Kapitulli 54
Jezusi u Ngrit
Trupi i Shpëtimtarit ishte në varr deri të dielën në mëngjes. Pastaj dy engjëj erdhën dhe e rrokullisën gurin nga varri.
Mateu 28:1-2 (shih passhënimin 2a); Lluka 24:1-4
Një grua të cilën Jezusi e kishte shëruar e quajtur Maria Magdalena shkoi te varri. Ajo u befasua kur pa se guri ishte hequr. Trupi i Jezusit nuk ishte në varr.
Ajo vrapoi t’i tregonte Pjetrit dhe Gjonit se dikush kishte marrë trupin e Shpëtimtarit. Ajo nuk e dinte se ku ishte ai.
Pjetri dhe Gjoni vrapuan te varri. Ata gjetën rrobën me të cilën Jezusi ishte varrosur, por trupi i Jezusit nuk ishte atje. Pjetri dhe Gjoni nuk dinin çfarë të bënin. Ata shkuan në shtëpi.
Maria Magdalena qëndroi te varri duke qarë. Kur pa përsëri në varr, ajo pa dy engjëj.
Ata e pyetën Maria Magdalenën përse po qante. Ajo tha se dikush kishte marrë trupin e Jezusit. Ajo nuk e dinte se ku ishte ai.
Ajo u kthye në anën tjetër dhe pa dikë. Ajo mendoi se ishte kopshtari. Ai e pyeti atë përse po qante. Ajo e pyeti Atë nëse Ai e dinte se ku ndodhej trupi i Jezusit.
Pastaj burri tha: “Mari,” dhe ajo e dinte se Ai ishte Jezusi. Ai i kërkoi asaj t’u tregonte Apostujve që ishte ringjallur.
Maria Magdalena dhe disa gra të tjera u thanë Apostujve se Jezusi ishte ringjallur. Në fillim Apostujt nuk u besuan atyre.
Më vonë, kur Apostujt po flisnin me njëri-tjetrin, Jezusi erdhi në dhomë. Apostujt u trembën. Ata akoma mendonin se Ai ishte i vdekur.
Shpëtimtari u tha atyre të preknin duart dhe këmbët e Tij. Ai ishte ringjallur – trupi dhe shpirti i Tij ishin bashkuar përsëri.
Apostujt ishin të lumtur që e shihnin Atë. Ai u kërkoi për të ngrënë. Ata i dhanë Atij peshk dhe mjaltë. Ai i hëngri ato.
Jezu Krishti ishte i pari njeri që u ringjall. Shumë të tjerë u ringjallën pastaj dhe u panë nga njerëz që jetonin në Jeruzalem. Jezusi kishte thënë: “Unë jam ringjallja dhe jeta.” Për shkak se Ai e mposhti vdekjen, ne të gjithë do të ringjallemi një ditë.