Leksyon 28

“Kita Mao ang mga Saksi”

Mga Buhat 1–5

Katuyoan

Aron pagpahinumdom sa mga sakop sa klase sa ilang responsibilidad nga mahimong mga saksi ni Jesukristo ug sa pagtabang kanila nga makakita kon sa unsa nga paagi nga ang gasa sa Espiritu Santo motabang kanila sa pagbuhat sa ingon.

Pagpangandam

1. Basaha, pamalandongi, ug i-ampo ang mahitungod sa mosunod nga mga kasulatan:

   1. Mga Buhat 1. Human sa pagpangalagad sa iyang mga tinun-an sulod sa 40 ka mga adlaw, ang nabanhaw nga Ginoo mikayab ngadto sa langit. Si Matias mao ang napili sa pagpuli sa bakante nga dapit nga gibiyaan ni Judas diha sa Korum sa Napulog Duha ka mga Apostoles.

   2. Mga Buhat 2. Diha sa adlaw sa Pentecostes, ang mga Apostoles napuno sa Espiritu Santo ug misulti sa daghan nga mga pinulongan. Daghan sa mga naminaw kanila nakabig.

   3. Mga Buhat 3–4. Sila si Pedro ug si Juan miayo sa usa ka bakul nga tawo ug mipamatuod nga ang tawo naayo pinaagi sa gahum ni Jesukristo. Ang mga Apostoles nag-ampo ug nakadawat sa dakong gahum pinaagi sa Espiritu Santo.

   4. Mga Buhat 5:12–42. Ang mga Apostoles mipadayon sa pagsangyaw ug pagpang-ayo uban sa dakong gahum. Sila gidakop ug gibilanggo apan sila gipagula gikan sa bilanggoan pinaagi sa usa ka anghel. Sila mipahayag ngadto sa labaw nga mga pari nga sila mosunod sa Dios kaysa mga tawo. Si Gamalio mitambag sa mga Pariseo sa dili pagpatay sa mga Apostoles.

2. Dugang nga basahonon: Marcos 16:19–20; Lucas 24:49–53; Joseph Smith— Kasaysayan 1:21–25.

3. Kon anaa ang hulagway nga Ang Pagkayab ni Jesus (62497 853; Pakete sa mga Hulagway sa Ebanghelyo 236), gamita kini sa panahon sa leksyon.

4. Kon ikaw naggamit sa pang-atensyon nga kalihokan, pakigsabut og duha ka tawo nga moanha sa klasehanan sa dili pa magsugod ang klase, samtang ang mga sakop sa klase nagpahimutang na. (Kon mahimo, kini nga mga tawo dili sagad motambong sa imong klase.) Pasudla sila sa lawak, pabuhata og usa ka butang sa makadiyot lamang (sama pananglit, makigsulti diha kanimo o magdala og usa ka butang sulod sa lawak), ug dayon mogawas . Sila kinahanglan dili makigsulti ngadto sa mga sakop sa klase o mopatagad sa ilang mga kaugalingon.

5. Sugyot alang sa pagtudlo: Ang mga magtutudlo kinahanglan gayud nga mopamatuod nga ang ilang gitudlo tinuod. Pagpamatuod kang Jesukristo ug sa iyang ebanghelyo kon ang Espiritu modasig kanimo, dili lamang diha sa katapusan sa leksyon. Ang paghatag og pagpamatuod magdala og gahum diha sa imong pagtudlo. (Tan-awa sa Teaching, No Greater Call [36123], mga pahina 10, 43–44.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pangutan-a ang mga sakop sa klase kon sila ba nakamatikod sa duha ka mga tawo kinsa misulod sa lawak ug unya mibiya sa wala pa magsugod ang klase (tan-awa sa seksyon sa “Pagpangandam”). Kon adunay mga sakop sa klase nga nakamatikod, ipasulti kanila unsa ang ilang namatikdan mahitungod sa mga tawo, kon si kinsa sila, unsa ang ilang gisul-ob, ug unsa ang ilang gibuhat. Ipasabut nga ang mga sakop sa klase nga nakakita niini nga mga bisita mga saksi. (Kon walay usa nga nakamatikod sa mga bisita, isulti kon unsa ang ilang gibuhat ug ipasabut nga ikaw usa ka saksi.) Ang tawo nga nakakita o nakasinati sa usa ka hitabo ug mosulti sa uban mahitungod niini maoy usa ka saksi.

Pangutan-a ang bisan kinsa nga sakop sa klase kinsa wala makakita sa mga bisita:

Pang-atensyon nga Kalihokan

• Ikaw mituo ba unsa ang gisulti niini nga mga saksi kanimo? Ngano o nganong dili?

Ipasabut nga ang leksyon karon mahitungod sa unang mga Apostoles, kinsa mga saksi sa nabanhaw nga Jesukristo. Sa dihang sila mipamatuod kaniya, daghang mga tawo ang mituo kanila ug sila gibunyagan diha sa Simbahan.

Paghisgut ug Paggamit sa Kasulatan

Sa imong pagtudlo sa mga tudling sa mosunod nga kasulatan, ipasabut pag-ayo ang kabahin sa hugot nga pagtuo ug gahum nga gigamit sa mga Apostoles sa pagpamatuod sa nabanhaw nga Ginoo. Hisguti uban sa mga sakop sa klase kon sa unsa nga paagi nga sila usab mahimong mga saksi ni Jesukristo.

Ipasabut nga ang basahon sa Mga Buhat mao ang istorya ni Lucas sa importanting mga hitabo diha sa Simbahan sulod sa 30 ka mga tuig o sobra pa human sa mortal nga kinabuhi ni Jesukristo. Si Lucas misulti sa 40 ka mga adlaw nga pangalagad sa nabanhaw nga Manluluwas ug sa iyang Pagkayab. Siya mihulagway dayon sa dakong espirituhanong pagdagayday sa adlaw sa Pagkunsad sa Espiritu Santo, ang pagpangulo ni Pedro sa Simbahan, ang unang misyonaryo nga mga kakugi sa mga Apostoles, ug ang mahinuklugon nga pagkakabig ni Pablo. Ang ikaduha nga katunga sa basahon nagpukos sa mga misyonaryo nga kahago ni Pablo taliwala sa mga Hentil.

1. Ang Ginoo mikayab ngadto sa langit. Si Matias gitawag nga mahimong usa ka Apostol.

Hisguti ang Mga Buhat 1. Dapita ang mga sakop sa klase sa pagbasa og kusog sa pinili nga mga bersikulo. Ipakita ang hulagway sa Pagkayab.

• Human nga si Jesus nabanhaw, siya nagpabilin uban sa iyang mga disipulo sulod sa 40 ka mga adlaw, “nagsulti sa mga butang mahitungod sa gingharian sa Dios” (Mga Buhat 1:3). Sa dihang hapit na siya mobalik ngadto sa iyang Amahan sa Langit, unsa ang iyang gisaad nga madawat dayon sa iyang mga Apostoles? (Tan-awa sa Mga Buhat 1:4–5; tan-awa usab sa Lucas 24:49. Itudlo nga bisan tuod kon ang mga Apostoles nakasinati sa mga pagpakita sa impluwensya sa Espiritu Santo, sila wala pa makadawat sa gasa sa Espiritu Santo.)

• Unsa ang gisulti ni Jesus sa mga Apostoles nga ilang buhaton human sila makadawat sa gasa sa Espiritu Santo? (Tan-awa sa Mga Buhat 1:8.) Sa unsa nga kini nga mga panudlo matandi ngadto sa responsibilidad nga gihatag sa mga Apostoles karon? (Tan-awa sa D&P 107:23, 35.) Giunsa pagtuman sa mga Apostoles kini nga responsibilidad sa panahon human gyud sa Pagkabanhaw ni Jesus? (Hinumdumi, sama pananglit, nga pipila sa gamhanang pagpamatuod ang girekord diha sa Mga Buhat 2–5.) Giunsa pagtuman sa mga Apostoles niini nga responsibilidad karon?

• Sa unsang paagi nga ang gasa sa Espiritu Santo nakatabang sa mga Apostoles sa ilang responsibilidad aron mahimong mga saksi ni Jesukristo? (Tan-awa sa Juan 15:26–27; 1 Mga Taga-Corinto 12:3.) Unsa ang papel sa Espiritu Santo diha sa atong pagpaningkamot sa pagtudlo sa ebanghelyo? (Tan-awa sa 2 Nephi 33:1; D&P 42:14.)

• Samtang ang mga Apostoles nagtan-aw ni Jesus nga mikayab ngadto sa langit, duha ka mga tawo nga nagsul-ob og puti ang nagbarug sa duol. Unsa ang gisulti niini nga mga tawo ngadto sa mga Apostoles? (Tan-awa sa Mga Buhat 1:10–11.) Ipamatuod nga ang Ikaduhang Pag-anhi ni Kristo mahimong usa ka tinuod nga hitabo. Si Kristo mobalik ngari sa yuta aron sugdan ang Milenyum ug maghari sa yuta.

• Human sa Pagkayab sa Ginoo, usa ka bag-o nga Apostol ang gipili aron pagpuli sa bakante nga dapit diha sa Korum nga gibiyaan ni Judas. Giunsa sa pagkapili ni Matias isip bag-o nga Apostol? (Tan-awa sa Mga Buhat 1:21–26.) Giunsa pagpili ang mga Apostoles ug ubang mga lider sa Simbahan karon? (Tan-awa sa Mga Artikulo sa Hugot nga Pagtuo 1:5.)

2. Sa adlaw sa Pentecostes, ang mga Apostoles napuno sa Espiritu Santo.

Basaha ug hisguti ang pinili nga mga bersikulo gikan sa Mga Buhat 2. Ipasabut nga ang kasaulogan sa Pagkunsad sa Espiritu Santo usa ka pagsaulog sa ting-ani nga gihimo 50 ka mga adlaw human sa Kasaulogan sa Pagpalabay. Ang mga Judeo gikan sa daghang mga kanasuran moabut ngadto sa Jerusalem alang niini nga kasaulogan. (Tan-awa sa Ang Giya ngadto sa mga Kasulatan, “Kasaulogan.”)

• Unsa ang mahinungdanon nga hitabo diha sa adlaw sa Pentecostes, usa ka semana human sa Pagkayab sa Manluluwas? (Tan-awa sa Mga Buhat 2:1–4. Itudlo kon giunsa kini pagtuman sa mga saad sa Ginoo diha sa Juan 14:26, 15:26, ug 16:7–14 ug diha sa Mga Buhat 1:5.)

• Unsa ang gibuhat sa mga Apostoles sa dihang ilang nadawat ang Espiritu Santo? (Tan-awa sa Mga Buhat 2:4.) Unsa ang reaksyon sa mga tawo sa dihang ilang nadungog ang mga Apostoles nga nagsulti og nagkalainlaing mga pinulongan? (Tan-awa sa Mga Buhat 2:5–13.) Sa unsa nga paagi nga ang pagsangyaw sa ebanghelyo karon sama sa pagsangyaw diha sa adlaw sa Pentecostes? (Tan-awa sa D&P 90:11; 100:5–8.)

• Unsay gibuhat ni Pedro niadtong kinsa mibugalbugal sa mga Apostoles tungod sa pagsulti sa daghang mga pinulongan? (Tan-awa sa Mga Buhat 2:14–24, 36.) Unsa ang nakapadani kaninyo sa tubag ni Pedro? Ngano nga mahinungdanon man nga magbaton og pagpamatuod ni Jesukristo ug sa iyang balaan nga misyon? Ngano nga mahinungdanon man alang kanato ang pagpaambit sa atong mga pagpamatuod ngadto sa uban? Sa unsa nga paagi nga ang Espiritu Santo makatabang kanato sa pagpaambit sa atong mga pagpamatuod?

• Unsay nahimong epekto sa pagpamatuod ni Pedro niadtong mga nakadungog niini? (Tan-awa sa Mga Buhat 2:37.) Unsa ang gitudlo ni Pedro sa mga tawo nga mituo sa iyang pagpamatuod? (Tan-awa sa Mga Buhat 2:38.) Ipatandi sa mga sakop sa klase ang Mga Buhat 2:38 ngadto sa ikaupat nga artikulo sa hugot nga pagtuo ug sa 3 Nephi 27:19–20. Ipasabut nga ang sukaranan nga mga baruganan ug mga ordinansa sa ebanghelyo managsama ra sa tanang mga dispensasyon.

• Mga 3,000 ka mga tawo ang mituo sa mga pulong ni Pedro ug gibunyagan. Giunsa pagpakita niining mga tawhana nga sila nakabig ngadto sa ebanghelyo ni Jesukristo? (Tan-awa sa Mga Buhat 2:41–47. Ilista ang mga tubag sa mga sakop sa klase diha sa pisara.) Unsa ang atong makat-unan gikan sa ilang mga ehemplo?

3. Si Pedro ug si Juan miayo sa usa ka bakul nga tawo pinaagi sa gahum ni Jesukristo.

Basaha ug hisguti ang pinili nga mga bersikulo gikan sa Mga Buhat 3–4. Ikaw mahimo nga mopabasa og kusog sa usa ka sakop sa klase sa Mga Buhat 3:1–11.

• Bisan tuod nga si Pedro ug si Juan walay salapi nga gikahatag ngadto sa bakul nga tawo didto sa pultahan sa templo, unsa ang ilang gikahatag kaniya? Pinaagi sa unsa nga gahum nga ang tawo naayo? (Tan-awa sa Mga Buhat 3:6, 12–13, 16; 4:10.) Sa unsa nga paagi nga kamo mibati sa makaayo nga gahum ni Jesukristo sa inyong kinabuhi?

• Si Pedro migamit niini nga milagro isip usa ka kahigayunan sa pagpamatuod kang Jesukristo (Mga Buhat 3:12–26; 4:5–12).Unsa nga mga kahigayunan ang ania kanato aron makapamatuod kang Kristo? Sa unsa nga paagi nga kamo napanalanginan samtang kamo nahimong saksi (o nakadungog sa uban nga nahimong mga saksi) ni Jesukristo?

• Unsay gibuhat sa mga pari ug mga Saduceo kalabut sa mga wali ni Pedro? (Tan-awa sa Mga Buhat 4:1–3. Ilang gipadakop si Pedro ug si Juan.) Unsay gibuhat sa panon sa katawhan kalabut sa wali? (Tan-awa sa Mga Buhat 4:4.) Sa inyong hunahuna ngano nga kining duha ka mga pundok managlahi man ang ilang reaksyon agig tubag ngadto sa parehas ra nga wali? Unsa ang gipadayag sa atong reaksyon ngadto sa mga pulong sa mga lider sa Simbahan mahitungod sa kondisyon sa atong mga kasingkasing?

• Uban sa naayo nga tawo nga nagpabilin nga nagbarug, ang mga pari ug ang mga Saduceo dili makalimud nga usa ka milagro ang nahitabo (Mga Buhat 4:13–14, 16). Tungod kay sila walay katarungan sa pagpabilanggo ni Pedro ug ni Juan, unsa man ang ilang gibuhat? (Tan-awa sa Mga Buhat 4:15–18. Ipasabut nga ang mga relihiyoso nga mga pangulo sa Judeo naglaum nga si Jesus ug ang iyang pagtulun-an makalimtan human sa Paglansang sa Krus. Sa dihang ang mga Apostoles nagpadayon sa pagsangyaw sa ebanghelyo ni Jesukristo, ang mga pangulo sa Judeo misulay sa pagpahunong kanila.)

• Unsay gibuhat nila ni Pedro ug ni Juan kalabut sa gusto sa mga pari ug sa mga Saduceo nga ilang hunongon ang pagtudlo sa ebanghelyo? (Tan-awa sa Mga Buhat 4:19–20.) Unsa ang mga kahimtang sa inyong kinabuhi nga malagmit nagkinahanglan og sama nga kaisug aron mahimong usa ka saksi alang ni Jesukristo?

• Human nga si Pedro ug si Juan gibuhian, sila mibalik ngadto sa mga miyembro sa Simbahan ug nag-ampo uban kanila (Mga Buhat 4:23–30). Unsa ang ilang gipangayo sa ilang pag-ampo? (Tan-awa sa Mga Buhat 4:29–30.) Unsa ang nahitabo isip resulta niini nga pag-ampo ug sa nagsunod nga mga gibuhat sa mga Apostoles? (Tan-awa sa Mga Buhat 4:31–35; 5:12–16.)

4. Ang mga Apostoles nagpadayon sa pagsangyaw ug pag-ayo uban sa dakong gahum.

Basaha ug hisguti ang pinili nga mga bersikulo gikan sa Mga Buhat 5:12–42.

• Sa dihang ang mga Apostoles nagpadayon sa pagsangyaw ug paghimo og mga milagro, ang mga pari ug mga Saduceo mibalhog kanila ngadto sa bilanggoan (Mga Buhat 5:17–18). Giunsa nila paggawas gikan sa bilanggoan? (Tan-awa sa Mga Buhat 5:19–20.) Unsa ang ilang gibuhat human sila makagawas? (Mga Buhat 5:21, 25.) Ngano nga ang mga Apostoles nagpadayon man gihapon sa pagsangyaw sa ebanghelyo bisan human sila gibilanggo? (Tan-awa sa Mga Buhat 5:29–32.)

• Unsa ang tambag nga gihatag ni Gamalio ngadto sa mga pangulo sa mga Judeo nga buot mopatay sa mga Apostoles? (Tan-awa sa Mga Buhat 5:33–39.) Unsa nga mga kasinatian ang inyong nakita sa kamatuoran sa mga pulong ni Gamalio?

• Unsa nga kausaban ang gikahatag sa gasa sa Espiritu Santo ngadto sa mga Apostoles? (Itandi ang Mateo 26:47–56, 69–75 ngadto sa Mga Buhat 4:5–21; 5:17–18, 26–42.) Sa unsa nga paagi nga ang mga ehemplo sa mga Apostoles makadasig kanato nga mahimong mga saksi sa kamatuoran?

Panapos

Ipasabut nga human makadawat ang mga Apostoles sa gasa sa Espiritu Santo, nahimo silang gamhanan nga mga saksi ni Jesukristo. Samtang ang mga Apostoles adunay linain nga mga tawag aron mahimong mga saksi ni Kristo, ang matag miyembro sa Simbahan adunay responsibilidad usab sa pagsaksi kaniya. Hatag og pagpamatuod nga ang Espiritu Santo makatabang kanato nga mahibalo kanus-a ug unsaon sa pagpamatuod kang Kristo. Sa atong pagsunod sa mga pag-aghat sa Espiritu, ang atong hugot nga pagtuo molambo, ang atong pagkamabination ngadto sa Espiritu molambo, ug kita mahimong mas epektibo pa nga mga saksi ni Ginoong Jesukristo.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Mga Pagpadayag sa Espiritu Santo sa panahon sa pagpahinungod sa Templo sa Kirtland

Ipasabut nga ang pagkunsad sa Espiritu sama sa nahitabo diha sa Mga Buhat 2:1–4 nahitabo usab sa panahon sa pagpahinungod sa Templo sa Kirtland niadtong 27 sa Marso 1836. Ipabasa og kusog sa usa ka sakop sa klase ang Doktrina ug mga Pakigsaad 109:36–37, ang bahin sa pagpahinungod nga pag-ampo diin si Propeta Joseph Smith mihangyo sa ingon nga pagkunsad. Unya ipabasa sa laing sakop sa klase ang mosunod nga pamahayag, nga naghulagway sa unsa nga paagi nga kana nga paghangyo gihatag:

Si Propeta Joseph Smith miingon nga sa usa ka tigum sa pagkagabii sa adlaw sa pagpahinungod sa Templo sa Kirtland, si “Brother George A. Smith mitindog ug misugod sa pagpanagna, sa dihang usa ka banha ang nadungog sama sa tingog sa naghaguros nga hangin, nga mipuno sa Templo, ug ang tanan sa kongregasyon nagdungan pagtindog, nga giaghat sa dili makita nga gahum; daghan ang nagsulti og lain-laing mga pinulongan ug nanagna; ang uban nakakita og mahimayaong mga panan-awon; ug akong nakita nga ang templo napuno sa mga anghel, nga ang katinuod akong gipahayag diha sa kongregasyon. Ang mga tawo sa kasilinganan nangabut nga nagdinaganay (kay nakadungog og dili kasagaran nga tingog diha sa sulod, ug nakakita og usa ka dan-ag nga siga sama sa kalayo nga nagtungtong ibabaw sa templo), ug natingala bahin sa kon unsa ang nahitabo” (History of the Church, 2:428).

2. “Ang panahon sa pagpahiuli na sa tanan nga mga butang” (Mga Buhat 3:21)

Ipabasa sa usa ka sakop sa klase ang Mga Buhat 3:20–21.

• Unsa ang nakit-an nang daan ni Pedro sa dihang siya nanagna “sa pagpahiuli sa tanan”? (Iyang nakita ang pagpahiuli sa ebanghelyo ni Jesukristo sa ulahing mga adlaw pinaagi ni Propeta Joseph Smith.)

3. “Ang tanan nga mga butang ingon sa katigayunan sa tanan” (Mga Buhat 4:32)

Hisguti ang Mga Buhat 4:32–5:11. Ipasabut nga ang mga miyembro sa unang Simbahan “adunay tanan nga mga butang ingon sa katigayunan sa tanan” (Mga Buhat 2:44; tan-awa usab 4:32, 34–37). Sila mipahinungod sa tanan nga anaa kanila aron ang panginahanglan sa matag usa mahatagan. (Ikaw mahimo nga motandi niini ngadto sa dakbayan ni Enoch [Moises 7:18], ang mga kaliwat ni Lehi [4 Nephi 1:1–3], ug ang unang mga miyembro sa Simbahan niini nga dispensasyon [D&P 42:30–34].)

• Unsay gibuhat ni Bernabe kalabut niining pamaagi sa pagpahinungod sa mga kabtangan. (Tan-awa sa Mga Buhat 4:36–37.) Giunsa ni Ananias ug Safira pagsupak kini nga pamaagi? (Tan-awa sa Mga Buhat 5:1–2.) Unsa ang gisulti ni Pedro ngadto nila ni Ananias ug Safira bahin sa ilang mga gibuhat? (Tan-awa sa Mga Buhat 5:3–4, 8–9.) Unsaon nato sa pagsiguro nga kita matinuoron ngadto sa Dios?

• Bisan tuod kita wala magpuyo ubos sa pormal nga pamaagi sa pagpahinungod, unsa ang gipangayo gikan kanato nga ihatag ngadto sa Dios o ipaambit sa laing mga tawo? (Tan-awa sa Omni 1:26; Mosiah 4:16; D&P 4:2; 119:4 alang sa pipila ka mga ehemplo.) Sa unsa nga paagi nga kita usahay “motipig sa uban nga bahin”?

  Si Elder Neal A. Maxwell mikomentaryo:

  “Si Ananias ug si Safira … ‘mitipig sa uban’ nga bahin imbis sa pagpahinungod nianang tanan (tan-awa sa Mga Buhat 5:1–11). Ang uban dili gayud mobaligya ni Jesus sa katloan ka buok nga mga plata, apan dili usab sila mohatag ngadto Kaniya sa tanan nila!

  “… Kita tingali naghunahuna sa pagpahinungod diha lamang sa mga butang ug mga salapi. Apan adunay daghang mga paagi sa pagtipig sa uban. Ang usa mahimong mohatag sa salapi ug panahon pero mopugong sa usa ka mahinungdanon nga bahin sa iyang kaugalingon. Ang usa mahimong mopaambit sa mga talento sa dayag apan sa tago mitipig og usa ka piho nga garbo. Ang usa mahimong magpugong sa pagluhod sa atubangan sa Dios apan mopakita og pagtahud sa piho nga pundok sa mga higala. Ang usa mahimong modawat og katungdanan diha sa Simbahan apan ang iyang kasingkasing mas nagpahimutang sa usa ka piho nga papel diha sa kalibutan” (sa Conference Report, Okt. 1992, 90; o Ensign, Nob. 1992, 66).

• Unsaon man nato pagbuntog ang kahigayunan sa “pagtipig sa uban”? Unsa nga mga panalangin ang mahimong moabut gikan sa atong paghatag sa tanan ngadto sa Ginoo?

4. Pangbatan-on nga kalihokan

Ang mga magtutudlo sa mga batan-on mahimong mogamit sa proseso sa “pagbansay- bansay pinaagi sa pagpangutana” sa bisan asang bahin sa leksyon. Ipatag-an sa mga sakop sa klase kon unsay ulohan sa leksyon pinaagi sa pagpangutana og mga pangutana nga imong matubag og “oo” o “dili.”