“Siya Nawala, ug Siya Nakaplagan Na”

Katuyoan

Aron pagtabang sa mga sakop sa klase nga makasabut sa kalipay nga moabut kon kita maghinulsol ug kon kita motabang sa uban nga maghinulsol.

Pagpangandam

Basaha, pamalandongi, ug i-ampo ang mahitungod sa mosunod nga mga kasulatan.
1. Lucas 15:1–10. Pinaagi sa sambingay sa nawala nga karnero ug sa sambingay sa usa ka piraso nga plata, si Jesus nagtudlo sa bili sa mga kalag.
2. Lucas 15:11–32. Pinaagi sa sambingay sa anak nga nawala, si Jesus nagtudlo nga ang Langitnong Amahan mobati og dakong kalipay sa pagpasaylo sa mahinulsulon. Ang Manluluwas nagtudlo usab sa iyang mga sumusunod nga magmapasayloon.
3. Lucas 17:11–19. Ang tawo kinsa giayo ni Jesus sa sangla mibalik aron sa pagpasalamat kaniya.
Dugang nga basahonon: Mateo 18:11–14.
Kon anaa ang mga hulagway sa Ang Anak nga Usikan (62155 853; Pakete sa mga Hulagway sa Ebanghelyo 220) ug Ang Napulo ka mga Sanglahon (62150 853; Pakete sa mga Hulagway sa Ebanghelyo 221), gamita kini sa panahon sa leksyon.
Sugyot alang sa pagtudlo: Si Jesus sa kasagaran mangutana og mga pangutana aron pag-awhag sa iyang mga tigpaminaw sa paggamit sa mga baruganan nga iyang gitudlo (tan-awa sa Mateo 16:13–16; Lucas 7:41–42). Mainampoon nga mag-andam og mga pangutana nga mag-awhag sa mga sakop sa klase sa pagapil sa mga panaghisgutan ug motabang kanila nga makasabut ug makagamit sa mga baruganan nga gitudlo. (Tan-awa sa Teaching, No Greater Call [36123], mga pahina 63–70.)

Gisugyot nga Pagpalambo sa Leksyon

Pang-atensyon nga Kalihokan

Kon angay, gamita ang mosunod nga kalihokan o usa ka kalihokan nga imong hinimo aron pagsugod sa leksyon.

Dapita ang mga sakop sa klase sa pagsaysay mahitungod sa usa ka higayon sa dihang sila nawad-an og usa ka butang nga mahinungdanon kanila o sa dihang usa ka sakop sa pamilya nawala. Unya ipangutana ang mosunod nga mga pangutana:

Pang-atensyon nga Kalihokan

Unsa ang inyong gibati sa dihang ang butang o ang tawo nawala? Unsa ang inyong gibati sa diha nga ang butang o ang tawo nakit-an?
Ikaw mahimo usab nga mangutana sa mga sakop sa klase sa pagsaysay mahitungod sa kasinatian nga ilang nasinati nga sila nawala ug unya nakit-an.

Ipasabut nga si Jesus kanunay nga nagtudlo sa espirituhanong mga leksyon pinaagi sa pag-istorya kanila sa mga kasinatian nga komon sa mga katawhan. Kini nga leksyon maghisgut sa pipila ka mga sambingay nga magtudlo sa kamahinungdanon sa pagpangita ug pagkakaplag niadtong nawala.

Paghisgut ug Paggamit sa Kasulatan

Sa imong paghisgut sa mosunod nga mga tudling sa kasulatan, tabangi ang mga sakop sa klase nga makasabut nga ang Langitnong Amahan ug si Jesukristo naghigugma sa matag usa ug buot nga kita mobalik ug mopuyo pagusab uban kanila.

1. Ang Manluluwas nagtudlo sa bili sa mga kalag.

Basaha ug hisguti ang Lucas 15:1–10. Ipasabut nga si Jesus mihatag sa sambingay sa nawala nga karnero ug sa sambingay sa usa ka piraso nga pilak human ang mga Pariseo ug mga escriba nagbagulbol, “Kini nga tawo nagaabiabi sa mga makasasala ug nakigsalo kanila sa pagpangaon” (Lucas 15:2).

Diha sa sambingay sa nawala nga karnero, ang magbalantay mibiya sa nubentay nuebe aron pagpangita sa usa nga nawala (Lucas 15:4). Diha sa sambingay sa usa ka piraso nga plata, ang babaye nangita pag-ayo alang sa usa ka nawala nga plata (Lucas 15:8). Unsa ang atong makat-unan gikan sa mga gibuhat sa magbalantay ug sa babaye? (Tan-awa sa D&P 18:10–13.)
Sa unsang mga paagi nga ang usa ka tawo “mawala”? Unsa ang atong responsibilidad niadtong nawala? (Tan-awa sa Lucas 15:4–5, 8; Alma 31:34–35.)

Si Presidente Gordon B. Hinckley miingon:

“Ang pipila sa atong mga kaubanan … naghilak sa kasakit ug pag-antus ug pag-inusara ug kahadlok. Dako ug halangdon ang atong katungdanan sa pag-abag ug pagtabang kanila, sa pagbayaw kanila, sa pagpakaon kanila kon sila gigutom, sa pag-amuma sa ilang mga espiritu kon sila giuhaw alang sa kamatuoran ug pagkamatarung….

“ … Adunay mga tawo kinsa sa makausa init diha sa ilang hugot nga pagtuo, apan kansang hugot nga pagtuo nagkabugnaw. Daghan kanila nangandoy sa pagbalik apan wala mahibalo kon unsa ang buhaton. Sila nagkinahanglan og mahigalaon nga mga kamot nga motabang kanila. Uban sa gamay nga kakugi, daghan kanila ang mahimong mapabalik ngadto sa pagkaon pag-usab diha sa lamesa sa Ginoo.

“Akong mga kaigsoonan, ako maglaum, ako mag-ampo nga ang matag usa kanato … maninguha sa pagpangita niadtong kinsa nagkinahanglan sa panabang, kinsa anaa sa walay paglaum ug malisud nga mga kahimtang, ug mobayaw kanila diha sa espiritu sa gugma ngadto sa pagdawat diha sa Simbahan, diin ang malig-on nga mga kamot ug mahigugmaon nga mga kasingkasing moabiabi kanila, mohupay kanila, mopaluyo kanila, ug mobutang kanila diha sa paagi nga malipayon ug mabungahon nga mga kinabuhi” (sa Conference Report, Okt. 1996, 118; o Ensign, Nob. 1996, 86).
Unsa ang atong bation diha sa pagbalik sa usa ka tawo nga nawala? (Ipapangita sa mga sakop sa klase ang tubag nga gisubli diha sa Lucas 15:5, 6, ug 9. Tan-awa usab diha sa mga bersikulo 7 ug 10 ug D&P 18:15–16.)

2. Si Jesus nagtudlo nga ang Langitnong Amahan magmaya diha sa pagpasaylo sa mahinulsolon.

Basaha ug hisguti ang Lucas 15:11–32. Ipakita ang hulagway sa anak nga usikan.

Diha sa sambingay sa anak nga usikan, unsa ang gibuhat sa manghud nga anak nga lalaki sa iyang kabilin? (Tan-awa sa Lucas 15:13) Unsa ang ubang mga paagi nga ang katawhan karon mobuhat og mga sayop susama niadtong anak nga usikan.
Unsa ang nahitabo sa anak nga usikan human niya giusikan ang iyang tanan nga kabilin? (Tan-awa sa Lucas 15:14–16.) Sa unsang paagi kini magamit sa atong panahon karon?
Sa dihang ang anak nga usikan anaa na sa panginahanglan, kinsa ang miamuma kaniya didto sa layo nga nasud? (Tan-awa sa Lucas 15:16.) Unsa ang atong makat-unan gikan niini?
Kinsa ang gihunahuna sa anak sa dihang siya nakamatikod nga walay usa didto sa layo nga nasud ang nagpakabana kaniya? (Tan-awa sa Lucas 15:17.) Unsa ang atong makat-unan mahitungod sa paghinulsol gikan sa kinaiya sa anak? (Tan-awa sa Lucas 15:18–19.)
Unsa ang gibuhat sa amahan sa dihang siya nakakita sa iyang anak nga mibalik? (Tan-awa sa Lucas 15:20.) Unsay gihimo sa amahan sa pagkumpisal sa iyang anak? (Tan-awa sa Lucas 15:21–24.) Sa unsa nga paagi nga ang tubag sa amahan parehas usab sa tubag sa Ginoo kon kita maghinulsol? (Tan-awa sa Lucas 15:7; Mosiah 26:30; D&P 58:42.)
Sa unsa nga paagi nga kita sama sa anak nga usikan? (Tan-awa sa kinutlo sa ubos.) Unsa nga paglaum ang gitanyag sa sambingay sa anak nga usikan?

Nagpasabut ngadto sa sambingay sa anak nga usikan, si Presidente Gordon B. Hinckley miingon: “Ako mohangyo kaninyo sa pagbasa niana nga sugilanon. Matag ginikanan kinahanglang mobasa niini og balik-balik. Kini may igong kamahinungdanon alang sa matag panimalay, ug may igong kamahinungdanon alang sa tanang mga tawo, kay dili ba kitang tanan mga anak man nga usikan nga nagkinahanglan nga maghinulsol ug moambit sa mapasayloon nga kalooy sa atong Langitnong Amahan ug unya mosunod sa Iyang ehemplo?” (“Of You It Is Required to Forgive,” Ensign, Hunyo 1991, 5).
Ngano nga ang magulang nga anak nasuko man sa paagi sa iyang amahan sa pagdawat sa iyang manghud nga anak? (Tan-awa sa Lucas 15:25–30.) Giunsa sa amahan pagtubag ang reklamo sa magulang nga anak? (Tan-awa sa Lucas 15:31–32.) Ngano nga usahay malisud man ang pagdawat og balik sa usa “ka anak nga usikan” nga naghinulsol na? Unsa ang atong makat-unan gikan sa gihimo niining tawhana ngadto sa iyang anak nga mibalik? (Tan-awa sa Lucas 15:32.)

3. Ang tawo nga giayo ni Jesus sa sangla mibalik aron sa pagpasalamat kaniya.

Basaha ug hisguti ang Lucas 17:11–19. Ipakita ang hulagway sa napulo ka mga sanglahon.

Samtang ang Manluluwas miadto sa Jerusalem, siya miayo sa napulo ka mga sanglahon (Lucas 17:11–14). Sa napulo ka mga sanglahon, pila ra man ang mibalik aron pagpahayag og pasalamat? (Tan-awa sa Lucas 17:15–16.) Unsa ang ubang mga katarungan nga kita, sama sa siyam ka dili mapasalamaton nga mga sanglahon, dili kanunay mopahayag sa atong pagpasalamat alang sa mga panalangin nga atong nadawat? Nganong mahinungdanon man nga kita mopahayag og pagpasalamat ngadto sa Ginoo?
Bisan tuod nga ang tanang napulo ka mga sanglahon nalimpyo na, ang tawo lamang kinsa mibalik ang nahimong hingpit nga naayo (Lucas 17:14, 19). Unsa ang kalainan tali sa pagkaayo ug sa hingpit nga naayo? (Tan-awa ang kinutlo sa ubos.) Sa unsa nga paagi nga ang atong pagpasalamat ug hugot nga pagtuo makatabang kanato nga mahimong hingpit nga maayo?

Si Bishop Merill J. Bateman nagtudlo: “Sa pagkahimong hingpit nga tawo, ang mapasalamaton nga sanglahon naayo diha sa sulod ingon man diha sa gawas. Niana nga adlaw ang siyam ka mga sanglahon naayo kutob sa panit, apan usa lamang ang adunay hugot nga pagtuo nga nakapahimong hingpit nga naayo” (sa Conference Report, Abr. 1995, 16; o Ensign, Mayo 1955, 14).

Panapos

Ipamatuod nga kita mobati og dakong kalipay kon kita maghinulsol ug mobalik ngadto sa Ginoo ug kon kita motabang sa uban nga mobalik. Ikaw mahimo nga mopahayag og pasalamat ni Jesus tungod sa mga sambingay ug sa ubang mga pagtulun-an nga nagpakita sa gugma sa Dios alang sa iyang mga anak ug sa iyang tinguha nga kita maghigugmaay sa usag usa.

Dugang nga mga Ideya sa Pagtudlo

Ang mosunod nga materyal makadugang sa gisugyot nga outline sa leksyon. Mahimo nimong gamiton ang usa o daghan pa niining mga ideya isip kabahin sa leksyon.

1. Ang sambingay sa walay hinungdan nga ulipon

Basaha ug hisguti ang sambingay sa walay hinungdan nga ulipon (Lucas 17:5–10).

Si Jesus mihatag niini nga sambingay human ang mga Apostoles mihangyo kaniya, “Dugangi ang among hugot nga pagtuo” (Lucas 17:5). Unsa ang atong makat-unan niini nga sambingay mahitungod sa kon unsaon nga kita makadugang sa atong hugot nga pagtuo? (Ang mga tubag mahimong maglakip nga kita motubo diha sa hugot nga pagtuo pinaagi sa makugihon nga pag-alagad sa Ginoo.)
Ngano nga nahimo man kitang walay hinungdan nga mga ulipon bisan kon kita mibuhat sa tanang gisugo sa Ginoo kanato? (Tan-awa sa Mosiah 2:20–25.) Unsa ang gipadayag niini mahitungod sa gugma sa Ginoo alang kanato?

2. Ang sambingay sa mga mamumuo diha sa parasan

Basaha ug hisguti ang sambingay sa mga mamumuo diha sa parasan (Mateo 20:1–16).

Niini nga sambingay, unsa ang nadawat sa matag mamumuo diha sa parasan?

Ipasabut og maayo nga kadtong mitrabaho og usa ka oras nakadawat og susama nga suhol sama niadtong mitrabaho sa tibuok adlaw. Kita kinahanglan nga dili mabalaka kon kinsa ang makadawat sa labing dako o kinsa ang mihimo og labing dako diha sa pag-alagad sa Ginoo. Ang hingpit nga Maghuhukom sa tanan, kinsa nahibalo sa atong mga kasingkasing, mohukom kanato nga may kalooy ug mohatag kanato sa “bisan unsa nga matarung” (Mateo 20:4, 7).

3. Pagpasalida sa video

Ang ikaupat nga bahin sa “New Testament Customs,” usa ka pinili gikan sa New Testament Video Presentations (53914), mahimong magamit sa pagpasabut kon giunsa pagtagad ang mga sanglahon sa mga panahon sa Bag-ong Tugon ug unsa ka dako nga panalangin nga kini nakapausab sa kinabuhi sa napulo ka mga sanglahon nga giayo ni Kristo.

Kini nga bahin naglakip usab sa kasayuran mahitungod sa kon giunsa sa mga Judeo sa Bag-ong Tugon pagkwenta ang panahon. Ikaw mahimo usab nga mopasalida niini nga bahin kon maghisgut na ka sa sambingay sa mga mamumuo diha sa parasan (tan-awa sa ikaduhang dugang nga ideya sa pagtudlo), aron pagtabang sa mga sakop sa klase nga mas makasabut sa pangulo sa panimalay nga “milakaw sa ikatulo nga takna” ug usab sa ikaunom, ikasiyam, ug sa mga katapusang takna (Mateo 20:3, 5–6).