“Leksyon 1 Materyal sa Pagpangandam sa Klase: Ang Basahon ni Mormon: Lain nga Tugon ni Jesukristo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 1 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 1 Materyal sa Pagpangandam sa Klase
Ang Basahon ni Mormon: Lain nga Tugon ni Jesukristo
Welcome sa Mga Pagtulun-an ug Doktrina sa Basahon ni Mormon. Si Presidente Russell M. Nelson mitudlo, “Ang mga kamatuoran sa Basahon ni Mormon adunay gahum sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag” (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62). Samtang imong tun-an ug buhaton ang mga kamatuoran nga gihisgutan niini nga kurso, makasinati ka sa kamatuoran sa mga pulong ni Presidente Nelson. Ang imong pagpamatuod sa Basahon ni Mormon ug ang imong pagtuo sa Langitnong Amahan ug ni Jesukristo molambo, ug mahimo kang mas sama Kanila.
Pahinumdom: Kini nga materyal sa pagpangandam mohatag kanimo og importanting sukaranan nga impormasyon alang sa imong kasinatian sa klase. Ang pagtuon sa matag materyal sa pagpangandam sa leksyon sa dili pa ang klase makatabang nimo nga makabaton og mas lawom, mas makahuluganon nga kasinatian sa pagkat-on.
Seksyon 1
Sa unsang paagi nga ang pagtuon sa Basahon ni Mormon makapalambo sa akong kinabuhi?
Sa sinugdanan sa Pagpahiuli sa ebanghelyo, si Propeta Joseph Smith mipahayag:
Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon. (Pasiuna sa Basahon ni Mormon, parapo 6)
Sukad sa pagmantala sa Basahon ni Mormon, minilyon ka tawo ang nakadiskobre sa kamatuoran niini nga pamahayag.
Si Elder Peter M. Johnson sa Seventy mipaambit og usa ka ehemplo kon sa unsang paagi ang Basahon ni Mormon mipanalangin sa iyang kinabuhi sa dihang batan-ong lalaki pa siya:
Dihang nagsugod ko sa akong doctoral program, nawagtangan ko sa kadasig. Ang programa modawat lang og upat ka estudyante anang tuiga, ug hawud ang ubang estudyante. Tag-as sila og score sa mga pasulit ug mas daghan og kasinatian sa mga posisyon sa senior management, ug milabaw ang ilang kamasaligon sa ilang mga abilidad. Human sa akong unang duha ka semana sa programa, ang pagbati sa pagkawala sa kadasig ug pagduha-duha nakaapekto—nga daw mobuntog kanako.
Mihukom ko nga kon kompletuhon man nako kining upat ka tuig nga programa, mohuman gyud ko og basa sa Basahon ni Mormon matag semester. Matag adlaw samtang magbasa ko, akong namatikdan ang pamahayag sa Manluluwas nga ang Espiritu Santo motudlo kanako sa tanang butang ug modala sa tanang butang sa akong panumduman [tan-awa sa Juan 14:26]. Nagpahinumdom kini kinsa ako isip anak sa Dios, nagpahinumdom kanako sa dili pagkumpara sa akong kaugalingon ngadto sa uban, ug gihatagan ako sa pagsalig sa akong balaan nga tahas aron molampos. … Basaha ug tun-i ang Basahon ni Mormon matag adlaw, matag adlaw, matag adlaw. (“Gahum sa Pagbuntog sa Kaaway,” Liahona, Nob. 2019, 111)
Si Presidente Ezra Taft Benson mitudlo nga “kinahanglan natong himoon ang Basahon ni Mormon nga sentro sa pagtuon [tungod kay] kini gisulat alang sa atong panahon.” (“Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 55). Samtang imong basahon ang mosunod nga pamahayag ni Presidente Nelson, ikonsiderar ang pagmarka kon sa unsang paagi ang Basahon ni Mormon makapanalangin sa atong mga kinabuhi, ilabi na sa atong panahon.
Minahal kong mga igsoon, mopamatuod ko nga ang Basahon ni Mormon tinuod gayud nga pulong sa Dios. Naglangkob kini sa mga tubag sa labing importanting mga pangutana sa kinabuhi. Nagtudlo kini sa doktrina ni Kristo. Mipalapad ug mipatin-aw kini sa daghang “yano ug bililhon” [tan-awa sa 1 Nephi 13:29–33] nga mga kamatuoran nga nawagtang sa mga siglo ug sa daghang hubad sa Biblia.
Ang Basahon ni Mormon naghatag sa kahingpitan sa labing masaligon nga pagsabut sa Pag-ula ni Jesukristo nga makaplagan bisan asa. … Ang hingpit nga gahum sa ebanghelyo ni Jesukristo anaa sa Basahon ni Mormon. Wala nay lain.
Ang Basahon ni Mormon mihatag og katin-awan sa pagtulun-an sa Agalon ug mipakita sa mga taktika sa kaaway. Ang Basahon ni Mormon nagtudlo og tinuod nga doktrina sa pag-iway sa sayop nga relihiyosong mga tradisyon sama sa hiwi nga binuhatan sa pagbunyag sa mga bata. Ang Basahon ni Mormon naghatag og katuyoan sa kinabuhi pinaagi sa pag-aghat kanato sa pagpamalandong sa posible nga kinabuhing dayon ug “walay katapusan nga kalipay” [Mosiah 2:41; tan-awa usab sa Alma 28:12]. Ang Basahon ni Mormon mipusgay sa sayop nga mga pagtuo nga ang kalipay makaplagan pinaagi sa kadautan ug kanang indibidwal nga kamaayo mao lang ang gikinahanglan sa pagbalik sa presenya sa Dios. Gipapha niini sa hangtud ang sayop nga konsepto nga ang pagpadayag mitapos sa Biblia ug nga ang kalangitan sarado na karon. (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62)
Pamalandong agi og Pagpangandam alang sa Klase
Unsa nga mga panalangin ang nadawat nimo o sa usa ka tawo nga imong nailhan pinaagi sa pagtuon sa Basahon ni Mormon? Unsa nga mga matang sa mga panalangin ang imong gilauman nga maabot sa imong kinabuhi pinaagi sa pagtuon sa Basahon ni Mormon sa sunod nga pipila ka bulan?
Seksyon 2
Sa unsang paagi ang usa ka pagtuon sa Basahon ni Mormon makapalig-on sa akong pagpamatuod ni Jesukristo?
Sa usa ka panan-awon, si propeta Nephi nakakat-on nga ang labing importanting katuyoan sa Basahon ni Mormon (ug ubang kasulatan sa ulahing adlaw) mao ang pagsaksi nga si Jesukristo “mao ang Anak sa Amahan sa Kahangturan, ug ang Manluluwas sa kalibutan; ug nga ang tanan nga mga tawo kinahanglan gayud nga moduol ngadto kaniya, o sila dili maluwas” (1 Nephi 13:40).
Sa iyang tibuok kinabuhi, si Nephi makugihong naghago “aron sa pagdasig sa [iyang] mga anak, ug usab sa [iyang] mga kaigsoonan, sa pagtuo kang Kristo” (2 Nephi 25:23). Sa katapusan sa iyang rekord, mihatag siya og katapusang saksi bahin sa gahom sa Basahon ni Mormon sa pagdala sa tanang tawo ngadto kang Kristo.
Pagtuon agi og Pagpangandam alang sa Klase
Basaha ang 2 Nephi 33:6–10, nga mangita kon sa unsang paagi gilaoman ni Nephi nga ang iyang mga pulong makaapekto kanimo.
Si Presidente Benson nakabantay nga gisalikway sa daghang tawo sa tibuok kalibotan ang kabalaan ni Jesukristo. Siya mipasabot:
Ilang gikwestyon ang Iyang milagroso nga pagkatawo, Iyang hingpit nga kinabuhi, ug ang katinuod sa Iyang mahimayaong pagkabanhaw. Ang Basahon ni Mormon nagtudlo sa yano ug dili sayop nga mga pulong kabahin sa kamatuoran sa tanan niadtong mga butanga. Kini naghatag usab sa labing kompleto nga pagpasabut sa doktrina sa Pag-ula. Sa tinuoray, kining balaanong dinasig nga basahon mao ang sukaranang bato sa pagpamatuod ngadto sa kalibutan nga si Jesus mao ang Kristo. … Ang pagpamatuod [sa Basahon ni Mormon] ni Jesukristo “klaro, lunsay, ug puno sa gahum.”. (Mga Pagtulun-an sa mga Presidente sa Simbahan: Ezra Taft Benson [2014], 155–156)
Pamalandong agi og Pagpangandam alang sa Klase
Paggahin og pipila ka minuto sa pagpamalandong sa unsay imong nakat-onan ug gibati mahitungod ni Jesukristo pinaagi sa imong pagtuon sa Basahon ni Mormon. Unsay imong mabuhat aron mahimo ang imong pagtuon sa Basahon ni Mormon nga mas nakasentro kang Kristo nga kasinatian?
Seksyon 3
Unsaon nako nga epektibong magamit kining materyal sa pagpangandam aron sa pagpalambo sa akong kasinatian niini nga klase?
Sa dihang mipakita si Jesukristo sa mga Nephite diha sa yuta sa Bountiful, gihatagan Niya ang matag tawo og kahigayonan sa paghikap sa mga samad sa Iyang mga kamot ug mga tiil ug dayon mitudlo sa pundok sa katawhan sa Iyang doktrina. Siya mipahayag nga kadtong kinsa mituo Kaniya ug mibuhat sa Iyang mga pagtulun-an makadawat og talagsaon nga mga panalangin niini nga kinabuhi ug pagabayawon sa katapusang adlaw (tan-awa sa 3 Nephi 11:29–40; 15:1).
Sa dihang nangandam ang Manluluwas sa pagbiya sa kataposan sa adlaw, mitan-aw Siya sa pundok sa katawhan ug mihatag og importante nga tambag kon unsaon sa pagpangandam alang sa unsay Iyang itudlo kanila sa sunod nga adlaw.
Pagtuon agi og Pagpangandam alang sa Klase
Basaha ang 3 Nephi 17:2–3, nga mangita alang sa unsay gitudlo sa Manluluwas mahitungod kon unsaon sa pagpangandam sa pagkat-on sa ebanghelyo.
Irekord ang Imong mga Hunahuna
Mahimong ganahan ka nga moila ug morekord og tumong nga mahimo nimong trabahoon atol niini nga kurso aron mahimo ka nga mas kugihan nga tigkat-on sa ebanghelyo sa Ginoo. Ikonsiderar ang paghimo og plano nga maglakip kon kanus-a ka magtuon sa materyal sa pagpangandam alang sa matag klase.
Ipaambit sa Imong Magtutudlo
Kon mahimo, ipadala ang pipila o tanan sa mosunod nga impormasyon ngadto sa imong magtutudlo sa elektronik nga paagi. O mahimo kang magsulat og note nga ihatod unya.
-
Unsa man ang imong gibati kabahin sa Basahon ni Mormon?
-
Sa unsang mga paagi nga ikaw naglaum nga molambo samtang motambong ka niini nga kurso?
-
Unsa nga mga pangutana ang ganahan nimong hisgotan unya atol niini nga kurso?