1. E i na, ko teia oki te au tuatua ta Amuleka i ako atu ki te au tangata i roto i te enua ko Amoniha, i te na ko anga e:

2. Ko Amuleka au, ko au oki te tamaiti a Kidona te tamaiti a Isemaela no te uanga mai oki a Aminadai, e ko taua Aminadai rai tei akauri i te tataanga i runga i te patu o te iero, tei tataia e te rima o te Atua.

3. E e uanga katoa a Aminadai no Niphai, te tamaiti a Lihai, tei aere mai mei te enua mai mei Ierusalema, e e uanga katoa na Manase, te tamaiti a Iosepha tei okonaia atu ki Aiphiti e tona ai tuakana.

4. E i na, e tangata rongonui oki au i rotopu i te aronga tei kite iaku. e i na, e maata toku iti tangata, e toku au taeake, e na toku rima i raukaʼi iaku te au mea i apinga nui ei au.

5. Kare ra i maata taku i kite i te au ravenga a te Atu, e tona ra au muna e te mana vavaria. Te karanga atu nei au e, kare i maata rava taku i kite no teia au mea nei, ina ra, kua tarevake au, no te mea e maata oki taku i kite ana no tona ririnui e te mana vavaria, e tae rava atu ki te akaoraanga i teia iti tangata nei.

6. Ina ra, kua akaketaketa ana au i toku ngakau, no te mea e manganui te au taime i kapikiia ana au, e kare au i akarongo atu, e no reira, kua kite au i teia au mea nei, kare ra au i marama, no reira kua aere rai au ma te patoi atu i te Atua, ki te kino o toku nei ngakau, e tae rava atu ki te ā o te rā i te itu o te marama, i roto oki i te ngauru o te mataiti o te tutaraanga o te au akava.

7. E i toku aereanga i te akara i tetai kopu tangata noku, kua mama mai tetai angela a te Atua kiaku ma te na ko mai e, Amuleka e oki ki toou ngutuare, no te mea ka angai koe i tetai peroveta a te Atua, e tangata tapu oki, e e tangata ikiia oki e te Atua, e i akakore ana oki aia i te kai i tetai au rā, no te ara a te tangata nei, e e matepongi oki aia, e e āriki oki koe iaia ki toou are ra ma te angai atu iaia, e ka akameitaki mai aia ia koe e toou ngutuare ra, e ka vai oki te akameitakianga a te Atua ki rungao ia koe e toou ngutuare ra.

8. E i na, kua ariki au i te reo o te angela, ma te oki atu ki toku ngutuare. E iaku e oki atura, kua kite au i te tangata ta te angela i akakite maira kiaku, ka ariki mai koe ki roto i toou are, e i na, ko taua tangata rai teia, tei tuatua mai ana kia kotou i te au mea a te Atua.

9. E kua tuatua maira te angela kiaku, e e tangata tapu oki aia, e no reira kua kite au e, e tangata tapu aia, no te mea kua tuatuaia mai oki e te angela a te Atua.

10. E kua kite oki au e, ko te au mea tana i tuatua mai e mea tika ïa, e i na, te karanga atu nei au kia kotou, e mei te Atua e ora nei, mei te reira katoa aia i te unga anga mai i tana angela kia akakite mai i teia au mea kiaku, e kua rave oki aia i teia i te taime ia Alama i noo ei ki toku ngutuare.

11. E i na, kua akameitaki mai aia i toku ngutuare, e kua akameitaki katoa mai iaku, e taku au vaine e taku au tamariki, e toku metua, e toku kopu tangata, e toku au kopu tangata katoatoa, e kua vai mai oki te au akameitakianga a te Atua ki rungao ia matou kia tau ki te tuatua tana i tuatua mai.

12. E teianei, i te oti anga ia Amuleka i te tuatua i teia au tuatua nei, kua akamata te tangata i te poitirere i te kite anga e, e maata atu i te kite okotai tei akapapu i te au mea i akaapaiaʼi ratou, e pera katoa ki te au mea te ka tae mai, mei ta te vaerua o te totou i roto ia raua.

13. Kua inangaro roa tetai i roto ia ratou i te uiui uianga atu kia raua, e na roto oki i ta ratou ravenga kikite e mou ei raua i ta raua tuatua, kia rauka oki ia ratou i te kimi apa no raua, e kia rauka oki ia ratou i te tuku atu ia raua ki to ratou au akava, kia akavaia raua kia tau ki ta te ture, e kia taiaia raua, me kore ra, kia tiriaia ki roto i te are auri, kia tau oki ki te tuatua ta ratou i akariro ei ara na raua.

14. E ko taua aronga rai oki tei kimi i te takore ia raua kia ratou tei riro ei aronga apii ture e kua tutakiia, me kore ra, kua ikiia e te au tangata ei rave i te ture i to ratou au akavaanga me kore, te akavaanga o te ara a te tangata ki mua i te au akava.

15. Kua apiiia oki teia au akaaere ture nei, ki te au angaanga kikite katoatoa o te tangata nei, kia rauka ia ratou i te rave i ta ratou angaanga ma te kite e te karape.

16. I reira, kua akamata ratou i te ui uianga atu kia Amuleka kia rauka oki ia ratou i te akatarevake i tana tuatua me kore, akaapa i te tuatua tana i tuatua.

17. E kare rava ratou i kite e, ka kite a Amuleka i to ratou akakoroanga, ina ra, i to ratou akamataanga i te uiui atu kiaia, kua kite takere aia i to ratou manako, e kua na ko atu kia ratou e, Aue kotou e teia uki rave ara e, te aronga apii ture, e te aronga pikikaa, no te mea te akamou nei kotou i te tango o te tiaporo e te akamou nei kotou i tetai puereere ei opu i te aronga tapu o te Atua.

18. Te maani nei kotou i tetai au ravenga ei takino i te mataara o te aronga tika, e ma te apai mai i te riri o te Atua ki rungao i to kotou upoko, e tae rava atu ki te uritumu angaia o teia au tangata nei.

19. Ae, kua tuatua meitaki a Mosaia to tatou ariki openga, i te vaitata anga aia i te oronga atu i te basileia e ma te kore oki e tangata kia ariki atu, ma te akaue atu i tona iti tangata e na to ratou uaorai reo ratou e akaaere, i na, e kua karanga katoa oki aia e, me ka tae mai te tuatau, e ka riro te reo o teia au tangata ei iki i te ara, e me ka tae mai te tuatau ka topa teia aronga ki roto i te kino, ka tau ratou kia takoreia.

20. E teianei, te tuatua atu nei au kia kotou, e tika to te Atu akaapaanga i ta kotou au ara, e e tika tikai tana e kapiki nei na roto i te reo o tana au angela e, e tataraara, e tataraara, no te mea, te vaitata mai nei te basileia o te ao.

21. Ae, e tika oki tana i akakite mai, na roto i te reo o tana au angela e, ka aere mai au ki toku nei iti tangata, ma te tika, e te tiratiratu i roto i toku rima.

22. Te karanga atu nei au kia kotou, E naringa kare te pure a te aronga tuatua tika i roto i te enua i teianei, kua rokoia kotou e te mate; kare oki na roto i te vai diluvi mei ta te tangata i te tuatau o Noa, kua na roto ra i te onge, e te maki mate, e te koke.

23. Kua na roto ra i te pure a te aronga tika i akaoraiaʼi kotou e no reira, me akaruke kotou i te mea tika, kare i reira te Atua e tāpū i tona rima, e na roto i tona riri otooto ka tae mai aia kia kotou e ka tairi poti aia ki te onge, e te maki mate, e te koke, e te vaitata mai nei te taime, mari ra kia tataraara kotou.

24. E i na, kua riri tikai te au tangata ia Amuleka, e kua kapiki maata atu ratou i te na ko atu e, te akaapa nei teia tangata i ta tatou ture tika e to tatou apii ture ta tatou i iki.

25. Ina ra, kua oora atu a Amuleka i tona rima ma te kapiki pakari atu kia ratou i te na ko anga e, Aue kotou e teia uki tangata rave ara e, i akapeea i raukaʼi ia Satani i te mou i to kotou au ngakau? Eaa ra kotou i kauraro ei ki raro iaia, e kia mana mai aia ki rungao ia kotou, kia akamatapo i to kotou mata, kia kore oki kotou e marama i te au tuatua tei tuatuaia atu ana kia tau ki to ratou tika?

26. E i na, kua akaapa ainei au i ta kotou au ture? Kare kotou i marama, kua karanga kotou e, kua patoi au i ta kotou ture, kare au i pera, kua tuatua ra au ma te tauturu i ta kotou ture, e kua riro te reira ei akaapaanga no kotou.

27. E i na, te karanga atu nei au kia kotou e, te akatumuia nei te mate no teia iti tangata nei, no te tuatua tika kore a to kotou au apii ture, e to kotou au akava.

28. E i muri ake i to Amuleka tuatua anga i teia au tuatua, kua kapiki atu ratou kiaia i te na ko anga atu e, I teianei kua kite matou e, e tamaiti teia na te tiaporo, no te mea kua pikikaa mai aia ia tatou, e kua patoi oki aia i ta tatou ture. E teianei te karanga nei aia e, kare aia i akaapa ana.

29. E kua akaapa aia i to tatou au apii ture, e to tatou au akava.

30. E kua tamou te au apii ture i te reira ki roto i to ratou au ngakau, kia maara oki ia ratou teia au mea nei ma te patoi iaia.

31. E te noo ra tetai i rotopu ia ratou ko Zezorama tona ingoa, E i na, koia oki to ratou tangata maata i te patoi anga atu ia Amuleka raua ko Alama, e koia oki tei kite roa atu ia ratou e maata tana angaanga i rotopu i te au tangata.

32. E i na, ko te akakoroanga o teia au apii ture nei, koia oki kia rauka te puapinga, e kua rauka te puapinga kia tau ki ta ratou angaanga.