1. Naringa oki au i te angela, e rauka mai oki iaku te inangaro o toku ngakau, kia tika oki iaku kia aere e tuatua atu ma te pu a te Atua, e ma te reo kia ngaueue te enua nei, ma te kapikianga atu ki te tangata katoatoa kia tataraara.

2. E ka akakite atu au ki te au tangata katoatoa, mei te reo o te mangungu i te tataraara e te ravenga ora no te tangata katoa ra, kia tataraara ratou, e kia aere mai ki to tatou Atua ra, e kia kore rava oki e maata akaou te tumatetenga i runga i te enua nei.

3. Ina ra, e tangata ua au nei, e te ara nei au i roto i toku inangaro, e tika oki iaku kia rekareka i te au mea ta te Atua i oronga mai kiaku nei.

4. Kare e tau iaku kia kimi atu au ki runga ake i ta te Atua tika i oronga maira, no te mea kua kite au e, ka oronga mai aia ki te tangata nei kia tau ki to ratou inangaro, mei te mea e ka mate, e me ka ora, e kua kite au e, ka oronga mai aia ki te tangata kia tau ki to ratou inangaro, i te ora, e i te mate.

5. E kua kite au e, kua tae mai te kino e te meitaki ki mua i te au tangata katoatoa, e ko tei kore i kite i te meitaki e te kino, kare aia e akaapaia, ina ra, ko tei kite i te kino e te meitaki, ka orongaia mai tana kia tau ki tona inangaro, me kua inangaro aia i te kino, me e meitaki, te ora me ko te mate, e te rekareka, me e ngakau tumatetenga.

6. E teianei, no te mea, kua kite au i teia au mea nei, eaa i reira ka inangaro akaou atu ei, mari ra, i te angaanga i kapikiiaʼi au nei?

7. Eaa ra au i inangaro ei kia riro au ei angela, kia tika iaku kia tuatua atu ki te au ope o te enua nei?

8. E i na oki, te akatupu nei te Atua i te tangata no roto i to ratou uaorai kopu, e to ratou uaorai reo, kia apii atu i tana ra tuatua na roto i te pakari tana i kite e ka tau no ratou, e no reira te kite nei tatou e, te akaaere ra te Atua ma te pakari, mei tei tau i te tuatua tika e te tuatua mou.

9. Kua kite au i ta te Atua i akaue mai kiaku ra, e te rekareka nei au i te reira, e kare au i rekareka iaku ua, kua rekareka ra au i ta te Atu i akaue mai iaku, e ko teia ïa toku rekareka, penei ake ka riro au ei raverave no te Atua ra, kia arataki i te tangata nei kia tataraara e ko toku ia rekarekaanga.

10. E i na, me kite au i toku au taeake ma te ngakau tataraara tikai, e i te aereanga mai ki to ratou Atu ra, ko te Atua, kua ki rava toku ngakau i te rekareka i reira, i reira oki au i akamaaraʼi i ta te Atu i rave noku ra, e kua akarongo mai i taku pure, e ka maara katoa iaku i tona rima aroa tana i akatoro mai kiaku nei.

11. E kua akamaara katoa au i te tuikaaanga o toku au metua, e kua kite papu oki au e, kua akaora te Atu ia ratou i te tuikaaanga ra, e kua na reira oki aia i te akatinamouanga i tana akonoanga. Na te Atu ra, na te Atua o Aberahama, te Atua o Isaaka, e te Atua o Iakoba, i akaora ia ratou mei te tuikaaanga ra.

12. I na, te maara ua nei iaku te tuikaaanga o toku ra ai metua, e na taua Atua rai i akaora ia ratou i te rima o te ngati Aiphiti ra, e nana katoa i akaora ia ratou mei roto mai i te tuikaaanga ra.

13. E ko taua Atua rai tei akatinamou i tana akonoanga ki rotopu ia ratou, e ko taua Atua rai tei iki mai iaku ki tetai taoonga tapu, kia ako atu i teia tuatua ki teia iti tangata nei, e kua akapuapinga mai aia i taku angaanga, e kua ki oki au i te rekareka.

14. Ina ra, kare au i rekareka i taku uaorai angaanga meitaki anake, kua rekareka katoa ra au i te angaanga meitaki a toku au taeake, tei aere ana ki te enua ko Niphai.

15. I na, kua rave ratou i te angaanga ma te maroiroi, e kua ua mai i te au ua e manganui, e e tutaki ta ratou.

16. I na, kia akamanako au i te angaanga meitaki a toku au taeake, kua apaina keia toku vaerua, mei te taka ke anga o te vaerua mei te kopapa, no tei ki tikai au i te rekareka.

17. E kia akameitaki mai te Atua i toku ra au taeake, e kia noo oki ratou i roto i te basileia o te Atua, e te aronga katoa tei akaariuia mai, kia kore ratou e aere akaou ki vao, kia akakaka ra ratou iaia e tuatau ua atu. E kia akatika mai oki te Atua, kia tau ki taku nei tuatua mei taku i tuatua ake nei. Amene.