Sunday School: Doktrina sa Ebanghelyo
Leksyon 43: ‘Pinili nga Kaliwatan’

Leksyon 43

“Pinili nga Kaliwatan”

1 ug 2 Pedro; Judas

Katuyoan

Aron pagtabang sa mga sakop sa klase sa pagpuyo diha sa pagkabalaan ug nga mahimong usa ka pinili nga kaliwatan.

Pagpangandam

  1. Basaha, pamalandongi, ug i-ampo ang mahitungod sa mosunod nga mga kasulatan:

    1. 1 Pedro 1; 2:1–10. Si Pedro nagtudlo nga kita kinahanglang magbaton og hugot nga pagtuo ug magpuyo sa pagkabalaan. Siya mipasabut nga ang mga Santos usa ka pinili nga kaliwatan, gitawag aron sa pagpakita sa mga pagdayeg ngadto sa Manluluwas.

    2. 1 Pedro 2:19–24; 3:13–17; 4:12–19. Si Pedro nagtudlo nga kita kinahanglang mosunod sa ehemplo sa Manluluwas sa paglahutay sa mga pagsulay ug sa mga pagpanggukod.

    3. 2 Pedro 1. Si Pedro miawhag kanato sa pag-ambit sa diosnong kinaiya ug magmakugihon sa pagsiguro sa atong pagtawag ug pagkapili.

    4. 2 Pedro 2–3; Judas. Si Pedro ug si Judas mipasidaan batok sa mini nga mga magtutudlo ug niadtong misalikway sa Ikaduhang Pag-anhi. Sila miawhag sa mga sumusunod ni Kristo sa pagpabilin nga matinud-anon.

  2. Dugang nga basahonon: 1 Juan 3:2–3; 3 Nephi 12:48; Doktrina ug mga Pakigsaad 122:7–8.

  3. Sugyot alang sa pagtudlo: Pagtuon pag-ayo sa matag leksyon aron ikaw makatudlo niini nga dili motan-aw kanunay sa manwal. Makatabang kon ikaw nakahibalo sa imong igtutudlo sa pagtan-aw kanunay sa mga mata sa mga sakop sa klase samtang ikaw magtudlo. Ang pagtan-aw sa mga mata makadugang sa partisipasyon sa mga sakop sa klase ug makapalambo sa ilang mga kinaiya ug makatabang kanimo sa pagsulti sa imong gugma ug pagtagad alang kanila.

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Ipaambit ang mosunod nga istorya nga giistorya ni Bishop Vaughn J. Featherstone:

“Daghang mga tuig ang milabay ako nakadungog sa usa ka sugilanon sa anak ni Hari Louis XVI sa Pransya. Si Haring Louis gipapahawa gikan sa iyang trono ug gibilanggo. Ang iyang anak nga lalaki, ang prinsipe, gidagit sa mga tawo nga mipapahawa sa hari. Sila naghunahuna nga tungod kay ang anak sa hari manununod sa trono, kon sila makapahimo kaniya nga imoral, siya dili gayud makahibalo sa maanindot nga kapalaran nga gihatag sa kinabuhi kaniya.

“Sila midala kaniya ngadto sa usa ka katilingban nga layo kaayo, ug didto sila mipabantang sa batan-on sa tanan nga kahugaw ug kadautan nga ikatanyag sa kinabuhi … Sulod sa sobrag unom ka bulan giingon siya niini pagtratar––apan walay bisan kausa nga ang batan-ong lalaki nakig-abin sa nagtintal. Sa katapusan, human sa hilabihan nga pagtintal, sila nangutana kaniya, ngano nga siya wala motugyan sa iyang kaugalingon ngadto niini nga mga butang––ngano nga siya wala gyud magpadala? Kini nga mga butang mohatag og kalipay, motagbaw sa iyang kahigal, ug kini maanindot; maiya kining tanan. Ang batan-ong lalaki miingon, “Ako dili makabuhat sa inyong gisugo tungod kay ako gipakatawo nga mahimong hari” (“The King’s Son,” New Era, Nob. 1975, 35).

Si Bishop Featherstone mikomentaryo:

“Ang atong Amahan usa ka hari, ug sama nga ang anak sa hari gipabantang sa tanan nga kadautan ug sa hiwi nga butang niini nga kinabuhi, kamo usab mahimong mapabantang sa hilabihan nga kahugaw ug kaubos sa atong kaliwatan. Apan kamo … usab natawo nga mahimong mga hari ug mga rayna, mga pari ug mga pari nga babaye [priestesses]” (New Era, Nob. 1975, 35).

Pang-atensyon nga Kalihokan

  • Ingon nga espiritu nga anak sa atong Langitnong Amahan, unsa ang atong potensyal? Sa unsa nga paagi nga ang kahibalo sa atong balaan nga potensyal makaimpluwensya sa paagi sa atong pagpuyo?

Hatagi og gibug-aton nga ingon nga mga anak sa atong Langitnong Amahan, kita mahimong sama kaniya ug makapanunod sa iyang tanan nga gipanag-iya. Ang mga sulat nila ni Pablo ug ni Judas nagtanyag og bililhon nga mga pagtulun- an nga makatabang kanato sa pagpuyo nga takus ingon nga mga anak sa Dios.

Paghisgut ug Paggamit sa Kasulatan

Sa mainampoong paagi pagpili sa mga tudling sa kasulatan, mga pangutana, ug uban nga materyal sa leksyon nga mas makatubag sa panginahanglan sa inadlaw- adlaw nga kinabuhi. Awhaga ang mga sakop sa klase sa pagpaambit og mga kasinatian nga may kalabutan sa mga baruganan sa kasulatan.

1. Pagpuyo uban sa hugot nga pagtuo ug pagkabalaan ingon nga usa ka pinili nga kaliwatan.

Tukia ang 1 Pedro 1 ug 2:1–10. Dapita ang mga sakop sa klase sa pagbasa sa pinili nga mga bersikulo.

  • Unsa ang gitudlo ni Pedro sa kapitulo 1 mahitungod sa misyon ni Jesukristo? (Tan-awa sa 1 Pedro 1:3–4, 18–21.) Sa unsa nga paagi nga ang pagkahibalo sa misyon ug sakripisyo sa Manluluwas makaapekto sa atong inadlaw-adlaw nga mga lihok? (Tan-awa sa 1 Pedro 1:8, 13–16, 22–23; 2:5. Mahimong ilista nimo sa pisara ang mga tubag sa mga sakop sa klase.)

  • Ngano nga ang hugot nga pagtuo “labaw kabililhon kay sa … bulawan,” sama sa giingon ni Pedro (1 Pedro 1:7; Mga Hebreohanon 11:6; 1 Nephi 7:12.) Unsa sa inyong hunahuna ang gipasabut nga ang atong hugot nga pagtuo pagasulayan sa kalayo? Unsa gayud ang katuyoan sa atong hugot nga pagtuo? (Tan-awa sa 1 Pedro 1:5, 9.)

  • Si Pedro mitudlo nga ang mga propeta kinsa mipamatuod ni Jesukristo “nagkugi sa pagpangita ug pagpakisusi nga matinguhaon” (1 Pedro 1:10; tan-awa usab sa bersikulo 11). Sa unsa nga paagi nga ang matinguhaon nga pag-ampo ug pagtuon sa kasulatan makalig-on sa atong mga pagpamatuod sa Manluluwas?

  • Kinsa ang pinili nga kaliwatan nga gisulti ni Pedro? (1 Pedro 2:9–10 ug ang kinutlo sa ubos.) Unsa ang atong responsibilidad ingon nga usa ka pinili nga kaliwatan? (Tan-awa sa 1 Pedro 2:9.) Unsaon nga kita makatuman niini nga responsibilidad? (Tan-awa sa Mateo 5:16.)

    Si Elder Bruce R. McConkie mihatag og kahulugan sa usa ka pinili nga kaliwatan nga “dili kadtong nagpuyo diha sa piho nga panahon o edad, apan … sa balay sa Israel sa karaan, sa panahon nga si Jesukristo mipuyo sa yuta, ug karon niining ulahing mga adlaw … [Kini naglakip] sa matinud-anong mga sakop sa Simbahan kinsa midala sa ilang mga kaugalingon sa ngalan ni Jesukristo ug nga gisagup ngadto sa iyang pamilya” (Doctrinal New Testament Commentary, 3 bol. [1966–73], 3:294).

2. Sunda ang ehemplo sa Manluluwas sa paglahutay sa mga pagsulay ug mga kasakit.

Basaha ug hisguti ang 1 Pedro 2:19–24; 3:13–17; 4:12–19.

  • PSi Pedro misulat nga si “Kristo … nag-antus tungod kanato, nagbilin kanato og panig-ingnan” (1 Pedro 2:21). Unsa ang atong buhaton aron makasunod sa ehemplo sa Manluluwas sa pag-atubang sa mga pagsulay ug sa mga pagpanggukod? (Tan-awa sa 1 Pedro 2:19–23.) Unsa nga mga ehemplo ang inyong nakita sa mga tawo kinsa sama ni Kristo milahutay sa mga pagsulay? Sa unsa nga paagi nga kita mapanalanginan samtang kita magsunod sa ehemplo sa Manluluwas sa pag-atubang sa mga pagsulay?

  • Kanus-a nga kamo (o usa ka tawo nga inyong nailhan) gigukod tungod sa inyong pagbuhat sa kabubut-on sa Ginoo? Giunsa kita pagtambag ni Pedro sa pagtubag sa ingon nga mga kahimtang? (Tan-awa sa 1 Pedro 3:13–17; 4:12–19. Ikaw mahimo nga molista sa mga tubag sa mga sakop sa klase diha sa pisara.) Sa unsa nga mga paagi nga ang pagsulay makahatag kanato sa kahigayunan sa pagpaduol ngadto sa Ginoo ug sa paghimaya kaniya?

3. Pag-ambit sa diosnong kinaiya ug sa pagpaningkamot sa pagsiguro sa atong pagkatinawag ug pagkapinili.

Basaha ug hisguti ang pinili nga mga bersikulo gikan sa 2 Pedro 1.

  • Unsa ang mga kinaiya nga gihulagway ni Pedro kabahin sa atong diosnon nga kinaiya? (Tan-awa sa 2 Pedro 1:4–7. Ilista ang mga kinaiya diha sa pisara.) Ngano nga mahinungdanon nga kita mopalambo niini nga mga kinaiya? (Tan-awa sa 2 Pedro 1:8.) Sa inyong nakit-an, giunsa kini nga mga kinaiya pagdemonstrar sa uban?

  • Si Pedro miawhag sa mga Santos sa “pagpaningkamot sa pagsiguro sa inyong pagkatinawag ug pagkapinili” (2 Pedro 1:10). Unsa ang gipasabut sa paghimo sa pagkatinawag ug pagkapinili nga siguro? (Aron makadawat gikan sa Ginoo sa kasigurohan o saad sa kahimayaan didto sa celestial nga gingharian. Ang usa ka tawo kansang tawag ug pagkapili gihimong siguro nahibalo nga siya “gibugkos ngadto sa kinabuhing dayon, pinaagi sa pagpadayag ug sa espiritu sa panagna” [D&P 131:5]. Si Joseph Smith nakadawat niini nga saad gikan sa Ginoo, ingon nga girekord diha sa Doktrina ug mga Pakigsaad 132:49.)

  • Unsa ang atong buhaton aron ang atong tawag ug pagkapili mahimong siguro?

    Si Propeta Joseph Smith mitudlo: “Human ang usa ka tawo makabaton sa hugot nga pagtuo ni Kristo, naghinulsol sa iyang mga sala, ug nabunyagan alang sa kapasayloan sa iyang mga sala ug nakadawat sa Espiritu Santo (pinaagi sa pagpandong sa mga kamot),… dayon papadayona siya sa pagpaubos sa iyang kaugalingon sa atubangan sa Dios, nga gigutom ug giuhaw sa pagkamatarung, ug nagpuyo sumala sa matag pulong sa Dios, ug ang Ginoo moingon dayon ngadto kaniya, Anak, ikaw pagahimayaon. Kon ang Ginoo sa hilabihan nakapamatuod kaniya, ug nakit-an nga kana nga tawo matinguhaon sa pag-alagad kaniya diha sa tanan nga kakuyaw, busa kana nga tawo makakaplag sa iyang pagkatinawag ug sa iyang pagkapinili nga nahimong siguro” (Teachings of the Prophet Joseph Smith, pinili ni Joseph Fielding Smith [1976], 150).

4. Isalikway ang mini nga mga magtutudlo ug kadtong molimud sa Ikaduhang Pag-anhi.

Basaha ug hisguti ang pinili nga mga bersikulo gikan sa 2 Pedro 2–3 ug Judas. Ipasabut nga si Judas anak ni Jose ug ni Maria ug igsoon ni Jesus.

Panapos

Ipamatuod ang mga kamatuoran nga imong gihisgutan. Awhaga ang mga sakop sa klase sa pagsunod sa mga pagtulun-an nila ni Pedro ug Judas samtang sila naninguha sa pagpuyo diha sa hugot nga pagtuo ug pagkadiosnon.

Dugang nga mga Ideya sa Pagtudlo

Ang mosunod nga materyal magdugang sa gisugyot nga outline sa leksyon. Ikaw mahimo nga mogamit sa usa o pipila niini nga mga ideya isip kabahin sa leksyon.

1. Dugang nga panaghisgutan sa 1 Pedro

  • Diha sa 1 Pedro 1, unsa nga panaglahi ang gihimo ni Pedro tali sa kon unsa ang madunoton o madugtaon ug unsa ang dili madunot o mahangturon? (Tan-awa sa 1 Pedro 1:4, 7, 18–19, 23–25. Ilista ang mga tubag sa mga sakop sa klase diha sa pisara ubos sa duha ka mga ulohan: Madunoton o Madugtaon ug Dili Madunot o Mahangturon.) Unsa ang atong makat-unan gikan niini nga mga panaglahi?

  • Si Pedro mitudlo nga si Jesus “gi-ordinahan nang daan sa wala pa ang katukuran sa kalibutan” aron mahimong Manluluwas (1 Pedro 1:20; tan-awa usab sa Pinadayag 13:8). Ngano nga kini nga kamatuoran mahinungdanon? Unsa ang gipadayag sa mga kasulatan sa ulahing mga adlaw nga nakadugang sa atong pagsabut sa pag-ordinar nang daan sa Manluluwas? (Tan-awa sa Moises 4:1–4; Abraham 3:27–28.)

  • Unsa ang tambag nga gihatag ni Pedro mahitungod sa mga balaod sa yuta? (Tan-awa sa 1 Pedro 2:13–15.) Unsa ang tambag nga gipadayag sa Ginoo sa ulahing mga adlaw mahitungod sa mga balaod sa yuta? (Tan-awa sa D&P 58:21–22; 98:4–10; 134:5; Mga Artikulo sa Hugot nga Pagtuo 1:12.)

  • Unsa ang gitudlo ni Pedro mahitungod sa buluhaton sa pagsangyaw sa ebanghelyo ngadto sa mga patay? (Tan-awa sa 1 Pedro 3:18–20; 4:6.) Kanusa si Jesus miadto sa kalibutan sa espiritu aron pag-organisar sa pagsangyaw sa ebanghelyo taliwala sa mga patay? (Tan-awa sa D&P 138:27.) Ngano nga siya mihimo niini? (Tan-awa sa D&P 138:29–37.) Unsa ang gipadayag sa pagpangalagad sa Manluluwas didto sa kalibutan sa espiritu mahitungod sa buluhaton sa Dios? (Ang mga tubag mahimong maglakip nga tungod sa hingpit nga kaangayan ug kalooy sa Dios, ang tanan nga katawhan kinsa nagpuyo sa kalibutan adunay kahigayunan sa pagdawat sa ebanghelyo ug pagdawat sa hingpit nga mga panalangin niini.)

  • Unsa ang tambag nga gihatag ni Pedro sa mga lider sa Simbahan sa 1 Pedro 5:1–4? Sa unsa nga paagi nga ang mga lider sa Simbahan “mopakaon sa mga panon sa Dios”? (1 Pedro 5:2; tan-awa sa 2 Pedro 1:12–15; D&P 42:12–14). Sa unsa nga paagi nga kamo napanalanginan pinaagi sa mga lider sa Simbahan kinsa misunod niini nga tambag?

2. “Walay … kasulatan nga arang kahimoan sa kinaugalingon nga panabut” ( 2 Pedro 1:20)

  • Basaha ang 2 Pedro 1:20–21. Unsa ang gitudlo ni Pablo niini nga mga bersikulo mahitungod sa paghubad sa mga kasulatan? Unsaon nato pagsiguro nga kita mihubad sa mga kasulatan sa husto nga paagi? (Ang mga tubag mahimong maglakip sa pagtinguha sa dinasig nga mga hubad sa mga lider sa Simbahan ug pinaagi sa pagtinguha sa giya sa Espiritu Santo.) Sa unsa nga paagi nga ang mga pagtulun-an sa mga lider sa Simbahan o ang giya sa Espiritu nakatabang kaninyo sa pagsabut sa usa ka piho nga kasulatan?