Leksyon 33

“Kamo Mao ang Templo sa Dios”

1 Mga Taga-Corinto 1–6

Katuyoan

Aron pagdasig sa mga sakop sa klase sa pagtinguha sa mga panalangin nga moabut gikan sa pagkahiusa diha ni Kristo, pagsunod sa Espiritu, ug sa pagkalimpyo sa moral.

Pagpangandam

1. Basaha, pamalandongi, ug i-ampo ang mahitungod sa mosunod nga mga kasulatan:

   1. 1 Mga Taga-Corinto 1:10–13; 3:1–11. Si Pablo miawhag sa mga Santos sa paglikay sa panagbingkil ug nga mahimong usa diha sa hunahuna ug sa paghukom.

   2. 1 Mga Taga-Corinto 1:17–31; 2:1–16. Si Pablo mitambag sa mga Santos sa pagsalig sa Espiritu Santo kay sa kaalam ug sa mga pilosopiya sa kalibutan.

   3. 1 Mga Taga-Corinto 3:16–17; 5; 6:9–20. Si Pablo miawhag sa mga Santos nga magmalimpyo sa moral.

2. Dugang nga basahonon: 1 Mga Taga-Corinto 7–10; Ang Giya ngadto sa mga Kasulatan, “Mga Sulat ni Pablo: 1 ug 2 Mga Taga-Corinto,” Mga Taga-Galacia ug Mga Taga-Roma,” 55.

3. Sugyot alang sa pagtudlo: Si Elder Boyd K. Packer mitambag: “Mahinungdanon alang sa usa ka magtutudlo nga makasabut nga ang mga tawo sa kasagaran maayo. Mahinungdanon nga mahibalo nga ang ilang kalagmitan mao ang pagbuhat sa butang nga matarung. Sa ingon nga mahimayaon nga hunahuna makapalambo sa hugot nga pagtuo. Makahimo kini sa tanan nga kalainan kon kita mobarug sa atubangan sa atong kaugalingon nga mga anak o moadto sa atubangan sa klase sa mga batan-on aron sa pagtudlo kanila” (Teach Ye Diligently [1975], 73).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Pagdrowing og usa ka dalan diha sa pisara, ug pagdrowing og awto o lain nga sakyanan diha sa dalan. Dayon ipaambit ang mosunod nga kasinatian nga giistorya ni Elder Joseph B. Wirthlin:

“Samtang kami nagbiyahe subay sa bukiron nga dalan usa ka gabii niana pinaagi sa pagmaneho ubos sa makusog nga ulan inubanan sa makanunayon nga paglagapak sa dugdug ug sa pagkalit og siga sa mga kilat, si Sister Wirthlin ug ako hapit na dili makakita sa dalan, bisan asa diha sa among atubangan o diha sa tuo o diha sa wala. Akong gitan-aw pag-ayo ang puti nga mga linya diha sa dalan labaw pa kaniadto. Ang pagpabilin subay sa mga linya makatabang kanamo nga dili motipas sa dalan ug ngadto sa lawom nga pang-pang diha sa usa ka kilid ug nakatabang kanamo nga makalikay nga magbinanggaay sa pikas bahin. Ang pagtipas sa bisan asa nga linya mahimong makuyaw kaayo. Dayon ako naghunahuna, ‘Aduna bay tawo nga tarung ang panghunahuna nga motipas ngadto sa wala o sa tuo diha sa linya sa trapiko kon siya nasayud nga ang sangputanan makamatay? Kon siya mohatag og bili sa iyang mortal nga kinabuhi, sa pagkatinuod siya magpabilin taliwala niini nga mga linya.’

“Kana nga kasinatian sa pagbiyahe niining bukiron nga dalan sama sa kinabuhi. Kon kita magpabilin sulod sa mga linya nga gimarkahan sa Dios, siya manalipod kanato, ug kita makaabut nga luwas sa kakuyaw ngadto sa atong padulngan” (diha sa Conference Report, Okt. 1990, 80; o Ensign, Nob. 1990, 64).

Ipasabut nga sa panahon nga si Pablo misulat sa iyang unang sulat ngadto sa mga Santos sa Corinto, ang uban kanila nagsugod na sa pagtipas gikan sa mga linya sa ebanghelyo. Kini nga leksyon maghisgut sa mga pag-awhag ni Pablo alang sa mga Santos sa paghinulsol sa tulo ka mga paagi nga sila misugod sa pagkahisalaag. Pagdrowing og tulo ka mga linya diha sa pisara nga nagpakita sa sakyanan nga mitipas sa dalan. Diha sa katapusan sa unang linya isulat ang Panagbingkil ug wala magkahiusa. Diha sa katapusan sa ikaduhang linya isulat ang Mag-agad sa kaalam sa kalibutan. Diha sa katapusan sa ikatulong linya isulat ang Imoralidad.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga ang mga tambag ni Pablo magamit sa atong panahon karon ug unsa nga paagi nga kita makagamit sa iyang mga panudlo diha sa atong kaugalingon nga mga kinabuhi.

1. Likayi ang panagbingkil ug maghiusa.

Basaha ug hisguti ang 1 Mga Taga-Corinto 1:10–13; 3:1–11.

• Unsa nga mga problema ang gisulti ni Pablo diha sa 1 Mga Taga-Corinto 1:10–13? Unsa ang gipasabut nga ang uban nga mga Santos miangkon nga “kang Pablo,” ang uban “kang Apolos,” ang uban “kang Cefas [Pedro],” ug ang uban “kang Kristo”? (Kay sa magkahiusa ingon nga mga sumusunod ni Jesukristo, ang uban nga mga Santos nagpundok-pundok sa ilang mga kaugalingon o grupo sulod sa Simbahan.) Sa unsa nga paagi nga kita usahay makahimo niining sama nga sayop? Unsa ang uban nga mga sangputanan niini nga mga matang sa panagbahin? Sa unsa nga paagi nga ang panagbahin ug panagbingkil makaapekto sa atong panag-uban ingon nga mga tinun-an ni Kristo? (Tan-awa sa Mosiah 18:21–22; 3 Nephi 11:29–30; D&P 38:27.)

• Unsa ang gitambag ni Pablo ngadto sa mga Santos nga buhaton aron mahimong mas magkahiusa? (Tan-awa sa 1 Mga Taga-Corinto 1:10. Samtang ang usa ka sakop sa klase magbasa niini nga bersikulo, ilista ang matag bahin sa tambag ni Pablo diha sa pisara ingon sa gipakita sa ubos.) Sa unsa nga paagi nga kita makagamit niini nga tambag diha sa panimalay ug diha sa Simbahan?

  1. “Pagsulti sa sama nga butang.”

  2. “Ayaw pagbaton og mga panagbahin diha kaninyo.”

  3. “Pagmahingpiton nga maghiusa diha sa sama nga hunahuna ug diha sa sama nga paghukom.”

• Ngano nga ang mga Santos nga Taga-Corinto nakadawat lamang sa “gatas” sa ebanghelyo? (Tan-awa sa 1 Mga Taga-Corinto 3:1–4.) Ngano nga ang panagbingkil makapugong nga kita makadawat sa “unod” sa ebanghelyo? Sa unsa nga paagi nga kita makaandam sa atong mga kaugalingon nga pakan-on sa “unod” sa ebanghelyo?

• Si Pablo mitudlo nga adunay daghan nga mga ministro (mga sulugoon) sa ebanghelyo apan nga si Jesukristo mao lamang ang tinuod nga sukaranan (1 Mga Taga-Corinto 3:5–11). Ngano nga mahinungdanon nga kita magbaton sa Manluluwas ingon nga sukaranan sa atong hugot nga pagtuo? (Tan-awa sa Helaman 5:12.)

2. Salig sa Espiritu kay sa kaalam sa kalibutan.

Hisguti ang 1 Mga Taga-Corinto 1:17–31; 2:1–6. Dapita ang mga sakop sa klase sa pagbasa sa pinili nga mga bersikulo.

• Si Pablo mitudlo nga ang kaalam sa Dios mohimo sa kaalam sa kalibutan nga “kabuang” (1 Mga Taga-Corinto 1:18–21). Sa unsa nga paagi nga ang kaalam sa Dios lahi gikan sa kaalam sa kalibutan? (Tan-awa sa Isaias 55:8–9; D&P 38:1–2. Unsa ang uban nga mga ehemplo sa kaalam sa Dios nga mihimo sa kaalam sa kalibutan nga binuang?

• Sa unsa nga mga paagi nga ang sekular nga pagkat-on usa ka panalangin ngari kanato? (Kon gikinahanglan, ipasabut nga ang sekular nagpasabut nga dili relihiyoso.) Sa unsa nga paagi nga kini mahimong babag ngari kanato? Sa unsa nga paagi nga kita makabalanse sa sekular ug espirituhanon nga pagkat-on? (Tan-awa sa 2 Nephi 9:28–29.)

• Si Presidente Spencer W. Kimball mitudlo: “Adunay kahigayunan sa pagangkon sa [sekular ug espirituhanon nga pagkat-on] nga magdungan…. Kon kita mogahin sa atong mortal nga mga adlaw sa pagtigum sa sekular nga mga kahibalo ngadto sa pagsalikway sa espirituhanon nan kita wala mag-andam sa atong mga kaugalingon, kay kini ang panahon alang sa tawo sa pag-andam sa pagsugat sa Dios; kini ang panahon alang sa hugot nga pagtuo nga pagaligonon, alang sa bunyag nga masangputon; alang sa Espiritu Santo nga pagadawaton, alang sa mga ordinansa nga ipahigayon. Uban niini nga programa mahimong moabut ang sekular nga kahibalo, kay gani diha sa kalibutan sa espiritu human sa kamatayon ang atong mga espiritu makapadayon sa pagkaton” (The Teachings of Spencer W. Kimball, ed. Edward L. Kimball [1982], 390).

• Unsa ang gipasabut ni Pablo sa dihang siya miingon nga ang Dios mipili “sa kabuang sa kalibutan aron sa pagpakaulaw sa mga manggialamon,” ug “sa huyang nga mga butang sa kalibutan aron sa pagpakaulaw sa … mga kusgan”? (1 Mga Taga-Corinto 1:27). Ngano nga ang Dios mipili sa “huyang nga mga butang sa kalibutan” aron pagtuman sa iyang mga katuyoan?

• Unsa nga mga kahuyang ang giatubang ni Pablo samtang siya nagtudlo sa ebanghelyo? (Tan-awa sa 1 Mga Taga-Corinto 2:1–3.) Sa unsa nga paagi nga ang iyang mga kahuyang nahimong mga kalig-on? (Tan-awa sa 1 Mga Taga-Corinto 2:2, 4–5.) Sa unsa nga paagi nga ang Ginoo mitabang kaninyo sa diha nga kamo mibati og kakulang o kahadlok sa paghimo sa iyang buhat?

• Sumala ni Pablo, sa unsa nga paagi kita makahibalo sa “mga butang sa Ginoo”? (Tan-awa sa 1 Mga Taga-Corinto 2:10–13.) Ngano nga kita usahay labaw nga mosalig sa atong kaugalingon nga kaalam ug salabutan kay sa pagpadayag pinaagi sa Espiritu? Unsa nga mga kalainan ang inyong namatikdan tali sa pagkat-on nga moabut pinaagi sa Espiritu ug sa pagkat-on nga moabut pinaagi sa salabutan lamang?

  Si Elder Bruce R. McConkie mitudlo: “Ang tinuod nga relihiyon mao ang usa ka butang sa Espiritu ug dili sa salabutan lamang, ug ang iyang mga kamatuoran mosulod ngadto sa mga kasingkasing sa mga tigpaminaw pinaagi sa gahum sa Espiritu, kay kon dili ang tawhanon nga kalag dili mausab … ug ang nagpangita sa kaluwasan dili mahimong mabuhi diha ni Kristo” (Doctrinal New Testament Commentary, 3 vols. [1966–73], 2:318).

• Si Pablo mitudlo nga imposible alang sa “kinaiyanhon nga tawo” sa pagdawat sa mga butang sa Dios (1 Mga Taga-Corinto 2:14). Ngano nga ingon man niini? Unsa ang atong buhaton aron pagbuntog sa kinaiyanhon nga tawo? (Tan-awa sa Mosiah 3:19.)

3. Kalimpyo sa moral.

Basaha ug hisguti ang pinili nga mga bersikulo gikan sa 1 Mga Taga-Corinto 3:16–17; 5; 6:9–20.

• Unsa ang gitandi ni Pablo sa atong mga lawas? (Tan-awa sa 1 Mga Taga-Corinto 3:16–17; 6:19–20.) Ngano sa inyong hunahuna nga kini tukma nga pagkatandi? Unsa nga mga butang ang makahugaw sa atong mga lawas? Unsa ang atong buhaton aron pag-atiman sa atong mga lawas ingon nga mga templo?

• Diha sa iyang pagpasidaan batok sa daghan nga mga mabug-at nga mga sala sa iyang panahon, si Pablo milakip sa sala sa pakighilawas (1 Mga Taga-Corinto 6:9). Unsa ang balaod sa Dios sa sekswal nga imoralidad? (Tan-awa sa D&P 42:23; 59:6.)

  Si Elder Richard G. Scott miingon: “Bisan unsa nga panghilawas nga gawas sa mga bugkos sa kaminyoon—ako nagpasabut nga bisan unsang tinuyo nga pagdapat sa sagrado, pribado nga mga bahin sa lawas sa uban, aduna o walay saput—usa ka sala ug gidili sa Dios. Usa usab ka kalapasan ang tinuyo nga pag-aghat niini nga mga pagbati sa inyong kaugalingon nga lawas” (sa Conference Report, Okt. 1994, 51; o Ensign, Nob. 1994, 38).

• Ngano nga ang mga sala sa panghilawas seryoso kaayo? (Tan-awa ang mosunod nga mga kinutlo.) Unsa ang mga panalangin sa pagkalimpyo sa moral ?

  Si Elder Joseph B. Wirthlin mitudlo: “Usa ka labing malukpanon nga mga paglingla sa bag-o nga mga panahon mao ang hunahuna nga ang imoralidad normal ug nga madawat ug walay dautan nga mga sangputanan. Sa tinuod lang, ang imoralidad mao ang hinungdan sa daghan nga mga pag-antus ug daghan nga matang sa mga problema nga mikaylap karon, naglakip sa nagdagsang nga mga sakit, pagkuha sa bata gikan sa tiyan, panagbulag sa mga pamilya, mga pamilya nga walay mga amahan, ug mga inahan kinsa sa ilang mga kaugalingon mga anak usab” (diha sa Conference Report, Okt. 1994, 100–101; o Ensign, Nob. 1994, 76).

  Si Elder Boyd K. Packer mitudlo: “[Si Satanas] nahibalo nga kini nga gahum sa paglalang dili lamang importante sa plano, apan mao ang yawe niini. Siya nahibalo nga kon siya makahaylo kaninyo sa paggamit niini nga gahum sa dili pa ang panahon, ang paggamit niini sa hilabihan ka sayo, o sa paggamit niini sa bisan unsa nga paagi, kamo mahimong mawad-an sa inyong mga kahigayunan alang sa mahangturon nga paglambo” (sa Conference Report, Abr. 1972, 137; o Ensign, Hulyo 1972, 112).

• Si Pablo mitambag sa mga Santos sa “dili pagpakig-uban [pakig-abin] sa mga makihilawason nga dili pa minyo” (1 Mga Taga-Corinto 5:9). Sa unsa nga paagi nga kini nga tambag atong magamit? (Hisguti kon sa unsa nga paagi nga ang mga higala ug ang mga matang sa paglingaw-lingaw nga atong gipili makaapekto sa atong tinguha ug abilidad nga malimpyo ang moral.) Sa unsa nga paagi nga kita makalikay sa imoral nga mga impluwensya?

• Unsa nga mga paagi ang gigamit ni Satanas sa pagsulay sa pagdani kanato nga adunay dili apil sa balaod sa moralidad sa Ginoo? (Tan-awa ang kinutlo sa ubos.) Sa unsa nga paagi nga kita makasalikway niini nga mga pagtintal? Unsa nga mga pasalig ang gihatag kanato sa 1 Mga Taga-Corinto 10:13 samtang kita maninguha sa pagsalikway sa mga pagtintal sa pagbuhat sa sala sa pakighilawas? Sa unsa nga paagi nga kamo napanalanginan samtang kamo nangayo sa tabang sa Ginoo sa pagsalikway sa pagtintal?

  Si Elder Richard G. Scott miingon: “Si Satanas motintal sa usa ka tawo sa pagpatuo nga adunay mga kahimtang nga katugutan sa pisikal nga pagdapat sa lawas ngadto sa pag-uyon sa usa ka tawo kinsa nagtinguha sa gamhanan nga paghulhog sa mga pagbati nga anaa kanila, ug kon magpabilin diha sa mga utlanan, walay kadaut nga moabut. Isip usa ka saksi ni Jesukristo ako magpamatuod nga kini hingpit nga bakak…. Paghukom unsa ang inyong buhaton o unsa ang dili buhaton. Kon ang mga pagtintal moabut, ayaw usba ang inyong mga sumbanan” (sa Conference Report, Okt. 1994, 51; o Ensign, Nob. 1994, 38).

• Unsa nga mga saad ang gihatag sa Pag-ula ni Jesukristo niadtong kinsa maghinulsol sa sala sa pakighilawas? (Tan-awa sa 1 Mga Taga-Corinto 6:11; Isaias 1:18; D&P 58:42.)

Panapos

Ipamatuod nga, sama ni Pablo, ang mga apostoles ug mga propeta sa atong panahon karon nagpadayon sa pagtudlo kanato unsa ang angay nga atong buhaton aron magpabilin diha sa mga utlanan nga gihatag sa Ginoo. Ikaw mahimo nga molakbit paghisgut sa bag-ohay nga pakigpulong sa komperensya diin ang propeta o usa sa mga apostoles mihisgot sa hilisgutan nga gisulti ni Pablo sa iyang sulat ngadto sa mga taga-Corinto, sama sa paglikay sa pakiglalis, pagsalig diha sa Espiritu, o pagpabilin nga limpyo sa moralidad. Kon angay, pakig-ambit kon sa unsa nga paagi kamo napanalanginan samtang kamo nagtuman sa tambag gikan ni Pablo o sa usa sa mga apostoles o mga propeta sa ulahing mga adlaw.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Ikaw mahimo nga mogamit sa usa o sa tanan niini nga mga ideya isip kabahin sa leksyon.

1. “Ang mga butang nga gitagana sa Dios alang kanila nga nahigugma kaniya” (1 Mga Taga-Corinto 2:9)

• Unsa ang labing talagsaon o labing maanindot nga butang nga inyong nakita o nasinati?

Ipabasa sa usa ka sakop sa klase ang 1 Mga Taga-Corinto 2:9. Ipamatuod nga ang mga panalangin nga gitagana sa Dios alang kanato kon kita maghigugma kaniya ug maghupot sa iyang mga sugo labaw pa ka talagsaon kay sa bisan unsa nga butang nga atong mahanduraw.

2. “Ang igsoon makigburoka batok sa iyang igsoon” (1 Mga Taga-Corinto 6:6)

Basaha ug hisguti ang 1 Mga Taga-Corinto 6:1–8.

• Sa unsa nga paagi nga ang kadaghanan sa mga Santos sa Corinto misulbad sa ilang panaglalis? (Tan-awa sa 1 Mga Taga-Corinto 6:1–8.) Sa unsa nga paagi nga kini mosangpot sa walay panag-uyon? Sa unsa nga paagi nga kini nga problema makita karon? Unsa ang atong makat-unan gikan sa tambag ni Pablo?