Sunday School: Doktrina sa Ebanghelyo
Leksyon 31: ‘Ug Tungod Niini ang mga Simbahan Nalig-on diha sa Hugot nga Pagtuo’

Leksyon 31

“Ug Tungod Niini ang mga Simbahan Nalig-on diha sa Hugot nga Pagtuo”

“Mga Buhat 15:36–18:22; 1 ug 2 Mga Taga-Tesalonica

Katuyoan

Aron pagtabang sa mga sakop sa klase nga makakat-on gikan sa mga panudlo ni Pablo mahitungod kon unsaon sa pagpaambit sa ebanghelyo ug unsaon sa pagpuyo ingon nga mga Santos.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mga Buhat 15:36–41; 16; 17:1–15; 18:1–22. Human mahusay ang panaglalis sa nakabig nga mga Hentil ug diha sa balaod ni Moises, si Pablo ug si Bernabe nag-andam alang sa ilang ikaduhang misyonaryo nga pagpanaw. Sila wala magkauyon bahin sa misyonaryo nga kauban ug nakahukom nga magbulag. Si Pablo midala ni Silas ug ni Timoteo ug nagsugod sa misyonaryo nga buluhaton didto sa Macedonia ug sa Gresya. Sila kanunay nga gigukod apan nakakabig og daghan nga mga tawo.

    2. Mga Buhat 17:16–34. Si Pablo miduaw sa Atenas ug nakakita nga ang tibuok dakbayan nagsimba og mga dios-dios. Siya mipamatuod ngadto sa mga taga-Atenas nga mga pilosoper ug nagsangyaw sa Areopago mahitungod sa kinaiya sa Dios, ang panaghiusa sa katawhan ingon nga mga anak sa Dios ug sa Pagkabanhaw.

    3. 1 ug 2 Mga Taga-Tesalonica. Si Pablo misulat sa duha ka mga sulat ngadto sa mga Santos sa Tesalonica, usa ka dakbayan sa Macedonia. Siya mitambag kanila mahitungod sa pagpaambit sa ebanghelyo, sa pag-andam alang sa Ikaduhang Pag-anhi, ug sa pagpuyo ingon nga mga Santos.

  2. Dugang nga basahonon: 1 Mga Taga-Corinto 2:4–5, 10–13; Giya ngadto sa mga Kasulatan, “Mga Sulat ni Pablo: 1 ug 2 Mga Taga-Tesalonica.”

  3. Kon ang mosunod nga mga kagamitan anaa, ikaw mahimong mogamit niini sa panahon sa leksyon:

    1. Usa ka mapa nga nagpakita sa misyonaryo nga panaw ni Pablo (mapa 13 sa LDS nga edisyon sa Biblia nga giimprinta niadtong 1999 o lapas pa; mapa 20 sa mga na-imprinta sa wala pay 1999).

    2. “The Second Coming,” tulo ka minuto nga bahin sa New Testament Video Presentations (53914).

  4. Sugyot alang sa pagtudlo: Ang mga sakop sa klase adunay reponsibilidad sa pagtambong sa klase nga andam sa pagpangutana, sa paghatag og mga hunahuna, sa pagpaambit og mga kasinatian, ug sa paghatag og pagpamatuod. Awhaga ang mga sakop sa klase sa pag-andam kon motambong pinaagi sa pagtuon sa mga kasulatan ug sa pag-ampo matag adlaw. Ipahayag ang kaikag ug pasalamat tungod sa pag-apil sa mga sakop diha sa klase.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa klase.

I-istorya ang mosunod nga sugilanon:

Samtang nagpuyo uban sa pamilya nga Heywood sa dakbayan sa Salt Lake sa naghinapos nga tuig niadtong mga 1800, si John Morgan nagdamgo usa ka gabii niana nga siya nagbiyahe subay sa dalan sa Georgia. Siya nakahibalo sa dalan tungod kay siya kanunay nga moagi niini ingon nga usa ka sundalo atol sa Gubat Sibil sa Estados Unidos. Siya niabut sa nagsanga nga mga dalan ug iyang nakita si Brigham Young nga nagbarug didto. Bisan tuod nga ang tuo nga sanga sa dalan nagpaingon sa sunod nga lungsod, si Presidente Young miingon kaniya sa pag-agi sa wala nga sanga sa dalan.

Si Mister Morgan, kinsa dili miyembro sa Simbahan niana nga panahon, misugilon ni Sister Heywood mahitungod sa iyang damgo ug nangutana kon unsa ang iyang hunahuna niini. Siya misulti kaniya nga siya (Sister Heywood) nagtuo nga siya (Mister Morgan) magpasakop sa Simbahan ug mag-alagad sa misyon diha sa kasadpan nga mga estado, ug nga usa ka adlaw siya makakita sa iyang kaugalingon diha sa dalan nga iyang nakita sa iyang damgo. Kon kana mahitabo, kinahanglan nga iyang hinumduman ang tambag ni Brigham Young ug moagi sa wala nga sanga sa dalan.

Milabay ang daghan nga mga tuig, human si John Morgan nabunyagan ug natawag ingon nga misyonaryo ngadto sa kasadpang mga estado, siya miabut sa nagsanga nga dalan nga iyang nakit-an diha sa iyang damgo. Siya nahinumdom sa tambag sa pag-agi sa walang bahin, busa siya miagi didto. Usa ka oras ang milabay, siya nakakaplag sa iyang kaugalingon diha sa daplin sa Bungtod sa Heywood—usa ka maanindot nga dapit uban sa sama sa ngalan sa pamilya diin siya mitipon sa pagpuyo sa dihang siya nagdamgo sa milabayng mga katuigan.

Samtang siya nagpanaw sa tibuok walog nga nagsangyaw, nakamatikod siya nga ang mga tawo andam na kaayo nga maminaw sa ebanghelyo. Human makadungog kaniya nga nagtudlo, pipila ka mga pamilya misugilon nga usa ka wala mailhi nga tawo miabut diha sa walog napulo ka mga adlaw ang milabay, naghangyo nga momarka sa ilang mga Biblia. Ang tawo nga wala mailhi misulti kanila nga adunay laing sinugo nga moabut ug mopasabut sa gimarkahan nga mga tudling ngadto kanila. Si John Morgan mipasabut niining gimarkahan nga mga linya samtang siya nagtudlo sa ebanghelyo. Sa misunod sunod nga mga semana, si Elder Morgan mitudlo ug mibunyag sa tanan gawas sa tulo sa baynte tres ka mga pamilya diha sa walog (Bryant S. Hinckley, The Faith of Our Pioneer Fathers [1956], 242–44.)

Pang-atensyon nga Kalihokan

  • Unsa ang nakaingon sa kalampusan ni John Morgan isip usa ka misyonaryo? (Ang mga tubag mahimong maglakip nga siya andam nga motrabaho pag-ayo, siya naminaw sa Espiritu, ug ang mga kasingkasing sa mga tawo naandam na sa pagdawat sa ebanghelyo.)

Ipasabut nga kini nga leksyon mahitungod ni Apostol Pablo, kinsa sama ni John Morgan, naminaw ngadto sa Espiritu ug nahimong malampuson nga mga misyonaryo. Diha sa iyang ikaduhang misyonaryo nga panaw, si Pablo nagantus sa daghan nga mga pagpanggukod apan nakakaplag usab sa daghan nga mga tawo kinsa andam sa nga modawat sa ebanghelyo ni Jesukristo.

Paghisgut ug Paggamit sa Kasulatan

Samtang ikaw nagtudlo mahitungod sa kang Pablo nga ikaduhang misyonaryo nga pagpanaw, hisguti kon unsa ang atong makat-unan gikan ni Pablo mahitungod sa iyang pagtudlo sa ebanghelyo, sa pag-andam sa atong mga kaugalingon sa pagkat-on sa ebanghelyo, ug sa paglig-on sa atong mga pagpamatuod.

1. Si Pablo, Silas, ug Timoteo nagsangyaw sa tibuok Macedonia ug Gresya.

Hisguti ang Mga Buhat 15:36–41; 16; 17:1–15; 18:1–22. Dapita ang mga sakop sa klase sa pagbasa sa pinili nga mga bersikulo. Ikaw mahimo nga mopahinumdom sa mga sakop sa klase nga ang basahon sa Mga Buhat gisulat ni Lucas. Siya tataw kaayo nga mipanaw uban ni Pablo diha sa pipila ka misyonaryo nga mga pagpanaw ni Pablo, tungod kay siya kanunay nga mogamit sa pulong kami kon magpasabut ngadto sa mga gibuhat ni Pablo ug sa iyang mga kauban nga misyonaryo (Mga Buhat 16:10).

  • Sa panahon sa iyang ikaduhang misyonaryo nga pagpanaw, si Pablo misangyaw sa daghan nga mga dakbayan sa Macedonia ug sa Gresya, naglakip sa Filipos, Tesalonica, Berea, Corinto, ug sa Atenas. (Itudlo kining mga dakbayan diha sa mapa.) Sa unsa nga paagi nga ang Espiritu migiya ni Pablo ug sa iyang mga kauban sa ilang pagpanaw? (Tan-awa sa Mga Buhat 16:6–10; 18:9–11.) Sa unsa nga paagi nga ang Espiritu migiya sa inyong pagpaninguha sa pag-alagad sa Ginoo?

  • Ang mga kasulatan mirekord nga si Lidia nakadungog ug mituo sa mga pulong ni Pablo tungod kay ang Ginoo miabli sa iyang kasingkasing (Mga Buhat 16:14–15). Ngano nga ang usa ka “abli nga kasingkasing” gikinahanglan aron makabig ngadto sa ebanghelyo? (Tan-awa sa Mosiah 2:9; D&P 64:34.) Dapita ang mga sakop sa klase sa pagsulti mahitungod sa ilang mga kasinatian sa dihang ang Ginoo miabli sa ilang kasingkasing (o sa kasingkasing sa usa ka tawo nga ilang nailhan) ngadto sa ebanghelyo.

  • Ngano nga si Pablo ug ang iyang mga kauban gibilanggo sa Filipos? (Tan-awa sa Mga Buhat 16:16–24.) Sa unsa nga paagi nga sila gibuhian? (Tan-awa sa Mga Buhat 16:25–26.) Sa unsa nga paagi nga sila migamit niini nga kasinatian ingon nga usa ka misyonaryo nga kahigayunan? (Tan-awa sa Mga Buhat 16:27–34.) Unsa ang uban nga mga ehemplo, gikan sa kasaysayan sa Simbahan o sa imong kaugalingon nga kinabuhi, diin ang maayo misangput tungod sa pagpanggukod?

  • Unsa ang gitudlo ni Pablo sa mga katawhan sa Tesalonica sa dihang siya migahin og tulo ka mga adlaw nga Igpapahulay diha sa sinagoga uban kanila? (Tan-awa sa Mga Buhat 17:1–3.) Unsa ang mga sangputanan sa mga pagtudlo ni Pablo didto sa Tesalonica? (Tan-awa sa Mga Buhat 17:4–10.)

  • Sa unsa nga paagi nga ang mga katawhan diha sa sinagoga sa Berea midawat sa mga panudlo ni Pablo? (Tan-awa sa Mga Buhat 17:10–12.) Sa unsa nga paagi nga kita makapalambo sa usa ka “bug-os nga pagkamasinabuton” sa pagkat-on sa ebanghelyo?

2. Si Pablo misangyaw sa Areopago ngadto sa mga pilosoper nga taga-Atenas.

Basaha ug hisguti ang pinili nga mga bersikulo gikan sa Mga Buhat 17:16–34. Ipasabut nga human si Pablo mibiya sa Berea, siya miadto sa Atenas diin mao ang kanhi sentro sa kultura sa kalibutan. Ang mga pilosoper didto mitan-aw sa Dios ingon sa dili makita nga nilalang o gahum, kay sa literal nga Amahan sa atong mga espiritu. Sila misimba sa mga nilalang sa Dios kay sa Dios mismo. Sila mipuli sa pagpadayag uban sa katarungan ug panaglalis, naghatag og bili sa kaalam sa tawo kay sa mga kamatuoran sa Dios.

  • Ang mga pilosoper sa Atenas “migugol sa ilang panahon sa walay hinungdan, apan sa pagsulti, o sa pagpaminaw sa ubang bag-o nga butang” (Mga Buhat 17:21). Sa unsa nga paagi nga kini nga kahimtang makita karon? Unsa nga mga kakuyaw ang anaa sa pagpangita kanunay “sa uban nga bag-o nga butang”?

  • Unsa ang gitudlo ni Pablo sa mga Taga-Atenas mahitungod sa Dios? (Tan-awa sa Mga Buhat 17:22–31.) Ngano nga mahinungdanon nga mahibalo nga “kita mga anak sa [Dios]”? (Mga Buhat 17:28). Sa unsa nga paagi nga sa pagsabut sa tinuod nga kinaiya sa Dios ug sa iyang buhat ingon nga atong Amahan makatabang kanato sa paghigugma ug sa pagsimba kaniya?

  • Si Pablo misumbalik sa mga katarungan ug kabuut sa mga pilosoper uban sa kinasingkasing nga pagsaksi sa Dios, ang atong Amahan. Diha sa pagtudlo sa ebanghelyo, ngano nga ang kinasingkasing nga pagpamatuod labaw nga makapadani kay sa kabuut ug katarungan? (Tan-awa sa 1 Mga Taga-Corinto 2:4–5, 10–13.)

  • Ngano nga ang mga pilosoper naminaw ni Pablo? (Tan-awa sa Mga Buhat 17:18–21.) Ngano sa inyong hunahuna nga kini nga katuyoan nakaapekto sa ilang reaksyon sa mensahe ni Pablo? (Tan-awa sa Mga Buhat 17:32–33.) Sa unsa nga paagi nga kita makaandam sa atong mga kaugalingon sa pagpaminaw ug sa pagsabut sa mga pulong sa mga lider sa Simbahan?

3. Si Pablo misulat og mga sulat sa tambag ngadto sa mga Santos sa Tesalonica.

Basaha ug hisguti ang pinili nga mga bersikulo gikan sa 1 ug 2 Mga Taga-Tesalonica.

  • Si Pablo nabalaka mahitungod sa mga Santos didto sa Tesalonica pero wala makabalik aron pagduaw kanila, busa siya mipadala ni Timoteo (1 Mga Taga-Tesalonica 2:17–18:3:1–2, 5–7). Human sa pagbalik ni Timoteo, si Pablo misulat og duha ka mga sulat nga naghatag og mga tambag ug pagdasig ngadto sa mga Santos nga taga-Tesalonica. Unsa ang atong makat-unan gikan sa paningkamot ni Pablo alang sa bag-ong mga miyembro sa Simbahan?

  • Unsa ang gitudlo ni Pablo diha sa 1 Mga Taga-Tesalonica 1:5 ug 2:2–12 mahitungod kon unsaon pagtudlo ang ebanghelyo sa uban? (Ilista ang mga tubag sa mga sakop sa klase diha sa pisara.) Sa unsa nga paagi nga ang pagsunod niini nga mga baruganan nakatabang kaninyo sa pagtudlo sa ebanghelyo?

  • Unsa ang mga kabalaka sa mga Santos nga taga-Tesalonica ang midayag diha sa mga pagpasabut ni Pablo sa Ikaduhang Pag-anhi? (Tan-awa sa 1 Mga Taga-Tesalonica 4:13–18; 5:1–3.) Unsa ang gisulti ni Pablo sa mga taga-Tesalonica nga mahitabo sa dili pa ang Ikaduhang Pag-anhi? (Tan-awa sa 2 Mga Taga-Tesalonica 2:1–4.) Sa unsa nga paagi nga kini nga panagna natuman? (Tan-awa sa D&P 1:15–16; 112:23; Joseph Smith—Kasaysayan 1:19.)

  • Unsa ang gisulti ni Pablo sa mga Santos nga taga-Tesalonica nga ilang buhaton aron pag-andam alang sa Ikaduhang Pag-anhi? (Tan-awa sa 1 Mga Taga-Tesalonica 5:4–8.) Unsa ang atong buhaton aron sa pag-andam alang sa Ikaduhang Pag-anhi?

Kon ikaw naggamit sa pasundayag sa video nga “The Second Coming,” ipasundayag kini karon. Hisguti sa lakbit ang mga tambag ni Elder Packer ug ni Elder Maxwell mahitungod sa pag-andam alang sa Ikaduhang Pag-anhi apan dili mabalaka mahitungod kon kanus-a kini mahitabo.

  • Unsa nga mga tambag ang gihatag ni Pablo sa mga taga-Tesalonica mahitungod sa pagpuyo isip mga Santos? (Tan-awa sa 1 Mga Taga-Tesalonica 4:9–12; 5:11–22.) Ilista ang mga tubag diha sa pisara. Kon gigiyahan sa Espiritu, hisguti ang uban nga mga punto sa tambag nga imong gilista. Ang panaghisgutan mahimong maglakip kon sa unsa nga paagi nga kita hingpit nga makatuman sa tambag ug sa unsa nga paagi kita mapanalanginan kon kita mobuhat sa ingon.

Panapos

Ipamatuod ang mga kamatuoran nga gitudlo ni Pablo mahitungod sa mga kinaiya nga angay nga huptan sa malampuson nga mga misyonaryo ug sa maloloy-on nga mga Santos sa Ulahing mga Adlaw. Awhaga ang mga sakop sa klase sa pagpaninguha sa pagpalambo niini nga mga kinaiya aron sila makatabang sa pag-andam sa ilang mga kaugalingon ug sa uban alang sa Ikaduhang Pag-anhi sa Ginoo.

Dugang nga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit niini nga ideya isip kabahin sa leksyon.

Pagtudlo sa ebanghelyo uban sa matarung nga kinaiya

Ipabasa sa mga sakop sa klase ang 1 Mga Taga-Tesalonica 2:2–3. Itudlo nga si Pablo miingon nga ang ebanghelyo kinahanglan nga itudlo uban sa kaisug ug uban sa walay paglimbong o paglingla. Si Elder James E. Talmage midugang sa pagtudlo nga kita kinahanglan maisugon nga motudlo sa kamatuoran sa walay pagsaway o pag-ataki sa mga pagtuo sa ubang katawhan. Isaysay ang mosunod nga istorya aron sa paghulagway niini:

Samtang siya usa pa ka tinun-an, si Elder Talmage sa makausa giduol sa usa ka tawo nga nagbaligya ngadto kaniya og usa ka maanindot nga lampara nga de lana. Si Elder Talmage aduna nay lampara nga sa iyang pagtuo nindot na, pero siya mitugot sa tigbaligya sa lampara sa pagsulod sa iyang kwarto aron sa pagdemonstrar.

“Kami misulod sa akong kwarto, ug akong gipasiga ang akong maayong pagkaatiman nga lampara. Ang akong bisita midayeg pag-ayo. Kini ang labing nindot nga lampara sa iyang matang, siya miingon, ug siya wala gayud makakita og lampara nga ingon kaanindot. Siya mipataas ug mipaubos sa pabilo sa lampara, ug miingon nga ang pabilohan maayo kaayo.

“ ‘Karon,’ siya miingon, ‘uban sa imong pagtugot akong pasigaon ang akong lampara,’ mipagawas niini gikan sa iyang maleta…. Ang kahayag niini midan-ag sa labing layo nga suok sa akong lawak. Ang masulaw nga siga niini mipahinay ug mipaawop sa siga sa akong lampara. Hangtud niana nga panahon sa madanihon nga demonstration nga sukad wala gayud nako mahibaloi ang kaawop ug kangiub diin maoy akong gipuy-an ug gitrabahoan, gitun-an ug gipaningkamutan.”

Si Elder Talmage mipalit sa bag-o nga lampara, ug siya sa kaulahian misugyot unsa ang atong makat-unan gikan sa tigbaligya sa lampara samtang kita magtudlo sa ebanghelyo: “Ang tawo kinsa nagbaligya sa lampara wala mobiay-biay sa akong lampara. Siya mibutang sa iyang mas hayag nga suga tupad sa akong hinay nga siga, ug ako gusto gyud dayong makaangkon niini.

“Ang misyonaryo nga mga sulugoon sa Simbahan ni Jesukristo karon gipadala, dili aron sa pagsaway ni pagyam-id sa mga pagtuo sa katawhan, apan paghatag sa kalibutan og usa ka labing maayo nga kahayag, diin ang nag-aso nga kangiub sa nag-awop nga siga sa binuhat sa tawo nga pagtuo mahimong makita. Ang buluhaton sa Simbahan maayo, dili makadaot” (sa Albert L. Zobell, Jr., Story Gems [1953], 45–48; tan-awa usab ang The Parables of James E. Talmage, comp. Albert L. Zobell Jr., [1973], 1–6).