“Leksyon 20 Materyal sa Pagpangandam sa Klase: Ang mga Panalangin sa Relihiyoso nga Kagawasan,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 20 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 20 Materyal sa Pagpangandam sa Klase
Ang mga Panalangin sa Relihiyoso nga Kagawasan
Unsa ka importante ang relihiyoso nga kagawasan para nimo? Segun sa Church Newsroom nga site, “Ang kagawasan sa relihiyon usa ka sukaranan nga tawhanong katungod nga nanalipod sa konsensya sa tanang tawo. Nagtugot kini kanato sa paghunahuna, pagpahayag ug pagbuhat sa unsay gituohan gayod nato. … Nanalipod [kini] sa mga katungod sa tanang grupo ug mga indibidwal, lakip niadtong labing mahuyang, marelihiyoso man o dili” (“Religious Freedom,” newsroom.ChurchofJesusChrist.org).
Namulong bahin sa atong panahon, si Elder Robert D. Hales sa Korum sa Napulog Duha ka mga Apostoles mipasidaan, “Naningkamot [si Satanas] sa pagbungkag, pagsupak, ug pagpakatap og kalibug bahin sa kagawasan sa relihiyon—kon unsa kini ug nganong importante kini sa espirituhanon natong kinabuhi ug sa ato gayung kaluwasan” (“Pagpreserbar sa Kabubut-on, Pagpanalipod sa Kagawasan sa Relihiyon,” Liahona, Mayo 2015, 112). Samtang magtuon ikaw aron sa pagpangandam alang sa klase, pamalandong kon unsay matudlo sa Basahon ni Mormon kanato mahitungod sa importansiya sa relihiyoso nga kagawasan ug hunahunaa kon unsay imong mabuhat sa pagdasig, pagpreserbar, ug pagpanalipod niini.
Seksyon 1
Sa unsa nga paagi nga ang relihiyoso nga kagawasan makapanalipod sa akong mga gituohan ug sa paagi nga ako mopili sa pagsunod niini?
Ang mosunod nga katingbanan [summary] naghatag og gibug-aton sa pipila ka sukaranan nga mga katungod nga nalakip sa relihiyoso nga kagawasan:
Ang relihiyoso nga kagawasan naglakip dili lang sa katungod sa gawasnong pagsimba apan sa pagpamulong ug pagbuhat usab base sa relihiyoso nga mga gituohan sa usa ka tawo. …
Ang relihiyoso nga kagawasan nanalipod sa katungod sa tanang tawo nga magbaton og ilang kaugalingon nga relihiyoso nga mga gituohan ug sa bukas nga pagpahayag niini nga walay kahadlok sa pagpangdaogdaog o nga hikawan sa patas nga mga katungod sa pagkalungsuranon. …
Ang kagawasan sa relihiyon nanalipod dili lamang sa mga indibidwal, apan usab sa relihiyoso nga mga organisasyon nga naghimong posible sa mga komunidad nga adunay susamang relihiyoso nga mga tinuohan [faith communities]. (“Religious Freedom: The Basics,” ChurchofJesusChrist.org)
Sa tibuok kasaysayan, ang sukaranan nga tawhanong katungod nga molihok segun sa atong mga gituohan kanunay nga gihagit ug gani gipugngan. Pananglitan, atol sa pagmando ni Hari Mosiah, ang pagpangdaogdaog sa mga dili tumutuo ngadto sa mga miyembro sa Simbahan nahimong hilabihan ka grabe (tan-awa sa Mosiah 27:1).
Pagtuon agi og Pagpangandam alang sa Klase
Basaha ang asoy diha sa Mosiah 27:1–4, nga mangita kon sa unsang paagi nga ang simbahan ug ang mga lider sa gobyerno nagtinabangay aron sa pagmugna og kalinaw taliwala sa katawhan.
Ang relihiyoso nga kagawasan wala lamang nanalipod sa pagpahayag niadtong kinsa mga relihiyoso, apan kini nagsuporta usab sa mga katungod niadtong dili mga relihoyoso o adunay lahi nga mga gituohan. Usa ka ehemplo niini anaa diha sa istorya ni Korihor. Si Korihor nagpuyo atol sa pagmando sa mga maghuhukom, usa ka sistema sa gobyerno nga gidesinyo sa pagpreserbar ug pagpanalipod sa kagawasan sa katawhan gikan sa dili matarong nga mga hari (tan-awa sa Mosiah 29). Si Korihor nagsangyaw “nga kinahanglan walay Kristo” (Alma 30:12). Nangangkon siya nga walay sala ug nga ang matag tawo mouswag sumala sa iyang kaugalingong salabotan. Ang mga pagtulun-an ni Korihor midala sa daghang tawo palayo sa Ginoo. (Tan-awa sa Alma 30:6, 12–18.)
Pagtuon agi og Pagpangandam alang sa Klase
Basaha ang Alma 30:7–9, 11, ug ilha kon nganong adunay katungod si Korihor sa pagpahayag sa iyang mga gituohan.
Sa Alma 30:29–58 mabasa nato nga gidala si Korihor ngadto ni propeta Alma ug sa labawng maghuhukom sa Zarahemla, ug gibatokan ni Alma ang mga pagtulun-an ni Korihor pinaagi sa paghatag og pagpamatuod ni Kristo. Ingon nga si Korihor adunay katungod sa pagpahayag sa iyang kawalay pagtuo sa Dios, si Alma gawasnon sa pagpamatuod nga buhi ang Langitnong Amahan ug si Jesukristo. Mipili nga dili motuo kang Alma, nangayo si Korihor og timailhan gikan sa Dios ug nahimong amang. Human kini nga panghitabo napahibalo sa publiko, kadtong mituo kang Korihor nakombinser nga sayop siya ug “silang tanan nakabig pag-usab ngadto sa Ginoo” (bersikulo 58).
Namulong sa importansiya sa pagpanalipod sa relihiyoso nga kagawasan alang sa tanang tawo, si Propeta Joseph Smith miingon:
Ako ingon ka andam nga mamatay aron pagdepensa sa mga katungod sa Presbyterian, sa Baptist, o sa maayong tawo bisan unsa nga denominasyon [sama niadtong sa usa ka miyembro sa Simbahan]; tungod sa samang baruganan nga motamak sa mga katungod sa mga Santos sa Ulahing mga Adlaw nga motamak sa mga katungod sa Romano Katoliko, o bisan unsa nga relihiyosong grupo nga dili kaayo inila o sobra ka huyang sa pagdepensa sa ilang kaugalingon. (Mga Pagtulun-an sa mga Presidente sa Simbahan: Joseph Smith [2007], 417)
Si Joseph Smith mihatag usab og gibug-aton sa relihiyoso nga kagawasan isip usa ka sukaranan nga pagtulun-an sa Simbahan: “Kami nag-angkon sa kahigayunan sa pagsimba sa Dios nga Makagagahum sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayunan, sa pagpasimba kanila sa bisan unsa nga paagi, asa, o unsa ang ilang buot simbahon.” (Mga Artikulo sa Hugot nga Pagtuo 1:11).
Ang Simbahan ni Jesukristo sa mga Santos sa Ulahing mga Adlaw mimantala sa mosunod nga pahayag mahitungod sa malinawong pagtinabangay alang sa relihiyoso nga kagawasan:
Diin ang balaod nagpugong sa relihiyoso nga kagawasan, ang mga Santos sa Ulahing mga Adlaw nagtuo bahin sa pagsunod sa balaod samtang nagtinguha og pagpanalipod alang sa ilang sukaranan nga mga katungod pinaagi nianang mga pamaagi nga pinasubay sa balaod nga mahimong anaa sa matag dapit o nasod. (“Religious Freedom: The Basics,” ChurchofJesusChrist.org)
Hisgoti agi og Pagpangandam alang sa Klase
Ikonsiderar nga makig-istoryahanay sa usa o mas daghan pa nga mga tawo sa lain nga tinuohan, ug mangutana nila kon ngano nga ang ilang relihiyon importante man kanila ug kon nakasinati ba sila sukad og relihiyoso nga pagpangdaogdaog. Tambong sa klase nga andam nga mopaambit sa unsay imong nakat-onan.
Seksyon 2
Unsa ang akong mahimo aron makatabang sa pagdasig o pagpreserbar sa relihiyoso nga kagawasan?
Mahimong makatabang ang paghunahuna og pipila ka ehemplo kon unsa kaha ang kinabuhi nga walay kagawasan sa relihiyon. Hunahunaa ang pagsinati og usa o mas daghan pa sa mosunod nga mga kahimtang diin ang kagawasan gipugngan:
Mahimong mawad-an ka sa imong trabaho o mga posisyon sa pagpangulo tungod sa pagpahayag og relihiyoso nga mga gituohan—bisan sa gawas sa trabaho. …
Tingali gikinahanglan ka nga motago sa imong relihiyon o mohimo og mga buluhaton nga supak sa imong mga gituohan. …
Mahimong gikinahanglan ka nga motrabaho sa Igpapahulay o sa relihiyoso nga mga holiday bisan og ang uban andam nga mopuli sa imong oras nga tingtrabaho. …
Ang imong mga anak diha sa publiko nga mga eskwelahan tingali gikinahanglan nga magkat-on kabahin sa sekswal ug gender nga mga teyoriya nga supak sa sukaranan nga mga pagtulun-an sa Simbahan. …
Dili ka mahimong mosagop og mga bata o mahimong usa ka ama-ama o ina-ina tungod sa imong relihiyoso nga mga gituohan o mga panglantaw bahin sa pamilya.
Isip usa ka tag-iya og negosyo o propesyonal, mahimong mawad-an ka sa imong lisensiya o mamultahan kon mobalibad ka sa pagbuhat og mga serbisyo nga supak sa imong relihiyoso nga mga gituohan. (“Religious Freedom Matters: What’s at Risk,” Ensign, Hulyo 2017, 37)
Narekord sa Basahon ni Mormon nga sa ika-19 nga tuig sa pagmando sa mga maghuhukom, usa ka daotan nga tawo nga ginganlan og Amalickiah nakigkunsabo aron mahimong hari sa mga Nephite. Maliputon siyang mitinguha sa paglaglag sa Simbahan sa Ginoo ug “sa katukuran sa kalingkawasan diin ang Dios mitugyan ngadto kanila” (Alma 46:10). Miulog-ulog si Amalickiah sa daghan nga mga Nephite, ug kini nga mga Nephite mibiya sa Simbahan aron mosunod kaniya. (Tan-awa sa Alma 46:1–10.)
Sa dihang si Moroni, ang labaw nga kapitan sa mga kasundalohan sa mga Nephite, nakahibalo sa plano ni Amalickiah, nasuko siya ug midasig sa mga tawo sa pagpanalipod sa ilang mga katungod, lakip sa ilang kagawasan sa relihiyon (tan-awa sa Alma 46:11–13, 19–20).
Pagtuon agi og Pagpangandam alang sa Klase
Basaha ang Alma 46:11–13, 19–20, ug pangitaa kon unsay gibuhat ni Kapitan Moroni aron sa pagpanalipod sa mga tawo batok sa mga hulga sa ilang mga kagawasan.
Ang mga tawo mihiusa uban ni Moroni ug mipakigsaad nga mobarog batok sa mga hulga sa ilang mga kagawasan (tan-awa sa Alma 46:21–22). Sa paghisgot sa atong obligasyon sa pagsuporta sa relihyoso nga kagawasan, si Elder Hales mitudlo:
Isip mga disipulo ni Jesukristo kita dunay responsibilidad sa pakigtinabangay uban sa relihiyusong mga tawo nga kapareho nato og mga intensyon, sa pagpahayag kon unsa ang husto. …
… Responsable kita sa pagpanalipod niining sagrado nga mga kagawasan ug katungod alang sa atong kaugalingon ug sa atong kaliwatan. Unsay mahimo ninyo ug nako?
Una, mahimo kita nga mapahibalo. Hibaloi ang mga problema sa inyong komunidad nga makaapekto sa kagawasan sa relihiyon.
Ikaduha, sa indibidwal ninyong kapasidad, apil kamo sa uban kinsa pareho nato og pasalig [commitment] sa kagawasan sa relihiyon. Pakigtambayayong sa pagpanalipod sa kagawasan sa relihiyon.
Ikatulo, pagpakabuhi nga usa ka maayong ehemplo sa unsay inyong gituohan—sa pulong ug sa buhat. Ang pagsunod sa atong relihiyon mas importante kay sa unsay atong isulti bahin sa atong relihiyon.
Ang Ikaduhang Pag-anhi sa atong Manluluwas nagkaduol. Dili kita maglangay niining mahinungdanon nga kawsa. Hinumdumi si Kapitan Moroni, kinsa miisa sa bandila sa kalingkawasan [tan-awa sa Alma 46:12]. … Atong hinumduman ang pagsanong sa katawhan: nga migamit sa ilang kabubut-on, sila “nagdagan og dungan” uban sa pakigsaad nga mobuhat [Alma 46:21]. (“Pagpreserbar sa Kabubut-on, Pagpanalipod sa Kagawasan sa Relihiyon,” 112, 113)
Pamalandong agi og Pagpangandam alang sa Klase
Unsa ang imong mahimo aron sa pagdasig o pagpreserbar sa relihiyoso nga kagawasan sa dapit diin ikaw nagpuyo?
