20:24–25.) Sa unsang paagi nga nakatuo man siya nga ang Ginoo nabanhaw? (Tan-awa sa Juan 20:26–29.) Sa unsang paagi nga kita usahay magpakita sa sama nga kahuyang nga gipakita ni Tomas?

    Si Elder Gordon B. Hinckley miingon:

    “Kamo ba wala makadungog sa uban nga mosulti sama sa gisulti ni Tomas? ‘Hatagi mi,’ sila moingon, ‘og makita nga kalig-unan. Ipamatuod sa atubangan sa among kaugalingong mga mata, ug sa among mga dunggan, ug sa among mga kamot, kon di gani dili gyud mi motuo.’ Kini mao ang pinulongan sa panahon nga atong gipuy-an. Si Tomas ang Nagduhaduha maoy nahimong ehemplo sa mga tawo sa tanang panahon kinsa midumili sa pagdawat gawas sa pisikal nga pagmatuod ug pagpasabut—nga mora gyud og makapamatuod sila sa gugma, o hugot nga pagtuo, o bisan sa ingon nga pisikal nga mga butang nga katingalahan sama sa elektrisidad….

    “Ngadto sa tanan nga makadungog sa akong tingog nga adunay pagduhaduha, akong usbon pagsulti ang mga pulong nga gihatag ni Tomas samtang siya mihikap sa nasamdan nga mga kamot sa Ginoo: ‘Ayaw na nianang pagka dili matinuohon, hinonoa magmatinuohon ka’ ” (sa Conference Report, Abr. 1978, 90; o Ensign, Mayo 1978, 59).

  • Unsaon nato pagsunod sa hingpit ang awhag nga “ayaw na nianang pagka dili matinuohon, hinonoa magmatinuohon ka”? (Juan 20:27).

4. Ang ubang mga Apostoles nakakita pag-usab ni Jesus didto sa Dagat sa Tiberiades (Dagat sa Galilea).

Basaha ug hisguti ang pinili nga mga bersikulo gikan sa Juan 21.

  • Ang nabanhaw nga Ginoo nagpakita pag-usab sa iyang kaugalingon ngadto sa pito sa iyang mga Apostoles samtang sila nangisda. Giunsa nila pag-ila nga siya mao si Jesus diha sa lapyahan? (Tan-awa sa Juan 21:4–7.) Human sa ilang pagpangaon, unsa ang gihangyo ni Jesus nga buhaton ni Pedro ug sa uban nga mga Apostoles? (Tan-awa sa Juan 21:15–17.) Unsaon nato sa pagtagad ang mga karnero sa Ginoo?

  • Unsa ang katarungan ni Juan sa pagsulat sa ubang mga butang nga gisulti ug gibuhat sa nabanhaw nga Jesus? (Tan-awa sa Juan 20:30–31.) Sa unsa nga paagi nga kamo nahatagan og kaayohan gikan sa pagtuon sa mga kasayuran sa kasulatan mahitungod sa Pagkabanhaw ni Jesus?

Panapos

Ipamatuod nga si Jesukristo nabanhaw ug nga tungod kaniya kita usab mabanhaw. Hatag og pagpamatuod sa kalig-on ug sa kahupayan nga nahatag sa imong kahibalo bahin sa Pagkabanhaw.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. “Siya nabanhaw” (Mateo 28:6)

Pakigsabut og gamay nga grupo nga moawit og “Siya Nabanhaw” (Mga Himno ug mga Awit sa mga Bata, p. 55) o “Si Kristo ang Ginoo Nabanhaw Karon” (Mga Himno ug mga Awit sa mga Bata, p. 54) diha sa katapusan sa leksyon.

2. “Babaye, nganong nagahilak ikaw?” (Juan 20:15)

Ipasabut nga ang Ebanghelyo ni Juan mao lamang ang Ebanghelyo nga naglangkob sa istorya sa pagpakita ngadto ni Maria Magdalena human dayon sa iyang Pagkabanhaw. Ipabasa og kusog sa sakop sa klase kini nga istorya diha sa Juan 20:11–18. Dapita ang mga sakop sa klase sa pagpaambit sa ilang mga hunahuna ug mga pagbati mahitungod niining hitaboa.

3. Laing mga saksi sa nabanhaw nga Ginoo

4. Mga kasulatan mahitungod sa Pagkabanhaw

Daghan nga mga tudling sa kasulatan gikan sa Basahon ni Mormon ug sa Doktrina ug mga Pakigsaad ang mopadako sa atong pagsabut sa Pagkabanhaw. Hisguti ang mosunod nga mga punto kon itugot sa panahon:

  1. Si Jesus mao ang una nga nabanhaw (2 Nephi 2:8), ug tungod sa iyang Pagkabanhaw, ang tanan nga mga katawhan mabanhaw (2 Nephi 9:22; Alma 11:42, 44).

  2. Human ni Jesukristo, kadtong makadawat sa celestial nga kahimayaan mabanhaw pag-una, pagasundan niadtong makadawat sa terrestrial nga himaya, kadtong makadawat sa telestial nga himaya, ug sa katapusan ang mga anak sa perdisyon (D&P 88:96–102).

  3. Kon kita mabanhaw, ang atong mga espiritu maghiusa pag-usab sa atong nahingpit nga mga lawas, nga dili na gayud pagabulagon pag-usab (Alma 11:43, 45).

  4. Ang kahibalo ug kaalam nga atong maangkon sa yuta “mouban kanato diha sa pagkabanhaw” (D&P 130:18–19).

  5. Ang mga espiritu sa mga patay nagtan-aw sa pagkabulag gikan sa lawas isip pagkaulipon; ang pagkabanhaw makapasinati nato og kahingpitan sa kalipay (D&P 138:12–17, 50).