Sunday School: Doktrina sa Ebanghelyo
Leksyon 4: ‘Andama Ninyo ang Dalan alang sa Ginoo’

Leksyon 4

“Andama Ninyo ang Dalan alang sa Ginoo”

Mateo 3–4; Juan 1:35–51

Katuyoan

Aron pagdasig sa mga sakop sa klase nga mahiduol ngadto sa Manluluwas pinaagi sa paghinulsol sa ilang mga sala, pagtuman sa ilang mga pakigsaad sa bunyag, ug sa pagpakigbatok sa pagtintal.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. Mateo 3:1–12. Si Juan Bautista nagsangyaw og paghinulsol ug nagbunyag, nag-andam sa dalan ni Ginoong Jesukristo.

    2. Mateo 3:13–17. Si Jesus gibunyagan ni Juan Bautista.

    3. Mateo 4:1–11. Si Jesus nakigbatok sa mga pagtintal ni Satanas diha sa kamingawan.

    4. Juan 1:35–51. Ang uban nga mga tinun-an ni Juan Bautista mihukom sa pagsunod ni Jesus.

  2. Dugang nga basahonon: Marcos 1:1–13; Lucas 3:1–22; 4:1–14; Juan 1:19–34; 2:1–25; 2 Nephi 31; Ang Giya ngadto sa mga Kasulatan, “Bunyag,” “Pagbunyag,” “Juan Bautista,” “Paghinulsol.”

  3. Kon ang mosunod nga mga hulagway anaa, gamita kini sa panahon sa leksyon: Si Juan Nagsangyaw diha sa Kamingawan (62132 853; Pakete sa mga Hulagway sa Ebanghelyo 207) ug Si Juan Bautista Nagbunyag ni Jesus (62133 853; Pakete sa mga Hulagway sa Ebanghelyo 208).

  4. Sugyot alang sa pagtudlo: Gamita ang panahon sa klase nga maalamon. Planoha kon unsa ang imong hisgutan ug pila ka mga minuto ang imong igahin sa matag bahin sa leksyon, apan himoa nga ang Espiritu mogiya kanimo. Ayaw tapusa ang makahuluganon nga panaghisgut aron lang matudlo nimo ang tibuok leksyon. Kini mas mahinungdanon alang sa mga sakop sa klase nga makakat-on ug mobati sa Espiritu kaysa matag punto diha sa leksyon nga pagahisgutan.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Isulat ang mosunod diha sa pisara, ug pangutan-a ang mga sakop sa klase kon sila nakahibalo unsa ang gipasabut niini.

Ipasabut nga kini mao ang Hebreohanon nga pulong Mesiyas, nga nagpasabut nga dinihugan. Ang mga Judeo naghulat sa daghang mga katuigan sa pag-anhi sa Mesiyas, kinsa, sumala sa panagna, mao ang ilang dinihugan nga Hari ug Tigluwas. Ang Griyego nga pulong sa Mesiyas mao ang Kristo. Si Jesukristo mao ang dugay nang gipaabut nga Mesiyas, ug si Juan Bautista mao ang propeta nga gipadala aron pag-andam sa agianan alang kaniya.

Paghisgut ug Paggamit sa Kasulatan

Hisguti kon sa unsa nga paagi nga ang mga pagtulun-an niining mosunod nga mga tudling sa kasulatan makatabang kanato nga mas mahiduol ngadto sa Manluluwas. Tungod kay malisud ang pagpangutana sa matag pangutana o hisgutan ang matag punto diha sa leksyon, sa mainampoong paagi pilia kadtong labing makatagbaw sa mga panginahanglan sa mga sakop sa klase.

1. Si Juan Bautista nag-andam sa dalan ni Ginoong Jesukristo.

Basaha ug hisguti ang Mateo 3:1–12. Ipakita ang hulagway ni Juan nga nagsangyaw, ug ipakigbahin ang mosunod nga impormasyon sa imong kaugalingong mga pulong:

Mga gatusan ka tuig sa wala pa matawo si Juan, daghan nga mga propeta ang nakakita nang daan sa iyang pagpangalagad ug nagpamatuod sa iyang pagkabantugan isip usa ka tawo nga mag-andam sa dalan alang sa Mesiyas (Isaias 40:3; 1 Nephi 10:7–10). Agi og pagpangandam alang sa pagpangalagad ni Juan, ang anghel nga si Gabriel mipahibalo sa umaabut nga pagkahimugso ni Juan (Lucas 1:13–19), si Zacarias nanagna sa adlaw sa paghingalan ug pagtuli ni Juan (Lucas 1:67–79), ug ang anghel mi-orden ni Juan nga nag-edad og walo pa ka adlaw ngadto sa iyang misyon (D&P 84:27–28). Ang pinakahalangdong pamahayag sa pagkabantugan ni Juan naggikan sa Manluluwas mismo, kinsa miingon, “Nga sa tanan nga gianak sa babaye, walay molabaw pa ka bantugan nga propeta kay ni Juan Bautista” (Lucas 7:28).

Si Juan natawo mga unom ka bulan sa wala pa matawo si Jesus. Wala madugay human sa pagkatawo ni Jesus, si Herodes, mibati og kahadlok tungod sa pahibalo nga usa ka bag-ong hari sa mga Judeo natawo, “gipamatay ang tanan nga mga batang lalaki sa Bethlehem ug sa tanan nga kasikbit niini, gikan sa duha ka tuig ang edad paubos” (Mateo 2:16). Aron mapanalipdan si Jesus, ang anghel nagpakita kang Jose sa usa ka damgo ug mimando kaniya sa pagdala ni Jesus ug Maria ngadto sa Ehipto (Mateo 2:13–15). Aron mapanalipdan si Juan, “Si Zacarias mimando ni [Elisabet] sa pagdala kaniya ngadto sa mga kabukiran, diin siya gipakaon og dulon ug dugos sa kagulangan” (Teachings of the Prophet Joseph Smith, sel. Joseph Fielding Smith [1976], 261). Si Juan misugod sa iyang pagpangalagad sa mga tawo human sa daghan nga mga katuigan, unang nagsangyaw sa kamingawan ug unya sa Jerusalem ug “sa tanan nga kayutaan nga palibut sa Jordan” (Mateo 3:5).

  • Unsa ang misyon ni Juan Bautista? (Tan-awa sa Lucas 1:76–79; 3:3–4.) Ngano sa inyong hunahuna nga kadto mahinungdanon man nga adunay usa nga mag-andam sa dalan sa Ginoo?

  • Unsa nga mensahe ang gisangyaw ni Juan aron pag-andam sa katawhan alang sa pag-anhi sa Manluluwas? (Tan-awa sa Mateo 3:1–2.) Unsa ang gipasabut sa paghinulsol? (Samtang ang mga sakop sa klase maghisgut sa mga tubag niini nga pangutana, ilista diha sa pisara ang ubang mga aspeto sa paghinulsol sumala sa gipakita sa ubos. Mahimo nimong dapiton ang mga sakop sa klase sa pagbasa sa kauban nga mga kasulatan.)

    1. Pagbati og diosnon nga kasubo tungod sa sala (2 Mga Taga-Corinto 7:9–10).

    2. Pagkumpisal ug pagsalikway sa mga sala (D&P 58:42–43).

    3. Paghimo og mga pakig-uli, kon mahimo, alang sa mga sayop nga nabuhat (Lucas 19:8).

    4. Pagtuman sa mga sugo (D&P 1:31–32).

    5. Pagbalik ngadto sa Ginoo ug pag-alagad kaniya (Mosiah 7:33).

  • Sa unsa nga paagi nga ang paghinulsol makatabang kanato nga makapuyo uban sa Langitnong Amahan ug ni Jesukristo? (Tan-awa sa 3 Nephi 27:19.) Sa unsa nga paagi nga ang paghinulsol makatabang kanato nga mas mahiduol ngadto kanila matag adlaw?

  • Ang mga Pariseo ug mga Saduceo nakasaksi sa mga pagbunyag nga gipahigayon ni Juan apan mihukom nga dili magpabunyag (Mateo 3:7; Lucas 7:29–30). Si Juan mibadlong kanila, nag-awhag kanila nga “maghinulsol … ug magdala og mga bunga nga angay sa paghinulsol” (Hubad ni Joseph Smith, Mateo 3:35; hinumdumi nga ang pulong nga bunga nagpasabut sa mga sangputanan ug ang pulong nga angay nagpasabut nga takus o angayan). Unsa ang mga bunga sa paghinulsol? (Tan-awa sa Moroni 8:25–26.)

  • Si Juan mibunyag “uban sa tubig ngadto sa paghinulsol” ug misaad nga si Jesus mobunyag “uban sa Espiritu Santo, ug uban sa kalayo” (Mateo 3:11). Unsa ang buot ipasabut sa pagbunyag “uban sa Espiritu Santo, ug uban sa kalayo”?

    Kita gibunyagan uban sa Espiritu Santo ug uban sa kalayo sa dihang kita midawat sa gasa sa Espiritu Santo pinaagi sa pagpandong sa mga kamot (D&P 20:41). “Ang gasa sa Espiritu Santo mao ang katungod nga maangkon, kon ang usa takus, sa pagpakig-uban sa Espiritu Santo…. Kini naglihok ingon nga tiglimpyo aron sa pagpadalisay sa tawo ug pagbalaan kaniya gikan sa tanang sala. Sa ingon kini kanunay nga gilitok ingon nga ‘kalayo’ ” (Bible Dictionary, “Holy Ghost,” 704).

2. Si Jesus gibunyagan ni Juan Bautista.

Basaha ug hisguti ang Mateo 3:13–17. Ipakita ang hulagway ni Juan nga nagbunyag ni Jesus.

3. Si Jesus nakigbatok sa mga pagtintal ni Satanas sa kamingawan.

Basaha ug hisguti ang Mateo 4:1–11 (tan-awa sa Hubad ni Joseph Smith sa Mateo 4:1, 5–6, 8–9, sa Ang Giya ngadto sa mga Kasulatan).

  • Human dayon sa pagbunyag ni Jesus, ang Espiritu midala kaniya ngadto sa kamingawan aron makig-uban sa Dios (Hubad ni Joseph Smith, Mateo 4:1). Sa imong hunahuna sa unsang paagi nga kini nga kasinatian nakaandam ni Jesus sa pagpakigbatok sa mga pagtintal ni Satanas? Sa unsa nga paagi nga ang pagpuasa, pag-ampo, ug ang pagka “giniyahan … sa Espiritu” makapaligon kanato batok sa pagtintal?

  • Unsay gitinguha ni Satanas sa dihang iyang gitintal si Jesus, kinsa nagpuasa, nga ipahimo ang mga bato og pan? (Tan-awa sa Mateo 4:2–3. Siya misulay sa pagdani sa tinguha sa pagtagbaw sa pisikal nga kagana.) Giunsa kita pagtintal ni Satanas aron mosunod sa pisikal nga kagana? Unsaon nato sa pag-ila ug sa pagsalikway niini nga mga pagtintal?

  • Si Satanas misulay sa paggamit sa garbo sa dihang iyang gitintal si Jesus nga moambak sa kinatas-an ug mopamatuod nga siya adunay gahum nga pagaluwason sa mga anghel (Mateo 4:5–6). Giunsa kita pagsulay ni Satanas ginamit ang atong garbo? Unsaon nato sa pag-ila ug pagsalikway sa mga pagtintal aron pagtagbaw sa mapagarbohon nga mga tinguha?

  • Unsa ang gitanyag ni Satanas kon si Jesus mosimba kaniya? (Tan-awa sa Mateo 4:8–9.) Giunsa kita pagtintal ni Satanas ginamit ang kalibutanon nga katigayunan ug gahum? Unsaon nato pag-ila ug pagbatok niini nga mga pagtintal? (Tan-awa sa Mateo 4:10.)

  • Unsa ang bakak kalabut sa tanyag ni Satanas sa paghatag ni Jesus sa mga gingharian sa kalibutan? (Tan-awa sa D&P 104:14.) Unsa ang ubang bakak nga mga tanyag nga gihimo ni Satanas karon aron sa pagdani kanato sa pagpakasala?

  • Gitubag ni Jesus ang matag pagtintal ni Satanas pinaagi sa pagkutlo gikan sa mga kasulatan (Mateo 4:3–4, 6–7, 8–10). Sa unsa nga paagi nga ang mga kasulatan makahatag kanato og kalig-on aron pagpakigbatok sa pagtintal? (Tan-awa sa Helaman 3:29–30.)

  • Si Satanas nangutana sa makaduha kon si Jesus mao ba ang Anak sa Dios (Mateo 4:3, 6).Sa inyong hunahuna ngano kaha nga si Satanas nangutana man niini? Giunsa niya kini pagpangutana sa kalibutan karon? Kon kita magatubang og pagtintal, sa unsang paagi nga makatabang kanato ang kahibalo nga kita mga anak sa Dios? (Tan-awa sa Moises 1:12–22.)

  • Sa unsa nga paagi nga makatabang kanato ang atong kahibalo nga si Jesus, ang Anak sa Dios, nag-atubang og sama nga mga pagtintal sa unsay atong giatubang? (Samtang ang mga sakop sa klase naghisgut niini nga pangutana, mahimo nimo silang pabasahon sa Mga Hebreohanon 4:14–15.)

    Si Elder Joseph B. Wirthlin miingon: “Ang Ginoo nasayud kaayo sa atong pagkamortal. Siya nakahibalo sa atong mga kahuyang. Siya nakasabut sa mga hagit sa atong inadlaw-adlaw nga mga kinabuhi. Siya nakasabut gyud sa mga pagtintal sa kalibutanong mga kagana ug mga kahinam” (sa Conference Report, Abr. 1996, 46; o Ensign, Mayo 1996, 34).

4. Ang ubang mga tinun-an ni Juan Bautista nihukom sa pagsunod ni Jesus.

Basaha ug hisguti ang pinili nga mga bersikulo gikan sa Juan 1:35–51.

  • Sa dihang si Jesus misugod sa iyang mortal nga pangalagad, unsa ang giawhag ni Juan Bautista nga buhaton sa iyang kaugalingong mga tinun-an? (Tan-awa sa Juan 1:35–37.) Sa dihang si Jesus nakakita sa duha ka mga tinun-an ni Juan Bautista nga misunod Kaniya, unsa ang Iyang gibuhat? (Tan-awa sa Juan 1:38–39.)

  • Sa dihang si Andres nakadungog ug nakaila sa Manluluwas, unsa ang iyang gibuhat? (Tan-awa sa Juan 1:40–42.) Human makadawat sa pagpamatuod nga si Jesus mao ang Mesiyas, unsay gibuhat ni Felipe kalabut sa mga pagduda ni Natanael? (Tan-awa sa Juan 1:43–46.) Unsa ang atong buhaton aron madapit nato ang uban sa “pagduol ug pagtan-aw” sa Manluluwas?

Panapos

Ipamatuod nga ang pagdapit sa “pagduol ug pagtan-aw” sa Manluluwas gipaabut nga buhaton sa matag usa kanato. Ipasabut nga kita makadawat niana nga pagdapit pinaagi sa paghinulsol, pagpabunyag, pagtuman sa atong mga pakigsaad sa bunyag, ug pagpakigbatok sa pagtintal.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Mga Pagtulun-an gikan sa pagbunyag sa Manluluwas

Ribyuha ang Mateo 3:16–17.

  • Sa unsa nga paagi nga ang mga kasayuran sa pagbunyag sa Manluluwas nagpakita nga ang bunyag kinahanglan pagahimoon pinaagi sa pag-unlod? (Tan-awa sa Mateo 3:16; tan-awa usab sa Juan 3:23; Mga Taga-Roma 6:3–6; 3 Nephi 11:23–26; Ang Giya ngadto sa mga Kasulatan, “Bunyag,” “Pagbunyag,” nga nagpasabut nga ang pulong bunyag gikan “sa pulong nga Griyego nga nagpasabut nga pagtunlud o pag-unlod.”)

  • Unsa ang nakita ni Juan human niya bunyagi ni Jesus? (Tan-awa sa Mateo 3:16.) Kang kinsang tingog ang iyang nadungog? (Tan-awa sa Mateo 3:17.) Unsa ang gitudlo sa kasayuran sa bunyag sa Manluluwas kalabut sa Dios nga Kapangulohan? (Ang Langitnong Amahan, Jesukristo, ug ang Espiritu Santo lain-lain nga mga nilalang.)

2. Si Jesus mipakita og pagtahud ug gugma alang sa iyang inahan

Ipasabut nga human si Jesus mabunyagi, siya ug ang iyang mga tinun-an mitambong og usa ka kasaulogan nga kasal sa Cana (Juan 2:1–11). Sa dihang ang iyang inahan misulti kaniya nga wala nay bino alang sa kasaulogan, siya nangutana sa iyang inahan, “Unsay gusto nimo nga akong buhaton alang kanimo? Kay ako kanang buhaton” (tan-awa sa Hubad ni Joseph Smith, Juan 2:4).

  • Unsa ang gipadayag sa mga pulong ni Jesus ngadto sa iyang inahan kabahin sa iyang pagbati ngadto kaniya? Unsa ang iyang gibuhat aron pagtabang kaniya? (Tan-awa sa Juan 2:6–11. Ipasabut nga ang unang milagro ni Jesus girekord diha sa Bag-ong Tugon.)

3. Si Jesus mipakita og balaan nga pagtahud samtang siya naglimpyo sa templo

Ipabasa sa mga sakop sa klase ang Juan 2:13–17, nga naglangkob sa istorya ni Jesus nga nakakita og mga magpapatigayon ug tigpangilis og mga salapi nga nagpasipala sa templo. Kon anaa ang hulagway nga Si Jesus Naglimpyo sa Templo (62163 853; Pakete sa mga Hulagway sa Ebanghelyo 224), ipakita kini. Ipasabut nga si Jesus nagpakita og balaan nga pagtahud sa dihang siya “miabug sa tanan ngadto sa gawas sa templo, … ug giyabo ang mga salapi sa mga tigpangilis, ug iyang gipanglintuwad ang ilang mga lamisa” (Juan 2:15). Ipasabut nga ang balaan nga pagtahud alang sa atong Langitnong Amahan naglakip og labaw pa kay sa hilum nga paglingkod diha sa Simbahan. Kini naglakip sa pagpakita pinaagi sa atong mga lihok nga kita naghigugma kaniya ug nga kita modawat sa iyang gahum.