“Leksyon 4 Materyal sa Pagpangandam sa Klase: Pangitaa sa mga Kasulatan,” Materyal sa Magtutudlo alang sa mga Pagtulun-an ug Doktrina sa Basahon ni Mormon (2021)
“Leksyon 4 Materyal sa Pagpangandam sa Klase,” Materyal sa Magtutudlo alang sa mga Pagtulun-an ug Doktrina sa Basahon ni Mormon
Leksyon 4 Materyal sa Pagpangandam sa Klase
Pangitaa sa mga Kasulatan
Si Elder Richard G. Scott sa Korum sa Napulog Duha ka mga Apostoles miingon, “Ayaw patuo sa bakak ni Satanas nga kamo walay panahon sa pagtuon sa kasulatan. … Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media.” (“Himoa ang Paggamit sa Pagtuo nga Inyong Prayoridad,” Liahona, Nob. 2014, 93). Samtang ikaw magtuon niining materyal, hunahunaa kon nganong gipahimo ni Elder Scott kaninyo ang maong taas nga prayoridad sa pagtuon sa kasulatan. Timbang-timbanga unsa ang tahas sa mga kasulatan sa kasamtangan sa imong kinabuhi.
Seksyon 1
Unsa nga prayoridad ang mga kasulatan sa akong kinabuhi?
Human si Lehi ug ang iyang pamilya nakabiyahe na sulod sa pipila ka mga adlaw didto sa kamingawan, ang Ginoo misugo ni Lehi sa pagpadala sa iyang mga anak nga lalaki balik ngadto sa Jerusalem aron sa pagkuha sa mga palid nga tumbaga gikan ni Laban. Ang mga palid nga tumbaga, mao ang usa ka bulomin sa karaan nga kasulatan, ikatandi sa atong Daang Tugon, nga naglangkob og usa ka talaan sa mga Judeo ug daghang mga sinulat sa mga propeta (tan-awa sa 1 Nephi 5:11–16; Ang Giya ngadto sa mga Kasulatan, “Brass Plates,” scriptures.ChurchofJesusChrist.org).
Ang Ginoo nasayud nga kining mga kasulatan mahimong mahinungdanon ngadto sa pamilya ni Lehi ug sa ilang mga mosunod nga kaliwatan. Ang Ginoo gani misugo kang Nephi sa pagpatay kang Laban aron maangkon ang talaan, nag-ingon, “Maayo pa nga ang usa ka tawo mamatay kay sa usa ka nasud nga mokunhod ug mamatay tungod sa pagkawalay pagtuo” (1 Nephi 4:13).
Sa dihang nadawat ni Lehi ang mga palid nga tumbaga ug misugod nga “misusi niini” (1 Nephi 5:10), “siya napuno sa Espiritu, ug misugod sa pagpanagna” (bersikulo 17).
Pagtuon agi og Pagpangandam alang sa Klase
Basaha ang 1 Nephi 5:19, 21–22, nga mangita kon nganong mahinungdanon nga ang pamilya ni Lehi magdala sa mga kasulatan samtang sila mibiyahe ngadto sa yuta nga gisaad.
Nagkomentaryo sa bili sa mga kasulatan diha sa iyang kaugalingong kinabuhi, si Presidente Julie B. Beck, kinsa miserbisyo isip Kinatibuk-ang Presidente sa Relief Society, miingon:
Ang kalipay moabut gikan sa nabatasan nga pagbasa sa kasulatan sa matag adlaw nga akong gisugdan sa daghan na kaayong katuigan. Sa ubang mga adlaw makabaton ko og dakong panahon sa pagpamalandong sa mga kasulatan. Sa laing mga adlaw akong mahinuktukan ang pipila ka bersikulo. Sama sa pagkaon ug pagginhawa nga makasustiner sa akong pisikal nga lawas, ang mga kasulatan nagpakaon ug naghatag og kinabuhi sa akong espiritu. Ako karon makasulti nga sama sa gisulti ni Nephi ug moingon: “Ang akong kalag nalipay sa mga kasulatan, ug ang akong kasingkasing namalandong kanila. … “Tan-awa, ang akong kalag nalipay sa mga butang sa Ginoo; ug ang akong kasingkasing nagpalandong sa kanunay diha sa mga butang diin ako nakakita ug nakadungog.” (2 Nephi 4:15–16). (“Akong Kalag Nalipay sa mga Kasulatan,” Liahona, Mayo 2004, 109)
Irekord ang Imong mga Hunahuna
I-rekord ang pipila sa mga rason nga sa imong hunahuna nga ang personal nga pagtuon sa kasulatan kinahanglan nga mahimong usa ka prayoridad sa imong kinabuhi.
Seksyon 2
Sa unsang paagi ang mga kasulatan makatabang kanako nga mas makaila kang Jesukristo?
Atol sa iyang pagpangalagad, si Nephi mihimo og duha ka mga talaan—ang dako nga mga palid ug ang gamay nga mga palid ni Nephi. Ang dagko nga mga palid ni Nephi sa sinugdanan naglangkob sa mga kasaysayan nga dili kalabut sa relihiyosong butang sa mga katawhan ni Nephi. Ang gagmay nga mga palid ni Nephi gihimo alang sa “linain nga katuyoan” sa pagtipig og usa ka talaan sa pagpangalagad sa mga katawhan ni Nephi (1 Nephi 9:3). Si Nephi namahayag nga ang “kahingpitan sa [iyang] tuyo” tungod kay kini nga talaan mao ang pag-awhag sa tanang katawhan sa pagduol ngadto ni Kristo ug maluwas (1 Nephi 6:4).
Sa dihang si Nephi mihatag sa responsibilidad alang sa gagmay nga mga palid ngadto sa iyang igsoong lalaki nga si Jacob, siya misugo ni Jacob sa pagsulat sa, “ang labi nga bililhon” (Jacob 1:1–2).
Pagtuon agi og Pagpangandam alang sa Klase
Basaha ang Jacob 1:4, 6–8 ug Jacob 4:3–4, nga mangita sa unsay giisip nga “ang labi nga bililhon” (Jacob 1:2).
Si Presidente Russell M. Nelson mitudlo nga si Nephi, Jacob, ug ang ubang mga propeta sa Basahon ni Mormon midugang sa ilang pagsaksi ngadto sa mga propeta sa uban nga kasulatan. Siya mipasabot:
Sa ingon og walay katapusan nga pagkasunod sa propetikanhong mga pamahayag—mga pagpamatuod sa “tanan nga balaan nga mga propeta” [Jacob 4:4] alang sa “usa ka daghan nga mga kaliboan nga mga katuigan sa dili pa ang iyang pag-anhi” [Helaman 8:18]—ang Basahon ni Mormon naghimo og sagradong pamahayag nga si Jesukristo, atong Manluluwas ug Manunubos. (“A Testimony of the Book of Mormon,” Ensign, Nob. 1999, 69)
Pamalandong agi og Pagpangandam alang sa Klase
Unsa ang imong nahibaloan ug nabati mahitungod ni Jesukristo samtang ikaw nagbasa sa mga kasulatan—ilabi na sa Basahon ni Mormon? Unsa nga piho nga mga tudling ang nakadala nimo nga mas maduol ngadto Kaniya?
Seksyon 3
Sa unsang paagi ang mga kasulatan nakagiya kanako sa pagsulbad sa mga problema ug paghimo og mga desisyon?
Pagkahuman nga natuman ni Lehi ang tanan nga gisugo ngadto kaniya, ang Ginoo mihatag og usa ka instrumento nga gitawag og Liahona (tan-awa sa Alma 37:38). Ang Liahona milihok sama sa usa ka kompas ug nagsilbi nga usa ka giya samtang ang pamilya ni Lehi mibiyahe latas sa kamingawan. Kini mipakita usab og personal nga mga mensahe gikan sa Ginoo. Si Nephi nakakat-on nga ang Liahona molihok “sumala ngadto sa hugot nga pagtuo ug kakugi ug pagtagad diin kami mihatag ngadto kanila (1 Nephi 16:28–29).
Mga 500 ka tuig ang milabay, sa dihang si Alma mipiyal sa iyang anak nga lalaki nga si Helaman uban sa pagtipig sa tumbaga nga mga palid ug sa ubang mga kasulatan, siya mihatag og mga panglantaw mahitungod sa paggamit sa Liahona.
Pagtuon agi og Pagpangandam alang sa Klase
Basaha ug pamalandungi ang mga panglantaw diha sa Alma 37:40–41, 43–45 kabahin sa unsang paagi ang mga kasulatan mahimong ipahisama o ikatandi ngadto sa Liahona.
Samtang nagserbisyo isip sakop sa Seventy, si Elder W. Rolfe Ker mitudlo:
Ang mga pulong ni Kristo mahimong usa ka personal nga Liahona alang sa matag usa kanato, nagpakita nato sa agianan. Dili kita magtinapulan tungod sa kasayon sa agianan. Himoon ta nga sa hugot nga pagtuo modala sa mga pulong ni Kristo ngadto sa atong mga hunahuna ug sa atong mga kasingkasing sa ingon nga kini nahisulat diha sa sagradong kasulatan ug sa ingon nga kini gipamulong sa buhing mga propeta, mga manalagna, ug mga tigpadayag. Atong ubanan sa hugot nga pagtuo ug kakugi ang pagbusog sa mga pulong ni Kristo, kay ang mga pulong ni Kristo ang mahimo natong espirituhanon nga Liahona nga magsulti kanato sa tanang mga butang nga kinahanglang atong buhaton. (“Ang mga Pulong ni Kristo—Atong Espirituhanong Liahona,” Liahona, Mayo 2004, 37)
Hisgoti agi og Pagpangandam alang sa Klase
Ikonsiderar ang pagpangutana og usa ka higala o sakop sa pamilya kon sa unsang paagi ang mga kasulatan ug ang mga pulong sa buhi nga mga propeta nahimong usa ka tinubdan sa giya—sama sa usa ka personal nga Liahona—sa ilang kinabuhi. Atol sa inyong panag-istorya, mahimo nimong ipaambit ang inyong kasinatian kalabut niini.