Sunday School: Doktrina sa Ebanghelyo
Leksyon 19: ‘Ang Imong Hugot nga Pagtuo Nakaluwas Kanimo’

Leksyon 19

“Ang Imong Hugot nga Pagtuo Nakaluwas Kanimo”

Lucas 18:1–8, 35–43; 19:1–10; Juan 11

Katuyoan

Aron pagtabang sa mga sakop sa klase nga makapalambo og mas dakong hugot nga pagtuo sa Langitnong Amahan ug ni Jesukristo.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Lucas 18:1–8. Pinaagi sa sambingay sa dili matarung nga maghuhukom ug sa biyuda, si Jesus nagtudlo sa kamahinungdanon sa makanunayon nga pag-ampo.

    2. Lucas 18:35–43. Usa ka buta nga tawo ang nagpakita sa iyang hugot nga pagtuo ug giayo ni Jesus.

    3. Lucas 19:1–10. Si Jesus gidawat sa balay ni Zaqueo.

    4. Juan 11:1–54. Si Jesus mipamatuod sa iyang pagkabalaan pinaagi sa pagpabuhi og balik ni Lazaro gikan sa patay.

  2. Dugang nga basahonon: Marcos 10:46–52; Lucas 11:5–13; Ang Giya ngadto sa mga Kasulatan, “Hugot nga Pagtuo.”

  3. Kon anaa ang hulagway nga Si Kristo Nag-ayo sa Buta nga Tawo (62145 853; Pakete sa mga Hulagway sa Ebanghelyo 213) ug Si Jesus Mipabangon ni Lazaro gikan sa Patay (62148 853; Pakete sa mga Hulagway sa Ebanghelyo 222), gamita kini panahon sa leksyon.

  4. Sugyot alang sa pagtudlo: Si Presidente David O. McKay miingon, “Ikaw makatudlo lamang sa epektibo nga paagi kon ikaw mismo mibati niini” (Gospel Ideals [1953], 190). Pagsiksik pinaagi sa pagtuon, pag-ampo, ug pagkamasulundon aron paglig-on sa imong pagpamatuod sa mga baruganan nga imong gitudlo. (Tan-awa sa Teaching, No Greater Call, [36123], mga pahina 12–19.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Sa wala pa mobiya si Elder Hugh B. Brown para magmisyon, ang iyang inahan misulti kaniya:

“Hugh, nahinumdom ka ba sa dihang gamay pa ka nga bata nga diha kay dautan nga damgo ug momata sa gabii nga nahadlok? Manawag ka gikan sa imong lawak, ‘Mama, naa ka ba diha?’ ug motubag ko ug mosulay sa paghupay nimo ug mopawala sa imong mga kahadlok. Karon nga moadto na ka sa misyon ug mogawas na sa kalibutan, dunay mga panahon nga mahadlok ka, nga mobati ka og kaluya, nga dili sarang, nag-inusara, ug dunay mga problema. Gusto kong masayud ka nga makatawag ka sa imong Langitnong Amahan sama sa imong naandang pagtawag kanako ug moingon, ‘Amahan, naa ka ba diha? Nagkinahanglan ko sa imong tabang.’ Buhata kini uban sa kahibalo nga Siya anaa ug nga Siya andam sa pagtabang kanimo kon ikaw mobuhat sa imong bahin ug mopuyo nga takus sa imong mga panalangin. Gusto kong mopasalig kanimo pag-usab nga Siya anaa ra ug motubag sa imong mga pag-ampo ug mga panginahanglan alang gayud sa imong kaayohan” (gi-istorya ni Marvin J. Ashton, “Know He Is There,” Ensign, Peb. 1994, 50).

Ipasabut nga niini nga leksyon atong tun-an ang mga kasayuran sa kasulatan nga makatabang kanato nga mopalambo og mas dakong hugot nga pagtuo nga ang Langitnong Amahan ug si Jesukristo nakaila ug nahigugma sa matag usa kanato.

Paghisgut ug Paggamit sa Kasulatan

Pilia sa mainampoong paagi ang tudling sa mga kasulatan, mga pangutana, ug uban pang materyal sa leksyon nga mas makatubag sa mga panginahanglan sa mga sakop sa klase. Hisguti kon sa unsa nga paagi nga magamit ang pinili nga mga kasulatan sa inadlaw-adlaw nga kinabuhi. Awhaga ang mga sakop sa klase nga mopaambit og mga kasinatian nga may kalabutan sa mga baruganan sa kasulatan.

1. Si Jesus nagtudlo sa sambingay sa dili matarung nga maghuhukom ug sa biyuda.

Basaha ug hisguti ang Lucas 18:1–8. Ipasabut nga si Jesus nagtudlo niini nga sambingay ngadto sa pundok sa mga Pariseo.

  • Sumala sa Lucas 18:1, ngano nga si Jesus mihatag man sa sambingay sa dili matarung nga maghuhukom ug sa biyuda? Giunsa pagtudlo niini nga sambingay nga kita “kinahanglan nga mag-ampo sa kanunay”? (Tan-awa sa Lucas 18:1–8.)

    Si Elder James E. Talmage nagtudlo, “Si Jesus wala magpasabut nga samtang ang makasasala nga maghuhukom sa katapusan misugot sa hangyo ang Dios mobuhat usab; apan Siya mipasabut nga bisan kon ang maong tawo parehas niini nga maghuhukom, kinsa ‘walay kahadlok sa Dios ni pagtahud sa tawo,’ nga sa katapusan maminaw ug mosugot sa hangyo sa biyuda, walay usa nga magduhaduha nga ang Dios, ang Makiangayon ug Maloloy-on, maminaw ug motubag” (Jesus the Christ, 3rd ed. [1916], 436).

  • Unsa ang gipasabut sa pag-ampo kanunay? (Tan-awa sa Lucas 18:7; Alma 34:27.) Unsa nga mga panalangin ang moabut kanato kon kita mag-ampo kanunay? (Tan-awa sa Lucas 18:7–8, 2 Nephi 32:9; D&P 90:24.)

  • Sa unsa nga paagi nga ang makanunayon nga pag-ampo usa ka buhat sa hugot nga pagtuo? Unsa ang angay natong buhaton kon kita nagmakanunayon sa pag-ampo ug mibati nga kita wala makadawat og tubag?

    Si Elder Richard G. Scott miingon:

    “Kini usa ka sayop nga hunahuna nga ang matag pag-ampo nga atong gihalad tubagon dayon. Ang uban nga mga pag-ampo nagkinahanglan og igo nga paningkamot sa atong bahin….

    “Kon kita mosaysay og usa ka problema ug motanyag sa kasulbaran [ngadto sa atong Langitnong Amahan], usahay Siya motubag og oo, usahay dili.

    Kasagaran Siya dili motubag, dili tungod kay kulang sa pagtagad, apan tungod kay Siya nahigugma kanato—sa hingpit. Siya buot nga kita mogamit sa mga kamatuoran nga Iyang gihatag kanato. Aron kita molambo, kita kinahanglan nga mosalig sa atong kahanas sa paghimo og husto nga mga paghukom. Kita kinahanglan nga mobuhat unsa ang atong gibati nga matarung. Inig abut sa panahon, Siya motubag. Siya dili mopakyas kanato” (sa Conference Report, Okt. 1989, 30–31; o Ensign, Nob. 1989, 30–31.)

  • Unsa ang inyong nakat-unan samtang kamo nagpadayon sa inyong pagampo?

2. Usa ka buta nga tawo nagpakita sa iyang hugot nga pagtuo ug giayo ni Jesus.

Basaha ug hisguti ang Lucas 18:35–43. Ipakita ang hulagway ni Jesus nga nagayo sa buta.

  • Giunsa pagpakita sa buta nga tawo nga didto sa duol sa Jerico nga siya adunay hugot nga pagtuo sa Ginoo? (Tan-awa sa Lucas 18:38–42.) Sa unsa nga paagi nga kamo napanalanginan samtang kamo nagpakita sa inyong hugot nga pagtuo?

  • Giunsa pagpakita sa tawo og pasalamat sa dihang siya nakakita na? (Tan-awa sa Lucas 18:43; tan-awa usab sa Marcos 10:52.) Unsaon nato pagpakita sa atong pasalamat ngadto sa Ginoo?

3. Si Jesus gidawat sa balay ni Zaqueo.

Basaha ug hisguti ang Lucas 19:1–10.

  • Kinsa si Zaqueo? (Tan-awa sa Lucas 19:2. Ipasabut nga ang mga publikano mga Judeo nga nagtrabaho isip maniningil sa buhis alang sa pangagamhanan sa Roma. Ang mga Judeo sa kasagaran wala mahimuot sa mga publikano ug nag-isip kanila nga mga mabudhion ug mga makasasala.)

  • Giunsa ni Zaqueo pagpakita sa iyang dako nga tinguha nga makakita ni Jesus? (Tan-awa sa Lucas 19:3–4.) Unsa ang gisulti ni Jesus ngadto ni Zaqueo human nga nakita siya diha sa kahoy? (Tan-awa sa Lucas 19:5.) Unsa ang gitubag ni Zaqueo sa mga pulong ni Jesus? (Tan-awa sa Lucas 19:6.) Unsa ang atong mahimo aron malipayon nga modawat sa Manluluwas diha sa atong mga panimalay?

  • Unsa ang reaksyon sa mga katawhan sa dihang si Jesus miadto aron mouban ni Zaqueo? (Tan-awa sa Lucas 19:7.) Sa unsa nga paagi nga ang tubag ni Jesus ngadto ni Zaqueo lahi gikan sa tubag sa uban? (Tan-awa sa Lucas 19:5.) Unsa ang atong makat-unan gikan sa ehemplo ni Jesus niini nga istorya?

  • Daghang mga tawo ang naglikay kang Zaqueo tungod sa iyang katungdanan isip usa ka publikano (Lucas 19:2, 7; Ang Giya ngadto sa mga Kasulatan, “Maniningil sa Buhis.”) Sa unsa nga paagi nga kita usahay mohimo og susama nga mga paghukom batok sa uban? Nganong mahinungdanon man alang kanato sa dili pagsalikway sa uban o maghunahuna nga kita mas maayo kay kanila? (Tan-awa sa Alma 5:54–56; 38:13–14.) Unsaon nato pagbuntog ang dili maayo nga mga pagbati batok sa uban?

    Si Elder Joe J. Christensen miingon: “Adunay mga tawo kinsa mobangon matag buntag nga mahadlok moadto sa eskwelahan, o bisan gani ngadto sa kalihokan sa Simbahan, tungod kay sila naguol kon unsaon sila sa pagtagad. Kamo adunay gahum sa pag-usab sa ilang mga kinabuhi ngadto sa mas maayo…. Ang Ginoo naglaum kaninyo nga mahimong tiglig-on ug mobayaw kanila. Ayaw kaayo paghunahuna alang sa inyong kaugalingon ug paghunahuna og sobra mahitungod sa gahum nga anaa kaninyo aron pagtabang sa uban, bisan kadtong sakop sa inyong kaugalingong pamilya” (sa Conference Report, Okt. 1996, 54; o Ensign, Nob. 1996, 39).

4. Si Jesus mipabuhi og balik ni Lazaro gikan sa patay

Basaha ug hisguti ang pinili nga mga bersikulo gikan sa Juan 11:1–54. Ipasabut nga human miadto si Jesus sa panimalay ni Zaqueo, siya nakadawat og mensahe gikan sa iyang mga higala nga sila si Maria ug Marta nga ang ilang igsoong lalaki nga si Lazaro, nga minahal usab nga higala ni Jesus, masakiton (Juan 11:1–5). Human sa duha ka adlaw, si Jesus mihangyo sa iyang mga tinun-an sa pag-uban kaniya ngadto sa Betania, ang dakbayan sa Judea, diin si Maria, Marta, ug Lazaro nagpuyo (Juan 11:6–7).

  • Sa dihang si Jesus mibalik didto sa Betania, si Lazaro namatay sulod na sa upat ka adlaw (Juan 11:17). Unsa ang gibuhat ni Marta sa dihang siya nakadungog nga si Jesus nagsingabut? (Tan-awa sa Juan 11:20.) Unsa ang nakadani kaninyo sa pagpamatuod ni Marta sa balaanong misyon sa Manluluwas? (Tan-awa sa Juan 11:21–27.)

  • Unsa ang gibuhat ni Jesus sa dihang iyang nakita si Maria ug ang uban pa nga naghilak? (Tan-awa sa Juan 11:33–35.) Sa unsang paagi kini nga kasayuran nakaimpluwensya sa inyong mga pagbati mahitungod ni Jesus?

  • Bisan pa sa iyang lig-on nga pagpamatuod, ang hugot nga pagtuo ni Marta daw naluya sa dihang si Jesus mihangyo nga ang bato pagakuhaon gikan sa lubnganan ni Lazaro (Juan 11:39). Giunsa siya pagtabang ni Jesus? (Tan-awa sa Juan 11:40). Unsa ang atong nakat-unan gikan niini mahitungod sa unsa ang gipaabut sa Ginoo gikan kanato?

  • Unsa ang natudlo ngari nato sa pag-ampo ni Jesus sa wala pa niya mapabangon si Lazaro mahitungod sa iyang relasyon uban sa iyang Amahan? (Tan-awa sa Juan 11:41–42.) Sa unsa nga paagi nga kita makasunod sa ehemplo ni Jesus sa atong personal ug sa pamilya nga pag-ampo?

Ipakita ang hulagway ni Jesus nga mipabuhi og balik ni Lazaro gikan sa patay, ug pagdapit og usa ka sakop sa klase sa pagbasa sa Juan 11:43–44.

  • Si Jesus mipabuhi og balik sa duha ka tawo gikan sa patay (Marcos 5:22–24, 35–43; Lucas 7:11–17). Sa unsa nga paagi nga ang pagkabuhi og balik ni Lazaro gikan sa patay magkalahi gikan sa duha ka miaging mga hitabo? (Ang anak nga babaye ni Jairo ug anak nga lalaki sa biyuda sa Nain gibuhi og balik gikan sa patay human sa pagkabulag sa ilang lawas ug espiritu. Sila wala pa mabutang sa lubnganan. Si Lazaro namatay sulod sa upat na ka mga adlaw, ug ang iyang lawas diha na sa lubnganan.)

  • Sa unsa nga paagi nga ang milagro sa pagbuhi og balik ni Lazaro gikan sa patay usa ka saksi sa balaan nga misyon sa Manluluwas? Unsa nga epekto ang anaa niini nga milagro diha sa mga tawo nga nakasaksi niini? (Tan-awa sa Juan 11:45–46.) Giunsa pagpalig-on niini nga milagro sa inyong hugot nga pagtuo diha sa Manluluwas?

Panapos

Ipasabut nga ang mga baruganan nga gitudlo niining mga kasayuran nga imong gihisgutan nakapalig-on sa atong hugot nga pagtuo sa Langitnong Amahan ug ni Jesukristo. Human sa mubo nga pagribyu sa mga kasayuran, basaha ang mosunod nga mga pamahayag ni Elder Thomas S. Monson:

“Ang pagpanglabay sa panahon wala makapausab sa kasarang sa Manunubos sa pag-usab sa mga kinabuhi sa mga tawo. Sama sa iyang gisulti ngadto sa patay nga Lazaro, siya usab misulti nganha kaninyo ug kanako: ‘ … gula kamo.’ (Juan 11:43.) Gula kamo gikan sa walay paglaum nga pagduhaduha. Gula kamo gikan sa mga kasakit sa sala. Gula kamo gikan sa kamatayon sa walay pagtuo. Gula kamo ngadto sa pagkabag-o sa kinabuhi. Gula kamo” (sa Conference Report, Abr. 1974, 72; o Ensign, Mayo 1974, 50).

Awhaga ang mga sakop sa klase sa pagpangita og mga paagi nga sila makapalig-on sa ilang hugot nga pagtuo sa Langitnong Amahan ug ni Jesukristo.

Dugang nga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton kini nga ideya isip kabahin sa leksyon.

Ang sambingay sa Pariseo ug sa publikano

Basaha ug hisguti ang sambingay sa Pariseo ug sa publikano (Lucas 18:9–14).

  • Unsaon ninyo paghulagway ang pag-ampo sa Pariseo niini nga sambingay? Unsaon ninyo paghulagway ang pag-ampo sa publikano?

  • Unsay buot ipasabut sa “ang matag-usa nga magapahitaas sa iyang kaugalingon, igapaubos; apan ang magapaubos sa iyang kaugalingon, igapahitaas”? (Tan-awa sa Lucas 18:14; Ether 12:27.)