“Ako Buta Kaniadto, Karon Ako Makakita Na”

Katuyoan

Aron pagtabang sa mga sakop sa klase nga mas makasabut ug magpasalamat ni Jesukristo isip mao ang Kahayag alang sa Kalibutan ug ang Maayong Magbalantay.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan:
1. Juan 9. Si Jesus nagpamatuod nga siya mao ang Kahayag sa Kalibutan ug miayo sa usa ka tawo kinsa natawo nga buta. Ang naayo nga tawo mipamatuod ngadto sa mga Pariseo ug misimba kang Jesus.
2. Juan 10:1–15, 25–28. Si Jesus nagtudlo nga siya mao ang Maayong Magbalantay ug nga siya mohalad sa iyang kinabuhi alang sa mga karnero. Ang mga karnero sa Ginoo mao kadtong kinsa maminaw sa iyang tingog ug mosunod kaniya.
Kon ang mosunod nga mga materyal anaa, gamita kini panahon sa leksyon:
1. Ang hulagway nga Si Kristo Nag-ayo og Buta nga Tawo (62145 853; Pakete sa mga Hulagway sa Ebanghelyo 213).
2. Bahin 3 sa “New Testament Customs,” pinili gikan sa New Testament Video Presentations (53914).
Sugyot alang sa pagtudlo: “Maalamon ang pagbaton og kahadlok nga ang atong kahanas dili pa igo sa pagtuman sa gisangon ngari kanato sa pagamuma sa pagtuo sa uban. Ang atong mga abilidad, bisan unsa pa ka dako, dili gayud makasarang. Apan kanang tinud-anay nga pagsabut sa atong mga kakulang makapahimo natong mapaubsanon nga maoy motulod nato ngadto sa pagkamasaligon sa Espiritu ug sa ingon ngadto sa gahum” (Henry B. Eyring, sa Conference Report, Okt. 1997, 114; o Ensign, Nob. 1997, 82–83).

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Hangyoa ang mga sakop sa klase sa paghunahuna og pipila ka pisikal nga mga kakulangan nga giayo ni Jesus sa panahon sa iyang mortal nga pangalagad. Ilista ang ilang mga tubag diha sa pisara. Dayon itudlo nga ang kabahin niini nga leksyon mao ang mahitungod sa pag-ayo ni Jesus sa usa ka buta nga tawo— usa ka milagro nga iyang gihimo kanunay.

Pang-atensyon nga Kalihokan

Sa inyong hunahuna ngano kaha nga ang pag-ayo sa buta mahinungdanon man kaayo nga milagro diha sa pagpangalagad sa Manluluwas? Sa espirituhanon nga paagi unsa ang gisimbolo sa pag-ayo sa buta? (Ang gahum sa Manluluwas sa pagtabang kanato nga makabuntog sa espirituhanon nga pagkabuta ug “makakita” o makasabut sa espirituhanon nga mga kamatuoran.)

Ipasabut nga ang mga kasulatan nga gitun-an niini nga leksyon nagpukos sa pagtan-aw ug sa pagpaminaw sa Manluluwas ug sa atong responsibilidad sa pagtabang sa uban nga mobuhat sa ingon.

Paghisgut ug Paggamit sa Kasulatan

Sa imong pagtudlo sa mosunod nga mga tudling sa kasulatan, hisguti kon unsaon kini paggamit sa inadlaw-adlaw nga kinabuhi. Awhaga ang mga sakop sa klase sa pagpaambit sa mga kasinatian nga may kalabutan sa mga baruganan sa kasulatan.

1. Si Jesus naghatag og panan-aw ngadto sa usa ka tawo nga buta sukad pa sa pagkatawo.

Hisguti ang Juan 9. Dapita ang mga sakop sa klase sa pagbasa sa pinili nga mga bersikulo. Ipakita ang hulagway ni Jesus nga nag-ayo sa buta nga tawo.

Sa wala pa mag-ayo sa tawo kinsa natawo nga buta, si Jesus mipahayag, “Ako ang kahayag alang sa kalibutan” (Juan 9:5). Sa unsang mga paagiha nga si Jesus midala og kahayag ngadto sa buta nga tawo? (Tan-awa sa Juan 9:6–7, 35–38.)
Ang tawo nga kaniadto buta mipamatuod sa daghang mga higayon nga si Jesus miayo kaniya (Juan 9:10–11, 15, 17, 24–25, 27, 30–33. Ikaw mahimo nga moawhag sa mga sakop sa klase nga markahan ang mga tudling diha sa ilang mga kasulatan). Unsa ang atong makat-unan gikan sa ehemplo niini nga tawo? (Ang mga tubag mahimong maglakip nga kita adunay responsibilidad sa pagpaambit sa atong mga pagpamatuod. Itudlo nga ang tawo maisugon nga mipamatuod ngadto sa daghang mga tawo, bisan niadtong misalikway sa iyang pagpamatuod ug mihadlok kaniya.)
Sa unsang paagi nga ang pagpamatuod niini nga tawo mitubo samtang siya nagpadayon sa pagpaambit niini? (Itandi sa mga bersikulo 11, 17, 33, ug 38.) Sa unsang paagi nga ang inyong pagpamatuod mitubo samtang kamo nagpaambit niini?
Unsay gibuhat sa mga Pariseo sa dihang ilang nadunggan ang kabahin sa milagro? (Tan-awa sa Juan 9:16.) Sa inyong hunahuna ngano nga nagdumili man sila sa pagdawat nga si Jesus nakahimo niini nga milagro pinaagi sa gahum sa Dios? (Ang mga tubag mahimong maglakip sa garbo, kasuko mahitungod sa pagpang-ayo ni Jesus sa panahon sa Igpapahulay, kahadlok nga sila mawad-an sa gahum o sa pagkainila, ug uban pa.) Sa unsang paagi nga ang mga Pariseo misulay sa pagdaut ni Jesus? (Tan-awa sa Juan 9:16, 18–20, 24, 28–29, 34.) Giunsa sa ubang mga tawo karon pagsalikway ang gahum sa Dios?
Unsay gibuhat sa mga ginikanan sa tawo nga kanhi buta sa dihang ang mga Pariseo nangutana kanila mahitungod sa milagro? (Tan-awa sa Juan 9:18–23.) Ngano nga ang mga ginikanan mitubag man niini nga paagi? (Tan-awa sa Juan 9:22.) Sa unsa nga paagi nga kita usahay sama sa mga ginikanan niini nga tawo? Sa unsa nga paagi nga kita mahimong mas maisugon sa atong mga pagpamatuod?
Giunsa man sa mga Pariseo pagsilot ang tawo sa dihang siya nagpadayon sa pagpamatuod nga si Jesus ang miayo kaniya? (Tan-awa sa Juan 9:34. Ipasabut nga ang gipapahawa nagpasabut nga gipahimulag sa pagkasakop sa simbahan.) Unsa ang gibuhat ni Jesus sa dihang siya nakadungog nga ang tawo gipapahawa tungod sa iyang pagpamatuod? (Tan-awa sa Juan 9:35–37.) Giunsa man pagpanalangin sa Ginoo ninyo tungod sa pagpabilin nga matinud-anon sa panahon sa kalisdanan?

Kon ikaw naggamit sa video, ipasalida ang “The Synagogue” karon.

Sa unsang paagi nga ang mga Pariseo makakita, ug sa unsang paagi nga sila buta? (Tan-awa sa Juan 9:39–41. Sila nakahibalo og maayo sa balaod, apan sila nabuta sa iyang tinuod nga katuyoan. Sila nagdumili sa pagtan-aw nga si Jesus miabut agi og katumanan sa balaod.) Unsa ang kalainan tali sa pagtan-aw pinaagi sa atong mga mata ug “pagtan-aw” o pagsabut sa espirituhanong paagi? Unsa ang ubang mga hinungdan sa espiritwal nga pagkabuta? Unsa ang atong makat-unan gikan niini nga istorya mahitungod sa kon unsaon pagbuntog ang espiritwal nga pagkabuta?

2. Si Jesus nagtudlo nga siya usa ka Maayong Magbalantay.

Basaha ug hisguti ang Juan 10:1–15, 25–28. Niini nga mga bersikulo, gihulagway ni Jesus kon unsaon sa usa ka magbalantay sa pagpanalipod ug pag-atiman sa iyang mga karnero. Ipasabut nga sa panahon ni Jesus, ang mga karnero dad-on ngadto sa usa ka koral nga gitawag og toril sa mga karnero inig ka gabii. Usa sa mga magbalantay mobantay sa pultahan samtang ang uban mopauli aron sa pagpahulay. Kon adunay ihalas nga hayop nga mosulod sa koral, ang magbalantay sa karnero magpakamatay kon gikinahanglan aron sa pagpanalipod sa mga karnero. Inig ka buntag, tanang mga magbalantay sa mga karnero mobalik ug motawag sa iyang mga karnero. Kini sila makaila sa iyang tingog ug mosunod kaniya aron manibsib.

Sa paghisgut ni Jesus kabahin sa magbalantay sa mga karnero ug sa iyang mga karnero, kinsa ang gipasabut nga mao ang mga karnero? (Tan-awa sa Juan 10:4, 27.) Kinsa ang magbalantay sa mga karnero? (Tan-awa sa Juan 10:11.) Unsa ang pipila ka mga hiyas sa maayong magbalantay? (Ikaw mahimo nga molista niining mga hiyas diha sa pisara sama sa gipakita sa ubos.)
1. Siya makaila sa iyang mga karnero, motawag kanila sa ilang ngalan, ug mangulo kanila (Juan 10:3–4, 14).
2. Siya mao ang pultahan alang sa mga karnero, motugot kanila sa pagsulod sa pundok aron maluwas ug makakaplag og masibsib (Juan 10:7, 9).
3. Siya mohatag sa mga karnero og “kinabuhi … nga madagayaon gayud” (Juan 10:10).
4. Siya mohalad sa iyang kinabuhi alang sa mga karnero (Juan 10:11, 15).
Unsa ang kalainan tali sa usa ka magbalantay sa mga karnero ug sa usa ka sinuhulan? (Tan-awa sa Juan 10:11–14.) Sa unsang paagi nga si Jesus mao ang hingpit nga ehemplo sa usa ka magbalantay sa mga karnero? (Ginamit ang lista nga imong nasulat diha sa pisara, hisguti kon giunsa ni Jesus paghatag og ehemplo sa matag usa niini nga mga hiyas. Tan-awa sa 2 Nephi 9:41–42 sa paghisgut nimo sa unsang paagi nga si Jesus mao ang pultahan sa mga karnero. Sa imong paghisgut sa pagka-andam ni Jesus nga mohatag sa iyang kinabuhi alang kanato, tan-awa sa Juan 10:17–18.)
Giunsa sa mga karnero pag-ila ang ilang magbalantay? (Tan-awa sa Juan 10:3–4.) Unsaon man nato pagkadungog sa tingog sa Ginoo? (Tan-awa sa D&P 1:37–38; 18:33–36; 97:1.) Sa unsang paagiha nga kita mapanalipdan kon kita masayud ug mosunod sa tingog sa Maayong Magbalantay?

Kon ikaw naggamit sa video, ipasalida ang “The Shepherd” ug ang “The Sheepfold” karon.

Kinsa ang mga kawatan ug mga tulisan nga mosulay pagsulod sa toril? (Tan-awa sa Juan 10:1. Sila ang mga tawo nga mosulay sa paghatag og kadaot sa mga sumusunod sa Ginoo ug mopahisalaag kanila.) Unsaon man nato pag-ila tali sa tinuod nga mga magbalantay ug kadtong mosulay sa pagpahisalaag kanato? (Tan-awa sa Juan 10:10.)
Sa unsang paagi nga ang mga karnero gantihan tungod sa pagsunod sa Maayong Magbalantay? (Tan-awa sa Juan 10:9–10, 28.) Sa unsa nga paagi nga kamo napanalanginan tungod sa pagsunod sa Manluluwas?

Panapos

Ipamatuod nga si Jesus mao ang Kahayag alang sa Kalibutan ug ang Maayong Magbalantay. Kon angay, ipaambit sa mga sakop sa klase kon giunsa sa Ginoo pagtabang kanimo nga makatan-aw sa espirituhanong paagi ug makasunod kaniya.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Ang atong mga responsibilidad ingon nga magbalantay sa mga karnero

Sa unsa nga paagi nga kita nahimo usab nga mga magbalantay sa mga karnero sa Ginoo? Unsa ang atong mahimo aron pagtabang sa uban nga makadungog ug mosunod sa tingog sa Maayong Magbalantay?

Si Elder Bruce R. McConkie nagtudlo: “Bisan kinsa nga nag-alagad sa bisan unsa nga kapasidad diha sa Simbahan diin siya may tulubagon alang sa espirituhanon ug temporal nga kaayohan ni bisan kinsa nga mga anak sa Ginoo mao usab ang magbalantay niadto nga mga karnero. Ang Ginoo naghimo sa iyang mga magbalantay nga may tulubagon alang sa kaayohan (kaluwasan) sa iyang mga karnero” (Mormon Doctrine, 2nd ed. [1966], 710).

2. “Uban nga mga karnero Ako aduna” (Juan 10:16)

Kinsa ang gipasabut ni Jesus diha sa Juan 10:16? (Tan-awa sa 3 Nephi 15:21–24.) Kanus-a nakadungog kining “uban nga mga karnero” sa tingog sa Manluluwas? Sa unsa nga paagi nga kini nga bersikulo makatabang sa usa ka tawo nga nagpakisusi sa Simbahan aron adunay maayo nga pagsabut sa Basahon ni Mormon?

Si Elder Howard W. Hunter nagtudlo: “Kadtong mga nasinati sa kinabuhi ug mga pagtulun-an sa Magtutudlo gikan sa ilang kahibalo sa mga basahon diha sa Biblia mahimong interesado nga mahibalo nga adunay usa usab ka talaan sa iyang pagpakita sa mga katawhan diha sa Kasadpang Katunga nga Bahin sa Kalibutan–ang uban nga mga karnero nga iyang gihisgutan. Kini giulohan nga ang Basahon ni Mormon nga gingalan sunod sa propeta kinsa mitigum ug mipamubo sa mga talaan sa mga katawhan didto sa kontinente sa Amerika. Ang Basahon ni Mormon mao ang lain nga saksi ni Kristo ug nagrekord sa iyang mga pagtulun-an ngadto sa laing panon sa Bag-o nga Kalibutan” (sa Conference Report, Abr. 1983, 19; o Ensign, Mayo 1983, 16).

3. Nagkalainlain nga mga paagi sa pagtan-aw

Aron pagtabang sa mga sakop sa klase nga hingpit nga makapasalamat sa mga paagi sa Manluluwas sa pagtabang kanato nga makakita, paghimo og ginunting nga pulong sa pipila ka nagkalainlain nga mga kahulugan sa pulong nga tan-awa (gisugyot nga mga kahulugan makita sa ubos). Ibutang ang ginunting nga mga pulong diha sa kalo o kahon, ug papuli-puliha ang mga sakop sa klase sa pagpili og usa ka ginunting nga pulong ug ipasabut giunsa sa Manluluwas pagtabang kanato nga makakita sa paagi nga kini gihulagway. Kini nga ideya mahimong epektibo ilabi na sa mga klase sa mga batan-on.

nga makakita pinaagi sa mata

nga makasabut

nga makahibalo sa

nga makahunahuna ingon nga

nga makakaplag

nga makagiya sa atensyon sa

nga makakita gikan sa usa ka talagsaon nga panglantaw