1. E kua tata akaou atura aia ki te tutara o te enua, koia oki ko Pahorana e ko teia oki te tuatua tana i tata atu i te na ko anga e, I na, te tata nei au i taku episetole kia Pahorana i roto i te oire ko Zarahemela, e koia oki te akavanui e te tutara ki rungao i te enua, e pera katoa ki te au tangata tei ikiia e teia aronga nei kia akatere i te au mea katoatoa o te tamaki.

2. E i na, e tuatua akaapa taku ia kotou, i na, kua kite oki kotou e, kua ikiia kotou ei akaputuputu mai i te au tangata, e ma te akarakei ia ratou ki te koke e te simetera, e te au apinga tamaki katoatoa ka aere atu ei ratou ki te ngati Lamana kia tamaki e no atu eaa ta ratou ngai ka tomo mai ki roto i to tatou nei enua.

3. E i na, te tuatua atu nei au kia kotou e, ko au e pera katoa ki toku au tangata, e pera katoa kia Hilamana e tona au tangata, i na, kua akakoromaki tikai ratou i te au tumatetenga mamaata, koia oki te pongi, te kaki vai, e te au tu tumatetenga katoatoa.

4. Ina ra, e naringa e ko teia ua ta matou i akakoromaki kare matou e akaapa.

5. Ina ra, kua maata te mate i rotopu i to tatou au tangata, kua tauasani oki tei mate i te koke, e kare i akapera naringa kotou i tauturu maata i to matou nuku e ma te akamaroiroi ia ratou. E maata oki ta kotou akono kore ia matou.

6. E teianei, te inangaro nei matou kia kite i te tumu o ta kotou akono kore, e inangaro katoa matou kia kite i te tumu no to kotou tu manako kore.

7. Ka rauka ainei ia kotou i te manako kia noo kotou ki runga i to kotou terono ma te manako kore e ma to kotou au enemi katoa i te akatotoa anga i te angaanga o te mate takapini ia kotou. E ma ratou katoa i te ta anga i toou au taeake e manganui.

8. E ko ratou katoa tei akara atu kia koe kia tauturuia mai, e kua akanoo oki ia kotou ki te ngai e tika ia kotou kia tauturu mai ia ratou e i raukaʼi ia kotou i te tono mai i te au nuku kia ratou kia akamaroiroi ia ratou e ma te akaora mai i te tauasani o ratou mei te koke ra.

9. I na, kare e ko teia anake ua, e kua tāpū oki kotou i ta kotou kai mei ia ratou, e manganui oki tei ta, e tei maringi te toto no to ratou inangaro maata i teia aronga nei e kua rave oki ratou i teia i te vaitata anga ratou i te mate i te pongi e no ta kotou akono kore maata ia ratou.

10. E teianei e taku au taeake akaperepere, kia akaperepereia ra oki kotou e tau ei, e kia akamaroiroi oki kotou ia kotou uaorai no te meitaki e te au o teia au tangata nei e tau ei, ina ra, kua mako kore kotou ia ratou e ka riro te toto o te tausani anga o ratou ki runga i to kotou upoko ei akaoko, e kua kite mai oki te Atua i ta ratou au pati anga e to ratou katoa au tumatetenga

11. I na, ka tika ainei ia kotou kia manako e, e ka tika ia kotou i te noo ki runga i to kotou terono e no te meitaki maata o te Atua, kare ia kotou e rave i tetai mea, e ka akaora aia ia kotou. I na, me kua manako kotou i teia, kua puapinga kore to kotou manako.

12. Te manako ainei kotou e, e no te maata o te ara a to kotou au taeake i taiaiaʼi ratou? Te karanga atu nei au kia kotou e, me kua pera to kotou manako kua tarevake kotou e te karanga atu nei au kia kotou e e manganui tei mate i te koke, e i na, no kotou ïa akaapaanga.

13. Te tuku ra oki te Atu i te aronga tuatua tika kia taiaia, kia tae oki tana tuatua tika e te akaapaanga ki te aronga kino e no reira, auraka kotou e manako e kua ngaro te aronga tuatua tika no te mea kua taiaia ratou, ina ra, ka o ratou ki roto i te akangaroianga o te Atu to ratou Atua.

14. E teianei, te karanga atu nei au kia kotou te mataku maata nei au ko te tae aea mai te akaapaanga a te Atua ki rungao i teia aronga nei no to ratou kope maata, e pera katoa no te kope o to tatou kavamani e to ratou akaruke ua anga i to ratou au taeake e ratou katoa tei taiaia.

15. E naringa oki e kare i akamata ana te angaanga kino i mua ake i to tatou upoko, ka rauka ia tatou i te paruru atu i to tatou au enemi kia kore ratou e mana mai ki runga ia tatou i teianei.

16. Naringa kare taua tamaki ra i tupu ki roto ia tatou uaorai, e naringa kare taua au tangata inangaro ariki ra i akatupu i te akamaringianga toto ki rotopu ia tatou uaorai, e i te taime te taumaro ra tatou ia tatou uaorai e naringa e kua taokotai to tatou maroiroi mei ta tatou i rave i muri mai, e naringa oki e kare te inangaro no te mana e te tikaanga o taua au tangata inangaro ariki ra i rungao ia tatou e naringa oki ratou i inangaro i te akatupu i te au ma te taokotai mai kia tatou ma te tamaki atu i to tatou au enemi kia kore ratou e rave i ta ratou koke ka tamaki mai ei ia matou e ka tupu oki te akamaringianga toto maata ki rotopu ia tatou, i na, naringa kua aere atu tatou kia ratou ma te maroiroi o te Atu, kua pueu to tatou au enemi e kua raveia oki te reira mei tei tau ki te akatupu anga i tana tuatua.

17. Ina ra, te aere mai nei te ngati Lamana kia tatou ma te rave i to tatou au enua, e te ta nei ratou i to tatou au tangata ki te koke, koia oki ta tatou au vaine e te tamariki katoa e ma te apai tuikaa atu ia ratou kia akakoromaki ratou i te au tu tumatetenga katoatoa. Kua tupu teia no te kino maata o tei kimi i te mana e te tika, koia oki te au tangata inangaro ariki ra.

18. Eaa ra au ka tuatua maata atu ei no teia pekapeka nei? Kare oki matou i kite ko kotou paa tei kimi ana i te mana e kare oki matou i kite e, ko kotou paa te au tangata pikikaa i to kotou enua.

19. Me kore ra, kua akaruke ainei kotou ia matou no te mea, tei te tumu o te enua kotou, e te noo ra kotou ma te au, e no reira ainei i kore ei kotou i apai mai i te kai na matou e kare katoa i tono mai i te au tangata ei tauturu i to matou nuku?

20. Kua ngaropoina ainei ia kotou te au akaueanga a te Atu? E kua ngaropoina ainei ia kotou te tuikaaanga o to kotou ai tupuna, kua ngaropoina ainei ia kotou te au taime i akaoraia ana tatou mei te rima o to tatou au enemi?

21. Me kore ra, te manako ainei kotou e, ka akaora ua mai rai te Atu ia tatou me noo ua tatou ki runga i to tatou terono ma te kore e taangaanga i te au mea ta te Atua i oronga mai no tatou?

22. E ka noo ua ainei kotou ma te kope ma te koropiniia kotou e te tausani anga o ratou e te ngauru katoa o te tausani tei noo ua ma te kope e ma te au tausani e pini ua ake i roto i te kotinga o te enua tei mate maira i te koke, te putaputa ra, ma te tae katoa o te toto?

23. Kua manako ainei kotou e, kare te Atua e akaapa ia kotou ka noo uaʼi kotou ma te akara i teia au mea nei? I na, te karanga atu nei au kia kotou, kare. E teianei te inangaro nei au kia akamanako kotou e kua tuatua mai ana te Atua e kia tamaia na mua to roto i te ariki, e i reira ka tamaiaʼi to vao ake i te ariki.

24. E teianei me kore kotou e tataraara i te au mea ta kotou i rave ma te akamata i te tu ki runga, ma te rave, ma te tuku mai i te kai e te tangata katoa kia matou e kia Hilamana e kia tauturu mai oki i tera pae o to matou enua tei rauka iaia ra, e kia tika ia matou kia rave akaou i te toenga o to tatou enua i tera tua, i na, kare i reira e tau ia matou kia tamaki akaou atu ki te ngati Lamana kia tāmā roa matou na mua i roto i te ariki, koia oki te akaaere maata o to tatou kavamani.

25. E me kore koe e akono mai i taku episetole, e kia aere mai e akaari mai kiaku e tei roto ia koe te vaerua tikai o te au ma te akamaroiroi e te tauturu i to tatou nuku ma te oronga atu i te kai ei tauturu ia ratou, i na, ka akaruke au i tetai pae o toku au tangata rangatira ei paruru i teia pae o te enua e ka vaio oki au i te maroiroi e te au akameitakianga o te Atu ki rungao ia ratou kia kore rava e mana ke atu e mana ki rungao ia ratou.

26. E teia no to ratou akarongo maata, e te akakoromaki i roto i to ratou au tumatetenga ra.

27. E ka aere atu au kia kotou, e mei te mea e tei rotopu ia kotou te au tangata tei inangaro i te au, e mei te mea e te vai ra tetai mea pura meangiti o te au, i na, ka akatupu au i te pekapeka i rotopu ia kotou e kia mate takiri te au tangata katoa tei inangaro i te rave ua i te mana e te tikaanga.

28. E i na, kare oki au e mataku i toou mana e taau tika, ina ra, ko toku Atua taku e mataku ra, e na roto oki i tana i akaue mai i rave ei au i taku koke kia paruru atu i toku enua, e no ta kotou au ara i pou maataʼi matou.

29. I na, ko te taime teia, e te vaitata mai nei te tuatau, e vai ei te koke o te tuatua tika ki rungao ia kotou, me kore kotou e maroiroi i te paruru i to kotou enua, e ta kotou au tamariki, ka iri te koke ki rungao ia kotou, e pou roa atu kotou.

30. I na, te tiaki nei au i te tauturu mei ia kotou mai, e me kore kotou e tauturu mai ia matou, i na, ka tae atu au kia kotou, koia oki, ki te enua ko Zarahemela, e ka ta ia kotou ki te koke e kia kore oki o kotou mana i te akakore i te meitaki o teia au tangata i roto i to tatou tamakianga no te au.

31. I na, kare oki te Atu e akatika kia ora kotou e ma te rave maroiroi i te ara e te au mea kino e mate ei oki tona au tangata tuatua tika.

32. I na, te manako ainei kotou e, ka akaora te Atu ia kotou, e ka akautunga i te ngati Lamana, e ko te au peu taito ïa a to ratou ai tupuna tei akatupu i to ratou riri, e kua tataki rua ia ïa oki no te au tangata tei oro atu mei ia tatou ra, e ko ta kotou ara, no to kotou inangaro i te au mea kaka e te au mea kino o teianei ao.

33. Kua kite oki kotou e, kare kotou i akono meitaki i te ture a te Atua, e kia kite oki kotou e, kua takatakai kotou i te reira ki raro i to kotou vaevae. I na, kua karanga mai oki te Atu kiaku e, me kore taua au tangata ta kotou i iki ei kavana no kotou e tataraara i ta ratou au ara, ka aere kotou ka tamaki atu ia ratou.

34. E teianei, ka akono rai au ko Moronai i te au akaueanga a toku Atua kia tau ki te koreromotu taku i papau e no reira, te inangaro nei au kia akono kotou i te tuatua a te Atua, e kia tono viviki mai kiaku ta kotou kai, e to kotou au tangata, e pera katoa kia Hilamana.

35. E i na, me kore kotou e rave i teia au mea nei, ka tae viviki atu au kia kotou, i na, kare oki te Atua e akatika ia matou kia mate i te pongi, e no reira, ka oronga mai aia i tetai o ta kotou kai na matou, no atu e na te koke e rave. E teianei, ka akara ana kotou, kia akatupu i te tuatua a te Atua.

36. I na, ko Moronai oki au to kotou rangatira maata, kare au e kimi ana i te mana noku ua, kia akakore ra i te reira, Kare au e kimi ana te ngai teitei o teianei ao, no te kaka ra o taku Atua, no te au ra e te meitaki o toku enua. E te akaoti nei au i taku episetole.