1. Aere atura ratou ma te akamata i te ako aere atu i te tuatua a te Atua ki te au tangata katoatoa, tomo atura ki roto i to ratou au sunago, e to ratou au are, e kua ako katoa i te tuatua na runga i to ratou mataara.

2. E maata atura ta ratou angaanga ki rotopu ia ratou ra, kua tupu akera te manuia kia ratou i rotopu i te aronga putaua ra, i na, kua tuaruia mai ratou mei roto i te au sunago no te manea kore o to ratou au kakau.

3. E no reira, kare ratou i akatika kia tomo ki roto i to ratou au sunago kia akamori i te Atua, kua manakoia ratou e, e mea viivii, e aronga veve oki ratou, kua manako to ratou au taeake e, e mea puapinga kore ratou, kua ngere oki ratou i te au mea o teianei ao, e e ngakau akaaka oki to ratou.

4. E te apii atura a Alama ma te ako atu i te au tangata i runga i te tuaivi ko Onida, kua aere maira tetai urupu maata kiaia, e ko te au tangata oki te reira i tuatua uaia ake nei, tei akaaka to ratou ngakau no te mea, kua ngere ratou i te au mea o te ao nei.

5. E tae akera ratou kia Alama ra, kua na ko maira te tangata maata kiaia e, i na, eaa ta toku nei taeake ka rave, kua akavaavaaia oki ratou e te au tangata katoa no to ratou veve, e pera katoa to matou au taunga e kua tuaru mai oki ratou ia matou mei roto mai i to matou au sunago ta matou i angaanga pakari tikai ki to matou uaorai rima, e kua tuaru ratou ia matou ki vao no to matou veve, e kare o matou ngai akaou kia akamori i to matou Atua, i na, ka akapeea matou nei?

6. I to Alama akarongo anga i teia tuatua nei kua uri aia ma te akara atu kiaia e kua akara atura aia ma te rekareka maata, kua kite oki aia e, no to ratou au tumatetenga i akaakaʼi ratou, e kua teateamamao oki ratou i te akarongo i te tuatua.

7. E kare rava oki i tuatua akaou atu ki te urupu tangata, ina ra, kua akatoro atu aia i tona rima, e kua kapiki atu ki te aronga tana e kite atura, ko tei tataraara tikai, ma te na ko atu kia ratou e.

8. Te kite nei au e, e aronga ngakau akaaka kotou, e mei te mea e tuatua tika oki te reira, e ao oki to kotou.

9. I na, kua tuatua mai oki to kotou taeake e, ka akapeea matou nei? kua tuaruia matou mei roto i to matou au sunago, e kare e rauka ia matou kia akamori akaou i to matou Atua.

10. I na, te karanga atu nei au kia kotou, kua manako ainei kotou e, kare e rauka ia kotou i te akamori i te Atua, mari ua ra ki roto i to kotou au sunago anake?

11. Ka ui katoa atu au e, kua manako ainei kotou e, kare e rauka ia kotou i te akamori i te Atua mari ra e okotai taime i te Epetoma?

12. Te karanga atu nei au kia kotou, kua tau kia tuaruia mai kotou mei roto mai i to kotou au sunago, kia akaaka oki kotou, e kia kite oki kotou i te pakari, e e mea tau oki ia kotou i te apii i te pakari, e no te mea oki e, kua tuaruia kotou ki vao, e kua riri to kotou au taeake kia kotou no to kotou veve maata i taakaakaiaʼi to kotou ngakau, e mea tika oki kia taakaakaia kotou.

13. E teianei, no te mea, kua maroia kotou kia akaaka, e ao to kotou, e me maroia tetai tangata kia akaaka, ka na mua aia i tetai taime i te tataraara, e i na, ko tei tataraara ka aroaia mai aia, e ko tei rauka te aroa e tae rava atu ki te openga ra, ka akaoraia ïa.

14. E mei taku i tuatua atu kia kotou, i te mea, e kua maroia kotou kia akaaka, e ao to kotou, kare ainei kotou i manako e, e ao tikai to ratou tei taakaaka ia ratou no te tuatua ra?

15. E ko tei taakaaka iaia uaorai, e ma te tataraara i tana au ara, e ma te tamou atu ki te openga, e ao tikai tona, e akameitakianga maata atu tona i to te aronga i maroia kia akaaka no to ratou veve.

16. E ao oki to ratou tei taakaaka ia ratou ma te kore i maroia kia akaaka, me kore ra, e ao tona to tei irinaki i te tuatua a te Atua, e tei bapetizoia ma te ngakau ketaketa kore, e tei kore rava i akaariuia ana ki te tuatua, me kore, maroia i mua ake ka irinaki ei i te tuatua.

17. E manganui oki tei karanga e, mei te mea e ka akaari mai koe i te akairo no te rangi mai, ka kite matou i te tika, e ka irinaki matou.

18. Te ui atu nei au kia kotou e, e akarongo ainei te reira? I na, te karanga atu nei au kia kotou e, kare me kite tetai tangata i tetai mea kare e puapinga kia irinaki, kua kite oki aia.

19. E teianei, e akaapaanga maata to te tangata i kite i te au inangaro o te Atua, e kare e akono i te reira, i to te tangata tei irinaki ma te kore e kite, me topa atura ki roto i te ara.

20. Kia akataka oki kotou i te reira. I na, te karanga atu nei au kia kotou, ka aiteite tetai tua ki tetai, e ka rauka i te tangata katoatoa kia tau ki tana ra angaanga.

21. I na, mei taku i tuatua no runga i te akarongo, kare oki te akarongo i te kite papu i tetai mea, me e akarongo toou, ka akamanako koe, no te au mea akara koreia, tei tika.

22. I na, te karanga atu nei au kia kotou, e kua inangaro katoa au kia akamaara kotou e, e aroa maata to te Atua i te tangata katoatoa tei irinaki ki tona ra ingoa, e no reira, te inangaro nei aia kia irinaki kotou i tana ra tuatua.

23. E teianei, te akakite mai nei aia i tana tuatua na roto i te au angela ki te tangata nei, e kare oki ki te tane ua, e pera rai ki te vaine. E kare e ko teia ua, kua oronga katoaia mai ki te au tamariki rikiriki i te au taime e manganui i te mea e akamaʼi te aronga pakari.

24. E teianei, e aku au taeake akaperepere, mei ta kotou i ui mai kiaku, ka akapeea kotou kua takinga kinoia oki kotou e kua tuaruia ki vao, kare au e inangaro kia manako kotou e, te akaapa atu nei au ia kotou, mari ra, na roto ra i te tuatua mou.

25. E kare oki au i manako ana e, kua maro katoatoaia kotou kia taakaaka ia kotou, e kua irinaki tikai oki au e, te vai nei tetai i rotopu ia kotou te ka taakaaka ia ratou, no atu e, eaa te mea.

26. Mei taku i tuatua ake nei no runga i te akarongo, kare ïa i te kite mou, koia katoa taku nei tuatua. Kare e rauka ia kotou kia kite papu i taku nei tuatua i te taime mua, koia katoa te akarongo, kare katoa ïa i te kite papu.

27. Ina ra, mei te mea e ara mai kotou, e ma te akamaroiroi i to kotou ngakau, kia tamata i taku nei tuatua, e i te akatupu katoa i te akarongo meangiti, e me kare atura e rauka ia kotou, mari ra, i te inangaro i te akarongo, kia tupu taua inangaro ra ki roto ia kotou ra e tae rava atu ki te akarongo meangiti, kia tika ia kotou kia ariki i tetai tuanga o taku nei tuatua.

28. E akaaite tatou i te tuatua ki tetai ua, e me akatika mai kotou kia tanuia te ua ki roto i to kotou ngakau, e mei te mea e, e ua mou e te meitaki, e kia kore oki kotou e uri i te reira ki vao na roto i to kotou akarongo kore, e e akaruke oki kotou i te vaerua o te Atu ra, i na, ka tupu oki ïa ki roto i to kotou ngakau e ka kite oki kotou i te tupuanga, e ka karanga kotou i roto ia kotou uaorai e, e ua meitaki teia, koia oki e tuatua meitaki teia, no te mea kua akamaata i toku vaerua e kua akamaramarama i toku manako, e kua riro ei mea vene reka kiaku.

29. E teianei, kare ainei te reira i akamaata i to kotou akarongo? Te karanga atu nei au kia kotou, ae, ina ra, kare oki te reira e riro ei kite mou.

30. Ina ra, te akamata ra te nionio, e te akamata ra te ua i te tupu, ei reira kotou e karangaʼi e, e ua meitaki teia, i na oki, te akaete nei, e te nionio nei e te tupu nei oki.

31. E teianei, kua kite papu ainei kotou e, e ua meitaki te reira? Te karanga atu nei au kia kotou e, Ae, no te mea, ka ua mai oki te ua ki tona uaorai tu.

32. E no reira, me tupu tetai ua, e e ua meitaki ïa, e me kore ra e tupu, kare ïa i te ua meitaki e ka akarukenaia ïa.

33. E teianei, no te mea kua tamata kotou i te reira, e kua tanu i te ua, e kua nionio, e kua tupu oki, kua kite papu i reira kotou e, e ua meitaki te reira.

34. E teianei, i na, e kite papu tikai ainei to kotou? Ae, e kite papu to kotou i taua mea ra, e kua angaanga kore to kotou akarongo, no te mea kua riro ïa ei kite mou, kua kite oki kotou e, kua akamaata te tuatua i to kotou ngakau, e kua kite katoa kotou e, kua nionio mai ki runga, e te tupu ra te marama ki roto i to kotou manako, e te tupu ra oki to kotou ngakau ki te maataanga.

35. E teianei, kare ainei te reira i te tuatua tika? Te karanga atu nei au kia kotou e, Ae, no te mea ko te marama ïa, e te marama katoa ra, ko te meitaki ïa, no te mea kua kitea ïa, e tenana, ka kite papu kotou e, e mea meitaki ïa, e teianei e tamata kotou i taua marama ra, kua papu ainei to kotou kite?

36. I na, te karanga atu nei au kia kotou, kare, auraka oki kotou e akapae i to kotou akarongo, kua akatupu anake oki kotou i to kotou akarongo, e kua taangaanga i to kotou akarongo ma te tanu i te ua ra, kia tamata kotou i te reira, kia kite e, me e ua meitaki.

37. E i na, me te tupu nei te rakau, e karangaʼi kotou e, e akono tatou kia tupu oki, e kia ua mai i te ua na tatou, e mei te mea ka akono meitaki kotou i te reira, ka aka, e ka tupu e ka ua mai i te ua.

38. Ina ra, me ka akono kore kotou i te rakau, ma te manako kore i te akakenukenu atu, kare rava e tupu, e me tae mai te vera o te ra ka pakapaka ïa, no te mea kare ona aka e ka ngaro ke, e ka uuti kotou e ka titiri ki vao.

39. Kare no tei kore e meitaki te ua, e kare katoa oki e riro tona ua ei mea kino, ina ra, no te mea ïa kua vai tanea ua to kotou enua, e kare kotou i akakenukenu i te reira, e no reira i kore ei kotou i kai i te ua rakau.

40. E tenana, me kore kotou e akono i te tuatua ma te akarongo ki te ua, kare rava e rauka ia kotou te ua o te rakau ora.

41. Ina ra, me akono kotou i te tuatua, e pera katoa ki te pu rakau me akamata i te tupu na roto i toou akarongo ma te akono meitaki, e te akakoromaki, i te akaraanga atu ki mua ki te ua nona ra, ka tupu te reira, e i na, ka riro oki te reira ei rakau tupu mou e tae rava atu ki te ora mutu kore.

42. E no to kotou maroiroi, e to kotou akarongo e to kotou akakoromaki ki te tuatua i te tauturu anga atu i te reira, ka tupu oki te aka ki roto ia kotou, i na, kare e roa atu ka kokoti kotou i tona ra ua, e puapinga maata oki to reira ra, e kua maata atu tona reka i to te au mea reka katoatoa ra, e te teatea i te au mea teatea katoa ra, e kua maata tona meitaki i to te au mea memeitaki katoa ra, e kai oki kotou i tana kai, e kia ki kotou, kia kore e pongi akaou, e kia kore katoa e kaki i te vai.

43. E teianei, e aku au taeake, ka kokoti kotou i te tutaki o to kotou akarongo, e to kotou maroiroi, e te akakoromaki, e te maru, ma te tiaki anga i te pu rakau kia ua mai i tetai ua na kotou.