Leksyon 10

“Isangon Ninyo ang Akong Yugo diha Kaninyo, ug Pagkat-on Kamo Gikan Kanako.”

Mateo 11:28–30, 12:1–13; Lucas 7:36–50; 13:10–17

Katuyoan

Aron pagtabang sa mga sakop sa klase nga makasabut nga samtang kita mosangon o mopas-an sa yugo sa Manluluwas ug mobuhat sa iyang kabubut-on, kita makakaplag sa kalinaw ug hingpit nga kalipay nga iyang gisaad.

Pagpangandam

1. Basaha, pamalandongi, ug i-ampo ang mahitungod sa mosunod nga mga kasulatan:

   1. Mateo 11:28–30. Si Jesus nagdapit sa tanan kinsa naghago ug nabug-atan sa pagduol ngadto kaniya, mosangon sa iyang yugo diha kanila, ug magkat-on gikan kaniya.

   2. Mateo 12:1–13; Lucas 13:10–17. Si Jesus namahayag nga siya ang Ginoo sa Igpapahulay. Siya miayo og mga tawo sa adlawng Igpapahulay ug gisaway tungod niini.

   3. Lucas 7:36–50. Usa ka babaye nga nangayo og pasaylo ang mihugas sa mga tiil sa Ginoo sa iyang mga luha; si Simon nga Pariseo mitamay ni Jesus tungod sa iyang pagpahikap sa usa ka makasasala nga babaye. Si Jesus mitudlo ni Simon sa sambingay sa duha ka mangungutang og kwarta ug mipasaylo sa babaye.

2. Dugang nga basahonon: Isaias 58:13–14; Mateo 11:16–19; 12:14–50; 26:6–13; Marcos 2:23–3:12; 14:3–9; Lucas 6:1–11; Doktrina ug mga Pakigsaad 59:9–19.

3. Kon ang mosunod nga mga materyal anaa, gamita kini sa atol sa leksyon:

   1. “Come unto Me”, usa ka pito ka minuto nga bahin gikan sa New Testament Video Presentations (53914).

   2. Ang hulagway ni Mary Fielding ug Joseph F. Smith nga Nagpanaw sa mga Kapatagan (62608 853; Pakete sa mga Hulagway sa Ebanghelyo 412), nga nagpakita sa usa ka parisan sa giyugohan nga kabayo.

4. Sugyot alang sa pagtudlo: Samtang mangandam ka sa matag leksyon, paghunahuna sa mainampoon nga paagi kon unsaon pag-awhag ang matag sakop sa klase aron moapil. Ang mga pagpasundayag, mga panaghisgut uban sa gagmay nga pundok, pag-role play, ug uban pang tukma nga mga kalihokan makatabang sa mga sakop sa klase nga mas ganahang moapil. (Tan-awa sa Teaching, No Greater Call, mga pahina 61–72, 159–84.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Hangyoa ang usa ka sakop sa klase sa pagduol sa atubangan sa klase ug ipabukhad ang iyang mga kamot. Pagbutang og mga basahon o uban pang bug-at nga mga butang diha sa mga kamot nianang tawhana. Padayon sa pagbutang diha sa mga kamot sa sakop uban sa mga butang hangtud nga siya mao ra og nabug-atan. Unya pangutana:

Pang-atensyon nga Kalihokan

• Hangtud kanus-a ikaw makapas-an niini nga kabug-at sa dili pa mohunong aron mopahulay? Unsa nga mga pagpangandam ang imong himoon aron pagdala sa bug-at ngadto sa layo kaayo?

Ipasabut nga adunay daghang mga matang sa mga karga, o mga kabug-at. Ang uban mga pisikal, samtang ang uban espirituhanon o sa emosyon ug dili ingon ka sayon nga makit-an. Daghang dili makita nga mga palas-onon ang molabaw pa sa atong gahum sa pagpas-an niini nga mag-inusara, ug kita mahimong maluya. Kini nga leksyon maghisgut sa unsa nga paagi nga ang Ginoo mopagaan sa atong mga kabudlay ug mohatag kanato og pahulay.

Paghisgut ug Paggamit sa Kasulatan

Samtang ikaw magtudlo sa mosunod nga mga tudling sa kasulatan, hisguti kon sa unsa nga paagi kini magamit diha sa inadlaw-adlaw nga kinabuhi. Awhaga ang mga sakop sa klase sa pagpakigbahin og mga kasinatian nga may kalabutan ngadto sa mga baruganan sa kasulatan.

1. Si Jesus midapit kanato sa pagsangon sa iyang yugo diha kanato ug pagkat-on gikan kaniya.

Basaha ug tukia ang Mateo 11:28–30.

• Unsa ang gipasabut sa “naghago ug [mahimong] mabug-atan”? (Mateo 11:28). Unsa ang uban nga mga ehemplo sa mga kabudlay nga atong gipas-an niini nga kinabuhi? Sa unsang paagi nga ang Ginoo “makahatag [kanato] og pahulay gikan niini nga mga kabudlay?

• Unsa ang usa ka yugo? (Ipakita ang hulagway ni Mary Fielding ug Joseph F. Smith ug itudlo ang toro nga may yugo diha sa hulagway. Ipasabut nga ang yugo usa ka bayanan o giporma nga kahoy o puthaw nga mahimong ibutang sa usa o duha ka tawo o mga hayop nga mobira o modala sa bug-at nga karga. Ang yugo mobalanse sa gibug-aton ug mohimo niini nga sayon nga bitaron. Agi og dugang sa kahulugan niini, ang ideya sa usa ka yugo makita usab diha sa daghan nga mga kasulatan ingon nga pasumbingay alang sa pagkaulipon o pagka binilanggo; tan-awa sa Jeremias 28:2; Alma 44:2.) Unsa ang gipasabut sa pagsangon sa yugo ni Kristo diha kanato? (Mapainubsanon nga mobuhat sa iyang kabubut-on ug motugot kaniya sa paggiya ug pagdumala sa atong mga kinabuhi.)

Kon ikaw naggamit sa video nga “Come Unto Me,” ipasalida ang unang bahin niini karon. Ihunong ang video kon si Presidente Howard W. Hunter nakahuman na sa iyang pagsulti.

• Ang Ginoo miingon, “Kay masayon ang akong yugo, ug magaan ang akong gipas-an” (Mateo 11:30). Sa unsang paagi nga ang yugo sa Manluluwas masayon? Ngano nga ang uban nga mga tawo naghunahuna nga ang mga pagtulun-an sa Ginoo hilabihan ka mapig-oton? Sa unsa nga paagi nga ang pagsunod ug pag-alagad sa Ginoo makahimo sa atong mga kabudlay nga magaan?

2. Si Jesus mipahayag nga siya mao ang Ginoo sa Igpapahulay.

Tukia ang Mateo 12:1–13 ug Lucas 13:10–17. Dapita ang mga sakop sa klase sa pagbasa og kusog sa pinili nga mga bersikulo.

• Unsay gibuhat sa mga Pariseo sa dihang sila nakakita sa mga tinun-an ni Jesus nga nanguha og mais atol sa Igpapahulay? (Tan-awa sa Mateo 12:1–2. Ipasabut nga ang hubad sa mga Pariseo sa balaod ni Moises mibaliwala sa tinuod nga espiritu ug katuyoan sa Igpapahulay ug hinoon nagpunting sa mga tradisyon nga labing nagpig-ot sa mga kalihokan sa Igpapahulay.) Unsa ang gitudlo sa Ginoo samtang siya mitubag sa ilang mga pagpasangil? (Tan-awa sa Mateo 12:3–8.)

• Unsa ang gipasabut ni Jesus sa dihang siya miingon, “Maoy kahimut-an ko ang pagkaluoy, ug dili ang paghalad”? (Mateo 12:7. Siya buot nga ang katawhan mopukos sa paghigugma sa uban, dili lamang sa paghimo og relihiyoso nga mga seremonya sa publiko.) Sa unsa nga paagi nga kita makagamit niini nga baruganan aron paggiya sa atong mga kalihokan sa Igpapahulay?

• Unsa ang gitudlo ni Jesus mahitungod sa katuyoan sa Igpapahulay sa dihang iyang giayo ang usa ka lalaki nga ang kamot mikuyos ug ang babayeng bakul? (Tan-awa sa Mateo 12:10–13; Lucas 13:10–17.) Unsa ang iyang gitudlo mahitungod sa Igpapahulay diha sa Marcos 2:27–28? (Ipasabut nga sa Hubad ni Joseph Smith sa Marcos 2:26 nagpasabut nga ang Igpapahulay gihatag ingon nga “adlaw sa pagpahulay” ug adlaw sa “paghimaya sa Dios.”) Unsa ang atong buhaton sa adlaw nga Igpapahulay aron paghimaya sa Dios? Sa unsa nga paagi nga ang pagbalaan sa adlaw nga Igpapahulay makahimo sa atong mga gipas-an nga magaan ug makahatag kanato og kapahulayan?

3. Si Jesus mipasaylo sa usa ka babaye diha sa balay ni Simon nga Pariseo.

Kon ikaw naggamit sa video nga “Come Unto Me” ipakita ang nahibilin niini karon. Dayon basaha ug hisguti ang pinili nga mga bersikulo gikan sa Lucas 7:36–50.

• Ang babaye nga misulod sa balay ni Simon nga Pariseo nagdala sa kabudlay sa sala (Lucas 7:37). Unsa ang gibuhat sa babaye nga nakapahimo ni Jesus sa pagkuha sa iyang kabudlay? (Tan-awa sa Lucas 7:38, 44–50.) Unsa ang atong buhaton aron ang Manluluwas mokuha sa kabug-at sa sala gikan sa atong mga kinabuhi?

  Sa unsang paagi nga ang babaye nga makasasala ug si Simon nga Pariseo magkalahi sa ilang mga batasan ngadto ni Jesus? (Ipakita ang kalainan sa paghinulsol, pagrespeto, pagpaubos, ug gugma sa babaye tali sa garbo, kulang sa pagtahud, ug mahukmanon nga kinaiya ni Simon. Tan-awa usab ang kinutlo sa ubos.) Ngano nga ang mga kinaiya nga gibatonan sa babaye mahinungdanon samtang kita maghinulsol ug mangayo og kapasayloan? Sa unsa nga paagi nga ang mga kinaiya nga gibatonan ni Simon makapahilayo kanato gikan sa paghinulsol?

  Si Elder James E. Talmage nagtudlo: “Nabatasan na niadtong panahona ang paghatag sa usa ka pinasidunggan nga dinapit sa tumang pagtagad; sa pagpadayon kaniya uban sa halok sa pag-abi-abi, sa paghatag og tubig alang sa paghugas sa abog gikan sa iyang mga tiil, ug lana alang sa pagdihog sa buhok sa iyang ulo ug sa bungot. Kining tanan nga mabinationg mga pagtagad wala mahimo ni Simon” (Jesus the Christ, 3rd ed. [1916], 261).

• Sa unsa nga paagi nga ang batasan ni Simon ngadto sa babaye nakahatag og dugang kabug-at sa iyang sala? Sa unsa nga paagi nga kita makahatag usahay og dugang kabug-at sa sala sa uban nga tawo? Unsa ang atong makat-unan gikan sa tubag sa Manluluwas ngadto sa babaye?

• Bisan tuod kon siya wala dapita ug mirisgo nga dili tagdon sa mabination nga paagi ni Simon ug sa iyang sakop sa panimalay, ang babaye miadto paglahus kang Kristo sa dihang siya nakahibalo kon asa siya makit-an (Lucas 7:37). Unsa ang atong makat-unan gikan sa iyang ehemplo? Unsa ang mga babag nga malagmit makapugong kanato gikan sa paghinulsol ug sa pagduol ngadto ni Kristo? Unsaon man nato sa pagbuntog niini nga mga babag?

• Unsa ang atong makat-unan gikan sa sambingay sa duha ka mga mangungutang? (Tan-awa sa Lucas 7:41–50.) Sa unsa nga paagi nga ang sala matandi ngadto sa utang? (Tan-awa sa Lucas 7:44–50.) Sa unsa nga paagi nga ang paghimo ni Kristo ingon nga atong “tigpautang” makahimo sa atong mga kabudlay nga magaan?

Panapos

Ipamatuod nga kita makapili sa pagdala sa atong mga kaugalingon sa mga kabudlay sa kalibutan o sa yugo ni Jesus. Ipamatuod nga ang mga pagtulun-an ni Kristo tinuod ug nga kita makakaplag sa kapahulayan kon kita mosunod kaniya. Awhaga ang mga sakop sa klase sa pagkat-on diha ni Kristo ug sa pagsunod sa iyang mga pagtulun-an aron sila makakaplag sa kapahulayan ug kalinaw.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Ang kamahinungdanon sa panaghiusa

Basaha ug tukia ang Mateo 12:22–30.

• Sa unsa nga paagi nga kita wala magkahiusa usahay batok sa atong mga kaugalingon diha mismo sa atong mga pamilya, mga panimalay, o mga ward? Unsa ang atong buhaton aron mahimong mas magkahiusa?

• Si Jesus misulti sa mga Pariseo, “Siya nga wala kanako nakigbatok kanako” (Mateo 12:30). Ngano nga ingon man niini?

2. “Matag walay hinungdan nga pulong” (Mateo 12:36)

Basaha ug tukia ang Mateo 12:33–37.

• Unsa ang gipadayag sa mga pulong nga atong gisulti mahitungod kanato? Ngano nga si Jesus mibutang og dakong importansya sa mga pulong nga atong gisulti? Unsa ang pipila ka mga ehemplo sa “walay hinungdan nga mga pulong”? (Ang mga tubag mahimong maglakip sa pagbugal-bugal, pagtabi-tabi, pagpamakak, pagpamalikas, pagbinastos). Sa unsa nga paagi nga kita makapalig-on sa atong mga pasalig sa pagsulti lamang sa maayo nga mga paagi?